Bathu ba no shinga ba ka sima ha ba to cha nshingo. Ngono, ba no shathila shinga ba ka sima ku zwichidza ne ku batsha bangwe—nenguba nshingo wa ba no shinga u si we mamo a pezhugwi.

U da kene u singa de, buchilo gu na zwinjinji zwa wa ka fanila lingisana nazo. Mu shango iyeyi ya ka wanda bathu ba singa shake shinga ba ka sima, ku shinga wa ka sima ku na mbayilo nkulu mu kuli.—Nreri 3:13.

“Nda ka zwidiya kuti ha u shinga wa ka sima, u no be ne ku zwithemba ne ku shathila cha u no thama. Mazwiwo iyawo e ku shatha a no thama kuti ndi de nshingo wangu. Ku da nshingo uwo dumbu kowo ku batsha kuti u zigwe ne zila ya ka naka.”—Reyon.

NLAYONTEWO WE BAIBILI: “Ku shinga kwazo ku na mbayilo.”—Zwiani 14:23.

Ibe ne nkumbulo wa ka lulwama ne kwe nshingo ne ku tobela thambo dza ka kwagwa ipapa.

U zwithemba mu ku thama zwithu ne zila mbuyanana. Nenguba u ka be u thama nshingo uwo we nzi, kene u thama nshingo uwo we ikwele, kene nshingo wa u no zwichidza nawo, shinga wa ka sima mu na cha u no thama. Ha u nga shinga nshingo uwo zwibuyanana, shinga kwa ka paphidzika—u shinga chinyolocho ne bunyambi. Ha u shinga ne bunyambi, u nowo shathila nshingo uwo.

NLAYONTEWO WE BAIBILI: “U no bona nthu u nyambi mu nshingo uwe kene? U nowo ma mbeli kwa bomambo, a a nga me mbeli kwe bathu ba sina ntutshi.”—Zwiani 22:29.

Lingila zwithu mbeli. Ku nga be mu zwibaka zose , ha u shinga zwithu zwa wa ka lingisana nazo zwibuyanana, u no batsha ne bangwe. Ha ti lakidzila, ha u shinga wa ka sima mu mishingo iyo ye nzi, u no thama kuti mishingo ye bangwe mu nsha wenyu i be milelu.

NLAYONTEWO WE BAIBILI: “Ku pa kwa ka kombolegwa pana ku piwa.”—Mishingo 20:35.

Shinga kwa ka paphidzika. Pana kuti u shinge koga kwa ka lizanila, gwisa ku shinga ku pinda cha wa ka fanila thama. Ne zila ya ka jalo, u nga khona lawula buchilo gugo—u shinga kwa ka paphidzika, u singa sundiwe, ngono u da ku zwishingisa.—Matewu 5:41.

NLAYONTEWO WE BAIBILI: “Ndulamo iyo i si tongo be nge ku kombeledzwa, koga ku be iwe u no thama ngo sununguka.”—Filimoni 14.

Linga zwithu ne zila ya ka lizalizana. Bathu ba no shinga ba ka sima ha ba te ba li simbe, kakale ha ba to zwibulayisa nshingo. Ba ka zwimisila ku lizalizanya zwithu, be shathila ku shinga ba ka sima kose ne ku nyatutuka.

NLAYONTEWO WE BAIBILI: “Ko yita ku tukununu ku no zhala luboko ngono u na mbakiso, pa na ku no zhala maboko mabili ngono a zhele ku shinga ne ku tatana ne phepo.”—Nreri 4:6.