TƆM KƖKPƐLƖKƖTƲ 35
Ɛzɩma ɖɩpɩzɩɣ nɛ ɖɩkpaɣ lɩmaɣza kɩbana?
Ða-tɩŋa payɩ ɖɩkpakɩɣ lɩmaɣza. Lɩmaɣza ana a-taa sakɩyɛ pɩzɩɣ nɛ awɛɛnɩ ɖoŋ kɩbaŋ yaa kɩdɛkɛdɩŋ ɖɔ-yɔɔ nɛ apɩzɩɣ ɖɔɖɔ nɛ acamɩ yaa acɛyɩsɩ ɖa nɛ Yehowa ɖa-taabalɩyɛ. Ðɩpɩzɩɣ nɛ ɖɩkpaɣ lɩmaɣza hɔɔlɩŋ ɩnɛ ɩ-taa: Ðenɖe ɖɩkaɣ caɣʋ wezuu yɔ, mbʋ pɩwɛɛ se ɖɩla nɛ ɖɩcɔnɩ ɖo-tomnaɣ yɔɔ kɩcɛyɩm ɖeɖe yɔ nɛ weyi pɩwɛɛ se ɖa nɛ ɖɩɖɔkɩ nesi yɔ. Ye ɖɩkpakɩɣ lɩmaɣza camɩyɛ yɔ, ɖɩnɩɣ leleŋ ɖe-wezuu caɣʋ taa nɛ ɖɔ-tɔm kɛdɩɣnɩ ɖɔɖɔ Yehowa.
1. Ɛzɩma ŋpɩzɩɣ nɛ ŋtɩŋnɩ Bibl yɔɔ nɛ ŋkpaɣ lɩmaɣza kɩbana?
Pʋcɔ nɛ ŋkpaɣ lɩmaɣzɩyɛ naɖɩyɛ lɛ, tɩmnɩ Yehowa nɛ ŋpɔzɩ-ɩ se ɛsɩnɩ-ŋ. Pɩmʋnaa se ŋtazɩ Bibl taa ɖɔɖɔ nɛ ŋtɩlɩ lɩmaɣza wena ɛwɛna yɔ. (Kalɩ Aduwa 2:3-6.) Hɔɔlɩŋ nɩɩyɩ taa lɛ, Yehowa ɖʋ paɣtʋ kpayɩ se pɩsɩnɩ-ŋ nɛ ŋtɩlɩ lɩmaɣzɩyɛ nɖɩ pɩwɛɛ se ŋkpaɣ yɔ. Ye mbʋ yɔ, mbʋ pɩwɛ ɖeu se ŋla yɔ lɛ se ŋkpaɣ lɩmaɣzɩyɛ se ŋñaŋ paɣtʋ ndʋ ɛɖʋwa yɔ.
Ɛlɛ ye Bibl ɛtɩɖʋ paɣtʋ natʋyʋ kpayɩ se pɩsɩnɩ-ŋ nɛ ŋtɩlɩ mbʋ pɩwɛɛ se ŋla yɔ, ɛbɛ ŋpɩzɩɣ nɛ ŋla? Yehowa kaɣ-ŋ ɖiyuu nɛ ɛwɩlɩ-ŋ «nʋmɔʋ ŋgʋ kɩ-taa pɩwɛɛ se ŋɖɔ yɔ.» (Izaayii 48:17) Ɛzɩma tɩyɛ? Bibl paɣtʋ kila naayɛ pɩzɩɣ nɛ aɖiyi-ŋ. Bibl paɣtʋ kila kɛnɩ toovenim tɔm kɩcɛyɩtʋ ndʋ tɩsɩɣnɩ-ɖʋ se ɖɩtɩlɩ Ɛsɔ lɩmaɣza yɔ. Ðoŋ ɖoŋ ɖɩkalɩɣ Bibl taa kɛdɛsɩ lɛ, sɩsɩɣnɩ-ɖʋ se ɖɩtɩlɩ Ɛsɔ lɩmaɣza tɔm ndɩ ndɩ yɔɔ. Ye ɖɩpɩzaa nɛ ɖɩtɩlɩ Yehowa lɩmaɣza yɔ, ɖɩpɩzɩɣ nɛ ɖɩkpaɣ lɩmaɣza wena akɛdɩɣnɩ-ɩ yɔ.
2. Ɛbɛ yɔɔ pɩwɛɛ se ŋmaɣzɩ pʋcɔ nɛ ŋkpaɣ lɩmaɣzɩyɛ naɖɩyɛ?
