TƆM KƖKPƐLƖKƖTƲ 60
Wolo pɩ-yɔɔ nɛ ŋɖɛɣnɩ ɛsɩndaa
Bibl kpɛlɩkʋʋ ɖʋtʋ tʋnɛ tɩsɩnɩ-ŋ nɛ ŋkpɛlɩkɩ tɔm sakɩyɛ Yehowa yɔɔ. Tɔm ndʋ ŋkpɛlɩkaa yɔ, tiyeba nɛ ŋsɔɔlɩ-ɩ pɩdɩɩfɛyɩ nɛ pɩtɩla yɔ tiyeba nɛ ŋkpaɣ ña-tɩ nɛ ŋha-ɩ nɛ pamɩyɩsɩ-ŋ lɩm. Ye pɩtɩkɛ mbʋ yɔ, pɩtɩla ŋwɛɛ nɛ ŋmaɣzɩɣ se pɩkazɩ pazɩ lɛ, ŋhaɣ ña-tɩ nɛ pamɩyɩsɩ-ŋ lɩm. Ɛlɛ pɩwɛɛ se ŋwolo pɩ-yɔɔ nɛ ŋɖɛɣnɩ ɛsɩndaa ña-lɩm mɩyɩsʋʋ wayɩ. Ŋpɩzɩɣ nɛ ŋwolo pɩ-yɔɔ nɛ ŋñɔtʋʋnɩ Yehowa ñe-wezuu caɣʋ kpeekpe taa. Ɛzɩma ŋpɩzɩɣ nɛ ŋla mbʋ?
1. Ɛbɛ yɔɔ pɩwɛɛ se ŋwolo pɩ-yɔɔ nɛ ŋcɛyɩsɩɣ ña nɛ Yehowa mɩ-taabalɩyɛ?
Pɩpɔzʋʋ se ɖɩñaɣ pana siŋŋ nɛ ɖɩcɛyɩsɩɣ ɖa nɛ Yehowa ɖa-taabalɩyɛ. Ɛbɛ yɔɔ? «Nɛ pɩsa nɛ ɖitaale nʋmɔʋ wiɖiyi kaaʋ.» (Ebree mba 2:1) Ɛbɛ pɩzɩɣ nɛ pɩsɩnɩ-ɖʋ nɛ ɖɩɖɔkɩ ɖe-siɣsiɣ wɛtʋ nɛ ɖiwolo pɩ-yɔɔ nɛ ɖɩsɛɣ Yehowa? Pɩpɔzʋʋ se ɖisusuu tɔm nɛ kpekpeka nɛ ɖɩñɩnɩɣ ɖɔɖɔ nʋmɔŋ lɛɛŋ weyi ɩ-yɔɔ pɩwɛɛ se ɖɩtɩŋna nɛ ɖɩsɛɛ Ɛsɔ nɛ pɩkɩlɩ yɔ. (Kalɩ Filiipi mba 3:16.) Nabʋyʋ ɛɛpɩzɩɣ nɛ pɩha-ɖʋ taa leleŋ ɖe-wezuu caɣʋ taa nɛ pɩkpaɖɩ Yehowa sɛtʋ.—Keɣa 84:10.
2. Ɛbɛ ɖɔɖɔ pɩwɛɛ se ŋwolo pɩ-yɔɔ nɛ ŋlakɩ?
Paa Bibl kpɛlɩkʋʋ ɖʋtʋ tʋnɛ tɩsɩɣ tɩnaɣ yɔ, pɩpɔzʋʋ se ŋwolo pɩ-yɔɔ nɛ ŋcakɩ wezuu ɛzɩ Krɩstʋ tʋ yɔ. Bibl yɔɔdaa se pɩpɔzʋʋ se «[ɖisuu] ɛyʋtʋ kɩfatʋ.» (Efɛɛzɩ mba 4:23, 24) Ye ŋwobi pɩ-yɔɔ nɛ ŋkpɛlɩkɩɣ Ɛsɔtɔm nɛ ŋwoki kediɣzisi yɔ, ŋkpɛlɩkɩɣ tɔm kɩfatʋ sakɩyɛ Yehowa yɔɔ nɛ ŋtɩlɩ ɖɔɖɔ ɛ-wɛtʋ nɛ pɩkpaɖɩ. Ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋmaɣzɩnɩ ɛ-wɛtʋ camɩyɛ ñe-wezuu caɣʋ taa yɔ. Wolo pɩ-yɔɔ nɛ ŋlakɩ lɛɣzɩtʋ ndʋ payɩ pɩpɔzʋʋ yɔ nɛ ŋyele nɛ Yehowa taa la leleŋ.
