Cɛtɩm: Yehowa Aseɣɖe Tɩnaa ɩɩtɔkɩ kisimasɩ mbʋ pʋyɔɔ yɔ, paatisiɣ Yesu yɔɔ

 Toovenim: Ðɩkɛ Krɩstʋ ñɩma. Ðɩwɛnɩ tisuu se Yesu Krɩstʋ yɔɔ ɖeke ɛyʋ pɩzɩɣ ɛtɩŋna nɛ ehiɣ ñʋʋ yabʋ.—Tʋma Labʋ 4:12.

 Cɛtɩm: Ɩyɔkʋʋ hɔŋ pɩtɩŋnɩ ɛzɩma iseɣtiɣ ɩ-taa ñɩma se pataatɔɔ kisimasɩ yɔ.

 Toovenim: Ðɩmaɣzɩɣ hɔŋ kɩcɛyɩm yɔɔ siŋŋ nɛ ɖɩtɩŋɩɣnɩ Bibl yɔɔ se ɖɩsɩnɩ ɩ-taa ñɩma se pa-taabalɩyɛ ɛcɛyɩsɩ.

 Cɛtɩm: Ɩfɛyɩnɩ kʋjɔŋ labʋ, laŋhɛzɩyɛ tɛtʋ yɔɔ nɛ wɛtʋ kɩbandʋ “lɩmaɣza” ɛzɩ kisimasɩ kazandʋ tɔɔyaa yɔ.

 Toovenim: Ðɩñakɩ pana se ɖɩkɛ kʋjɔŋ laɖaa nɛ laŋhɛzɩyɛ tɩnaa paa evemiye nɖɩ. (Aduwa 11:25; Roma 12:18) Ɛzɩma ɖɩlakɩ ɖe-kediɣzisi nɛ ɖisusuu tɔm yɔ, pɩlakɩ nɔɔ kʋɖʋmaɣ nɛ Yesu tɔm tʋnɛ: “Paha-mɩ falaa, ɩha falaa.” (Maatiyee 10:8) Pɩtasɩ lɛ, ɖɩhɔŋ ɛyaa lɩmaɣza nɛ ɖiwokini Ɛsɔ Kewiyaɣ ŋga ke-ɖeke kakaɣ kɔnʋʋ laŋhɛzɩyɛ siŋŋ tɛtʋ yɔɔ yɔ, kɔ-yɔɔ.—Maatiyee 10:7.

•   Yesu ha-ɖʋ paɣtʋ se ɖɩtɔzʋʋ ɛ-sɩm yɔɔ, pɩtɩkɛ ɛ-lʋlʋʋ yɔɔ.—Luka 22:19, 20.

•   Yesu apostoloowaa nɛ ɛ-tɔmkpɛlɩkɩyaa kajalaɣ ñɩma pataatɔkɩ kisimasɩ. Takayaɣ ŋga payaɣ New Catholic Encyclopedia yɔ, kɔyɔɔdaa se “pɩnaɣ 243 Ð.A taa papaɣzɩ tɔɔʋ kisimasɩ kazandʋ” pʋ-tɔbʋʋ lɛ se apostoloo kɛdɛzaɣ ñɩnʋ sɩba nɛ pɩcɛzɩ pɩnzɩ mɩnʋʋ pʋcɔ papaɣzɩ tɔɔʋ kazandʋ ndʋ.

•   Nabʋyʋ fɛyɩ nɛ pɩwɩlɩɣ se Saŋayɩŋ fenaɣ kɩyakʋ 25 ŋgʋ wiye palʋlɩ Yesu, patɩma kɩyakʋ ŋgʋ palʋlɩ-ɩ yɔ, Bibl taa.

•   Ðɩnawa se kisimasɩ kazandʋ ɛɛkɛdɩɣnɩ Ɛsɔ mbʋ pʋyɔɔ yɔ, tɩlɩnɩ sɩɩnaa layaa sɔnzɩ taa.—2 Kɔrɛntɩ 6:17.

 Ɛyaa sakɩyɛ tɔkɩ kisimasɩ kazandʋ, ŋgʋ pana mbʋ se tɩlɩnɩ sɩɩnaa layaa sɔnzɩ taa nɛ tɩɩlakɩ nɔɔ kʋɖʋmaɣ nɛ ndʋ Bibl yɔɔdʋʋ yɔ. Ɛyaa mba papɩzɩɣ pɔpɔzɩ se: Ɛbɛ yɔɔ pɩcɛyaa se Krɩstʋ mba iyele nɛ pe-wezuu caɣʋ wɛɛ ndɩ nɛ ɛyaa lalaa mbʋ? Ye ɛyʋ ɛtɔkɩ kisimasɩ pɩwɛɛkɩɣ we?

 Bibl seɣtiɣ-ɖʋ se ɖɩlabɩnɩ tʋmɩyɛ ɖa-maɣzɩm nɛ ɖɩtɩlɩ mbʋ “pɩwɛ camɩyɛ nɛ piɖe Ɛsɔ ɛzɩdaa” yɔ. (Roma 12:1, 2) Kɩwɩlɩɣ-ɖʋ ɖɔɖɔ se pɩwɛɛ se ɖiyele nɛ toovenim tɔm mʋ ñɩm ɖɛ-ɛzɩdaa. (Yohanɛɛsɩ 4:23, 24) Pʋyɔɔ lɛ, ɖɩmaɣzɩɣ ndʋ lalaa maɣzɩɣ ɖɔ-yɔɔ yɔ, tɩ-yɔɔ, ɛlɛ ɖɩlakɩnɩ tʋmɩyɛ Bibl paɣtʋ kila, paa piyeki se ɖe-wezuu caɣʋ ɛwɛɛ ndɩ nɛ lalaa yɔ.

 Paa ɖa-maɣmaɣ ɖɩɩtɔkɩ kisimasɩ kazandʋ yɔ, ɖɩnawa se paa ɛyʋ weyi ɛwɛnɩ waɖɛ se ɛlɩzɩ mbʋ ɛlakɩ hɔɔlʋʋ ŋgʋ kɩ-taa yɔ; pʋyɔɔ lɛ ɖɩñaŋ mba pa-lɩmaɣza wɛ ndɩ nɛ ɖa-ñɩna yɔ. Ðɩɩkaɖɩɣnɩ lalaa alɩwaatʋ ndʋ pɔtɔkɩ kisimasɩ kazandʋ yɔ.