Jizus fla ma tudu kriston debe batiza. (Lé Mateus 28:19, 20.) Má kuzê ki é batismu? I kuzê ki un algen debe faze pa el pode batiza?

1. Kuzê ki é batismu?

“Batiza” ta ben di un palavra gregu ki siginifika “murgudja”. Kantu Jizus batiza, se korpu interu kanba déntu di riu Jurdon i dipôs el ‘sai di agu’. (Marcos 1:9, 10) Sima Jizus, óras ki kristons verdaderu ta batiza, ses korpu interu debe kanba déntu di agu.

2. Kuzê ki un algen ta mostra óras ki el ta batiza?

Óras ki un algen ta batiza, el ta mostra ma dja el da se vida pa Jeová. Modi ki un algen ta da se vida pa Jeová? Antis di el batiza, el ta faze un orason, i na kel orason el ta fla Jeová ma el krê sirbi-l pa tudu ténpu. El ta promete adora sô Jeová, i faze Se vontadi ta ser kel kuza más inportanti na se vida. El ta disidi ‘nega se kabésa i sigi sénpri’ izénplu di Jizus i kes kuza ki el inxina. (Mateus 16:24) Óras ki el da se vida pa Jeová i el batiza, el ta konsigi ten un amizadi fórti ku El i ku kes algen ki ta sirbi Jeová.

3. Kuzê ki un algen meste faze antis di el batiza?

Antis di bu batiza é inportanti prende sobri Jeová i bira bu fé na el más fórti. (Lé Hebreus 11:6.) Sima bu ta ba ta faze kel-li, bu amor pa Jeová ta bira más fórti. Di sertéza bu ta krê pâpia ku otus sobri el i vive sima el ta krê. (2 Timóteo 4:2; 1 João 5:3) Óras ki un algen sta vive di un manera ki ta agrada Jeová, el pode disidi da se vida pa El i batiza. — Colossenses 1:9, 10. a

 SABE MÁS

4. Nu pode prende txeu kuza ku batismu di Jizus

Lé Mateus 3:13-17 pa bu prende más sobri batismu di Jizus. Dipôs pâpia sobri kes pergunta li:

• Jizus batizadu kantu el éra bebé?

• Modi ki el batizadu? El podu sô un bokadinhu di agu na kabésa?

Kantu Jizus batiza, el kumesa ta faze kel trabadju inportanti ki Deus manda-l faze. Lé Lucas 3:21-23 i João 6:38, i dipôs pâpia sobri kel pergunta li:

• Dipôs ki Jizus batizadu, kal ki éra trabadju más inportanti na se vida?

5. Bu pode konsigi batiza

Kel ideia di da bu vida pa Jeová i batiza pode parse un kuza grandi dimás. Má, bu pode faze prugrésu i xinti más kunfiansa di toma kel disizon inportanti la. Odja izénplu di alguns algen ki konsigi faze kel-la. Odja VÍDIU.

Lé João 17:3 i Tiago 1:5, i dipôs pâpia sobri kel pergunta li:

• Kuzê ki pode djuda un algen pripara pa batiza?

1. Nu ta da nos vida pa Jeová óras ki nu ta fla-l ma nu krê sirbi-l pa tudu ténpu

2. Óras ki nu ta batiza, nu ta mostra pa tudu algen ma nu da nos vida pa Deus

 6. Óras ki nu batiza nu ta faze párti di família di Jeová

Óras ki nu batiza, nu ta faze párti di un família unidu na mundu interu. Nbóra anos é di lugar i kultura diferenti, nu ta kridita na kes mésmu kuza i nu ta sigi kes kuza ki Bíblia ta fla. Lé Salmo 25:14 i 1 Pedro 2:17, i dipôs pâpia sobri kel pergunta li:

• Dipôs ki un algen batiza, ki tipu di amizadi el ta ten ku Jeová i ku kes ki ta adora-L?

 REZUMU

Jizus fla ma tudu kriston debe batiza. Pa un algen konsigi faze kel-la, el ten ki kontinua ta ten un fé fórti na Jeová, vive sima El ta krê i da se vida pa El.

Perguntas di rezumu

• Kuzê ki é batismu i pamodi ki é inportanti batiza?

• Kuzê ki batismu ta mostra?

• Kuzê ki un algen meste faze antis di el da se vida pa Jeová i batiza?