3. Ɛzɩma Yehowa kaɣ-ŋ sɩnʋʋ se ŋwobini ɛsɩndaa?
Bibl yɔɔdaa se: «Ɛsɔ . . . maɣmaɣ [kaɣ-mɩ] tɛzʋʋ falɩsʋʋ. Ɛkaɣ labʋ nɛ ɩɖɔkɩ kpam, ɛkaɣ labʋ nɛ ɩkpa ɖoŋ, ɛkaɣ yebu nɛ ɩka camɩyɛ.» (1 Pɩyɛɛrɩ 5:10) Ða-tɩŋa payɩ ɖɩkatɩɣ takɩm. Ɛlɛ Yehowa haɣ-ɖʋ mbʋ pɩpɔzʋʋ-ɖʋ yɔ se pɩsa nɛ ɖɩɖɔkɩ ɖa-tɩ takɩm taa. (Keɣa 139:23, 24) Ɛlabɩ tamaɣ se ɛkaɣ yebu nɛ ŋsɔɔlɩ nɛ ɛha-ŋ ɖoŋ nɛ ŋwolo pɩ-yɔɔ nɛ ŋsɛɛ-ɩ. —Kalɩ Filiipi mba 2:13.
TAZƖ NƐ PILIMI
Tazɩ nɛ ŋna mbʋ pɩpɩzɩɣ pɩsɩnɩ-ŋ nɛ ŋwolo pɩ-yɔɔ nɛ ŋɖɛɣnɩ ɛsɩndaa yɔ nɛ ɛzɩma Yehowa kaɣ-ŋ wazʋʋ yɔ.
4. Wolo pɩ-yɔɔ nɛ ŋyɔɔdʋʋnɩ ña-taabalʋ kɩbanʋ ɖoŋ ɖoŋ
Adɩma nɛ Bibl kpɛlɩkʋʋ sɩnɩ-ŋ nɛ ŋpɩsɩ Yehowa taabalʋ. Ɛzɩma tʋma ana apɩzɩɣ asɩnɩ-ŋ nɛ ŋñɔtɩnɩ-ɩ nɛ pɩkɩlɩ?
Ɩkalɩ Keɣa 62:8, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma pɩwɛɛ se ŋñɔɔzɩ ña-adɩma nɛ pɩsa nɛ ña nɛ Yehowa mɩ-taabalɩyɛ cɛyɩsɩ camɩyɛ?
Ɩkalɩ Keɣa 1:2 nɛ pɩtɛɛ tɔm, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma pɩwɛɛ se ŋñɔɔzɩ ñe-Bibl kalʋʋ nɛ pɩsa nɛ ña nɛ Yehowa mɩ-taabalɩyɛ cɛyɩsɩ camɩyɛ?
Ɛbɛ pɩwɛɛ se ŋla nɛ ña-tɩ yɔɔ Bibl kpɛlɩkʋʋ wazɩ-ŋ nɛ pɩkɩlɩ? Pɩsa nɛ ɩtɩlɩ lɩmaɣza wena apɩzɩɣ nɛ asɩnɩ-mɩ yɔ a-taa naayɛ lɛ, ɩcɔnɩ VIDEO; nɛ pʋwayɩ lɛ ɩtazɩ tɔm ndʋ tɩkɔŋ yɔ tɩ-taa.
-
Video taa lɔŋ tasʋʋ mbʋ ŋpɩzɩɣ nɛ ŋlabɩnɩ tʋmɩyɛ?
-
Tɔm ñʋŋ weyi ɩ-taa ŋsɔɔlaa se ŋtazɩ?
5. Ðʋ ña-tɩ fezuu taa kaɖʋsɩ
Ye ŋɖʋʋ ña-tɩ kaɖʋsɩ Yehowa sɛtʋ taa yɔ, pɩsɩɣnɩ-ŋ nɛ ŋwobini ɛsɩndaa. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Cameron ɖʋ ɛ-tɩ fezuu taa kaɖʋsɩ lɛ, wazasɩ nzɩ ehiɣaa?
Pɩtɩkɛ paa weyi ɛpɩzɩɣna nɛ ɛkʋyɩ ɛ-ɛjaɖɛ taa nɛ ewolo ɛjaɖɛ lɛɛɖɛ taa se esusuu tɔm. Ɛlɛ ɖa-tɩŋa payɩ ɖɩpɩzɩɣ nɛ ɖɩɖʋ ɖa-tɩ kaɖʋsɩ nzɩ pɩwɛɣ-ɖʋ kɛlɛʋ se ɖɩtalɩ yɔ. Ɩkalɩ Aduwa 21:5, nɛ pʋwayɩ lɛ ɩtazɩ nɛ ɩna se kaɖʋsɩ nzɩ ŋpɩzɩɣ nɛ ŋɖʋ ña-tɩ . . .
