Primeru livru di Krónikas 5:1-26
5 Kes-li é kes disendenti di Ruben, kel primeru fidju di Israel. El éra primeru fidju, má pamodi el ka ruspeta* kama di se pai, se direitu di primeru fidju dadu pa kes fidju di Juzé, ki éra fidju di Israel. Pur isu, na lista di família el ka dadu direitu di primeru fidju.
2 Enbóra Judá éra más inportanti di ki ses irmon, i é di el ki ben kel algen ki skodjedu pa ser líder, direitu di primeru fidju éra di Juzé.
3 Kes fidju di Ruben, kel primeru fidju di Israel, éra Anoki, Palu, Esron i Karmi.
4 Kes-li éra família di Juel: Semaías éra fidju di Juel. Gogi éra fidju di Semaías. Simei éra fidju di Gogi.
5 Simei éra pai di Mika. Mika éra pai di Reaías. Reaías éra pai di Baal.
6 Baal éra pai di Berá. Berá, ki Tilgate-Pilnezer, rei di Asíria, leba prézu, éra xéfi di tribu di Ruben.
7 Di akordu ku lista di família, kes ómi li éra família di Berá: xéfi Jeiel, Zakarias
8 i Bela, fidju di Azás. Azás tevi un fidju ki txomaba Sema. Sema tevi un fidju ki txomaba Juel. Família di Bela ta moraba na un zóna ki ta bai di Aroer ti Nebu i Baal-Meon.
9 Dja ki ses ribanhu bira txeu na téra di Jiliade, es ba mora na lésti, pértu di dizértu ki ta bai ti riu Eufratis.
10 Na ténpu di Saul, es ba luta kóntra kes agarenu i es ganha-s. Es toma ses ténda i es fika ta mora na es, na tudu tiritóriu, na lésti di Jiliade.
11 Kes família di Gade ta moraba na ses ladu, na téra di Bazan, kel tiritóriu ki ta bai ti Salká.
12 Na Bazan, Juel éra xéfi. Safon éra sugundu xéfi i tanbê tinha Janai i Safate.
13 I ses irmon, ki ta fazeba párti di ses grupu di família, éra Mikael, Mezulon, Seba, Jorai, Jakan, Zia i Éber. Pa tudu, es éra seti.
14 Kes-li éra disendenti* di Abiail. Abiail éra fidju di Uri. Uri éra fidju di Jaroa. Jaroa éra fidju di Jiliade. Jiliade éra fidju di Mikael. Mikael éra fidju di Jezizai. Jezizai éra fidju di Jadu. Jadu éra fidju di Bus.
15 Aí éra fidju di Abdiel i nétu di Guni. Aí éra xéfi di ses grupu di família.
16 Es ta moraba na Jiliade, na Bazan i na kes vila ki ta fikaba pértu di es i na kes kanpu di Saron ki tinha kumida. Es ta pastoraba animal ti limiti di Saron.
17 Tudu es podu na lista di família duránti govérnu di Joton, rei di Judá, i duránti govérnu di Jerubuon,* rei di Israel.
18 Kes algen di tribu di Ruben, di Gade i kes di metadi tribu di Manasés tinha 44.760 trópa balenti na ses izérsitu. Kes ómi li ta uzaba skudu i spada, i es ta staba armadu ku arku.* Es éra trenadu pa géra.
19 Es luta kóntra kes agarenu, Jetur, Nafis i Nodabe.
20 Dja ki es pidi Deus pa djuda-s na kel géra i es kunfia na el, Deus obi ses pididu di ajuda i el djuda-s. Pur isu, tudu kes agarenu i tudu kes algen ki staba djuntu ku es, intregadu na ses mô.
21 Es toma kes animal ki es tinha: 50 mil kamelu, 250 mil ovelha i 2 mil buru. Tanbê es leba 100 mil algen.*
22 Txeu di es matadu pamodi kel géra éra di Deus verdaderu. Dipôs, es fika ta mora na téra ki éra di kel povu, ti ténpu ki es lebadu prézu.
23 Kes família di metadi tribu di Manasés ta moraba na kel zóna ki ta bai di Bazan ti Baal-Ermon, Senir i monti Ermon. Es éra un monti di algen.
24 Kes-li éra kes xéfi di kes grupu di família: Efer, Isi, Eliel, Asriel, Jeremias, Odavias i Jadiel. Es éra trópa balenti, famozu i es éra xéfi di grupu di ses família.
25 Má, es ka foi fiel pa kel Deus di ses gentis grandi i es adora* kes deus di kes povu di kel país, ki é kes algen ki Deus traba di ses dianti.
26 Pur isu, kel Deus di Israel poi* Pul, rei di Asíria, (kel-li krê fla Tilgate-Pilnezer, rei di Asíria) ta fika kóntra kes algen di tribu di Ruben, di Gade i di metadi tribu di Manasés. El leba-s prézu pa Ala, pa Abor, pa Ara i pa kes zóna di riu Gozan, undi ki es sta ti dia di oji.
Nótas di rodapé
^ Ô: “el suja”.
^ Na ebraiku ta fla: “kes fidju”.
^ Kel-li krê fla Jerubuon sugundu.
^ Na ebraiku ta fla: “i es ta pizaba arku”. Djobe Disionáriu di Bíblia.
^ Ô: “alma”. Djobe Disionáriu di Bíblia.
^ Ô: “es faze prostituison ku”. Kel-li é un manera di fla ma es adora otus deus.
^ Na ebraiku ta fla: “disperta spritu di”.
