LISHOMO 24
Vanjelo ni vanyani na vanavo vatenda nyamani?
Yeova ankulota wetu tumanye likola lyake lya kuwa. Likola alyo ni vanjelo, vanavo vankushamegwa ‘vanavake Nnungu.’ (Jobi 38:7) Ibibiliya ivalanga nyamani kwaupande wa vanjelo? Vanavo vankuvapwashela dashi vanu? Da vanjelo uti vankutenda imbande yalikola lyake Nnungu?
1. Vanjelo ni vanyani?
Yeova andivaumba vanjelo hakanava kuumba shilambo. Vanjelo havananeeka na vanama kuwa. (Vabalaniya 1:14) Dinkupagwa dimilioni dyoe dya vanjelo na kula njelo ankuvanavo mavalelo ake. (Maono 5:11) Vanavo ‘vanatumbyanga lilove limwe [Yeova] na vanaigwilila lidi lyake.’ (Dimu 103:20) Muwakati wakala, Yeova ashinavatumila vanjelo pakulota kuvalanga mitenga, kuvapwashela na kuvashililidya venentete vake. Nelo, vanjelo vankuvalangalalela Vaklistu pakulota kuvapwashela vanu valota kulipundisha kwaupande wake Nnungu.
2. Shatwani na vandamoni ni vanyani?
Vanjelo vanji havaukile mushu vakulupilika kumwe Yeova. Njelo ntandi kumpinga Nnungu ni “wavanshema Ndamoni na Shatwani, nae ni ávaduwanga vanu mushilambo uti.” (Maono 12:9) Shatwani ashílota avalangalalele vavagwe, nae anínduwanga Adamu namu Eva na badae vanjelo vanji pakulota havanamwigwilile Yeova. Vanjelo avo vashamegwa vandamoni. Yeova andivavinga kuwa kuvajela mushilambo shapai, na vanavo vandauka ndabamolegwa.—Shomya Maono 12:9, 12.
3. Shatwani na vandamoni vatuduwanga dashi?
Shatwani na vandamoni vankuvaduwanga vanu voe kwa indila ya dimumu dya vandamoni au yangele, ni shinu shakunyata kutangola na dimumu dyakunyata. Kwampano, vanu vanji vanauka kwa vanu vanalambela kumanya vinu vya ku niyaniya, ku yangele, wavi, kwa vamitela na vinu uti vivele nkati muvitendo vya undamoni. Vanji vanalambela ntela wakulilaulila wigwania na vandamoni. Namomo Shatwani anavatadya vanu vamini kenga vankuulula kutangola na vakupela. Kanji Yeova ankutwaulila: ‘Hamunauke kwa vanu vanatangola na dimumu dyakunyata namomo hamunauke ku yangele.’ (Valawi 19:31) Nae ankutwaulila davo pakulota kutushililidya kumwe Shatwani na vandamoni. Vanavo ni vamongo vake Nnungu na valota vatuvyange.
LAMBELA KUMANYA VYOE
Manya kwaupande wa vinu vyambone vyavatenda vanjelo vake Nnungu na shijoidyo shipagwite mu yangele na mwashi mwatulota kuululila kulishililidya kumwe Shatwani na vandamoni.
4. Vanjelo vanavapwashela vanu pakulota valipundishe kwaupande wake Yeova
Vanjelo vake Nnungu havanavandadidya vanu ntenga shalowa. Pavedoni, vanavo vandavalangalalela vakulipudya vake Nnungu pakulota vavakodye vanu valota kulipundisha kwaupande wake. Shomya Maono 14:6, 7, na badae mwambangile mwaa vyakudya vya mwina:
-
Mwaa shani tunkulota lipwashalelo lya vanjelo patwandadya ntenga?
-
Aunona shinu kuva shambone kumanya kenga vanjelo vankuulula kukupwashela wako, pakulota uvakodye vanu valota kwigwilila ntenga wamu Ibibiliya? Mwaa wa nyamani?
5. Ita vitendo vya undamoni
Shatwani na vandamoni ni vamongo vake Yeova. Na wetu momo ni vamongo vetu. Shomya Lukashi 9:38-42, na badae mwambangile mwaa shakudya sha mwina:
-
Vandamoni vavatenda nyamani vanu?
Wetu hatunalote kuvakalibisha vandamoni mushingumi shetu. Shomya Kumbukumbu 18:10-12, na badae mwambangile mwaa vyakudya vya mwina:
-
Dindila shani dyavatumila vandamoni pakulota kutuduwanga na kutangola namu wetu? Diyadi shani dyawona kulikaja lyaunama?
-
Da Yeova ankuvanavo ishaliya yakutuleya vitendo vya shindamoni? Mwaa wa nyamani?
Lola VIDEO, na badae mwambangile mwaa vyakudya vya mwina.
-
Wako unkwona kenga ilishi yamungidile Palesha mwanagwe mu nkono ni shinu shakujowa? Mwaa wa nyamani?
-
Nyamani shatandile Palesha pakulota havanamwidile vandamoni?
Vaklistu vaiu ngwengwe vanavaita vandamoni. Shomya Vitendo 19:19 na 1 Vakolintu 10:21, na badae mwambangile mwaa shakudya sha mwina:
-
Mwaa shani ni shambone kutaa moto shinu shoeshoe shigwania na vitendo vya shindamoni?
6. Tema ing’ondo imwe Shatwani na vandamoni vake
Vandamoni valangalalegwa namu Shatwani. Kanji vanjelo vakukulupilika valangalalegwa na nang’olo wa vanjelo Migele, lina linji limwe Yesu. Migele avenavo dimongo dyakuva dashi? Shomya Maono 12:7-9, na badae mwambangile mwaa vyakudya vya mwina:
-
Wadimongo ni nyani? Migele na vanjelo vake au Shatwani na vandamoni vake?
-
Wako wona kenga vakwoda vake Yesu indivavaikila vanjope Shatwani na vandamoni vake?
Wako unkuulula kutema ing’ondo imwe Shatwani na vandamoni vake. Shomya Tiyagu 4:7, na badae mwambangile mwaa shakudya sha mwina:
-
Wako ulota kulishililidya dashi kumwe Shatwani na vandamoni?
VANU VANJI VANKUSHIDONI: “Hashinava shinu shakunyata kujela mishesho au kulola video kwaupande wa vitendo vya shindamoni. Ako ni kupikita vila.”
-
Mwaa shani kukumbukila davo ni shijoidyo?
KWAUNGWIPI
Vanjelo vakukulupilika vankutupwashela. Shatwani na vandamoni vake ni vamongo vake Yeova, na vanavo vatumila vitendo vya shindamoni pakulota kuvaduwanga vanu.
Tukumbukilange
-
Vanjelo vake Yeova vankuvapwashela dashi vanu pakulota kulipundisha kwaupande wake nae?
-
Shatwani na vandamoni ni vanyani?
-
Mwaa shani wako indikuvaikila wite vitendo vya shindamoni?
LIPUNDISHE
Lola nyamani shilodya kenga Yesu ni Migele nang’olo wa vanjelo.
“Yule Malaika Mkuu Mikaeli Ni Nani?” (Makala iliyo kwenye mtandao)
Lola vimanyikilo vilodya kenga Ndamoni apali, i makumbukililo na mavalelo lakunyata lavenavo munu muntima.
“Je, Ibilisi Ni Kiumbe Halisi?” (Makala iliyo kwenye mtandao)
Nnole nkongwe mwaukidile ndalyumadyanga mu vitendo vya shindamoni.
Manya Shatwani mwatumilila vitendo vya shindamoni pakulota kuvaduwanga vanu.
