Lisa yɔɔdaa se koobiya Krɩstʋ mba camɩyɛ lakasɩ kaakɩlɩnɩ-m tukunuu nɛ pɩkɩlɩ.” * Lisa yɔɔdaɣ mbʋ piiseɣtiɣ-i nɛ ɛpaɣzɩ toovenim kpɛlɩkʋʋ yɔ pɩ-tɔm lɛ ɛyɔɔdɩ tɔm ndʋ. Anne ɖɔɖɔ yɔɔdɩ tɔm ndʋ tɩ-ɖɔndɩ. Ɛyɔɔdaa se: “Pɩtɩkɛ tɔm ndʋ Yehowa Aseɣɖe Tɩnaa wɩlɩ-m yɔ ndʋ calɩnɩ-m seɣtuu nɛ mɔnsɔɔlɩ toovenim, ɛlɛ pa-camɩyɛ lakasɩ.” Sɔnɔ, koobiya halɩñɩma mba pa-naalɛ pɔsɔɔlɩ Bibl kalʋʋ nɛ pamaɣzɩɣ kɩ-taa tɔm yɔɔ, ɛlɛ camɩyɛ lakasɩ nzɩ paalabɩ-wɛ yɔ, sɩwɛnɩ ɖoŋ kɩbaŋ siŋŋ pɔ-yɔɔ.

Ɛzɩma ɖɩpɩzɩɣ nɛ ɖɩla camɩyɛ lakasɩ nɛ pitukuni mba pɔcɔ-ɖʋ nɛ pata yɔ pa-laŋa? Iyele nɛ ɖɩna nʋmɔŋ naalɛ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ. Nʋmɔŋ ɛnɩ lɛ, ɖɔ-yɔɔdaɣ nɛ ɖa-lakasɩ. Pʋwayɩ lɛ, ɖɩkaɣ naʋ ɛyaa mba pɩwɛɛ se ɖɩlabɩ-wɛ camɩyɛ lakasɩ yɔ.

Halʋ kɩbanʋ weyi ɛ-tɔm pɔyɔɔdɩ Aduwa ñʋʋ 31 taa yɔ, ɛwɛnɩ “camɩyɛ lakasɩ paɣtʋ” ɛ-nzʋlʋmɩyɛ yɔɔ. (Adu. 31:26; nwt) Eyeki se “paɣtʋ” ndʋ tiɖiyi tɔm ndʋ ɛyɔɔdʋʋ yɔ nɛ ɛzɩma ɛyɔɔdʋʋ-tʋ yɔ. Pɩpɔzʋʋ ɖɔɖɔ se walaa ɩwɛɛnɩ “paɣtʋ” ndʋ pa-nzʋlʋmɩyɛ yɔɔ. Lʋlɩyaa sakɩyɛ ɖiɣzinaa se ye pañasɩɣ pe-piya tɔm kɩñasʋ yɔ, pɩpɩzɩɣ nɛ pɩwɛɛnɩ ɖoŋ kɩdɛkɛdɩŋ sɩ-yɔɔ. Ye lʋlɩyaa ɩñasɩɣ pe-piya tɔm kɩñasʋ yaa ye paayɔɔdʋʋnɩ-sɩ nɛ nɔɔ kɩbaŋa yɔ, pɩtɩla pe-piya ɩɩkaɣ-wɛ welisinuu. Ɛlɛ, ye lʋlɩyaa ɩyɔɔdʋʋnɩ pe-piya nɛ nɔɔ kɩbaŋa yɔ, pɩwɛɣ-sɩ kɛlɛʋ se siwelisini-wɛ nɛ sɩñam-wɛ.

Paa ŋkɛ lʋlɩyʋ yaa ŋtɩkɛ yɔ, ɛzɩma ŋpɩzɩɣ nɛ ŋyele nɛ camɩyɛ lakasɩ ɖiyi ñɔ-yɔɔdaɣ? Ðɩpɩzɩɣ nɛ ɖɩna mbʋ pɩpɩzɩɣ nɛ pɩsɩnɩ-ɖʋ yɔ pɩ-taa nabʋyʋ Aduwa 31:26 tɛ kajalaɣ hɔɔlʋʋ taa. Ðɩkalɩɣ peeɖe se: “Ekuluu ɛ-nɔɔ lɛ, lɔŋ tɔm ɛyɔɔdʋʋ.” Ye mbʋ, pɩpɔzʋʋ se ɖɩmaɣzɩɣ tɔm pee wena ɖɩlakɩnɩ tʋmɩyɛ yɔ a-yɔɔ nɛ ɖɩmaɣzɩɣ ɖɔɖɔ nɔɔ ŋga ɖɩyɔɔdʋʋna yɔ kɔ-yɔɔ camɩyɛ. Ðoŋ ɖoŋ lɛ, ye ɖɩpɔzʋʋ ɖa-tɩ tɔm tʋnɛ yɔ, pɩsɩɣnɩ-ɖʋ: ‘Tɔm ndʋ mancaɣ yɔɔdʋʋ yɔ tiseɣtiɣ pana na, yaa tiyeki se laŋhɛzɩyɛ ɛwɛɛ?’ (Adu. 15:1) Ye mbʋ, pɩkɛnɩ lɔŋsɩnɖɛ se ɖɩmaɣzɩ ɖa-ñʋʋ taa pʋcɔ nɛ ɖɩyɔɔdɩ.

