LISON 06
Modi ki vida kumesa?
Deus é ‘fonti di vida’. (Salmo 36:9) Bu ta kridita na kel-li? Alguns algen ta fla ma ningen ka kria vida. Si kel-li é verdadi, nton vida parse di el pa el. Má si é Jeová ki kria vida, bu ka ta atxa ma vida ten un obijetivu? a Nu ben odja na Bíblia modi ki vida kumesa i tanbê pamodi ki nu ten bons motivu pa kridita na kel ki el ta fla.
1. Modi ki séu ku Téra kumesa?
Bíblia ta fla: ‘Na komésu Deus faze séu ku Téra.’ (Génesis 1:1) Kuazi tudu sientista ta konkorda ma séu ku Téra tevi un komésu. Modi ki Deus faze-s? El uza se forsa, ki é se spritu santu, pa faze tudu kuza ki ten na séu ku na Téra, sima galáksias, strélas i planétas. — Génesis 1:2.
2. Pamodi ki Deus faze Téra?
Jeová ‘ka kria [Téra] pa nada, má el faze-l pa moradu na el’. (Isaías 45:18) El faze Téra pa ser un lugar sábi pa nu mora na el i el da-nu tudu kel ki nu meste pa nu vive pa tudu ténpu. (Lé Isaías 40:28; 42:5.) Sientistas ta fla ma ka ten lugar sima Téra. El é úniku planéta ki ten tudu kel ki nu meste pa nu vive.
3. Kuzê ki ta poi algen ser diferenti di animal?
Kantu Jeová tirmina di faze Téra, el kria plantas ku animal. Dipôs ‘Deus kria ómi sima se imaji’. (Lé Génesis 1:27.) Kuzê ki ta pô-nu ser spesial? Dja ki Deus faze-nu sima se imaji, nu ta pode mostra se kualidadis, sima amor i justisa. Tanbê el kria-nu ku kapasidadi di prende línguas, di gosta di kuzas bunitu i di múzika. I diferenti di animal, nu pode adora nos Kriador.
SABE MÁS
Odja próvas ma tevi un algen ki faze vida i ma kuzê ki Bíblia ta fla sobri kriason ta faze sentidu. Prende kuzê ki kes kualidadi ki nu ten ta inxina-nu sobri Deus.
4. Tevi un algen ki faze vida
Pesoas ta resebe glória óras ki es ta faze kuzas ki es kôpia na naturéza. Nton bu ka ta atxa ma ken ki faze kes kuza na naturéza merese mutu más glória? Odja VÍDIU, i dipôs pâpia sobri kel pergunta li:
-
Kuzê ki pesoas dja kôpia di naturéza?
Tudu kaza ten un algen ki faze-l. Má ken ki faze tudu kuza na naturéza? Lé Hebreus 3:4, i dipôs pâpia sobri kes pergunta li:
-
Ki kuzas na naturéza ta dexa-u más dimiradu?
-
Ta faze sentidu kridita ma tevi un algen ki faze séu ku Téra i tudu kuza ki sta na es? Pamodi?
Bu sabia?
Bu pode atxa artigus i vídius sobri kel asuntu li na jw.org na kes párti “Tevi un algen ki faze-l?” i “Kuzê ki pesoas ta fla sobri modi ki vida kumesa”.
‘É klaru ki tudu kaza ten un algen ki faze-l, má ken ki faze tudu kuza é Deus’
5. Kuzê ki Bíblia ta fla sobri kriason ta faze sentidu
Na Génesis kapítlu 1, Bíblia ta pâpia sobri modi ki Téra fazedu i modi ki vida na el kumesa. Bu ta kridita na kel-li ô bu ta atxa ma é sô un stória inventadu? Odja VÍDIU, i dipôs pâpia sobri kes pergunta li:
-
Bíblia ta inxina ma Téra i vida na el kriadu na 6 dia di 24 óra?
-
Bu ta atxa ma kel ki Bíblia ta fla sobri kriason ta faze sentidu? Pamodi?
Lé Génesis 1:1, i dipôs pâpia sobri kel pergunta li:
-
Sientistas ta fla ma séu ku Téra tevi un komésu. Modi ki kuza ki es ta fla sta di akordu ku kuzê ki bu lé na Bíblia?
Alguns algen ta pergunta si Deus uza ivoluson pa faze vida. Lé Génesis 1:21, 25, 27, i dipôs pâpia sobri kes pergunta li:
-
Bíblia ta inxina ma Deus uza ivoluson pa faze pexi, animal i algen? Ô el faze tudu kuza bibu di akordu ku ses ‘tipu’? b
6. Anos é un kriason spesial di Deus
Jeová faze-nu diferenti di animal. Lé Génesis 1:26, i dipôs pâpia sobri kel pergunta li:
-
Nu fazedu sima imaji di Deus. Kuzê ki nos kapasidadi di mostra amor i konpaxon ta inxina-nu sobri manera di ser di Deus?
ALGUNS ALGEN TA FLA: “Kuzê ki Bíblia ta fla sobri kriason é un stória inventadu.”
-
Kuzê ki bu ta atxa? Pamodi?
REZUMU
Jeová kria séu ku Téra i tudu kuza bibu.
Perguntas di rezumu
-
Kuzê ki Bíblia ta inxina sobri modi ki séu ku Téra kumesa?
-
Deus uza ivoluson pa faze diferentis tipu di vida ô el faze tudu es?
-
Kuzê ki ta pô-nu ser spesial?
DJOBE MÁS
Odja izénplus na naturéza ki ta mostra ma ten un kriador.
“Kuzê ki naturéza ta inxina-nu?” (Nhos korda!, setenbru di 2006)
Odja modi ki un pai pode splika pa se fidju pikinoti kuzê ki Bíblia ta fla sobri kriason.
Odja si nu pode kridita na ivoluson i na Bíblia omésmu ténpu.
“Deus uza ivoluson pa kria diferentis tipu di vida?” (Artigu na jw.org)
Odja modi ki kes osu antigu ô spiriénsas ki siênsia dja faze ta mostra si tevi un algen ki faze vida ô si el parse di el pa el.
Modi ki vida kumesa — Sinku pergunta ki bale péna sabe respósta (bruxura)
Bu pode gosta di kes-li tanbê
PERGUNTAS KI MÁS TA FAZEDU
Modi ki ta fazedu kel studu di Bíblia ki Tistimunhas di Jeová ta oferese?
Bu pode uza kalker traduson di Bíblia, pa bu studa Bíblia di grasa ku Tistimunhas di Jeová. Bu pode konvida tudu bu família ô kalker amigu ki bu krê.
