Bafakazi ba Jehova, ba no bata zwidiyo zwabo zwe gubungano ka bili ne viki ku Dziholo dze Bushe kwa ba no shanganila. Ko shingikalani ku dzili, ngono u nga bona mbayilo upi ha u shanganila?

•  Ko shingikalani ku Holo ye Bushe?

•  Ini wa ka fanila ku shanganila?

•  Chi no legwa ne bakhwinya babo

 Ku Holo ye Bushe ndiko ku no zwidiyiwa zwidiyo zwi no lingisa nthu ku Baibili. Zwidiyo zwi no diyiwa ko zwi nga ku batsha ku:

•   zwidiya malebeswa ne kwe Ndzimu.

•   hwisiwa kuti ini zwithu zwi shingikala ne zila ya ka jali.

•   be nthu u butuka.

•    be ne bakhwinya ba butuka kwazo.

 Apa wa gala u ziba? Pa no shanganila Bafakazi ba Jehova ko dangwa Holo ye Bushe ne kuti ndiko ku no legwa kwazo ne kwe Bushe gwe Ndzimu.​—Matewu 6:​9, 10; 24:14; Luka 4:​43.

 Zibiso i nowo ku batsha. Milayontewo ye Baibili i no zwidiyiwa ku zwidiyo zwe gubungano zwe Bafakazi ba Jehova i nowo ku batsha ku “wana buchenjedu.” (Zwiani 4:5) Ichechi cho dwa kuti Baibili i nga ku batsha ku tola thambo dza ka lulwama mu buchilo. Kakale i nga ku batsha ku dabila buzo wulu dze buchilo, dzi nonga:

•   To chililani?

•   Apa Ndzimu u nga bigwa nlandu we ku dziyidzika kwedu?

•   Ko shingikalani ha ti fa?

 Yeyi i mingwe ye misholo i no diyiwa mu zwidiyo zwedu zwe bupelo gwe viki:

•   Ini wa ka Fanila Tungamigwa ne Baibili?

•   U Nga Bona Batsho Ngayi mu Zwibaka Zwe Mathatha?

•   Cha ti no Thamigwa ne Bushe Gwe Ndzimu Ngwenu.

 “Wa ndi no ngina ikwele naye wa ka zha ku zwidiyo zwe gubungano. A ka gala ne be nsha wedu, ngono ti ka bala dzibuka dzedu naye. Shulenyana, a ka ndi budza kuti wa ka shathisiwa kwazo ne dabilo dza ka be dzi dabigwa ne ba no buzwiwa. Kakale a ka leba kuti ku kereke yabo a kuna zwidiyo zwi no fanana ne zwedu.”​—Brenda.

 Apa wa gala u ziba? Ha ku to ruwegwa ku ngina ku Holo ye Bushe, kakale ha ku to dusiwa dzikuleke.

 U nowo kulumbidziwa ne bangwe. Baibili i kati libaka gungwe gwe ku shangana kwe Bakirisiti wu ku “kulumbidzana.” (Bahebera 10:24, 25) Bushangano gwa ka lulwama mu bathu ba no biga Ndzimu ne bangwe mbeli go nyatutusa mu shango iyeyi i zhele ku zwilinga u li woga.

 “Ha nda shwa nda nyala, ndo zwihwa ndi sa ka shatha ndi li pasi nda ka nyalamoyo, ngono bangwe ku Holo ye Bushe ba no thama kuti ndi zwihwe ndi li butuka. Ha ndi gwilila ku nzi shule kwe zwidiyo zwe gubungano, ndo zwihwa nda ka shatha nda ka zwibaakanyila zhuba li no tobela.”​—Elisa.

 Apa wa gala u ziba? Ku na makubungano e Bafakazi ba Jehova a no pinda 120 000 mu shango yose, a no shanganila mu ndawo dzi no pinda 60 000. Gole ne gole, ko bakiwa, Holo dze Bushe dzi nga be 1 500 dzi no shingisiwa ne palo ye bathu i no dwilila i paphidzika. a