Ɛzɩma pɩwɛɛ se ɖɩsɔɔlɩ ɛyʋ lɛlʋ yɔ
Ða-tɩŋa ɖɩkɛ hɔʋ kʋɖʋmʋʋ taa mba, mbʋ pʋyɔɔ yɔ ɖɩkɛ kajalaɣ ɛyʋ Aɖam liɖe taa piya. Hɔʋ kʋɖʋmʋʋ taa mba wɩlɩɣ ɖama sɔɔlɩm nɛ ñamtʋ, ɛlɛ sɔnɔ pɩwɛ kaɖɛ se ɖɩna sɔɔlɩm mbʋ. Pɩtɩkɛ mbʋ ɖɛ-Ɛsɔ sɔɔlɩm tʋ sɔɔlaa.
NDƲ MASƖ KIÐEÐESI YƆƆDAA PƖLƖƖNƖ SƆƆLƖM YƆƆ YƆ
“Ŋŋsɔɔlɩ ño-koobu ɛzɩ ña-maɣmaɣ yɔ.”—LEVITIKI 19:18.
“Iwolo pɩ-yɔɔ nɛ ɩsɔɔlɩ mi-koyindinaa.”—MAATIYEE 5:44.
YE PƆTƆM SE ÐƖSƆƆLƖ ƐYƲ LƐLƲ PƖ-TƆBƲƲ LƐ SUWE?
Yʋsɩ tɔm ndʋ Ɛsɔ yɔɔdɩ sɔɔlɩm yɔɔ nɛ pama-tʋ ɛ-Tɔm taa 1 Kɔrɛntɩ mba 13:4-7 taa yɔ:
“Sɔɔlɩm wɛ suuɖu nɛ pɩlakɩ kɩbandʋ.”
Maɣzɩ tɔm tʋnɛ tɩ-yɔɔ: Ye ŋyʋsɩnɩ nɔɔyʋ ɛlɛ ɛ-taa tɩwɩɩnɩ-ŋ nɛ ɛɖʋ suuɖu nɛ ɛlabɩ-ŋ kɩbandʋ ɛzɩma pɩlakɩ-ŋ?
Sɔɔlɩm fɛyɩ sʋsɩ.”
Maɣzɩ tɔm tʋnɛ tɩ-yɔɔ: Ye ɛyaa lalaa taa ɩwɩɣnɩ-ŋ nɛ pasʋsʋʋ-ŋ ɛzɩma pɩlakɩ-ŋ?
‘Sɔɔlɩm ɛɛñɩnɩɣ pɩ-maɣmaɣ pɩ-kɛzɛsɩ.’
Maɣzɩ tɔm tʋnɛ tɩ-yɔɔ: Ɛzɩma pɩlakɩ-ŋ ye ɛyaa lalaa itisiɣ ña-lɩmaɣza yɔɔ faaa nɛ paañɩkɩɣ ñɔ-yɔɔ paa ɛzɩmtaa se ŋtisiɣ pɔ-tɔm yɔɔ?
‘Sɔɔlɩm ɛɛcakɩnɩ nɔɔyʋ.’
Maɣzɩ tɔm tʋnɛ tɩ-yɔɔ: Ɛsɔ sɔɔlɩ faaa se ɛkpaɣ nɛ ekpeɣu ɛyaa mba palabɩ kɩwɛɛkɩm nɛ pekpiɖi pɩ-yɔɔ pʋwayɩ yɔ. “Ɛ-taa ɛɛwɩɣ nɛ pileɖi caaa, ɛɛcakɩnɩ nɔɔyʋ tam.”(Keɣa 102:9) Ye ɖɩyʋsɩnɩ nɔɔyʋ nɛ ɛkpaɣ nɛ ekpeɣu-ɖʋ yɔ, pɩkɛdɩɣnɩ-ɖʋ. Mbʋ pɩwɛɛ se ɖɩkpaɣ nɛ ɖikpeɣu lalaa alɩwaatʋ ndʋ payʋsʋʋnɩ-ɖʋ yɔ.—Keɣa 85:5.
Sɔɔlɩm “taa ɛɛlakɩ leleŋ nɛ mbʋ pɩfɛyɩ siɣsiɣ yɔ.”
Maɣzɩ tɔm tʋnɛ tɩ-yɔɔ: Ye kɩdɛkɛdɩm nabʋyʋ ɛtalɩ-ɖʋ yɔ, ɖɩtɩsɔɔlɩ se lalaa taa ɩla leleŋ nɛ ɖa-kʋñɔŋ. Mbʋ ɖɔɖɔ ye lalaa ɩwɛ kʋñɔŋ taa yɔ, pɩfɛyɩ se ɖɩnɩɩ leleŋ pa-kʋñɔŋ yɔɔ, paa paalabɩ-ɖʋ mbʋ pɩfɛyɩ ɖeu yɔ.
Pɩsa nɛ Ɛsɔ wazɩ-ɖʋ lɛ, pɩwɛɛ se ɖɩsɔɔlɩ lalaa paa wɛtʋ ndʋ tɩ-taa patɩɩwɛɛ yɔ. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ ɩ-taa nakʋyʋ lɛ se ɖɩsɩnɩ mba pɛwɛ kɩcɛyɩm taa yɔ.
