Primera di Pedru 1:1-25
1 Di Pedru, apóstlu di Jizus Kristu, pa kes ki ta mora pa poku ténpu na es mundu i ki sta spadjadu na Pontu, Galásia, Kapadósia, Ázia i Bitínia. Deus skodje nhos.
2 El é nos Pai di séu, i el skodje nhos di akordu ku kel ki dja el disidiba antis. El da nhos se spritu santu pa bira nhos santu. El faze kel-li pa nhos pode obi ku el i pa nhos pode bira linpu pamodi sangi di Jizus Kristu.
Pa Deus mostra nhos kada bês más se grandi bondadi i da nhos pas.
3 Pa Deus i Pai di nos Sinhor Jizus Kristu, lovadu. Pamodi através di se grandi mizerikórdia, el pô-nu ta nase otu bês pa un speransa bibu através di resureison di Jizus Kristu,
4 pa un eransa ki ka ta straga, sen mantxa i ki ka ta paga. El sta guardadu na séu pa nhos,
5 ki Deus sta ta proteje ku se puder pamodi nhos ten fé. Deus sta ta proteje nhos pa un salvason ki sta prontu pa mostradu na ténpu di fin.
6 Pamodi kel-li, nhos ta xinti txeu alegria, enbóra na es momentu, nhos meste fika tristi pa poku ténpu, pamodi txeu provason.
7 Asi pa nhos fé ki provadu* poi nhos ta resebe lovor, glória i ónra óras ki Jizus Kristu ta mostradu. Kel tipu di fé li ten mutu más valor di ki oru ki pasa na lumi i ki pode straga, enbóra el provadu na lumi.
8 Enbóra nunka nhos ka odja-l, nhos ta ama-l. Enbóra nhos ka ta odja-l gósi, nhos ta mostra fé na el i nhos ta fika txeu kontenti ku un grandi alegria ki ka ta da pa splika,
9 timenti nhos ta alkansa obijetivu di nhos fé, ki é nhos salvason.*
10 Sobri kel salvason li, kes proféta ki pâpia sobri kel grandi bondadi di Deus ki staba guardadu pa nhos, faze txeu invistigason i piskiza ku kuidadu.
11 É pur isu ki es kontinua ta djobe kuzê ki ta kontiseba ku Kristu i ki ténpu ki el ta kontiseba. Antis, Deus uza se spritu santu pa fla-s ma Kristu ta ben sufreba i dipôs el ta resebeba glória.
12 Deus poi kes proféta ta sabe ma es ka staba ta profetiza pa es, má pa nhos, i gósi nhos mostradu kes kuza li através di kes ki pâpia ku nhos sobri kes notísia sábi. Es faze kel-li pamodi spritu santu ki mandadu la di séu djuda-s. I é kes kuza li ki anjus tene txeu vontadi di intende.
13 Pur isu, nhos pripara menti pa trabadju. Nhos faze tudu kuza ku bon juís. Nhos poi speransa na kel grandi bondadi ki nhos ta ben dadu óras ki Jizus Kristu mostradu.
14 Gósi nhos é fidjus di Deus, ki ta obi ku el, pur isu, nhos para di aji di akordu ku kes dizeju mariadu ki nhos tinha kantu nhos éra iginoranti,
15 má sima kel Santu ki txoma nhos, nhos bira santu na tudu nhos konportamentu,
16 pamodi sta skrebedu: “Nhos ten ki ser santu, pamodi ami é santu.”
17 I si nhos sta ta ora pa* nos Pai ki ta julga kada un di akordu ku se óbra, sen faze diferénsa, nhos konporta ku grandi ruspetu duránti kel ténpu ki nhos sta ta mora na es mundu.
18 Pamodi nhos sabe ma é ka ku kuzas ki ta straga, sima prata ô oru, ki nhos libertadu* di kel manera di vive sen valor, ki nhos gentis grandi pasa nhos.*
19 Má é ku sangi ki ten txeu valor, sima di un korderu sen difeitu i sen mantxa, kel di Kristu.
20 É verdadi ki el konxedu antis di fundason di mundu, má el mostradu na fin di ténpu pamodi nhos.
21 Através di el nhos kridita na Deus, kel ki resusita-l* i da-l glória, asi pa nhos pode poi nhos fé i speransa na Deus.
22 Gósi ki dja nhos purifika* pamodi nhos obi ku verdadi, i kel-li poi nhos ta ama kunpanheru sima irmon i sen finjimentu, nhos ama kunpanheru txeu i di korason.
23 Pamodi nhos nase otu bês, ka através di kel simenti* ki ta straga, má através di kel ki ka ta straga, através di palavra di kel Deus bibu, ki ta dura pa tudu ténpu.
24 Pamodi “tudu algen* é sima padja, i tudu se glória é sima un flor di kanpu. Padja ta seka i flor ta kai,
25 má palavra di Jeová* ta dura pa tudu ténpu”. I kel “palavra” li é kes notísia sábi ki nhos fladu.
Nótas di rodapé
^ Ô: “refinadu”.
^ Ô: “salvason di nhos alma”.
^ Na gregu ta fla: “ta invoka”.
^ Na gregu ta fla: “resgatadu; libradu”.
^ Ô: “ki nhos pasadu através di nhos tradison”.
^ Na gregu ta fla: “labanta-l di mórti”.
^ Ô: “purifika nhos alma”.
^ Kel-li krê fla simenti ki ta pode da frutu.
^ Na gregu ta fla: “tudu karni”.
