NDIMA 35

Ndi Nga be Nkhwinya we Ndzimu Chini?

Cha ka shingikalila Jeremy cha ka thama kuti a bokele mbayilo we ku be nkhwinya we Ndzimu. “Nda ka ti ndi na makole a li 12, tate ba ka ti siya,” ka leba e jalo. “Zhuba lingwe ndili lele nda ka tembezela, ndi kumbila Jehova kuti a thame kuti tate ba buye kanyi.”

Ne ntata ye ku pelegwa ne thembo, Jeremy a ka tangisa ku bala Baibili. Wa ka ti e bala Pisalema 10:14, a ka kuthika moyo. Ndimana i no leba ne kwa Jehova i ti: “Badziyili banogalabgwe mu muli. Mobatsha siyang’wa.” Jeremy a ka be e ti: “Nda ka bona kuti Jehova wa be e lebeleka nami e ndi budza kuti i mbatshi wangu; ne Tate bangu. Apa ndi nga be ne tate ba butuka mu nli?”

NENGUBA u li mu chimo chi no nga cha Jeremy kene u si mu chili, Baibili i no lakidza kuti Jehova u no shaka u be nkhwinya uwe. Baibili i no ti: “Muzwisedzedze ku Ndzimu ndizo na iwobo unowozwisedzedza kumuli.” (Jakuba 4:8) Kumbulila kuti matama iyawa a no dwani: Nenguba u singa mbone​—ha a nga be nkhwinya uwo se kwa ku legwa—​Jehova Ndzimu u no ku koka ku be nkhwinya uwe!

Ngono ku be nkhwinya we Ndzimu ko sheteka kuti u tole thambo. Ha ti fanisa: ha wa ka dzwala nti, ha u to zwikulila koga. Kuti u kule zwibuyanana, wa ka fanila ku u ngwisizidzila kakale wa ka dzwagwa mu ndawo ya ka u lulwamila. Ko fanana ne ku be nkhwinya we Ndzimu. U nga thama chini kuti bukhwinya igogu gu kule?

Ku Zwidiya i Chithu Chikulu

Bukhwinya go shanganyila ku lebesana kwe bathu babili​—bose be lebeleka ne ku teedza. Ikoku ko fanana bo ne bukhwinya gugo ne Ndzimu. Ku bala ne ku zwidiya Baibili i zila ya ti no teedza kuti Ndzimu u no lebani naswi.​—Pisalema 1:2, 3.

Malebeswa wose, ku zwidiya i nga dwa i si chithu cha u no da. Batshwa banjinji ba nga da ku lingilila TV, ku zana dzi-game, kene ku lebesana ne bakhwinya. Ngono ha u shaka ku kudza bukhwinya gugo ne Ndzimu, ha u nga lashilile zwithu koga. U nowo fanigwa ne ku nteedza ne ku zwidiya Dama lile.

U si hwe zogwadza. Ku zwidiya Baibili ha i zo fanila ku be chithu chi no lema. U nga shathila ku zwidiya​—ne u ka be u li nthu u si nga de ku zwidiya. Cha wa ka fanila thama wu ku zwibigila nako ye ku zwidiya Baibili. “Ndi na ndongoloso,” ko leba ngwanadi Lais. “Ndo bala ndima ye Baibili mangwanana mangwe ne mangwe.” Maria, u na makole a li 15, u na iye ndongoloso. “ Ndo bala Baibili ku si ku ngapani ndi sathu a yezela,” a ka jalo.

Ku tangisa ndongoloso iyo ye ku zwidiya, bona  bokisi li mu zebe 292. Kusi kwalo, kwala nako ya u nga shingisa i nga be 30 minutes koga u zwidiya Dama le Ndzimu.

․․․․․

Ku zwithamila ndongoloso i chithu che kutanga. Ha wa chi tangisa ku zwidiya, u nga bona kuti ha ku te ku li ku lelu ku bala Baibili. Pangwe u nga dumana na Jezreel u na makole a li 11, ha e ti, “Baibili ya ka sima nako ingwe kakale i singa khate ku bagwa.” Ha u zwihwa ne zila ya ka jalo, u si zwitoboke. Dwilila u zwidiya Baibili ne nkumbulo we ku ziba kuti u no shingisa nako ku teedza Jehova Ndzimu, nkhwinya uwo. Ku bupelo, ku zwidiya Baibili ko wo ku shingila ne ku bona mbayilo ha wa ka dwilila u i shingisa!

