Mikaele, u no legwa ne kukwe ne dzikereke dzingwe dzi ti “Saint Michael,” i zina dumbu la ka piwa Jeso a sathu a ka zha mu shango ne a chi fa. a Mikaele wa ka nyanyayidzana na Satani shule kwe lufu gwa Mozisi ne ku batsha engele ku yesa zibiso ye Ndzimu ku mporofiti Daniele. (Daniele 10:13, 21; Jude 9) Mikaele wa ka be e chila ku dumana ne zina lile​—“E Fanana ne Ndzimu”​—ne ku gwila bushe gwe Ndzimu kakale e gwisa zwita zwe Ndzimu.​—Daniele 12:1; Zumbunulo 12:7.

 Lingisisa kuti ini ku hwika kuti Jeso ndiye engele nkulu Mikaele.

•   Mikaele ndiye “engele nkulu.” (Jude 9) Nsholo “engele nkulu,” ku no dwa “she we baengele,” u no wangwa mu ndimana mbili koga dze Baibili. Pa u no wangwa, u no leba ne kwe chithu chingompela, ku no dwa kuti engele u ngompela ndiye koga u no dangwa ne zina ilelo. Ingwe ye ndimana idzedzo i no leba kuti Tetshi Jeso wa ka musiwa mu bafi “banowodeluka kudzimu nge hwi gulu le ndaulo, nenge hwi le ntumwa nkulu.” (1 Bathesalonika 4:16) Jeso u na “hwi le ntumwa nkulu” ne kuti ndiye engele nkulu, Mikaele.

•   Mikaele u no tungamila chisole che baengele. “Mikaele ne batumwa babe bakagwa ne bhophona,” Satani. (Zumbunulo 12:7) Mikaele u na masimba makulu mu bugalo gwe chimeya, ne kuti u no dangwa “mmwe we balauli bakulu be batumwa” kakale i li “ntungamili wenyu.” (Daniele 10:13, 21; 12:1) Mazina iyawa a no lakidza kuti Mikaele i “ntungamili nkulu we chisole che baengele,” se kwa ku leba David E. Aune u no zwidiya ne kwe dzibuka dze New Testament.

   Baibili i no leba ne kwe zina lingwe li ngompela koga le nthu u na masimba mu chisole che baengele. I no chenesa “She Jesu ezumbunuka ku dwa kudzimu ne batumwa babe ali mu moto unothuta, ehwisa zogwadza basina hanya.” (2 Bathesalonika 1:7, 8; Matewu 16:27) Jeso “wakayenda kudzimu, ne batumwa be kudzimu ne batungamili ne bana masimba bose banhwa.” (1 Pita 3:21, 22) Kowobe ku singa hwike kuti Ndzimu a thame Jeso na Mikaele i li batungamili ba no nyanyayidzana be baengele ba ka yengemala. Ngono, ko hwika kuti mazina iyawa wose, Jeso na Mikaele, nde e nthu u ngompela.

•   Mikaele “unowozha” mu chibaka che “manikano hwulu kwazo.” (Daniele 12:1) Mu buka ya Daniele, dama “unowozha” lo shingisiwa kwazo mu na she u no zha e tola thambo ya ka shalulika. (Daniele 11:2-4, 21) Jeso Kirisiti, u no zigwa se “Dama le Ndzimu,” u no tola thambo ya ka shalulika se “She wa boshe” ku wo pedzisa zwita zwe Ndzimu ne ku bakilila bathu be Ndzimu. (Zumbunulo 19:11-16) U nowo thama e jalo mu chibaka che “kudziyidziwa kukulu kusathu kukabe yapo kudwa mu kutangisa kwe shango.”​—Matewu 24:21, 42.