Takayaɣ ŋga fezuu kiɖeɖeu ɖiyi Pɔɔlɩ nɛ ɛma Tiiti yɔ ka-taa, ɛtɔm se pɩwɛɛ se piya evelisi, pɩkpɛndɩnɩ Tiiti, ɩñaɣ pana nɛ sɩkɛ “kɩɖaʋ kɩbaŋʋ tʋma kɩbana labʋ taa paa hɔɔlʋʋ ŋgʋ lɛ kɩ-taa.” (Tit 2:6, 7) Takayaɣ kʋɖʋmaɣ ŋga ka-taa, ɛtɔm se palɩzɩ Yehowa samaɣ nɛ hɔɔlʋʋ nɛ kɛwɛɛ kele kele se pɩsa nɛ kɛwɛɛ “kpekpeka tʋma kɩbana labʋ taa.” (Tit 2:14) Tʋma kɩbana ana, a-taa naɖɩyɛ lɛ, Ɛsɔ Kewiyaɣ tɔm susuu nɛ tɩ-wɩlʋʋ. Ye ŋkɛ pɩɣa evelaɣ yɔ, pɩɩwɛɣ ɖeu se ŋlabɩnɩ ñe-evebitu ɖoŋ tʋmɩyɛ nɛ ŋla nʋmɔʋ lɩzʋʋ sɩnɩyʋ yaa paa ɖooye nʋmɔʋ lɩzʋʋ tʋmɩyɛ na?—Adu 20:29.

Ye ŋsɔɔlaa se ŋkɛ nʋmɔʋ lɩzɩyʋ yɔ, la ɖʋtʋ kɩbandʋ ndʋ tɩ-yɔɔ ɖɔm wɛɣ-ŋ kɛlɛʋ nɛ tɩpɩzɩɣ tɩsɩnɩ-ŋ nɛ ŋtalɩ kaɖʋwa ŋga yɔ. (Lk 14:28-30) Ŋpɩzɩɣ nɛ ŋmaɣzɩ tɔm pɔzʋʋ pʋnɛ pɩ-yɔɔ: Ɛzɩma ŋkaɣ cɔnʋʋ ño-tomnaɣ yɔɔ kɩcɛyɩm ɖeɖe ŋŋlakɩ nʋmɔʋ lɩzʋʋ tʋmɩyɛ lɛ? Ɛzɩma ŋkaɣ labʋ ɖʋtʋ se pɩsa nɛ ŋtalɩ ñɩɣtʋ ndʋ pɩpɔzʋʋ yɔ? Tɩmnɩ Yehowa se ɛsɩnɩ-ŋ. (Keɣa 36:5) Heyi ña-lʋlɩyaa nɛ nʋmɔʋ lɩzɩyaa mba pɩɖɔŋnɩ-wɛ camɩyɛ yɔ ɖʋtʋ ndʋ ŋlaba yɔ tɩ-tɔm. Pʋwayɩ lɛ, ŋkpɛzɩ nɩŋgbanzɩ nzɩ sɩsɩɣnɩ-ŋ se ŋtalɩ ña-kaɖʋwa yɔ. Pɩtʋʋ fɛyɩ se Yehowa kaɣ-ŋ wazʋʋ, pana wena ŋñakɩ nɛ ŋlakɩ ɛ-tʋmɩyɛ nɛ kpeekpe yɔ a-yɔɔ.

CƆNƖ VIDEO PIYA EVELISI SAŊ YEHOWA, NƐ PƲWAYƖ LƐ, ŊCOSI TƆM PƆZƲƲ PƲNƐ PƖ-YƆƆ:

• Kala wena nabɛyɛ lʋbɩna nɛ papɩzɩ pɛkɛ nʋmɔʋ lɩzɩyaa, nɛ ɛzɩma papɩzaa palʋbɩnɩ-yɛ?

• Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩkɛ paa ɖooye nʋmɔʋ lɩzɩyaa?

• Ɛbɛ yɔɔ pɩcɛyaa se ɖɩwɛɛnɩ tɔm susuu ɖʋtʋ kɩbandʋ?

• Ɛzɩma tɩyɛ ɛgbɛyɛ taa mba lalaa pɩzɩɣ nɛ pakpazɩ ɖoŋ nʋmɔʋ lɩzɩyaa nɛ pasɩɣnɩ-wɛ ɖɔɖɔ?

• Wazasɩ nzɩ nʋmɔʋ lɩzɩyaa hikiɣ?