Eduuye lɛɛɖɛ yɔɔdʋʋ se: “Nɔɔyʋ kɛ tɔm lʋlʋyʋ yem nɛ eloŋ ɛzɩ laɣɖɛ yɔ.” (Adu. 12:18) Ye ɖɩmaɣzɩɣ ɖoŋ weyi ɖɔ-tɔm pee nɛ nɔɔ ŋga ɖɩyɔɔdʋʋna yɔ, pɩpɩzɩɣ nɛ pɩwɛɛnɩ lalaa yɔɔ yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩmaɣzɩ tɔm ndʋ ɖɩcaɣ yɔɔdʋʋ yɔ tɩ-yɔɔ pʋcɔ ɖɩyɔɔdɩ-tʋ. Ye ɖɩlakɩnɩ tʋmɩyɛ “camɩyɛ lakasɩ paɣtʋ” yɔ, pɩkaɣ-ɖʋ sɩnʋʋ se ɖɩtaalakɩnɩ tʋmɩyɛ kañatʋ tɔm pee nɛ pɩkaɣ-ɖʋ sɩnʋʋ ɖɔɖɔ nɛ ɖɩtaañasɩɣ lalaa tɔm. (Efɛz. 4:31, 32) Ðɩɩkaɣ labɩnʋʋ tʋmɩyɛ lɩmaɣza nɛ yɔɔdaɣ ŋga keyeki nɛ pitii lalaa yɔɔɔ yɔ, ɛlɛ pi-lone taa lɛ, ɖɩkaɣ labɩnʋʋ tʋmɩyɛ tɔm pee kɩbana nɛ ɖɩyɔɔdɩnɩ nɔɔ kɩbaŋa ŋga kakpazɩɣ lalaa ɖoŋ yɔ. Yehowa ha-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. Alɩwaatʋ ndʋ sɔɔndʋ kaakpa ɛ-lɩmɖʋyʋ Eliya yɔ, ɛyɔɔdɩnɩ-ɩ nɛ nɔɔ kɩbaŋa nɛ ɛkpazɩ-ɩ ɖoŋ. Tiyiyu weyi Yehowa tiyaa yɔ, ɛyɔɔdɩnɩ Eliya nɛ “nɔɔ hɛɛɛ ñɩŋga.” (1 Aw. 19:12) Ye pɔtɔm se ɛyʋ ɛwɛɛnɩ camɩyɛ lakasɩ yɔ, pɩɩsɩɣnɩ se ɛwɛɛnɩ yɔɔdaɣ kɩbaŋa ɖeke, ɛlɛ pɩpɔzʋʋ ɖɔɖɔ se ɛlakɩ camɩyɛ lakasɩ. Ɛzɩma tɩyɛ?

Ye ɖɩmaɣzɩɣnɩ Yehowa yɔ, pɩtasɩnɩ yɔɔdaɣ kɩbaŋa lɛ, ɖɩlakɩ ɖɔɖɔ camɩyɛ lakasɩ.  (Efɛz. 4:32; 5:1, 2) Lisa weyi ɛ-tɔm ɖɩyɔɔdɩ kiɖe tɛɛ yɔ, ɛkɛdɩ ɛzɩma Yehowa Aseɣɖe Tɩnaa labɩ-ɩ camɩyɛ lakasɩ yɔ pɩ-tɔm. Ɛyɔɔdaa se: “Alɩwaatʋ ndʋ pɩɩkɛnɩ kɩjɛyʋʋ se ɖɔ-hɔʋ ɛkʋyɩ lone nɖɩ ɖɩ-taa kɩwɛɛ yɔ tuda nɛ kɩkɛɛ lone lɛɛɖɛ taa yɔ, koobiya nabɛyɛ naalɛ nɛ pa-halaa, pamʋ hɛzʋʋ pa-tʋmɩyɛ taa alɩwaatʋ natʋyʋ pazɩ se pasɩnɩ-ɖʋ nɛ ɖikpeɣli ɖo-wondu. Halɩ alɩwaatʋ ndʋ tɩ-taa lɛ, mantaapaɣzɩtɩ Bibl kpɛlɩkʋʋ!” Camɩyɛ lakasɩ nzɩ, siseɣti Lisa nɛ ɛpaɣzɩ kpɛlɩkʋʋ toovenim.

