Yesu nɛ apostoloowaa patɩŋnɩ Kidrɔɔnɩ Fɛɛʋ taa nɛ pakpa Oliivi Pʋʋ yɔɔ. Ðoo kaatayɩ kɩmaŋ nɛ fenaɣ kaañaɣ camɩyɛ. Pɔkɔm nɛ patalɩ Jɛtɩsemaanee kaɖaɣ taa lɛ, Yesu heyi-wɛ se: «Ɩcaɣ cɩnɛ nɛ ifeŋiɣ.» Peeɖe Yesu tuzi ɛ-tɩ pazɩ nɛ eluŋ ɛ-nʋmbɔla yɔɔ. Ɛɛwɛ ɛsɩñɩŋɩyɛ taa siŋŋ nɛ ɛtɩmnɩ Yehowa se: «Yele nɛ ñɔ-sɔɔlɩm la.» Nɛ Yehowa tiyi e-tiyiyu nɔɔyʋ nɛ ɛkpazɩ Yesu ɖoŋ. Yesu pɩsaa nɛ ɛkɔɔ lɛ, ɛmaɣnɩ apostoloowaa 3, peɖiɣni ɖou. Yesu heyi-wɛ se: “Ife! Pɩtɩkɛ ɖom alɩwaatʋ yɔ! Alɩwaatʋ talaa se pakpa-m nɛ paɖʋzɩ mon-koyindinaa nesi tɛɛ.”

Pitileɖi lɛ Yudaasɩ talɩ, ɛ nɛ samaɣ sɔsɔɔ nakɛyɛ, kɔɖɔkɩ sɩsɩ nɛ ɖaŋ. Ɛsɩm ɖenɖe ɛpɩzɩɣ nɛ ɛna Yesu yɔ, mbʋ pʋyɔɔ yɔ, ɛ nɛ Yesu nɛ apostoloowaa lalaa powokaɣ lone nɖɩ ɖɩ-taa ɖoŋ ɖoŋ. Yudaasɩ kaaheyi sɔɔjanaa se ɛsɩɣnɩ-wɛ nɛ patɩlɩ Yesu. Pʋyɔɔ ɛɖɔma nɛ ɛñɔtɩnɩ Yesu nɛ ɛtɔ se: “Wɩlɩyʋ, mɛnsɛwa,” nɛ ɛmʋzɩ ɛ-lɩkpaɣzaɣ yɔɔ. Nɛ Yesu pɔzɩ-ɩ se: “Yudaasɩ, ŋlɩɣ ma-wayɩ nɛ ma-lɩkpaɣzaɣ yɔɔ mʋzʋʋ na?”

Yesu ɖɔ nɛ ɛñɔtɩnɩ samaɣ nɛ ɛpɔzɩ-kɛ se: «Anɩ ɩñɩnɩɣ?» Nɛ pocosi se: «Yesu Nazarɛɛtɩ tʋ.» Nɛ eheyi-wɛ se: «Ma yɔ.» Nɛ papɩsɩnɩ wayɩ nɛ pɔtɔlɩ. Yesu ɖaɣnɩ samaɣ pɔzʋʋ se: «Anɩ ɩñɩnɩɣ» ye? Nɛ paɖaɣnɩ-ɩ cosuu se: «Yesu Nazarɛɛtɩ tʋ.» Yesu heyi-wɛ se: “Meheyi-mɩ se ma yɔ. Iyele ɛyaa panɛ nɛ pɛɖɛɛ.”

Pɩyɛɛrɩ na mbʋ pɩwɛɛ nɛ pɩlakɩ yɔ lɛ, ɛlɩzɩ ɛ-sɩɣa nɛ ɛsɛtɩ cɔjɔ kɩlɩm lɩmɖʋyʋ weyi payaɣ se Malɩkuusi yɔ, ɛ-nɩŋgbaŋʋʋ. Peeɖe Yesu tukuni ɛlɛ nɩŋgbaŋʋʋ nɛ ɛwaa-ɩ. Pʋwayɩ lɛ, eheyi Pɩyɛɛrɩ se: “Pɩsɩnɩ ña-sɩɣa ko-huyuu taa. Ye ŋkpakɩɣ sɩɣa ɛyaa yɔɔ yɔ, ŋga  ŋkaɣ sɩbɩnʋʋ ɖɔɖɔ.” Sɔɔjanaa kpa Yesu nɛ pɔhɔkɩ e-nesi, nɛ apostoloowaa se. Pʋwayɩ lɛ, powoni-i cɔjɔ sɔsɔ Ana tɛ. Ana pɔzɩ Yesu tɔm nɛ pʋwayɩ lɛ, ewoni-i Cɔjɔ Kɩlɩm Kayifu ɖɩɣa taa. Ɛlɛ ɛbɛ talɩ apostoloowaa?