Bibl yɔɔdaa se: «Lɔŋsɩnɖʋ maɣzɩɣ nɩŋgbanzɩ nzɩ payɩ ɛkpɛzɩɣ yɔ sɩ-yɔɔ camɩyɛ.» (Aduwa 14:15) Pʋ-tɔbʋʋ lɛ se pʋcɔ nɛ ɖɩkpaɣ lɩmaɣzɩyɛ naɖɩyɛ lɛ pɩwɛɛ se ɖɩkpaɣ alɩwaatʋ nɛ ɖɩmaɣzɩ camɩyɛ. Ŋŋmaɣzɩɣ mbʋ mbʋ ŋpɩzɩɣ nɛ ŋla yɔ pɩ-yɔɔ lɛ, pɔzɩ ña-tɩ se: «Bibl paɣtʋ kila wena pɩzɩɣ nɛ asɩnɩ-m? Lɩmaɣzɩyɛ nɖɩ pɩwɛɛ se mankpaɣ nɛ pɩtaakɔɔ nɛ pɩcɛyɩ-m pʋwayɩ? Lɩmaɣzɩyɛ nɖɩ mankpakɩɣ yɔ, ɛzɩma ɖɩkaɣ tukunuu lalaa? Kɔzɩ kɔzɩ lɛ, ɖɩkaɣ kɛdɩnʋʋ Yehowa?»—Wayɩ Wayɩ Paɣtʋ 32:29.
Yehowa wɛnɩ waɖɛ se eheyi-ɖʋ mbʋ pɩkɛ kɩbam nɛ mbʋ pɩkɛ kɩdɛkɛdɩm yɔ. Ye ɖɩsɩm ɛ-paɣtʋ nɛ ɛ-paɣtʋ kila camɩyɛ nɛ ɖɩñakɩ pana se ɖɩlabɩnɩ-yɛ tʋmɩyɛ yɔ, pɩsɩɣnɩ-ɖʋ nɛ ɖɩwɛɛnɩ ɛhʋyɛ kɩbanɖɛ. Ɛhʋyɛ sɩɣnɩ-ɖʋ se ɖɩtɩlɩ kɩbam nɛ kɩdɛkɛdɩm. (Roma mba 2:14, 15) Ɛhʋyɛ nɖɩ ɖɩfalɩsɩ-ɖɩ camɩyɛ yɔ, ɖɩsɩɣnɩ-ɖʋ nɛ ɖɩkpaɣ lɩmaɣza kɩbana.
TAZƖ NƐ PILIMI
Tazɩ nɛ ŋna ɛzɩma Bibl paɣtʋ kila nɛ ɛhʋyɛ tɔm cɛyaa, alɩwaatʋ ndʋ ɖɩcaɣ se ɖɩkpaɣ lɩmaɣzɩyɛ naɖɩyɛ yɔ.
3. Yele nɛ Bibl ɖiyi-ŋ
Ɛzɩma Bibl paɣtʋ kila pɩzɩɣ nɛ aɖiyi-ɖʋ alɩwaatʋ ndʋ ɖɩcaɣ se ɖɩkpaɣ lɩmaɣzɩyɛ naɖɩyɛ yɔ? Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ tɩ-yɔɔ wɛʋ lɩzʋʋ waɖɛ kɛnaa?
-
Ɛbɛ yɔɔ Yehowa ha-ɖʋ tɩ-yɔɔ wɛʋ lɩzʋʋ waɖɛ?
-
Ɛbɛ ɛha-ɖʋ se pɩsɩnɩ-ɖʋ nɛ ɖɩlabɩnɩ tʋmɩyɛ tɩ-yɔɔ wɛʋ lɩzʋʋ waɖɛ camɩyɛ?
Ɩkalɩ Efɛɛzɩ mba 5:15, 16 nɛ ɩna Bibl paɣtʋ kiɖe naɖɩyɛ. Nɛ pʋwayɩ lɛ ɩtazɩ nɛ ɩna ɛzɩma ɛyʋ pɩzɩɣ nɛ ‘ɛlabɩnɩ ɛ-alɩwaatʋ tʋmɩyɛ camɩyɛ’ nɛ . . .
-
ɛkalɩɣ Bibl ɖoŋ ɖoŋ.
-
ɛkɛ walʋ yaa halʋ kɩbanʋ, yaa lʋlɩyʋ kɩbanʋ yaa pɩɣa kɩbaŋa.
-
ewoki ɛgbɛyɛ taa kediɣzisi.