-
ɛgbɛyɛ taa.
-
tɔm susuu taa.
Ɛzɩma paɣtʋ kiɖe nɖɩ ɖɩwɛ mayaɣ kanɛ ka-taa yɔ ɖɩpɩzɩɣ nɛ ɖɩsɩnɩ-ŋ nɛ ŋtalɩ ña-kaɖʋsɩ?
Kaɖʋsɩ nzɩ ŋpɩzɩɣ nɛ ŋɖʋ ña-tɩ yɔ
-
Ñɔɔzɩ ña-adɩma nɛ awɛɛ ɖeu nɛ pɩkɩlɩ.
-
Kalɩ Bibl kpeekpe.
-
Ñaɣ pana nɛ ŋtɩlɩ ñɛ-ɛgbɛyɛ taa koobiya kpeekpe.
-
Ñaɣ pana nɛ ŋpaɣzɩnɩ nɔɔyʋ Bibl kpɛlɩkʋʋ.
-
La nʋmɔʋ lɩzʋʋ sɩnɩyʋ yaa paa ɖooye nʋmɔʋ lɩzʋʋ tʋmɩyɛ.
-
Ye ŋkɛ koobu abalɩñɩnʋ yɔ, ñaɣ pana nɛ ŋpɩsɩ ɛgbɛyɛ taa tʋmlaɖʋ.
6. Nɩɩ wezuu leleŋ tam!
Ɩkalɩ Keɣa 22:26, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ pɩwɛɛ se ŋla nɛ ŋnɩɩ wezuu leleŋ lɛɛlɛɛyɔ nɛ pɩkpaɣ nɛ pɩɖɛɛ tam tam?
TOBI LƐ
Wolo pɩ-yɔɔ nɛ ŋcɛyɩsɩɣ ña nɛ Yehowa mɩ-taabalɩyɛ nɛ ŋɖʋʋ ña-tɩ fezuu taa kaɖʋsɩ. Pɩsɩɣnɩ-ŋ nɛ ŋnɩɩ wezuu leleŋ tam!
Tɔm taa tazʋʋ
-
Ɛbɛ yɔɔ ña-taa pɩzɩɣ nɛ pɩtɛ se Yehowa kaɣ-ŋ sɩnʋʋ nɛ ŋɖɔkɩ ñe-siɣsiɣ wɛtʋ nɛ ŋwolo pɩ-yɔɔ nɛ ŋsɛɣ-ɩ?
-
Ɛbɛ pɩwɛɛ se ŋla nɛ ŋcɛyɩsɩ ña nɛ Yehowa mɩ-taabalɩyɛ?
-
Ɛzɩma fezuu taa kaɖʋsɩ sɩɣnɩ-ŋ se ŋwobini ɛsɩndaa?
WONDU LƐƐTƲ
Ɛbɛ mʋ ñɩm Yehowa ɛsɩndaa nɛ pɩkpaɖɩ? Kɩbam sɔsɔm nabʋyʋ labʋ tam kʋɖʋm yaa ɖe-siɣsiɣ wɛtʋ ɖɔkʋʋ kpam ɖe-wezuu caɣʋ kpeekpe taa?
Halɩ weyi ɛsɛɣ Yehowa siɣsiɣ yɔ, ɛpɩzɩɣ nɛ elesi taa leleŋ weyi ɛwɛna yɔ. Cɔnɩ video nɛ ŋna mbʋ ɛpɩzɩɣ ɛla nɛ ɛɖaɣnɩ hiɣu taa leleŋ ɛnɩ yɔ.
Tɩŋnɩ kpɛlɩkʋʋ nɛ tɔm yɔɔ maɣzʋʋ yɔɔ nɛ ŋɖaɣnɩ hiɣu taa leleŋ (5:25)
Ɛzɩma ɖɩpɩzɩɣ nɛ ɖɩɖʋ ɖa-tɩ fezuu taa kaɖʋsɩ nɛ ɖɩtalɩ-sɩ?
Ɛbɛ yɔɔ pɩcɛyaa se Krɩstʋ tʋ ɛpɩɩ fezuu taa, nɛ ɛbɛ yɔɔ pɩwɛɛ se ŋcɛyɩ ña-tɩ nɛ ŋtalɩ kaɖʋwa ŋga?
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
