Izrayɛɛlɩ piya kaawɛnɩ lɩmaɣza sakɩyɛ wena a-yɔɔ pɩɩpɔzaa se sɩsa Yehowa yɔ. Ɛlɩzɩ-sɩ yomiye taa Ejipiti nɛ ɛya sɩ-ñʋʋ Farawɔɔ sɔɔjanaa nesi tɛɛ. (Ejl 15:1, 2) Yehowa sɩɣnɩ ɛ-samaɣ mbʋ ɖɔɖɔ sɔnɔ. Ɛzɩma ɖɩpɩzɩɣ nɛ ɖɩwɩlɩ-ɩ ɖɛ-ɛsɩmɩyɛ?—Keɣa 115:12.

Ðɩpɩzɩɣ nɛ ɖɩla nʋmɔʋ lɩzʋʋ sɩnɩyʋ yaa paa ɖooye nʋmɔʋ lɩzɩyʋ tʋmɩyɛ. Ŋpɩzɩɣ ŋtɩmnɩ Yehowa se eyele nɛ ŋsɔɔlɩ nʋmɔʋ lɩzʋʋ tʋmɩyɛ nɛ ɛha-ŋ ɖɔɖɔ ɖoŋ nɛ ŋlabɩ-ɖɩ. (Fil 2:13) Sakɩyɛ paɣzɩnɩ nʋmɔʋ lɩzʋʋ sɩnɩyʋ tʋmɩyɛ. Ŋpɩzɩɣ ŋlɩzɩ se ŋlakɩ tʋmɩyɛ nɖɩ ñɩɣtʋ 30 yaa 50, mars nɛ avril fenasɩ taa, nɛ fenaɣ ŋga ka-taa egeetiye yɔɔ cɔnɩyʋ kɔŋ mɩ-ɛgbɛyɛ taa yɔ. Ye ŋlabɩ nʋmɔʋ lɩzʋʋ sɩnɩyʋ tʋmɩyɛ nɛ ŋnɩɩ ɖi-leleŋ yɔ, pɩpɩzɩɣ pituyi-ŋ nɛ ŋla paa ɖooye nʋmɔʋ lɩzʋʋ tʋmɩyɛ. Halɩ mba palakɩ tomnaɣ yɔɔ tʋma wena amʋʋ-wɛ alɩwaatʋ sakɩyɛ yɔ nɛ mba pɛkɛ kʋdɔndɩnaa yɔ, papɩzaa nɛ pala paa ɖooye nʋmɔʋ lɩzʋʋ tʋmɩyɛ. (mwb16.07 8) Pɩtʋʋ fɛyɩ, Yehowa mʋnaa se ɖɩla mbʋ payɩ ɖɩpɩzɩɣ yɔ nɛ ɖɩsamɩ-ɩ.—3Aw 16:25.

CƆNƖ VIDEO KOOBIYA HALƖÑƖMA NAADOZO MOŊGOLII ƐJAÐƐ TAA, NƐ PƲWAYƖ LƐ ŊCOSI TƆM TƲNƐ TƖ-YƆƆ:

• Kala wena koobiya halɩñɩma naadozo waa mba palʋbɩnaa pʋcɔ nɛ papɩsɩ nʋmɔʋ lɩzɩyaa?

• Wazasɩ nzɩ pehiɣaa?

• Papɩsɩ paa ɖooye nʋmɔʋ lɩzɩyaa lɛ, pɩha-wɛ waɖɛ se pala tʋma lɛɛna wena Yehowa sɛtʋ taa?

• Ɛzɩma pa-kɩɖaʋ kɩbaŋʋ sɩnɩ lalaa?