Titu 2:1-15
2 Má abo, kontinua ta pâpia kel ki sta di akordu ku kel ensinu ki é bon.
2 Kes ómi di idadi debe kontrola ses ábitu, ser sériu, ten bon juís, ser firmi na fé, na amor i ku kapasidadi di aguenta firmi.
3 Di mésmu manera, kes mudjer di idadi debe konporta di manera ki ta mostra ruspetu pa Deus, es ka debe kalúnia, nen ser skravu di txeu vinhu i es debe inxina kel ki é bon,
4 asi pa es konsedja* kes mudjer más jóven pa ama ses maridu, pa ama ses fidju,
5 pa es ten bon juís, pa es ser puru, trabadjaderas na kaza,* pa es ser bon, pa es obi ku ses maridu, asi pa ka papiadu mal di palavra di Deus.
6 Di mésmu manera, kontinua ta konsedja kes ómi más jóven pa es ten bon juís
7 i ser un izénplu di bons óbra na tudu kuza. Inxina kel ki é puru,* ku tudu seriedadi,
8 ta uza palavras ki é bon ki ka pode kritikadu, asi pa tudu kes ki é kóntra nos fika na vergónha, pamodi es ka ten ninhun kuza mariadu* pa fla sobri nos.
9 Pa kes ki é skravu obi ku ses dónu na tudu kuza, pa es tenta agrada-s, pa es ka responde-s mariadu
10 i pa es ka furta-s, má pa es mostra ma es merese tudu kunfiansa, asi na tudu kuza pa es bira kel ensinu di nos Salvador, Deus, más bunitu.
11 Pamodi kel grandi bondadi di Deus mostradu, i kel-la traze salvason pa tudu tipu di algen.
12 El ta trena-nu pa nu nega tudu kuza ki é kóntra vontadi di Deus i kes dizeju di mundu, i pa nu vive ku bon juís, ku justisa i ta adora Deus na meiu di es mundu,*
13 timenti nu ta spera kel speransa sábi pa kunpri i pa kel grandi Deus i nos Salvador, Jizus Kristu, mostra ses glória.
14 El da se vida pa nos pa el pode liberta-nu* di tudu tipu di maldadi i pa el purifika-nu, asi pa nu pode ser se povu spesial, i ki ten vontadi di* faze bons óbra.
15 Kontinua ta pâpia di kes kuza li, ta konsedja* i ta koriji* ku tudu autoridadi. Ka bu dexa ningen dispreza-u.
Nótas di rodapé
^ Ô: “pa es rekupera bon juís di; pa es trena”.
^ Ô: “pa es kuida di ses kaza”.
^ Ô talvês: “Inxina ku puréza”.
^ Ô: “gravi”.
^ Ô: “sistéma”. Djobe Disionáriu di Bíblia.
^ Na gregu ta fla: “resgata-nu; libra-nu”.
^ Ô: “zelu pa”.
^ Ô: “inkoraja”.
^ Ô: “reprende”.
