LISON 18
Modi ki nu pode sabe ken ki é kristons verdaderu?
Bilhons di algen ta fla ma es é kriston. Má es ka ta kridita na kes mésmu kuza i nen es ka ta sigi kes mésmu lei. Nton modi ki nu pode sabe ken ki é kristons verdaderu?
1. Ken ki é kristons verdaderu?
Kristons é disiplus, ô sigidoris, di Jizus Kristu. (Lé Atos 11:26.) Modi ki es ta prova ma es é disiplus di Jizus? Jizus fla: ‘Si nhos kontinua na nhas palavra, nhos é nhas disiplu di verdadi’. (João 8:31) Kel-li krê fla ma kristons verdaderu ten ki obi ku kes kuza ki Jizus inxina. Jizus sénpri ta inxinaba kuzê ki Bíblia ta fla. Kes ki ta sigi-l di verdadi ta faze mésmu kuza. — Lé Lúkas 24:27, BPK.
2. Modi ki kristons verdaderu ta mostra amor?
Jizus fla se sigidoris: ‘Nhos ama kunpanheru sima N ama nhos.’ (João 15:12) Modi ki Jizus mostra ma el ta amaba se disiplus? El pasa ténpu ku es, el nkoraja-s i el djuda-s. Ti el da se vida pa es. (1 João 3:16) Di mésmu manera, kristons verdaderu ka ta pâpia sô di amor. Má, es ta mostra ma es ta ama kunpanheru na kuzas ki es ta fla i ki es ta faze.
3. Ki trabadju kristons verdaderu sta ta faze?
Jizus da se disiplus un trabadju. ‘El manda-s pa es pâpia ku gentis di Reinu di Deus’. (Lúkas 9:2, BPK) Kristons na ténpu di apóstlus, ka ta pregaba sô na kes lugar di adorason, má tanbê na otus lugar ki es ta atxaba txeu algen i na kaza di pesoas. (Lé Atos 5:42; 17:17) Oji tanbê, kristons verdaderu ta prega kes verdadi ki sta na Bíblia na kalker lugar ki es ta atxa pesoas. Es ta ama pesoas. Pur isu, es ta fika kontenti di uza ses ténpu i ses forsa pa pâpia di speransa i konsolu ki Bíblia ta da. — Marcos 12:31.
SABE MÁS
Odja modi ki bu pode sabe diferénsa entri kristons verdaderu i kes algen ki ka ta sigi ensinus i izénplu di Jizus.
4. Es ta djobe verdadi ki sta na Bíblia
Kes kriston na ténpu di apóstlus ta daba valor pa Palavra di Deus
É ka tudu algen ki ta fla ma es é kriston ki ta atxa ma é inportanti ntende verdadi ki sta na Bíblia. Odja VÍDIU, i dipôs pâpia sobri kel pergunta li:
-
Modi ki alguns igreja ki ta fla ma es é kriston ka dexa pesoas prende kuzê ki Jizus inxina?
Jizus inxina verdadi ki sta na Palavra di Deus. Lé João 18:37, i dipôs pâpia sobri kel pergunta li:
-
Di akordu ku Jizus, modi ki nu pode sabe ken ki é kes kriston ‘ki sta di ladu di verdadi’?
5. Es ta prega verdadi ki sta na Bíblia
Kes kriston na ténpu di apóstlus ta pregaba pa otus algen
Antis di Jizus bai pa Séu, el da se disiplus un trabadju ki kontinua ti nos ténpu. Lé Mateus 28:19, 20 i Atus 1:8, BPK, i dipôs pâpia sobri kel pergunta li:
-
Ti undi ki nos trabadju di pregason ta baba i pa kantu ténpu ki el ta duraba?
6. Es ta vive di akordu ku kes kuza ki es ta inxina
Kuzê ki konvense un ómi ki txoma Tom ma el atxa relijion verdaderu? Odja VÍDIU, i dipôs pâpia sobri kes pergunta li:
-
Na vídiu, kuzê ki poi Tom ta dizisti di relijion?
-
Pamodi ki el tinha sertéza ma el atxa verdadi?
Kes kuza ki pesoas ta faze é mutu más inportanti ki kes kuza ki es ta fla. Lé Mateus 7:21, i dipôs pâpia sobri kel pergunta li:
-
Kuzê ki é más inportanti pa Jizus: kes kuza ki nu ta fla ma nu ta kridita ô kes kuza ki nu ta faze?
7. Es ta ama kunpanheru
Kes kriston na ténpu di apóstlus ta amaba kunpanheru
Kristons dja poi ses vida na prigu pa otus kriston? Odja VÍDIU, i dipôs pâpia sobri kes pergunta li:
-
Na vídiu, pamodi ki Lloyd poi se vida na prigu pa salva irmon Johansson?
-
Bu ta atxa ma Lloyd aji sima un kriston verdaderu?
Lé João 13:34, 35, i dipôs pâpia sobri kes pergunta li:
-
Modi ki disiplus di Jizus, ki é kes kriston verdaderu, ta trata pesoas di otu rasa ô país?
-
Kuzê ki es ta faze na ténpu di géra?
ALGUNS ALGEN TA FLA: “Kristons dja faze txeu kuza mariadu. Nton, modi ki es pode ser relijion verdaderu?”
-
Ki testu di Bíblia bu ta mostraba un algen pa el sabe ken ki é kristons verdaderu?
REZUMU
Kristons verdaderu ta sigi kes kuza ki Bíblia ta inxina, es ta mostra amor di verdadi i es ta prega kes notísia sábi ki sta na Bíblia.
Perguntas di rezumu
-
Kes kuza ki kristons verdaderu ta kridita na el ten bazi na kuzê?
-
Ki kualidadi ta djuda-nu sabe ken ki é kristons verdaderu?
-
Ki trabadju kristons verdaderu ta faze?
DJOBE MÁS
Prende más sobri un grupu di algen ki ta faze ses midjór pa sigi izénplu di Jizus Kristu i kes kuza ki el inxina.
Odja kuzê ki djuda un mudjer ki antis éra frera atxa “un família spritual di verdadi”.
“Es uza Bíblia pa responde-m tudu nhas pergunta!” (Sentinéla, 1 di abril di 2014)
Odja modi ki kristons verdaderu ta mostra amor pa ses irmon ki meste di ajuda.
Ajuda pa nos irmons óras ki kontise un dizastri na naturéza — sô un párti (3:57)
Odja modi ki kes kriston na ténpu di apóstlus sigi kes kuza ki Jizus inxina i modi ki kes kriston verdaderu ta faze mésmu kuza oji.
“Modi ki nu ta konxe kes kriston verdaderu?” (Sentinéla, 1 di marsu di 2012)
Bu pode gosta di kes-li tanbê
PERGUNTAS KI MÁS TA FAZEDU
Modi ki ta fazedu kel studu di Bíblia ki Tistimunhas di Jeová ta oferese?
Bu pode uza kalker traduson di Bíblia, pa bu studa Bíblia di grasa ku Tistimunhas di Jeová. Bu pode konvida tudu bu família ô kalker amigu ki bu krê.
