Idukason ki ten bazi na Bíblia ten puder di muda vida di pesoas. Pur izénplu, odja kuzê ki kontise ku Ricardo i Andres.

RICARDO: N tinha sô 15 anu kantu N entra na un grupu violéntu. Sima maioria di jóvens di nha idadi, N ta nportaba txeu ku opinion di kes novu amigu ki N tinha. Pode parse stranhu, má, nha obijetivu na vida éra pasa 10 anu na kadia. N ta pensaba si pamodi na lugar undi ki N ta moraba, kes algen ki dja kustuma bai kadia éra txeu ruspetadu i pesoas ta dimiraba es. N kria ser sima es.

Timenti N staba na kel grupu violéntu, N faze tudu tipu di kuzas mariadu ki ta nvolveba drógas, violénsia i séksu. Un dia di noti, N nvolve na un géra ki nu staba ta da kunpanheru tiru. N pensa ma N ta moreba. Má, N konsigi skapa sen ninhun pankada. Dipôs di kel-li, N kumesa ta pensa más na nha vida i na nhas obijetivu i N disidi ma N krê mudaba. Nton, N disidi muda. Má, modi ki N pode fazeba kel-la? Na undi ki N pode atxaba ajuda?

Maioria di nhas família ka éra filís. Es ta viveba ku txeu prubléma. Má família di nha tiu éra diferenti. N sabia ma es éra bons algen. I N sabia ma es ta viveba di akordu ku prinsípius di Bíblia. Un dia, es inxina-m ma nómi di Deus é Jeová. Poku ténpu dipôs di kel géra ki nu staba ta da kunpanheru tiru, N ora pa Jeová, N txoma-l pa se nómi i N pidi-l pa el djuda-m. Na kel otu dia, N fika dimiradu kantu un Tistimunha di Jeová konku na nha pórta! El kumesa ta inxina-m sobri Bíblia.

Lógu dipôs, N nfrenta un grandi dizafiu. Kes amigu ki N tinha antis na kel grupu violéntu, ta txomaba mi txeu bês i es ta konvidaba mi pa nu sai. Nbóra ka éra fásil, N ta flaba es ma nau. N staba disididu na kontinua ku nha studu di Bíblia i N sta kontenti pamodi N faze kel-la! Nha vida muda konpletamenti i N atxa filisidadi di verdadi.

N ta lenbra ma N flaba Deus na orason, ma un bês N staba dispostu na pasa 10 anu na kadia, pa N pode sérba ruspetadu na un grupu violéntu. Má, dja N mudaba nha obijetivu. Pur isu, N pidi Deus pa dexaba mi sirbi-l peloménus 10 anu di pioneru, pa N pode djudaba otus algen prende sobri Bíblia sima N djudadu. Deus responde nhas orason i dja ten 17 anu ki N sta na sirvisu pa ténpu nteru. I grasas-a Deus, nunka N ka bai kadia.

Má N ka pode fla mésmu kuza di kes amigu ki N tinha antis. Txeu di es dja ten txeu ténpu na kadia i otus sta mortu. Óras ki N ta odja pa trás, N ta odja ma N ten txeu pa agradese nhas família ki é Tistimunhas di Jeová. Es staba dispostu na ser diferenti i vive di akordu ku Bíblia. N pasa ta ruspeta-s más di ki kalker algen di un grupu violéntu ki N ta ruspetaba. I más inportanti, N ta agradese Deus, pamodi el inxina-m kel midjór manera di vive.

 ANDRES: N nase i N kria na un lugar póbri undi pesoas ta atxaba ma éra normal, ngana algen pa toma-s ses kuza, uza drógas, mata algen i faze prostituison. Nha pai éra visiadu na bebida alkólika i na kokaína. El ku nha mai ta staba sénpri ta briga i ta insulta kunpanheru.

Inda mi éra jóven dimás kantu N kumesa ta uza bebida alkólika i drógas. N ta pasaba maior párti di nha ténpu na rua ta furta i ta bende kes kuza ki N ta furtaba. Kantu N bira más grandi, nha pai tenta bira nha amigu. Má, el faze kel-li di un manera mariadu. El inxina-m kunpra i bende dróga i otus kuza ilegal. Na poku ténpu, N ganha txeu dinheru. Nton, un dia un pulísia bai ti nha kaza. El prende-m i N kondenadu pa 5 anu di kadia pamodi N tenta mata algen.

Un dia di palmanhan, dadu un avizu na altifalanti di kadia ta fla ma kes prézu, staba konvidadu pa sisti un diskursu di Bíblia ki Tistimunhas di Jeová ta ba fazeba. N disidi bai. Kuzê ki N obi ta fazeba sentidu. Nton, N kumesa ta studa Bíblia ku Tistimunhas di Jeová. Es ka ta flaba sô kuzê ki N krê obiba, má es ta mostraba mi na Bíblia kal ki éra konportamentu ki ta agrada Deus.

Lógu N da kónta, ma mi sô N ka ta konsigi fazeba kes mudansa ki N mesteba, prinsipalmenti óras ki otus prézu ta amiasaba mi pamodi es ka staba ta gosta di kes mudansa ki N staba ta faze. Nton, N ora pa Jeová ta pidi-l forsa i sabedoria. I el djuda-m. Na verdadi, envês di N fika dizanimadu, ti N tevi koraji di pâpia ku otus prézu sobri Bíblia.

Kantu txiga kel dia di N sai di kadia, N staba txeu nervozu ki N ka krê saíba. Kantu N staba ta sai, txeu prézu fika ta sana-m i ta fla-m txau. Alguns ti fla-m ku karinhu: “Bu pode bai pa kaza, pastorzinhu.”

N ta fika ku medu sô di pensa na kuzê ki pode kontiseba ku mi, si N ka dexaba Deus inxinaba mi. N ta agradese Deus txeu, pamodi el ama-m i pamodi el ka atxa ma mi éra un algen ki ka tinha ramedi. a