Apóstlus obi órdi di Jizus di spadja notísias sábi pa Téra interu. Na anu 47 D.J., irmons di Antiokia manda Polu ku Barnabé pa un viaji di pregason. Es éra pregadoris zelozu i es viaja pa tudu Ázia. Es bai pa lugaris sima Derbi, Listra i Ikóniu.

Polu ku Barnabé prega pa tudu algen, riku ku póbri, jóven ku algen grandi. Txeu algen seta verdadi sobri Jizus Kristu. Kantu Polu ku Barnabé prega pa Sérjiu Polu, ki éra governador di Xipri, un fitiseru tenta inpidi-s. Polu fla kel fitiseru: ‘Jeová sta kóntra bo.’ Kel óra, fitiseru bira ségu. Kantu Governador Sérjiu Polu odja kuza ki kontise, el pasa ta ten fé na Jizus.

Polu ku Barnabé ta pregaba pa tudu kau. Es ta pregaba di kaza en kaza, na merkadus, na rua i na sinagógas. Kantu es kura un ómi manku na Listra, kes algen ki odja kel milagri, pensa ma es éra deus i es tenta adora-s. Má Polu ku Barnabé ka dexa-s i dipôs es fla-s: ‘Nhos adora sô Deus! Nos é ómi sima nhos.’ Dipôs, ben alguns judeu i es poi gentis ta fika kóntra Polu. Kes algen da-l ku pédra i es rasta-l pa fóra di sidadi ta pensa ma dja el móre. Má, Polu inda staba bibu! Kel óra, irmons bai djuda-l i leba-l otu bês pa sidadi. Dipôs, Polu volta pa Antiokia.

Na anu 49 D.J., Polu faze otu viaji. Dipôs ki el volta pa odja irmons na Ázia, el bai prega notísias sábi na lugaris inda más lonji, na Europa. El bai pa Atenas, Filipus, Tesalónika i otus  lugar. Silas, Lúkas i un rapás ki txomaba Timótiu viaja djuntu ku Polu. Es trabadja djuntu na forma kongregasons i es djuda-s fika fórti na fé. Polu pasa un anu i meiu na sidadi di Korintu, ta da irmons koraji. El prega, el inxina i el skrebe kartas pa txeu kongregason. Tanbê el tinha se trabadju ki éra faze téndas. Dipôs, Polu viaja pa Éfezu i el volta pa Antiokia.

Más tardi, na anu 52 D.J., Polu kumesa se tirseru viaji na Ázia. El viaja ti zóna nórti di Filipus i dipôs el volta pa otu ladu ti Korintu. Polu pasa txeu anu na Éfezu ta inxina, ta kura i ta djuda kel kongregason. Tanbê, tudu dia, el ta fazeba diskursus pa públiku na un sala di un skóla. Txeu algen bai obi-l i es muda ses vida. Dipôs, kantu Polu prega notísias sábi na txeu téra, el bai Jiruzalen.