4. Falɩsɩ ñɛ-ɛhʋyɛ nɛ ɖɩsɩnɩ-ŋ nɛ ŋkpakɩɣ lɩmaɣza kɩbana
Ye Bibl ɛɖʋ paɣtʋ kpayɩ hɔɔlʋʋ nakʋyʋ taa yɔ, pɩpɩzɩɣ nɛ pɩwɛɛ kɛlɛʋ se ŋtɩlɩ lɩmaɣzɩyɛ nɖɩ pɩmʋnaa se ŋkpaɣ hɔɔlʋʋ ŋgʋ kɩ-taa yɔ. Ɛlɛ ye Bibl ɛtɩɖʋ paɣtʋ natʋyʋ kpayɩ yɔ, ɛbɛ ŋpɩzɩɣ nɛ ŋla? Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Video taa, nɩŋgbanzɩ nzɩ Emma kpɛzaa se pɩsa nɛ ɛpɩzɩ nɛ ɛfalɩsɩ ɛ-ɛhʋyɛ nɛ ɛkpaɣ lɩmaɣza wena akɛdɩɣnɩ Yehowa yɔ?
Ɛbɛ yɔɔ pɩfɛyɩ ɖeu se ɖɩpɔzɩ lalaa se peheyi-ɖʋ lɩmaɣza wena pɩwɛɛ se ɖɩkpaɣ yɔ? Ɩkalɩ Ebree mba 5:14, nɛ pʋwayɩ lɛ ɩtazɩ tɔm tʋnɛ tɩ-taa:
-
Paa pɩwɛ kɛlɛʋ se ɖɩpɔzɩ lalaa se pakpaɣ lɩmaɣza ɖo-lone taa yɔ, ɛbɛ pɩpɔzʋʋ se ɖa-maɣmaɣ ɖɩla?
-
Wondu ndʋ pɩzɩɣ tɩsɩnɩ-ŋ nɛ ŋfalɩsɩ ñɛ-ɛhʋyɛ nɛ ŋpɩzɩ nɛ ŋkpaɣ lɩmaɣza kɩbana?
Ðɛ-ɛhʋyɛ wɛ ɛzɩ tɛtʋ anjaʋ takayaɣ yɔ, ɖɩsɩɣnɩ-ɖʋ se ɖɩtɩlɩ ɛzɩma ɖiɖiyi ɖe-wezuu caɣʋ yɔ.
5. Ña lalaa ɛhʋyɛ
Ɛyaa pɩzɩɣ nɛ pakpaɣ lɩmaɣza ndɩ ndɩ hɔɔlʋʋ nakʋyʋ taa. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ lalaa ɛhʋyɛ? Iyele nɛ ɖɩyɔɔdɩ kɩɖaŋ naalɛ tɔm:
Kɩɖaʋ 1: Koobu halɩñɩnʋ nɔɔyʋ sɔɔlɩ pantalaʋ tɔɔlʋʋ alɩwaatʋ ndʋ ɛlakɩ e-evemiye taa tʋma yaa alɩwaatʋ ndʋ ɛ nɛ ɛ-taabalaa pacakɩ yɔ. Ŋgʋ koobiya halɩñɩma mba pɛwɛ ɛ-ɛgbɛyɛ kɩfaɖɛ taa yɔ, paba ñanaɣ halʋ tɔɔlɩ pantalaʋ lɛ pɩcɛyɩɣ-wɛ.
Ɩkalɩ Roma mba 15:1 nɛ 1 Kɔrɛntɩ mba 10:23, 24; nɛ pʋwayɩ lɛ ɩtazɩ tɔm tʋnɛ tɩ-taa:
-
Lɩmaɣzɩyɛ nɖɩ koobu halɩñɩnʋ ɛnʋ ɛpɩzɩɣ nɛ ɛtɩŋnɩ masɩ sɩnɛ sɩ-yɔɔ nɛ ɛkpaɣ? Ye ŋwɛ weyi ɛ-ɛhʋyɛ ɛɛhaɣ-ɩ nʋmɔʋ se ɛla mbʋ ñɛ-ɛhʋyɛ ñahaɣ-ŋ nʋmɔʋ se ŋla yɔ ɛ-cɔlɔ yɔ, ɛbɛ ŋkaɣ labʋ?
Kɩɖaʋ 2: Koobu abalɩñɩnʋ nɔɔyʋ nawa se Bibl ha nʋmɔʋ se pɔñɔɔ sʋlʋm nɛ pɩmaɣna. Ɛlɛ ɛkpaɣ lɩmaɣzɩyɛ se ɛɛtɩɩñɔʋ sʋlʋm paa ññɩɩ. Paya-ɩ nɛ ewolo helim mʋʋ nabʋyʋ taa lɛ, ɛnaɣ koobiya lalaa wɛɛ nɛ pɔñɔʋ sʋlʋm.
