Ebreus 12:1-29
12 Pur isu, dja ki nu ten un núven grandi di tistimunha ta rodia-nu, nu libra tanbê di tudu pézu i di pekadu ki ta trapadja-nu faxi, i nu kóre sen dizisti na kel korida ki nu ten nos dianti,
2 ta odja ku atenson pa Jizus, ki é kel Líder Prinsipal i Kel ki ta konpleta nos fé. Pamodi kel alegria ki podu se dianti, el aguenta mórti na un staka di tortura,* el ka liga pasa vergónha i el xinta na direita di tronu di Deus.
3 Pur isu, nhos pensa ku kuidadu na kel ki aguenta txeu palavra duru di pekadoris, ki staba ta aji kóntra ses própi interesi, asi pa nhos ka kansa i nen pa nhos ka dizisti.*
4 Na nhos luta kóntra es pekadu, inda nhos ka rezisti ti txiga pontu di móre.*
5 I nhos skese konpletamenti di kel avizu ki nhos dadu sima fidjus: “Nha fidju, ka bu dispreza disiplina di Jeová,* i nen ka bu dizanima óras ki el koriji-u.
6 Pamodi Jeová* ta disiplina kes ki el ta ama, na verdadi, el ta sota* tudu kel ki el ta resebe sima fidju.”
7 Nhos meste aguenta firmi pamodi el ta faze párti di nhos disiplina.* Deus ta trata nhos sima fidjus. Kal fidju ki se pai ka ta disiplina-l?
8 Má, si é ka tudu nhos ki ta resebe es disiplina, nton nhos é ka fidjus di verdadi, má nhos é fidjus di fóra.
9 Tanbê, nos pai li na téra* ta disiplinaba nos, i nu ta ruspetaba es. Nton, nu ka debe staba inda más prontu pa obi ku nos Pai di nos vida spritual pa nu pode vive?
10 Pamodi es ta disiplinaba nos pa poku ténpu di akordu ku kel ki es ta atxaba ma é dretu, má Deus ta faze-l pa nos ben, asi pa nu ser santu sima el.
11 É verdadi ki ninhun disiplina ka ta da alegria na kel óra ki el ta dadu, má el ta duê.* Má dipôs, kel disiplina ta da frutu di justisa ki ta da pas pa kes ki sta ta trenadu pa el.
12 Pur isu, nhos poi nhos mô ki sta kaídu i nhos juelhu ki sta fraku ta bira fórti,
13 i nhos kontinua ta faze kaminhu rétu pa nhos pé, asi pa kel ki é manku ka fika piór, má envês di kel-li, pa el fika kuradu.
14 Nhos inpenha pa pas ku tudu algen, nhos vive un vida santu* pamodi sen el ninhun ómi ka ta pode odja Sinhor.
15 Nhos presta txeu atenson pa ningen ka fika sen resebe kel grandi bondadi di Deus, pa ninhun raís ku venénu ka kria i ranja nhos prubléma, i kontamina txeu algen.
16 Nhos presta atenson pa ka parse ningen na nhos meiu ki ta faze konportamentu seksual mariadu* nen ningen ki ka ta da valor pa kuzas sagradu, sima Izaú, ki troka se direitu di primeru fidju pa un pratu di kumida.
17 Pamodi nhos sabe ma dipôs kantu el kria erdaba kel benson, el negadu. Pamodi enbóra el tenta muda kel disizon* ku lágua na odju, el ka konsigi.*
18 Pamodi nhos ka txiga pértu di un kuza ki nhos ta pode toka i ki staba ta arde ku lumi, nen di un nuvén sukuru, nen di sukuru prétu, nen di un tenporal,
19 nen di son di un tronbéta i nen di kel vós ki fla kes palavra, ki kantu povu obi, es inplora pa es ka fladu más nada.
20 Pamodi es ka podia aguentaba kel órdi li: “Ti un animal, si el toka na monti, el debe dadu ku pédra ti ki el móre.”
21 Tanbê, kel kuza ki Muizés odja da-l tantu medu ki el fla: “N sta ta treme di medu.”
22 Má nhos txiga pértu di un monti Sion i di un sidadi di kel Deus bibu, kel Jiruzalen di séu, i di un monti* anju
23 ki sta djuntadu i di kongregason di kes primeru ki ses nómi skrebedu na séu, i di Deus, kel Juís di tudu algen, i di vida spritual di kes justu ki biradu perfeitu,
24 i di Jizus kel mediador di un kontratu novu, i di kel sangi ki brufadu ki ta pâpia midjór di ki sangi di Abel.
25 Nhos toma kuidadu pa nhos ka nega obi ku* kel ki sta ta pâpia. Pamodi si kes ki nega obi ku kel ki da kel avizu di Deus na téra ka skapa, nos tanbê nu ka ta skapa si nu disvia di kel ki pâpia désdi séu!
26 Na kel ténpu se vós poi téra ta treme, má gósi el promete: “Más un bês é ka sô téra ki N ta poi ta treme, má séu tanbê.”
27 Kes palavra “más un bês” ta mostra ma ta ben tradu kes kuza ki ta ben podu ta treme, kes kuza ki fazedu, pa pode fika kes kuza ki ka ta podu ta treme.
28 Nton, dja ki nu ta ben resebe un Reinu ki ka ta podu ta treme, nu kontinua ta resebe kel grandi bondadi, asi pa nu pode faze sirvisu sagradu pa Deus di un manera ki el ta seta, ku txeu ruspetu* i ku ónra.
29 Pamodi nos Deus é un lumi ki ta kaba ku tudu kuza.
Nótas di rodapé
^ Djobe Disionáriu di Bíblia.
^ Ô: “ka dizanima nhos alma”.
^ Na gregu ta fla: “ti ki nhos sangi bazadu”.
^ Ô: “kastiga”.
^ Ô: “trenu”.
^ Na gregu ta fla: “pai di nos karni”.
^ Ô: “traze tristéza”.
^ Na gregu ta fla: “inpenha pa santifikason”.
^ Djobe Disionáriu di Bíblia.
^ Kel-li krê fla disizon di se pai.
^ Na gregu ta fla: “el ka atxa lugar pa kel-li”.
^ Ô: “dizénas di milharis di”.
^ Ô: “ka da diskulpa pa nhos dexa di obi ku; ka iginora”.
^ Ô: “ku medu”.
