É ka sô duénsa ki Jizus kura nen é ka sô mortus ki el resusita. Tanbê el tinha puder pa kontrola béntu ku txuba. Dipôs ki el ora na un monti, Jizus djobe pa Mar di Galilea i el odja un tenporal ta ben. Se disiplus staba na ses barku ta rema ku tudu forsa kóntra béntu. Jizus kumesa ta anda riba di agu na direson di barku. Kantu apóstlus odja algen ta anda riba di agu, es fika ku medu. Má Jizus fla-s: ‘É mi. Ka nhos xinti medu.’

Pedru fla: ‘Sinhor, si é bo própi, fla-m pa N bai atxa-u.’ Jizus fla Pedru: ‘Ben atxa-m.’ Nton na meiu di kel tenporal, Pedru sai di barku i el kumesa ta anda riba di agu na direson di Jizus. Má kantu el staba kuazi ta txiga na Jizus, Pedru djobe pa tenporal i el fika ku medu. El xinti ma el staba ta funda. Pedru grita: ‘Sinhor, salva-m!’ Jizus pega-l na mô i el fla-l: ‘Pamodi ki bu fika ku dúvida? Undi bu fé sta?’

Jizus ku Pedru subi na barku i kel óra tenporal para. Bu ta konsigi imajina modi ki apóstlus xinti? Es fla-l: ‘Abo é própi Fidju di Deus.’

É ka sô kel un bês li ki Jizus kontrola forsa di naturéza. Un otu bês, kantu Jizus ku se apóstlus sta ta viajaba pa otu ladu di mar, Jizus staba ta durmi na párti tras di barku. Timenti el sta ta durmiba, faze un grandi tenporal. Óndias fika ta da na barku i barku fika xeiu di agu. Apóstlus korda Jizus ta grita: ‘Instrutor, nu sta kuazi ta móre! Djuda-nu!’ Jizus korda i el fla mar: ‘Fika kétu!’ Kel óra béntu para i mar fika kétu. Jizus pergunta apóstlus: ‘Undi nhos fé sta?’ Es fla kunpanheru: ‘Ti béntu ku mar ta obi ku el.’ Apóstlus prende ma si es kunfiaba na Jizus di tudu ses korason, es ka meste xintiba medu di nada.