Ni shambone kuvanavo vambodi pakulota kupagwa pamo muwakati walipuwilo na pakulota kutupwashela muwakati wakukamadyanga. Kanji Ibibiliya inkutumanyia kenga i vambodi uti vambone kwetu. Napanelo tulota kuvatandola dashi vambodi vakukulupilika? Kumbukila vyakudya avi.

1. Vambodi valota kukwambukisha dashi?

Patupita wakati woe twambanga mwaa na munu, kwali mu vyombo vyadyabali tunkuulula kwanjanga kunjedya munu ajo. Shinu ashi shinkuulula kutupwashela au mene. Kenga momo mwaivalangila Ibibiliya iishidoni, ‘aijá awena na valimanyilo andava walimanyilo, kanji aijá awena na vajinga andapata shaushanga.’ (Mikong’o 13:20) Vambodi vannagwaledya na vantumikila Yeova vankuulula kukupwashela kummandika nae ngwengwe na kumya wamushi wambone. Kanji kuvanavo vambodi vákannagwaledya Yeova vankuulula kutimbanga umbodi wetu namu nae. Ndyomana Ibibiliya inkutwaulila pakulota tuvatandole shana vambodi! Vambodi vetu vakava vanu vannagwaledya Yeova, shindava shinu shambone kwetu na kwavo vanavo momo. Nadoni tunkuulula “kwing’ana ntima shii na kunanawananga.”—1 Vateshalonika 5:11.

2. Yeova alota kuligwa dashi na kutandola kwako kwa vambodi?

Yeova anavatandola shana vambodi vake. ‘Nae avanagwaledya avalá vakwaloka ntima.’ (Mikong’o 3:32) Yeova alota kuligwa dashi tukavatandola vambodi vákannagwaledya nae? Nae kunnanyatila namene! (Shomya Tiyagu 4:4.) Kanji tukavaita vambodi vakunyata na kuvatandola vambodi vannagwaledya Yeova, nae andapuwanga na andatutandola kuva tuvambodi vake.—Dimu 15:1-4.

 LAMBELA KUMANYA VYOE

4. Vambodi vetu hainalateka shinu vave vashilinga shetu

Ibibiliya inkuvavalanga valume vavili va ku Ishilaeli yakala, vashishamegwa Yonatani namu Daudi. Yonatani ávele mwanagwe umu na ávele nang’olo kumpunda Daudi, ata ikava davo vanavo vandívanavo umbodi wakunanopa namene. Shomya 1 Samuwele 18:1, na badae mwambangile mwaa shakudya sha mwina:

• Mwaa shani hainalateka shinu vambodi vetu vave vashilinga shetu au shinamilo shimo namu wetu?

Shomya Valoma 1:11, 12, na badae mwambangile mwaa shakudya sha mwina:

• Mwaa shani vambodi vannagwaledya Yeova vankuulula kwing’ana ntima shii kula munu na muje?

Lola video, pakulota umanye mwashi nnemba mwaukidile navapata vambodi palyutu lyakashilindila. Lola VIDEO, na badae mwambangile mwaa shakudya sha mwina.

• Kulingana na video, mwaa shani vatatavake Akil vashinangaikanga kwamwaa wa vambodi vavenavo nae kushikola?

• Nyamani shishintadya Akil avanagwaledye vanavo?

• Nae aulwile dashi kutema kuligwa kuva gweka?

 5. Mwakuvapatila vambodi vambone

 KWAUNGWIPI

Kuvatandola shana vambodi ni shambone kwetu na kunampuwangidya Yeova.

Tukumbukilange

• Mwaa shani kuvatandola vambodi ni shinu shikumene kumwe Yeova?

• Inamuna shani ya umbodi ivaikidile hatunavenavo?

• Wako ulota kuvanavo dashi umbodi wambone na vanu vakukulupilika?