Yesu kɔm tɛtʋ yɔɔ se esusi Ɛsɔ Kewiyaɣ tɔm kɩbandʋ. Yehowa ha Yesu fezuu kiɖeɖeu se ɛla piti lakasɩ nɛ ɛtɩŋnɩ sɩ-yɔɔ nɛ ɛwɩlɩ mbʋ ɛkaɣ labʋ alɩwaatʋ ndʋ ɛpɩsɩɣ Wiyaʋ yɔ. Ɛpɩzɩɣ nɛ ɛwaa kʋdɔmɩŋ tɩŋa. Lona wena a-taa payɩ ewokaɣ yɔ, ɛyaa wokaɣ ɛ-cɔlɔ se ɛsɩnɩ-wɛ nɛ ɛwaa pa-kʋdɔmɩŋ. Eyeba nɛ yʋlʋmaa paɣzɩ naʋ, tandamaa paɣzɩ nɩʋ, kaakalasɩ paɣzɩ ɖɔm nɛ aliikenaa hiɣ ñʋʋ yabʋ. Paa ɛyaa itukuni e-toko nɔɔ maɣmaɣ yɔ, pɔ-yɔɔ cɛkɩ. Hɔɔlɩŋ weyi ɩ-taa payɩ Yesu wokaɣ yɔ, ɛyaa tɩŋaɣ-ɩ. Yesu tɩɖɔɔnɩ pa-taa nɔɔyʋ, halɩ pɩkpɛndɩnɩ alɩwaatʋ ndʋ ɛñɩnaɣ se ɛwɛɛ e-ɖeke yɔ.

Kɩyakʋ nakʋyʋ, ɛyaa nabɛyɛ kɔnɩ kaakalaɣ nakɛyɛ ɖɩɣa ŋga ka-taa Yesu kaawɛ yɔ. Ɛlɛ ɛyaa kaasu ɖɩɣa ŋga ka-taa nɛ pataapɩzɩɣ se pasʋʋ. Pʋyɔɔ palabɩ pɔʋ nakʋyʋ kuduyuu ñʋʋ taa nɛ petisi kaakalaɣ ŋga Yesu cɔlɔ. Peeɖe Yesu heyi-kɛ se: ‘Kʋyɩ nɛ ŋɖɔ.’ Kakʋyaa nɛ kapaɣzɩ ɖɔm lɛ, pɩɖɩɣzɩ ɛyaa siŋŋ.

Alɩwaatʋ lɛɛtʋ taa, Yesu sʋwaɣ kɔfɩ nakʋyʋ taa lɛ, canasɩ hiu sɩŋ poliŋ taa nɛ sikoo nɛ siheyi-i se: ‘Yesu, ya ɖa-ñʋʋ.’ Alɩwaatʋ ndʋ tɩ-taa lɛ, pataahaɣ waɖɛ canasɩ se sɩñɔtɩnɩ ɛyaa lalaa. Yesu heyi canasɩ nzɩ se siwolo templo taa, mbʋ pʋyɔɔ yɔ Yehowa paɣtʋ pɔzaɣ canasɩ nzɩ pawa sɩ-kʋdɔŋ yɔ se sɩla mbʋ. Sɩkpaɣ nʋmɔʋ nɛ sɩɖɛɣ lɛ, sɩna se sɩ-yɔɔ cɛba. Canasɩ nzɩ, sɩ-taa nakɛyɛ nawa se kɔ-yɔɔ cɛba lɛ, kapɩsɩ  kɔkɔɔ Yesu cɔlɔ se kɛsɛɛ-ɩ nɛ kasa ɖɔɖɔ Ɛsɔ. Canasɩ nzɩ, sɩ-taa kʋɖʋmaɣ ɖeke pɩsɩna nɛ kɛsɛɛ Yesu.

Halʋ nɔɔyʋ maɣzaɣ se ɛ-tɔm tɛma, mbʋ pʋyɔɔ yɔ ɛhɩnɩ kʋdɔŋ pɩnzɩ 12. Ɛkɔmnɩ Yesu wayɩ nɛ ɛsʋʋ samaɣ taa nɛ etukuni e-toko nɔɔ. Nɛ ɛ-yɔɔ cɛ kpaagbaa. Pɩlabɩ mbʋ lɛ, Yesu pɔzɩ se: “Atukuni mon-tokonaa?” Sɔɔndʋ kpa halʋ ɛnʋ, ɛlɛ ɛɖɔ nɛ ɛñɔtɩnɩ Yesu nɛ eheyi-i toovenim. Yesu hɛzɩ ɛ-laŋɩyɛ nɛ eheyi-i se: ‘Mɛn-pɛlɛ, wobini laŋhɛzɩyɛ.’

Tʋmlaɖʋ sɔsɔ weyi payaɣ-ɩ se Yayiruusi yɔ, ewoba nɛ etendi Yesu se: ‘Kɔɔ man-ɖɩɣa taa! Pɩwɩɣ mɛn-pɛlɛ pɩdɩɩfɛyɩ.’ Ɛlɛ pɛlɛ ɛnʋ ɛsɩba pʋcɔ nɛ Yesu talɩ Yayiruusi tɛ. Yesu talaa lɛ, ɛna se ɛyaa sakɩyɛ wobi peeɖe se pɛhɛzɩ Yayiruusi hɔʋ taa mba laŋɩyɛ. Yesu heyi-wɛ se: ‘Itaawii, koɖou kiɖou.’ Pʋwayɩ lɛ, ɛɖɔkɩ pɩɣa ŋga ke-nesi nɛ ɛtɔ se: “Pɩɣa peleɣa ña, kʋyɩ!” Kakʋyɩ kpaagbaa nɛ Yesu heyi ka-lʋlɩyaa se paha-kɛ nabʋyʋ nɛ kɔtɔɔ. Maɣzɩ nɛ ŋna ɛzɩma ka-lʋlɩyaa taa kaalabɩ leleŋ siŋŋ yɔ!