Pɩkɔm pʋwayɩ lɛ, Izrayɛɛlɩ mba ɖaɣnɩ haʋ siɣye Yehowa nɛ papaɣzɩ sɛʋ cɛtɩm ɛsɔnaa. Nɛ Madiyaŋ mba mɩlaɣ Izrayɛɛlɩ mba kpɩna nɛ pɛwɛɛkɩɣ pɔ-tɔɔnasɩ hayɩm taa; palabɩ mbʋ pɩnzɩ lʋbɛ. Pʋyɔɔ lɛ, Izrayɛɛlɩ mba seɣaɣ nɛ pɛmɛlɩɣ ɛwasɩ pɔŋ taa yaa pakpaɣaɣ pʋŋ ñʋŋ taa se Madiyaŋ mba itaahiɣ-wɛ. Petendi Yehowa se ɛya pa-ñʋʋ. Nɛ Yehowa tiyi e-tiyiyu nɔɔyʋ evebu weyi payaɣ se Gideyɔɔ yɔ ɛ-cɔlɔ. Tiyiyu ɛnʋ eheyi Gideyɔɔ se: “Yehowa lɩzɩ-ŋ se ŋkɛ you laɖʋ sɔsɔ nɔɔyʋ.” Nɛ Gideyɔɔ pɔzɩ-ɩ se: “Ɛzɩma mankaɣ labʋ nɛ maya Izrayɛɛlɩ mba ñʋʋ? Mɛnfɛyɩnɩ ɖoŋ nɩɩyɩ.”

Ɛbɛ kaɣ sɩnʋʋ Gideyɔɔ nɛ ɛna se Yehowa lɩzɩnɩ-ɩ? Ɛsɩ heu tɔnɛ naɖɩyɛ tataa nɛ eheyi Yehowa se: “Ye cee tanaŋ tɛɛ ŋlaba nɛ ɖoluu kpa tɔnɛ ɖɩnɛ ɖɩ-yɔɔ ɛlɛ wɩlɩŋ wɛɛ tataa yɔ, ɖɩnɛ ɛlɛ manaɣ se toovenim lɛ ŋlɩzɩ-m se maya Izrayɛɛlɩ ñʋʋ.” Tɛʋ fema lɛ, lɩm wɛ tɔnɛ yɔɔ cɔɔɔ, ɛlɛ tataa nɛ wɩlɩŋ. Gideyɔɔ ɖaɣnɩ pɔzʋʋ Yehowa se ɛla nɛ tɛʋ tasɩɣ fem lɛ, lɩm wɛɛ tataa, ɛlɛ pɩtaawɛɛ tɔnɛ yɔɔ. Yehowa cosi ɖɔɖɔ ɛ-adɩma ana a-yɔɔ nɛ Gideyɔɔ na se Yehowa lɩzɩ-ɩ. Peeɖe ekpeɣli ɛ-ɛyaa se pɔñɔɔzɩ pa-tɩ nɛ poyooni Madiyaŋ mba.

 Yehowa heyi Gideyɔɔ se: “Mankaɣ sɩnʋʋ Izrayɛɛlɩ mba nɛ pawa you. Ɛlɛ ye ñɔ-sɔɔjanaa ɩɖɔ sakɩyɛ yɔ, ɩpɩzɩɣ nɛ ɩmaɣzɩ se mɩ-maɣmaɣ mi-ɖoŋ taa ɩwabɩ you. Pʋyɔɔ lɛ, heyi mba sɔɔndʋ kpaɣ-wɛ yɔ se papɩsɩ ɖɩɣa.” Ɛyɔɔdɩ mbʋ lɛ, sɔɔjanaa 22000 pɩsɩ ɖɩɣa nɛ pɩkazɩ 10000. Ɛlɛ Yehowa heyi-i se: “Sɔɔjanaa mba pɩkazaa yɔ, pakɩlɩ ɖɔʋ. Tini-wɛ pɔɔ taa nɛ ŋheyi-wɛ se pɔñɔɔ lɩm. Nɛ mba pakpazɩɣ pɛ-ɛsa nɛ pɔcɔŋnɩ koyindu nʋmɔʋ taa alɩwaatʋ ndʋ peɖiɣni ñɔʋ lɩm yɔ, pe-ɖeke pɩwɛɛ se powolo you.” Ɛyaa 300 ɖeke pɩzɩna nɛ pala mbʋ. Nɛ Yehowa heyi-i se sɔɔjanaa cabɩ waa mba, mba kaɣnɩ wabʋ Madiyaŋ sɔɔjanaa 135000.

Ðoo yuwa lɛ, Yehowa heyi Gideyɔɔ se: “Alɩwaatʋ talaa se ŋyooni Madiyaŋ mba.” Gideyɔɔ cɛlɩ ɛ-sɔɔjanaa nɔndɔŋ nɛ peeɣsi sɔsɔsɩ nzɩ sɩ-taa nɛ miŋ koolonzi yɔ. Nɛ pʋwayɩ lɛ, eheyi-wɛ se: “Ɩcɔnɩ-m camɩyɛ nɛ ɩla ɖeyi ɖeyi ɛzɩ malakʋʋ yɔ.” Gideyɔɔ hʋlɩ nɔndɔʋ, ɛyɔkɩ peɣa ŋga ɛɖɔkaa yɔ, nɛ ɛkpazɩ e-miŋ kooloŋa nɛ ɛma kubuka se: «Yehowa nɛ Gideyɔɔ pa-laɣɖɛ!» Nɛ ɛ-sɔɔjanaa 300 waa la mbʋ ɖɔɖɔ. Sɔɔndʋ kpa Madiyaŋ mba nɛ pamɩzɩ ɖama nɛ weyi ɛkatɩɣ e-koobu lɛ, pɩlakɩ-ɩ ɛzɩ e-koyindu yɔ, nɛ pakʋ ɖama. Yehowa tasɩ sɩnʋʋ Izrayɛɛlɩ mba nɛ pawa po-koyindinaa.