Pakpaɣaɣ Izrayɛɛlɩ mba nɛ ɖoŋ nɛ palakɩ tʋma ɛzɩ yomaa yɔ. Pʋyɔɔ Yehowa tiyi Moyizi nɛ Aarɔɔnɩ se powolo peheyi Farawɔɔ se: “Yele man-samaɣ nɛ kowolo kɛsɛ-m kañɩmbusuu taa.” Farawɔɔ cosini cajayɛ se: “Man-paa fɛyɩnɩ tɔm ndʋ Yehowa yɔɔdʋʋ yɔ, nɛ maayeki Izrayɛɛlɩ mba nɛ pɛɖɛɛ.” Pʋwayɩ lɛ, Farawɔɔ ñɩɣ Izrayɛɛlɩ mba yɔɔ nɛ palakɩ tʋma wena awɛ ɖoŋ nɛ pɩkɩlɩ kajalaɣ ñɩna yɔ. Nɛ Yehowa ɖʋ ɛ-taa se ɛwɩlɩɣ Farawɔɔ lɔŋ pazɩ. Ŋsɩm ɛzɩma ɛkaɣ-ɩ wɩlʋʋ lɔŋ ɛnɩ yɔ? Ɛkaɣ kɔnʋʋ asɛyɩŋ 10 Ejipiti mba yɔɔ. Yehowa heyi Moyizi se: “Farawɔɔ kizaa se eewelisiɣni-m. Cee tanaŋ tɛɛ, ɛkaɣ wobu Niili Pɔɔ nɔɔ. Wolo ɛ-cɔlɔ peeɖe nɛ ŋheyi-i se Niili taa lɩm kpeekpe kaɣ pɩsʋʋ calɩm mbʋ pʋyɔɔ yɔ ekizaa se eeyeki man-samaɣ nɛ kɛɖɛɛ.” Moyizi wolo Farawɔɔ cɔlɔ ɛzɩ Yehowa heyuu-i yɔ. Aarɔɔnɩ kpaɣ ɛ-ɖaʋ nɛ ɛma Niili Pɔɔ Farawɔɔ ɛsɩndaa nɛ lɩm pɩsɩ calɩm. Nɛ Niili lɩm paɣzɩ sɔŋ lɩʋ, mbʋ pʋyɔɔ yɔ, kpakpasɩ sɩba nɛ lɩm mbʋ nɔɔyʋ taapɩzɩɣ se ɛtasɩ-pʋ ñɔʋ. Ɛlɛ Farawɔɔ ɖɔkɩ ñɩtʋ se eeyeki Izrayɛɛlɩ mba nɛ pɛɖɛɛ.

 Kɩyakɩŋ 7 wayɩ lɛ, Yehowa ɖaɣnɩ tiyuu Moyizi Farawɔɔ cɔlɔ se eheyi-i tɔm tʋnɛ: “Ye ŋtiyele man-samaɣ nɛ kɛɖɛɛ yɔ, meyeki nɛ saya su Ejipiti ɛjaɖɛ taa ɖo.” Farawɔɔ tasɩ kizuu se eeyeki samaɣ nɛ kɛɖɛɛ nɛ pʋyɔɔ lɛ, Aarɔɔnɩ kpazɩ ɛ-ɖaʋ nɛ ɛsɔdaa nɛ saya paɣzɩ suu Ejipiti ɛjaɖɛ taa. Saya kaawɛ paa le, ɖɩsɩ taa, ɛyaa ɖɩhɩnɩyɛ taa nɛ ñanzɩ taa. Farawɔɔ heyi Moyizi se etendi Yehowa nɛ asɛyʋʋ ŋgʋ kɩsɩɩ tɩnaɣ. Nɛ Farawɔɔ tɔ se eyeki Izrayɛɛlɩ mba nɛ pɛɖɛɛ. Yehowa yele nɛ asɛyʋʋ ŋgʋ, kɩsɩɩ tɩnaɣ nɛ Ejipiti mba kuu saya wena asɩba yɔ nɛ pakaa huwa huwa. Nɛ sɔŋ ñɛyɩnɩ ɛjaɖɛ tɩŋa yem. Ɛlɛ Farawɔɔ ɖaɣnɩ kizuu se samaɣ ɛtaaɖɛɛ.

Pʋwayɩ lɛ, Yehowa heyi Moyizi se: “Yele nɛ Aarɔɔnɩ kpaɣ ɛ-ɖaʋ nɛ ɛmabɩnɩ tɛtʋ, nɛ mʋzʋʋ pɩsɩ pɔtʋ.” Aarɔɔnɩ tɩɩlabɩ mbʋ lɛ, pɔtʋ lɩɩ paa le. Farawɔɔ samaɣ taa nabɛyɛ wolo nɛ peheyi-i se: “Asɛyʋʋ kʋnɛ, Ɛsɔ cɔlɔ kɩlɩnaa.” Ɛlɛ Farawɔɔ ɖaɣnɩ kizuu kpem se eeyeki Izrayɛɛlɩ mba nɛ pɛɖɛɛ.