Ntembezelo i Chithu Chikulu

Ntembezelo i zila ya ti no lebeleka ne Ndzimu nayo. Kumbula kuti ntembezelo i chipo chi no chenamisa seni! U nga lebeleka na Jehova mu dzinako dzose busiku kene masikati. U no gala a li yapo. Pezhugwi kwa ikoko, u no shaka hwa cha u no leba. Ndizo Baibili i ku sendedzela i ti: “Musidziyidzike nge tjimwe, koga kumbilani tjimwe ne tjimwe mu Ndzimu nge mitembezelo nenge kuboka.”​—Bafilipi 4:6.

Se kwa likwalo igogu gu lakidza, ku na zwithu zwinjinji zwa u nga lebeleka na Jehova ne kwazo. I nga be mathatha awo kene ku dziyidzika kuko. Kose ne zwithu zwa u nga bokela. Iko dumbu, apa ha u nga bokele zwithu zwa ka naka zwa wa ka thamigwa ne bakhwinya babo? U nga thama chi no fanana mu na Jehova, wa ka ku thamila chingwe ne chingwe cha ka naka ku pinda bathu bose.​—Pisalema 106:1.

Kwala zwithu zwingwe zwa u nga boka Jehova.

․․․․․

Ha ku to bilayedza kuti ku na zwithu zwi no ku khataza ne ku ku dziyidza mu zwibaka zose. Pisalema 55:22 i kati: “Tola mitolo iyo uyibige muna Yahwe; ndizo banowokumilidza; Yahwe abatowotongoletja balulwami bakatshedugwa.”

Kwala zwithu zwa u nga shaka ku tembezela ne kwazo.

․․․․․

Zwa ka ku Shingikalila

Ku na chingwe ne kwe bukhwinya gugo ne Ndzimu cha u sa ka fanila bigila ntome. Mpisalema Dafite wa ka kwala e ti: “Labilani mubone kuti Yahwe bakalulwama!” (Pisalema 34:8) Ha Dafite e kwala Pisalema ye bu 34, wa ka be a shingikaligwa ne chingwe chi no tshusa. Wa ka be e tizha mbulayi She Saulo​—chithu chi no khataza dumbu. Ngono wa ka be a ka fanila ku tizhila mu ndawo dzi no gala zwita zwizwe zwe Bafilisitiya. Wa ka ti a ka lingisana ne lufu, Dafite a ka shinga ne buchenjedu ku zwithama nthu u no penga ngono a ka khona ku tizha.​—1 Samuele 21:10-15.

Dafite ha a zo tola ku khona ku tizha kukwe i li buchenjedu gugwe. Mu bumo gwa ichecho, wa ka kudza Jehova. Mu pisalema ya kwa tongo legwa ne kwayo, wa ka kwala e ti: “Ndakashaka Yahwe, bakandidabila, ngono bakandisunungula mu kutja kwangu kose.” (Pisalema 34:4) Ya ka be cha ka nshingikalila, ku be Dafite a ka dwa bangwe kuti ‘ba labile ne ku bona kuti Jehova wa ka lulwama.’ *

Kumbula chingwe cha ka ku shingikalila mu buchilo gugo chi no thama kuti u dume ha Jehova e thokomela? Ha kwa ka jalo, kwala ne kwako ipapa. Gumbuludzo: Cha ka ku shingikalila ha chi zo fanila ku legwa ne kwacho kwazo. Lika ku kumbula zwi si zwa chingwe zwa wa ka kombolegwa mu zwili, zwi ngana zwi ka be zwi si nga tolegwe pezhugwi.

․․․․․

Pangwe bazwadzi babo ba ka ku diya Baibili. Ha kwa ka jalo, wa ka kombolegwa. Ne kwa ka jalo, u no sheta ku paphidza bukhwinya gugo ne Ndzimu. Ha u sathu u ka thama u jalo, u nga shingisa zibiso i mu nkwalo iwoyu ku ku batsha ku tangisa. Jehova u no ku kombolela. Baibili i kati: “Kumbilani mowopiwa, shakani mowowana.”​—Matewu 7:7.

ZWIDIYE KWA KA PAPHIDZIKA NE KWE KHANI IYEYI MU VOLUME 1, NDIMA 38 NE 39

MU NDIMA I NO TOBELA

A u no wana kwa ka sima ku lebeleka ne bangwe ne kwe Ndzimu? Zwidiye se kwa u nga lebelekela cha u no dumila.

[Nkwalo u kusi]

NDIMANA YE MONGO

“Bakakombolegwa bashayi mu meya.”​—Matewu 5:3.

GUMBULUDZO

Ha u bala zebe dzi li 4 koga dze Baibili zhuba ne zhuba, u nowo widza ku i bala yose mu gole li ngompela.

A WA GALA U ZIBA . . . ?

