THUTO 15
Jesu Ndi Yani?
Jesu i nngwe we bathu ba no zibgwa kwazo mu histori. Ne kwa ka jalo, bathu banjinji ba no ziba zina lile koga, ha ba to ziba kunjinji ne kukwe, kakale banjinji ba na mikumbulo i si nga fanane ne kwe kuti dumbu Jesu ndi yani. Baibili iyo i no tini ne kukwe?
1. Jesu ndi yani?
Jesu i engele u na masimba u no chila kudzimu. Ndiye we kutanga ku bumbiwa mu zwithu zose zwa ka bumbiwa na Jehova. Ndizo, e dangwa kuyi “mbano ye lubumbo gose.” (Bakolosa 1:15) Baibili i no dana Jesu iti “Nkololo . . . uyega” we Ndzimu ne kuti Jehova wa ka bumba Jesu ne bukukwe. (Johani 3:16) Jesu wa ka shinga na Tate babe, Jehova, ne ku ba batsha ku bumba zwithu zwingwe zose. (Bala Zwiani 8:30.) Jesu u no dwilila e shathila ku hwanana kwazo na Jehova. I nlebelekeli we Ndzimu u no thembeka, u no leba ne kwe nlaetsa ne milayo ye Ndzimu, ndizo e dangwa “Dama.”—Johani 1:14.
2. Ini Jesu a ka zha mu shango?
Mu makole a nga be 2 000 a ka pinda, Jehova wa ka shingisa meya dzidze dza ka yengemela ku pindisila buchilo gwa Jesu ku dwa kudzimu ku ntumbu we ngwanadi u noyi Mariya. Ne zila iyeyi, Jesu wa ka zwagwa ili nthu. (Bala Luka 1:34, 35.) Jesu wa ka zha mu shango ku be Mesiya, kene Kirisiti, ne ku chidza bathu. a Buporofiti gose gwe Baibili gu no leba ne kwe Mesiya gwa ka shingikadziwa mu nli, ikoko kwa ka batsha bathu ku bona kuti Jesu ndiye “Mesiya, Nkololo we Ndzimu unotjila.”—Matewu 16:16.
3. Jesu u ngayi?
Shule kwe ku chila se nthu mu shango, Jesu wa ka musiwa ili chibumbiwa che meya e be e gwilila kudzimu. Ikwenu, “Ndzimu wakammilidzila pezhugwi kwazo.” (Bafilipi 2:9) Ngwenu, Jesu u na mamo makulu—u no pindiwa ndi Jehova koga.
ZWIDIYE KWA KA NGINILILA
Zwidiye kwa ka paphidzika kuti dumbu Jesu ndi yani kakale ne kuti ini ta ka fanila ku zwidiya ne kukwe.
4. Jesu ha te Ndzimu Masimbawose
Baibili i no diya kuti nenguba Jesu ili chibumbiwa che meya chi na masimba chi kudzimu, u no hwilila Ndzimu, Tate babe, Jehova. Ini ti jalo? Zana VIDIYO ku bona kuti Baibili i no diyani ne kwe khani ye kuti Jesu ha a to fanana ne Ndzimu we masimbawose.
Ndimana dzi no tobela dzo ti batsha ku bona kuti Jehova na Jesu ba no amana chini. Bala ndimana ingwe ne ingwe, mu be mu lebesana ne kwe buzo dzi no tobela:
Bala Luka 1:30-32.
-
Engele wa kati Jesu u no amana chini na Jehova, Ndzimu “Upezhugwi zhugwi”?
Bala Matewu 3:16, 17.
-
Ha Jesu e dubikiwa, hwi li no dwa kudzimu la katini?
-
U no kumbula kuti ndi yani wa ka be e leba?
Bala Johani 14:28.
-
Ndi upi u nkulu kakale a na ndaulo? A ndi tate kene nkololo?
-
Jesu wa ka dana Jehova eti ndi Tate babe. Ichecho cho ti diyani?
Bala Johani 12:49.
-
A Jesu u no kumbula kuti iye na Tate babe i nthu u ngompela? Iwe u no kumbulani?
5. Kwa ka boneka dumbu kuti Jesu ndiye Mesiya
Baibili i na buporofiti gunjinji gu nga batsha bathu ku bona kuti Mesiya ndi yani—iye wa ka shalugwa ne Ndzimu ku chidza bathu. Zana VIDIYO ku bona gungwe buporofiti gwa ka shingikadziwa na Jesu ha ali mu shango.
Bala buporofiti igogu gwe Baibili, mu be mu lebesana ne kwe buzo dzi no tobela:
Bala Mika 5:2 ku zwidiya kuti Jesu wa ka be wo zwaligwa ngayi. b
-
A ku zwagwa kwa Jesu kwa ka shingikadza buporofiti igogu?—Matewu 2:1.
Bala Pisalema 34:20 na Zakariya 12:10 ku bona cha ka be cha lebebgwa mbeli ne kwe lufu gwa Mesiya.
-
A buporofiti igogu gwa ka shingikadziwa?—Johani 19:33-37.
-
A u no kumbula kuti ku na chingwe cha Jesu a ka thama, ili kuti buporofiti igogu gu shingikadziwe?
-
Ichecho cho ku diyani ne kwa Jesu?
6. Ku zwidiya ne kwa Jesu ko ti batsha
Baibili i no tshambilidza kuti ini ta ka fanila ku tolela pezhugwi ku zwidiya ne kwa Jesu ne nshingo wa a ka piwa ne Ndzimu. Bala Johani 14:6 ne 17:3, mu be mu lebesana ne kwe buzo i no tobela:
-
Ini ili chithu chikulu kuti ti zwidiye ne kwa Jesu?
Jesu wa ka zhula zila ye ku be ne bukhwinya ne Ndzimu. Wa ka diya malebeswa ne kwa Jehova, ngono mu nli ti nga khona ku be ne buchilo gu singapele
BATHU BANGWE BA KATI: “Bafakazi ba Jehova a ba to dumila mu na Jesu.”
-
U nga ba dwa u tini?
CHA WA ZWIDIYA
Jesu i chibumbiwa che meya chi na masimba. I Nkololo we Ndzimu kakale ndiye Mesiya.
U Nga Tini?
-
Ini Jesu e dangwa “mbano ye lubumbo gose”?
-
Jesu wa ka be e thamani ha a sathu a ka zha mu shango?
-
To ziba chini kuti Jesu ndiye Mesiya?
SHAKISISA
Zwidiye kwa ka paphidzika ne kwe chiabe cha Jesu se Mesiya.
“A Buporofiti gu no Leba ne Kwa Mesiya go Lakidza Kuti Jesu wa ka be Ali Iye Mesiya?” (Web article)
Bona kuti a Baibili i no diya kuti Ndzimu wa ka be tate ba Jesu ne zila i no fanana ne ye bathu ye ku thama bana.
Zwidiye kuti ini khani ye kuti Tate, Nkololo ne meya dza ka yengemala i chithu chi ngompela, i sa ka teiwa mu Baibili.
Bona kuti ku shakisisa ne kwa Jesu mu Baibili kwa ka shandula buchilo gwe nkadzi nngwe chini.
a Thuto 26 ne 27 dzowo leba ne kwe kuti ini bathu be sheta ku chidziwa kakale kuti Jesu u noti chidza chini.
b Bona Zibiso ya ka Paphidzika 2 ku bona buporofiti gwa ka lebela mbeli kuti Jesu wa ka wo zha mu shango lini.
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
