Ɛsɔ labɩ tamaɣ nayʋ Abraham se e-liɖe taa pɩɣa nakɛyɛ yɔɔ pakaɣ tɩŋnʋʋ nɛ pawazɩ “tataa ajɛɛ kpeekpe yɔɔ. (Kiɖe Tɛɛ Tɔm 22:18) A-kɛnɩ e-liɖe taa pɩɣa ŋga?

Pɩlakɩ ɛzɩ pɩnzɩ 2 000 yɔ Ɛsɔ ha Yesu, weyi ɛkɛ Abraham liɖe taa pɩɣa yɔ ɖoŋ nɛ ɛla piti lakasɩ sɔsɔsɩ. Piti lakasɩ nzɩ sɩwɩlaa se Yesu yɔɔ Ɛsɔ kaɣ tɩŋnʋʋ nɛ ɛwazɩ ajɛɛ kpeekpe.—Galaatɩ mba 3:14.

Piti lakasɩ nzɩ Yesu laba yɔ sɩsɩnaa nɛ ɛyaa tɩlɩ se ɛnʋ kɛnɩ weyi Ɛsɔ lɩzaa se ɛwazɩ ajɛɛ kpeekpe yɔɔ yɔ, pɩtasɩ lɛ sɩsɩnaa nɛ ɛyaa tɩlɩ ɛzɩma Ɛsɔ kaɣ tɩŋnʋʋ ɛ-yɔɔ nɛ ɛwazɩ ɛyaa tam yɔ. Yesu tɛ piti lakasɩ wɩlʋʋ se ɛwɛnɩ wɛtʋ kɩbandʋ; tɩ-taa natʋyʋ yɔ:

Ziziŋ nɩʋ—Yesu wa kʋdɔndɩnaa.

Kɩyakʋ nakʋyʋ canaɣ nakɛyɛ tendi Yesu se ɛwaa-kɛ. Yesu tukuni canaɣ ŋga nɛ pɩtɛ lɛ, ɛyɔɔdɩ se: “Mɔnsɔɔlaa!” nɛ kpaagbaa mbʋ lɛ canaɣ ŋga kɔ-yɔɔ cɛ.—Markɩ 1:40-42.

Kʋjɔʋ labʋ—Yesu calɩ ɛyaa mba ñɔɔsɩ wɩɣaɣ yɔ.

Yesu taasɔɔlɩ se ɛyaa ɩkʋyɩ ɛ-cɔlɔ nɛ ñɔɔsɩ nɛ pekpe. Yesu tɩŋnɩ kpɔnɔnaa pazɩ yem nɛ kpakpasɩ pazɩ yem yɔɔ nɛ ɛcalɩ ɛyaa kudokiŋ sakɩyɛ; nɛ pɩtɩkɛ tam kʋɖʋm ɖeke ɛlabɩ mbʋ. (Maatiyee 14:17-21; 15:32-38) Pa-tɩŋa pɔtɔwaa nɛ pahaɣ nɛ halɩ pɩkazɩ.

Pʋtɔdɩyɛ naʋ—Yesu fezi sɩɖaa.

‘Pɩlabɩ Yesu pʋtɔdɩyɛ’ nɛ efezi lelu nɔɔyʋ pɩɣa ŋga ke-ɖeke ɛɛwɛna nɛ kasɩ yɔ. Lelu ɛnʋ ɛtaawɛnɩ nɔɔyʋ se ɛcɔnɩ ɛ-yɔɔ.—Luka 7:12-15.