Bathu bose be meya ba ka bumbiwa ndi Jehova ba ka be ba ka lulama. Ngono ntum̄iwa m̄we ka shanduka mbi. Ndi Satani Diabulo. Satani wa ka be e shaka ku ti bathu bose mu shango ba namate iye mu bumo gwa Jehova. E tji ndi tjo tja ka yetikala:

Mu n’ndana we Edeni, kwa ka be ku na miti i no zwala zwizwalo zwi no zipa. Jehova wa ka budza Adamu ne nkadzi u we, Eva, ba nga zwi ja koga ba ka sungunuka. Ngono Ndzimu wa ka ba dwa ka ti ba si tongo ja nti m̄we. Wa ka ti ha banga u ja, ba nowu fa tjose.—Genesisi 2:9, 16, 17.

Lim̄we zhuba Eva wa ka be a li ega ha nyoka i lebeleka naye. Nakale, ya ka be i si nyoka ya ka be i lebeleka dumbu; Ya ka be i li Satani Diabulo wa ka be e thama ku ti nyoka i be se i no lebeleka. Satani ka dwa Eva ka ti ha a nga ja izwalo tja ba ka dzibisiwa, u nowo tjenjela se Ndzimu. Kakale wa ka ti ha a nga fe. Matama i awa ose a ka be a li manyepkhwa. Ne kwa ka jalo, Eva wa ka duma Satani ka be e ja izwalo. Gwa shule, ka pa Adamu, na iye ka ja.—Genesisi 3:1-6.

Ku dwa mu khani i yeyi, to zwi diya kuti Satani i komba ne n’nyepi. Wa ka budza Eva ku ti ha a nga shaya teedza Ndzimu, ha a nga fe. Etji ya ka be ili manyepkhwa. Wa ka fa na iye Adamu. Satani ha a zo fa ipapo, ne nguba a tjowo fa gwa shule ngobe wa Ka thama tjibi. Mu lubaka guno, nakale, uno tjila ne ku dwilila e dzimidza ludzi gwe bathu. U tji n’nyepi, kakale u no gwisa ku thama bathu ku ti ba vune milayo ye Ndzimu.—Johani 8:44.

Gwa shule, batum̄wa bam̄we ba ka shanduka babi. Batum̄wa i baba ba ka bona bakadzi ba ka naka mu shango ba ka be be shaka shanganila ngubo na bo. Ndizo ba ka be bo zha mu shango be ambala mibile ye bathu. Ba ka be bo zwi tolela bakadzi. Oku kwa ka be kwa ka leyana ne mazwimisilo e Ndzimu.—Genesisi 6:1, 2; Jude 6.

Kakale kwa ka thamila ludzi gwe nthu buyendasi gu kulu. Bakadzi be batum̄wa i baba ba ka zwala bana, nakale ba ka be ba si bana ba ka jayegwa. Ba ka kula ku be zwigeben̄a ne mazhithu e mimoyo mibi. Gwa shule shango i ka zhala bugeben̄a Jehova ka buya ka pedza nge ku ti a pedzise bathu babi nge nsundila nkulu. Bathu koga ba ka tandula Nsundila ya ka be nlulami Nowa ne be nsha uwe.—Genesisi 6:4, 11; 7:23.

Batum̄wa babi, nakale, ba ka bgwilila ku bugalo gwe meya; ha ba zo fa. Ngono ba ka logwa. Ha ba zo letjedzegwa bgwilila mu nsha we Ndzimu we batum̄wa ba ka lulama. Ku papha, Jehova ka si ba letjedzele ku ambala mibili ye bathu. Ngono gwa shule ba nowo fa mu sumbikilo wulu.—2 Peteru 2:4; Jude 6.

Mu kutangisa kwe khulu ledu le makole, kwa ka be ne ngwa ku dzimu. Buka ye Baibili ye Bonyololo i no thalusa tja ka shingikala: “Ku ka be ne ngwa ku dzimu: Maikele [Jesu Kirisiti wa ka musiwa] ne batum̄wa ba be ba ka [lulama] ba ka gwa ne hangale [Satani], ngono hangale ne batum̄wa ba yo ba ka [bipa] ba ka gwa ngono i ka si kunde, ne bugalo gwa bo gu ka si tja be po ku dzimu. Ndizo hangale wulu i ka posiwa, nyoka ye kutanga, i no dan̄wa Satani na Diabulo u no dzimidza shango yose i no gagwa; wa ka posegwa mu shango ne batum̄wa babe [babi] baka posegwa pasi na ye.”

Belelo i ka be ni? Khani i no dwilila: “Nge lubaka i gogu shathani, i m̄wi ku dzimu na m̄wi ba no gala ko!” Batum̄wa ba ka lulama ba bo bowo shatha ngobe Satani ne batum̄wa babi, kene meya, ba ka be ba si tji ku dzimu. Ngono ko i m̄wi nge kwe bathu mu shango? Baibili i ka ti: “Buyendasi mu shango ne mu gungwa, ngobe Diabulo wa ka delukila ku muli, a li zhele bushongola, e ziba ha lubaka gugwe gu li gu fupi.”—Bonyololo 12:7-9, 12.

E, Satani ne bakhwinya ba be babi ba no dzimidza ne ku thama ndashiko wulu mu shango. Batum̄wa i baba babi ba no dan̄wa madimona. Zwita zwe Ndzimu. Bose babi.