Ézudu 24:1-18
24 Dipôs el fla Muizés: “Subi i bai inkontra ku Jeová, abo, Aron, Nadabe, Abiú i 70 ansion di Israel, i nhos inbaxa di lonji.
2 É sô Muizés ki debe txiga pértu di Jeová. Kes otu ka debe txiga pértu, i povu ka debe subi djuntu ku el.”
3 Nton, Muizés bai ti povu i el fla-s tudu kes palavra di Jeová i tudu kes lei, i povu interu responde ku un sô vós: “Nu sta dispostu na faze tudu kes kuza ki Jeová fla.”
4 Nton, Muizés skrebe tudu kes palavra di Jeová. El labanta sédu palmanhan, el faze un altar na pé di monti i el poi 12 pilar pa reprizenta kes 12 tribu di Israel.
5 Dipôs, Muizés skodje ómis di Israel ki éra jóven, i es faze oférta kemadu i es oferese toru pa ser sakrifisiu di pas pa Jeová.
6 Muizés panha metadi di sangi i el pô-l na alguns tijéla, i el brufa kel otu metadi riba di altar.
7 Nton, el panha livru di kontratu i el lé-l ku vós altu pa povu. I es fla: “Nu sta dispostu na faze tudu kel ki Jeová fla i nu ta ser obidienti.”
8 Nton Muizés panha kel sangi i el brufa-l riba povu i el fla: “Kel-li é sangi di kontratu ki Jeová faze ku nhos di akordu ku tudu kes palavra li.”
9 Muizés, Aron, Nadabe, Abiú i kes 70 ansion di Israel subi kel monti,
10 i es odja kel Deus di Israel. Dibaxu di se pé tinha un kuza ki ta parseba ku txon di safira, puru sima séu.
11 El ka kastiga kes ómi inportanti di Israel. Es tevi un vizon di Deus verdaderu, i es kume i es bebe.
12 Nton, Jeová fla Muizés: “Subi i ben atxa-m na monti i fika la. N ta ben da-u kes tábua di pédra ku kes lei i kes mandamentu ki N ta ben skrebe pa N inxina povu.”
13 Muizés i se ajudanti, Juzué, pripara, i Muizés subi monti di Deus verdaderu.
14 Má antis, el flaba kes ansion: “Nhos spera-nu li ti ki nu volta. Aron i Ur ta fika ku nhos. Ken ki ten un prubléma pode bai na es.”
15 Nton, Muizés subi monti timenti kel núven sta kubriba kel monti.
16 Glória di Jeová kontinua riba di monti Sinai, i kel núven kubri-l duránti 6 dia. Na sétimu dia, el txoma Muizés di déntu di kel núven.
17 Pa kes israelita ki staba ta odja, glória di Jeová staba ta parse sima un lumi fórti riba di monti.
18 Nton, Muizés entra na núven i el subi monti. I el fika 40 dia i 40 noti na monti.