Ku bala buka iyeyi koga ne ku shingisa gumbuludzo layo la ka teyiwa mu Baibili ko lakidza kuti Jehova u no ku da.​—Johani 6:44.

CHA U NGA SHINGILA MU CHILI!

Ku bona mbayilo mu ku zwidiya Baibili ne bukwangu, Ndowo ․․․․․

Kuti ndi khone tembezela misi yose, Ndowo ․․․․․

Cha ndi nga buzwa bazwadzi bangu ne kwe khani iyeyi i ․․․․․

U NO KUMBULA CHINI?

● U nga thama chini kuti ku zwidiya Baibilii ne bukuko ku ku zipile dumbu?

● Ini Jehova e teedza mitembezelo ye bathu ba sa ka zwilizanila?

● U nga thama chini kuti mitembezelo iyo i hwike?

[Matama a no chenesa itshwantsho]

“Nda kati ndi chi nchechana, nda ka be ndi buyulila mitembezelo. Ngwenu ndo tembezela ne kwe zwithu zwa ka naka ne zwa ka bipa zwe zhuba lingwe ne lingwe. Se kwa ku sina mazhuba a no fanana dumbu, ikoko ko thama kuti ndi si buyulile ntembezelo.”​—Eve

[Bokisi/​Itshwantsho]

 Bala Kwa ka Nginilila mu Baibili

1. Shalula chingwe cha ka shingikala mu Baibili cha u nga shaka ku bala ne kwacho. Tembezelela buchenjedu ku hwisisa cha u no bala.

2. Bala cha ka kwagwa ne njele. Bala wa ka biga moyo. Ha u dwilila u bala, kumbulila cha u no bala. Lingisa nkumbulo mu na cha u no bala ne zila ya ka pelela: Lika ku bona zwi no shingikala, ku hwa mahwi e ba no legwa ne kwabo, ihwa nnuwo we zwi mu phepo, nzipo we zojiwa, ne zwingwe sa ikoko. Thama kuti cha ka kwagwa chi boneke zwibuyanana mu nkumbulo uwo!

3. Kumbula ne kwe cha wa bala. Zwibuzwe buzo, dzi nonga:

● Ini Jehova a ka thama kuti ichechi chi be mu Dama lile?

● Ndi bapi ba ka kwagwa ne kwabo ba ngayedziwa, ngono ndi bapi ba no ti chenjedza ne mazwibato abo?

● Ndi nga zwidiyani mu na cha nda bala?

● Cha ka kwagwa cho ndi diyani ne kwa Jehova ne zila ya a no thama zwithu nayo?

4. Tembezela Jehova ne bufutshwanana. U mbudze cha wa zwidiya mu ku bala Baibili kuko ne se kwa u nga shingisa cha wa bala mu buchilo gugo. Bokela Jehova chipo cha a ka ku pa mu zwibaka zose​—Dama lile, Baibili ya ka Yengemala!

[Itshwantsho]

“Dama lenyu luvone gwe makumbo angu, ne tjedza tje zila yangu.”​—Pisalema 119:105.

[Bokisi/​Itshwantsho]

Zwithu Zwi no Zha Gwe Kutanga

A wa ka batika kwazo kwa u singa khone ku tembezela? U sina nako ye ku zwidiya Baibili? Kanjinji ko dwa mu kuti ini chi no zha kutanga mu buchilo gugo.

Thama chilakidzilo yechi: Tola ghaba, u bo u lashila mabgwe makulukulu mu kati. Dila nseche mu ghaba​—kuti li zhale. U nowo be wa chi be ne ghaba li zhele mabgwe ne nseche.

Chi dusa chi mu ghaba, bigila nseche ne mabgwe ntome. Shandulila cha wa bo u thama: Dila nseche mu ghaba gwe kutanga, biga mabgwe pezhugwi kwe nseche. Ha a to ngina wose? Ne kuti ngwenu wa dila nseche mu ghaba gwe kutanga.

Chi no lakidziwa? Baibili i kati: “Mutubule kushalula tjakalulwama kupinda zose.” (Bafilipi 1:10) Ha u tola zwithu zwitukununu se mayedziso u zwi tolela pezhugwi, ha u nga be ne chibaka cha ka lizana ku thama zwithu zwikulukulu​—zwithu zwe bundzimu. Ngono ha u tobela chi no legwa ne Baibili, u nowo wana u na chibaka cha ka lizana ku thama zwithu zwe Bushe gwe Ndzimu ne ku be ne chibaka che mayedziso. Kose ko dwa mu kuti u no longani gwe kutanga mu ghaba lilo!

[Itshwantsho]

Se nti u no bigwa mu ngumba, bukhwinya gugo ne Ndzimu go sheta ku ngwisidzigwa kuti gu kule