Ɩkalɩ Eklezɩyasɩtɩ 7:16 nɛ Roma mba 14:1, 10; nɛ pʋwayɩ lɛ ɩtazɩ tɔm tʋnɛ tɩ-taa:
-
Lɩmaɣzɩyɛ nɖɩ koobu abalɩñɩnʋ ɛnʋ ɛpɩzɩɣ nɛ ɛtɩŋnɩ masɩ sɩnɛ sɩ-yɔɔ nɛ ɛkpaɣ? Ye ŋna nɔɔyʋ wɛɛ nɛ ɛlakɩ nabʋyʋ, ŋgʋ ñɛ-ɛhʋyɛ ɛɛhaɣ-ŋ nʋmɔʋ se ŋlabɩ-pʋ yɔ, ɛbɛ ŋkaɣ labʋ?
Pɩsa nɛ ŋkpaɣ lɩmaɣzɩyɛ kɩbanɖɛ lɛ . . .
1. Pɔzɩ Yehowa se ɛsɩnɩ-ŋ.—Yakubu 1:5.
2. Ñɩnɩ tɔm Bibl nɛ Bibl kpɛlɩkʋʋ takayɩsɩ taa se pɩsa nɛ ŋtɩlɩ Bibl paɣtʋ kila wena apɩzɩɣ nɛ asɩnɩ-ŋ yɔ. Ŋpɩzɩɣ ɖɔɖɔ nɛ ŋpɔzɩ tɔm Krɩstʋ ñɩma mba papɩ fezuu taa yɔ.
3. Maɣzɩ ɖoŋ weyi lɩmaɣzɩyɛ nɖɩ ŋkpakɩɣ yɔ ɖɩkaɣ wɛnʋʋ ñɛ-ɛhʋyɛ nɛ lalaa ɛhʋyɛ yɔɔ yɔ ɩ-yɔɔ.
NABƐYƐ YƆƆDƲƲ SE: «Ŋwɛnɩ waɖɛ se ŋla mbʋ payɩ ŋsɔɔlaa yɔ. Ndʋ lalaa maɣzɩɣ yɔ tɩ-tɔm tɩcɛyɩ.»
-
Ɛbɛ yɔɔ pɩwɛɛ se ŋmaɣzɩ ɛzɩma pɩlakɩ Ɛsɔ nɛ ɛyaa lalaa yɔ pɩ-yɔɔ?
TOBI LƐ
Pɩsa nɛ ɖɩkpaɣ lɩmaɣza kɩbana lɛ, pɩpɔzʋʋ se ɖɩtɩlɩ ndʋ Yehowa maɣzɩɣ yɔ nɛ ɖoŋ weyi ɖa-lakasɩ wɛɣnɩ ɛyaa lalaa yɔɔ yɔ.
Tɔm taa tazʋʋ
-
Ɛzɩma ŋpɩzɩɣ nɛ ŋkpaɣ lɩmaɣza wena akɛdɩɣnɩ Yehowa yɔ?
-
Ɛzɩma ŋpɩzɩɣ nɛ ŋfalɩsɩ ñɛ-ɛhʋyɛ?
-
Ɛzɩma ŋpɩzɩɣ nɛ ŋwɩlɩ se ŋñaŋ lalaa ɛhʋyɛ?
WONDU LƐƐTƲ
Ɛzɩma ŋpɩzɩɣ nɛ ŋkpaɣ lɩmaɣza wena apɩzɩɣ nɛ acɛyɩsɩ ña nɛ Ɛsɔ mɩ-taabalɩyɛ yɔ?
«Prenons des décisions qui honorent Dieu» (La Tour de Garde, 15 avril 2011)
Cɔna nɛ ŋtɩlɩ nɛ pɩkpaɖɩ pɩlɩɩnɩ ɛzɩma Yehowa tasɩɣ-ɖʋ lɔŋ yɔ pɩ-yɔɔ.
Cɔna nɛ ŋna mbʋ pɩsɩnɩ abalʋ nɔɔyʋ nɛ ɛkpaɣ lɩmaɣzɩyɛ nɖɩ ɖɩ-kpaɣʋ wɛ kaɖɛ yɔ.
Kalɩ nɛ ŋna ɛzɩma ŋpɩzɩɣ nɛ ŋkpaɣ lɩmaɣza wena akɛdɩɣnɩ Yehowa, paa Bibl ɛtɩɖʋ paɣtʋ natʋyʋ kpayɩ pɩlɩɩnɩ pɩ-yɔɔ yɔ, pɩ-yɔɔ tɔm lɛɛtʋ.
«Vous faut-il un commandement pour tout?» (La Tour de Garde, 1er décembre 2003)
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
