Ndzimu wa ka longolodza ludzi gwa Aburahamu ku be ichaba, e be e ba pa milayo. Wa ka dana ichaba ichecho “Iziraela”, ngono a ka chi thama mmilili we namato ye malebeswa ne we dama lile. (Pisalema 147:19, 20) Kuti bathu be zwichaba zose ba bone mbayilo mu Iziraela.​—Bala Genesisi 22:18.

Ndzimu wa ka shalula Baiziraela ku be bafakazi babe. Buchilo gwabo gwa ntolo go lakidza se kwa bathu be bona mbayilo mu ku hwa milayo ye Ndzimu. (Ditironomi 4:6) Ndizo ku dwa mu Baiziraela, bathu bangwe ba nga ziba Ndzimu we malebeswa.​—Bala Izaya 43:10, 12.

Gwe bupelo Baiziraela ba ka lashikigwa ne ku amuchigwa ne Ndzimu, ngono Jehova a ka misila ichaba ichecho ne gubungano le Bukirisiti. (Matewu 21:43; 23:37, 38) Ngwenu mu bumo gwe Baiziraela, Bakirisiti be malebeswa ba no shingila se bafakazi ba Jehova.​—Bala Mishingo 15:14, 17.

Jesu wa ka longolodza badiyiwana babe kuti ba rere ne ku thama badiyiwana mu zwichaba zose. (Matewu 10:7, 11; 24:14; 28:19, 20) Ngwenu nshingo iwoyu, wo yenda ku bupelo gwawo mu ku wila kwe njendiso ya ngwenu ye zwithu. Kuli gwe kutanga mu ku chila kwe bathu, Jehova wa ka shanganya dzimillion dze bathu ku dwa mu zwichaba, mu namato ye malebeswa. (Zumbunulo 7:9, 10) Bakirisiti be malebeswa ba ka longolodziwa ku kulumbidzana ne ku batshana. Ba no shathila ndongoloso i no fanana ye Baibili mu zwidiyo zwabo mu shango yose.​—Bala Bahebera 10:24, 25.

Mu makole a bo 1870, group i si ngapani ye bathu ba no zwidiya Baibili ya ka bona malebeswa e Baibili a ka be a lashika. Ba ka be be ziba kuti Jesu wa ka longolodza gubungano le Bukirisiti ku rera, ndizo be be be tangisa nshingo we ku rera ne kwe Bushe mu shango yose. Ne 1931 ba ka tangisa ku dangwa kuyi Bafakazi ba Jehova.​—Bala Mishingo 1:8; 2:1, 4; 5:42.

Mu century ye kutanga, makubungano e Bukirisiti mu shango njinji a ka wana batsho mu gubungano li no laula li li pathu pa ngompela, la ka be li linga Jesu i li Nsholo we gubungano. (Mishingo 16:4, 5) Ne zila i no fanana ngwenu, Bafakazi ba Jehova mu shango yose ba no batshiwa ne Gubungano li no Laula le badala ba na lizibo. Lo thokomela ofisi dze matabi e Bafakazi ba Jehova a no shandulila, a no printa, ne ku andamisa zwithu zwe ku zwidiya Baibili mu ndimi dzi no pinda 600. Ndizo Gubungano li no Laula li khona ku kulumbidza ne hwalo, ne ku tungamila makubungano a no pinda 100,000 mu shango yose. Mu gubungano lingwe ne lingwe, balume ba no fanilika ba no shingila se badala kene balingilili. Balume ibaba ba no thokomela pkhwizi dze Ndzimu ne ludo.​—Bala 1 Pita 5:2, 3.

Bafakazi ba Jehova ba na ndongoloso ye ku rera ndebo mbuya ne ku thama badiyiwana. Koga se baaposetolo, to rera mu ngumba ingwe ne ingwe. (Mishingo 20:20) Kakale to zwidiya Baibili ne bathu ba no da malebeswa. Ngono Bafakazi ba Jehova ha te gubungano koga. Ti nsha u na Tate ba na ludo. Ti bazwalani ne azwadzi ba no thokomelana. (2 Bathesalonika 1:3) Ngobe bathu ba Jehova ba ka longolodziwa ku shathisa Ndzimu ne ku batsha bangwe, i nsha wa ka shatha ku pinda nngwe ne nngwe mu shango.​—Bala Pisalema 33:12; Mishingo 20:35.