Payaɣaɣ Izrayɛɛlɩ abalʋ nɔɔyʋ se Ɛlɩkaana nɛ ɛɛwɛnɩ halaa 2. Payaɣ halʋ lɛlʋ Hana nɛ payaa lɛlʋ se Peniina. Ɛlɩkaana kaasɔɔlɩ Hana tɔm pɩdɩɩfɛyɩ. Peniina woŋaɣ Hana paa ɖooye, mbʋ pʋyɔɔ yɔ ɛlɛ fɛyɩnɩ pɩɣa, ŋgʋ Peniina ñaawɛnɩ piya sakɩyɛ. Paa pɩnaɣ ŋga lɛ, Ɛlɩkaana wokini ɛ-hɔʋ Ɛsɔ sɛtʋ kɩɖanɖʋʋ ŋgʋ kɩɩwɛ siloo yɔ kɩ-tɛɛ se kɩsɛɛ Ɛsɔ. Paawobi peeɖe pɩnaɣ nakɛyɛ lɛ, ɛna se ɛ-halʋ kʋsɔɔlʋ Hana wɛ ɛsɩñɩŋɩyɛ taa. Nɛ eheyi-i se: “Mentendi-ŋ Hana taawii, paa ŋfɛyɩnɩ pɩɣa yɔ, ma mɛwɛɛ! Mɔnsɔɔlɩ-ŋ pɩdɩɩfɛyɩ.”

Pɛwɛ peeɖe lɛ, Hana pɩsɩ e-ɖeke Ɛsɔ sɛtʋ kɩɖanɖʋʋ tɛɛ se ɛtɩmnɩ Ɛsɔ. Etendi Yehowa nɛ wiluu se ɛsɩnɩ-ɩ. Eheyi Yehowa se: “Ye ŋha-m abalɩbɩɣa yɔ, mɛncɛlɩɣ-ŋ kɛ nɛ kala ña-tʋmɩyɛ ke-wezuu caɣʋ kpeekpe taa.”

Cɔjɔ kɩlɩm Elii na Hana eɖiɣni wiluu lɛ, ɛmaɣzɩ se sʋlʋm kʋʋnɩ-ɩ. Hana cosi-i se: “Ðajaa, pɩtɩkɛ sʋlʋm kʋʋnɩ-m. Kaɖɛ sɔsɔɖɛ naɖɩyɛ taa mɛwɛɛ nɛ mɔyɔɔdʋʋnɩ Yehowa se ɛsɩnɩ-m.” Peeɖe Elii nawa se ɛtɩyɔɔdɩ camɩyɛ nɛ ɛpɩsɩnɩ-ɩ se: “Ɛsɔ ɛsɩnɩ-ŋ nɛ ɛha-ŋ mbʋ ŋñɩnɩɣ yɔ.” Hana laŋɩyɛ hɛɛ nɛ ɛɖɛɛ ekpe. Pɩtɩtalɩ pɩnaɣ pʋcɔ nɛ  ɛlʋlɩ abalɩbɩɣa, nɛ ɛyaa-kɛ se Samɩyɛɛlɩ. Maɣzɩ nɛ ŋna ɛzɩma Hana taa kaalabɩ leleŋ siŋŋ yɔ!

Hana tɩsɔɔ tɔm ndʋ eeheyi Yehowa yɔ tɩ-yɔɔ. Ɛtɩɩcɛbɩ Samɩyɛɛlɩ hɩɖɛ lɛ, ewoni-i se ɛla tʋmɩyɛ Ɛsɔ sɛtʋ kɩɖanɖʋʋ tɛɛ. Eheyi Elii se: “Abalɩbɩɣa ŋga maatɩmnɩ Yehowa se ɛha-m kɛ yɔ, ŋga yɔ. Kakaɣ labʋ Yehowa tʋmɩyɛ ke-wezuu caɣʋ kpeekpe taa.” Ɛlɩkaana nɛ Hana pɛñɛyaɣ tokonaa kɩfama nɛ powokini Samɩyɛɛlɩ paa pɩnaɣ ŋga. Nɛ Yehowa tasɩ wazʋʋ Hana nɛ ɛlʋlɩ abalɩbiya naadozo nɛ halɩbiya naalɛ.