Pɩnzɩ mɩnɩŋ 35 nzɩ sɩɖɛwa yɔ sɩ-taa, pɩkazɩ pazɩ se Izrayɛɛlɩ piya ɩtalɩ Lidaʋ Tɛtʋ taa lɛ, Ɛsɔ tɔ se ɛkaɣ pɔ-yɔɔ kandɩyʋʋ nɛ Ejipiti kʋdɔmɩŋ sɔsɔŋ ɛtaakpa-wɛ. (Wayɩ Wayɩ Paɣtʋ 7:15) Mbʋ yebina nɛ ɛha-wɛ paɣtʋ kʋdɔmɩŋ nɛ cɩɖɩ cɩɖɩ wɛʋ pɔ-hɔɔlʋʋ taa nɛ pɩ-taa tʋ kpayɩ kpayɩ. Kɩɖaŋ nɩɩyɩ yɔ:

•   Tɩpɔzaɣ-wɛ se pɔsɔ lɩm nɛ pɔcɔtɩ po-wondu.—Levitiki 15:4-27.

•   Awayɩ ɖɩlɩyɛ hɔɔlʋʋ taa lɛ, Ɛsɔ tɔm se: «ŋkaɣ wɛnʋʋ lone maalika wayɩ nɛ peeɖe ŋkaɣ lɩʋ awayɩ nɛ ña-tamaɖɛ tɩnaɣ taa; nɛ ŋtɛm lɩʋ awayɩ lɛ, ŋŋhuuzi ña-azuluma yɔɔ tɛtʋ.»—Wayɩ Wayɩ Paɣtʋ 23:13, 14.

•   Mba pɛwɛnɩ kʋdɔŋ ŋgʋ kɩɖɛɣ ɛyaa yɔ pasɩɣ-wɛ kɩjaʋ pʋtɔbʋʋ lɛ se pacakɩ kɩjaʋ alɩwaatʋ natʋyʋ. Pɩcɔ nɛ mba pɔ-yɔɔ cɛba yɔ papɩsɩ maliika taa lɛ, pʋpɔzʋʋ se pɔcɔtɩ po-wondu, pɔsɔ lɩm nɛ pɛwɛɛ «kele kele.»—Levitiki 14:8, 9.

•   Weyi etukuuni ɛyʋ weyi ɛsɩba yɔ e-tomnaɣ yɔ, pɩpɔzʋʋ pasɩ-ɩ kɩjaʋ.—Levitiki 5:2, 3; Kɩgalʋʋ 19:16.

 Paɣtʋ ndʋ paaɖʋ Izrayɛɛlɩ piya yɔ tɩlabɩ nɔɔ kʋɖʋmaɣ nɛ ɖɔkɔnaa ñɩndʋ nɛ lɩmaɣza wena pɛwɛna cɩɖɩ cɩɖɩ wɛtʋ yɔɔ yɔ, ŋgʋ pa-alɩwaatʋ taa lɛ ɛyaa taatɩlɩ tɔm ndʋ.

 Ɛlɛ lɩmaɣza wena ɛyaa kaawɛnɩ cɩɖɩ cɩɖɩ wɛtʋ yɔɔ yɔ ana kaatɔyɩna. Kɩɖaŋ nɩɩyɩ yɔ:

•   Pɔlɔwaɣ kʋzɔɔtʋ wondu habɛɛ yɔɔ. Kʋzɔɔtʋ lɩm, tɔɔnasɩ nzɩ sɩwɛɛkaa yɔ, nɛ mbʋ piyeki nɛ ɛyaa sakɩyɛ hɩnɩɣ kʋdɔmɩŋ nɛ piya sakɩyɛ sɩkɩ yɔ.

•   Ðooo lɛ ɖɔkɔtɔnaa taatɩlɩ mbʋ piiyeki nɛ ɛyaa hɩnɩɣ kʋdɔmɩŋ yɔ. Ejipiti mba maɣzaɣ se papɩzɩɣ pakpaɣ kamaɣ calɩm, sumaɣ nakɛyɛ pɩndʋ, holu weyi ɛsɩba yɔ, hɩm nɛ kpɔnɔ ŋgʋ kɩwɛɛkaa yɔ nɛ pawaa ɛyaa kʋdɔmɩŋ, ɛlɛ piyekaɣ nɛ ɛyaa tɛzɩɣ kʋdɔmɩŋ hɩnʋʋ. Pakpakaɣ halɩ pɩkpɛndɩnɩ ɛyaa nɛ kpɩna pɩndʋ nɛ pawaɣnɩ ɛyaa pa-kʋdɔmɩŋ.