Ndi Nga bo Nngwe we Bafakazi ba Jehova Chini?

ZANA

Zwithu zwi no sheteka kuti nthu a bo nngwe we Bafakazi ba Jehova zo thalusiwa na Jesu mu na Matewu 28:19, 20. Ndimana idzedzi dzo lakidza chi no sheteka kuti u be ndiwana wa Kirisiti, ku no shanganyila ku lebeleka, kene ku pa bufakazi, ne kwa Jehova.

Che kutanga: Zwidiye chi no diyiwa ne Baibili. Jesu wa ka pa ndaulo batobeli babe kuti ba ‘yite badiyiwana . . . , ba ba diye.’ (Matewu 28:19, 20) Dama la ka shanduligwa se “badiyiwana” lo dwa “nthu u no zwidiya.” Baibili i na dzithuto, kwazokwazo dzithuto dza Jesu mu ili, dzi na zibiso ya u no sheta kuti u chile buchilo gu no shathisa ne gu na mazwimisilo. (2 Timoti 3:16, 17) To shathila ku ku batsha kuti u zwidiye chi no diyiwa ne Baibili, ku shingisiwa ndongoloso ye thuto ye Baibili ye mahala.—Matewu 10:7, 8; 1 Bathesalonika 2:13.

Che bubili: Shingisa cha u no zwidiya. Jesu wa ka ti bose ba no zwidiya ba ka fanila “kulondolodza tjimwe ne tjimwe tja [a ka ba laya] nge kwatjo.” (Matewu 28:20) Ichechi cho dwa kuti thuto iyo ye Baibili a te i no thama kuti u chenjele koga—i nga na i ka thama kuti u shandule zila ya u no kumbula nayo kwazo kose ne mazwibato awo. (Mishingo 10:42; Baefeso 4:22-29; Bahebera 10:24, 25) Ko dwa kuti ba no hwa ndaulo ya Jesu ba no zwitolela tshwetso ne bukwabo ye ku ntobela ne ku pa machilo abo Jehova Ndzimu.—Matewu 16:24.

Che butatu: Dubikiwa. (Matewu 28:19) Mu Baibili, ku dubikiwa ko fanidzanyiwa ne ku biganyiwa kwe nthu wa fa. (Bona Baroma 6:2-4.) Chifaniso che ku fa mu zila ye buchilo gwa ntolo ne tangisa buchilo gutshwa. Ku dubikiwa kuko, hwu duma mbeli kwe nngwe ne nngwe kuti wa ka tobela zwithu zwibili zwe kutanga zwa ka thalusiwa na Jesu, kakale u no kumbila Ndzimu kuti a ku pe chikumbuludzi chibuyanana.—Bahebera 9:14; 1 Pita 3:21.

Ndi nga ziba chini kuti ndi nga chi dubikiwa?

Budza bakugwana be phuthego. Ba nowo lebesana nawe ku bona kuti a u no hwisisa chi no sheteka, kuti a u no shingisa cha u no zwidiya, ne kuti a wa ka pa Ndzimu buchilo gugo ne ku da kuko.—Mishingo 20:28; 1 Pita 5:1-3.

A zwithu izwezwi zo sheteka bo ne mu bana be Bafakazi ba Jehova?

Ee. To kudza bana bedu ti shingisa “kudiya ne kulaya kwa [Jehova],” se kwa ti no piwa ndaulo ne Baibili. (Baefeso 6:4) Ne kwa ka jalo, ha ba kula, ba ka fanila ku zwithamila tshwetso ne bukwabo ye ku zwidiya, ku amuchila, ne ku shingisa chi no diyiwa ne Baibili, kuti ba fanilike ku dubikiwa. (Baroma 12:2) Nngwe ne nngwe wa ka fanila zwishalulila namato ya a no shaka.—Baroma 14:12; Bagalatiya 6:5.