Anne weyi ɛ-tɔm ɖɩyɔɔdɩ kiɖe tɛɛ yɔ, ɛwɩlaa ɖɔɖɔ se ɛwɛnɩ ɛsɩmɩyɛ camɩyɛ lakasɩ nzɩ Yehowa Aseɣɖe Tɩnaa labɩ-ɩ yɔ sɩ-yɔɔ. Ɛyɔɔdaa se: “Mbʋ ɛyaa mba patɩkɛ Yehowa sɛyaa yɔ palabɩ-m yɔ pʋyɔɔ lɛ, pɩɩwɛ-m kaɖɛ se mantaa ɛyaa liu.” Ɛtasɩ yɔɔdʋʋ se: “Alɩwaatʋ ndʋ mankatɩ Yehowa Aseɣɖe Tɩnaa yɔ, mantɩtaa-wɛ liu. Mɔnpɔzaɣ man-tɩ se: ‘Ɛzɩ ɛbɛ yɔɔ ɛyaa panɛ pɔñɔtʋʋnɩ-m?’ Ɛlɛ koobu halɩñɩnʋ weyi ɛkpɛlɩkɩnɩ-m Bibl yɔ, ɛlabɩ-m camɩyɛ lakasɩ nɛ ɛ-laŋɩyɛ pilim, nɛ piseɣti-m nɛ mantaa-ɩ liu.” Ɛbɛ lɩ pɩ-taa? Ɛyɔɔdaa se: “Pʋwayɩ lɛ, manpaɣzɩ kam ñʋʋ nɛ tɔm ndʋ mɛnkpɛlɩkaɣ yɔ.”

Yʋsɩ se camɩyɛ lakasɩ nzɩ ɛgbɛyɛ taa koobiya labɩ Lisa nɛ Anne yɔ, mbʋ sɩnɩnɩ-wɛ nɛ  pɔsɔɔlɩ se pɛkpɛlɩkɩ toovenim. Camɩyɛ lakasɩ nzɩ ɛgbɛyɛ taa mba labɩ-wɛ yɔ, pɩsɩnɩ-wɛ nɛ papaɣzɩ taʋ liu Yehowa nɛ ɛ-samaɣ.

Ɛyaa nabɛyɛ lɛ, pɩtɩla yɔ ɛzɩma pɔcɔnɩ pɔ-yɔɔ nɛ papaɣlɩ nɛ ɖenɖe pacaɣ nɛ papaɣlɩ yɔ, pʋyɔɔ lɛ, pɩwɛ-wɛ kɛlɛʋ se pɛwɛɛnɩ yɔɔdaɣ kɩbaŋa nɛ pɩwɛɛ-wɛ ɖɔɖɔ kɛlɛʋ se pamʋyʋʋ. Pɩwɛ ɖeu se ɛyaa nabɛyɛ wɛnɩ wɛtʋ ndʋ mbʋ pʋyɔɔ yɔ pɔ-sɔnzɩ nɛ pɛ-ɛyʋtʋ seɣtiɣ-wɛ se pɛwɛɛnɩ wɛtʋ ndʋ. Ɛlɛ ye ɖɔ-sɔnzɩ nɛ ɖɛ-ɛyʋtʋ ɖeke eseɣtiɣni-ɖʋ se ɖɩwɛɛnɩ wɛtʋ ndʋ yɔ, ɖɩɩpɩzɩɣ nɛ ɖɩyɔɔdɩ se ɖɩwɛɛ nɛ ɖɩmaɣzɩɣnɩ Ɛsɔ camɩyɛ lakasɩ.—Kpaɣ-tʋ nɛ ŋmaɣzɩnɩ Tʋma Labʋ 28:2.

Camɩyɛ lakasɩ nzɩ sɩlɩnɩ Ɛsɔ cɔlɔ yɔ, sɩkɛ Ɛsɔ fezuu piye hɔɔlʋʋ nakʋyʋ. (Gal. 5:22, 23) Ye mbʋ, pɩsa nɛ ɖɩwɛɛnɩ camɩyɛ lakasɩ siŋŋ lɛ pɩpɔzʋʋ se fezuu kiɖeɖeu ɛsɩnɩ-ɖʋ. Alɩwaatʋ ndʋ ɖiyeki se fezuu kiɖeɖeu ɛsɩnɩ-ɖʋ yɔ, ɖɩwɩlɩɣ se ɖɩsɔɔlaa se ɖɩmaɣzɩnɩ Yehowa nɛ Yesu. Nɛ ɖa Krɩstʋ mba lɛ, ɖɩmaɣzɩɣ lalaa yɔɔ siŋŋ. Ye mbʋ, sɔɔlɩm mbʋ ɖɩwɛnɩ Yehowa Ɛsɔ yɔɔ nɛ sɔɔlɩm mbʋ ɖɩwɛnɩ ɛyaa lala yɔɔ yɔ, mbʋ seɣtiɣni-ɖʋ se ɖɩwɛɛnɩ camɩyɛ lakasɩ. Nɛ ye sɔɔlɩm mbʋ, mbʋ eseɣtiɣni-ɖʋ yɔ, ɖɩnɛ ɛlɛ ɖa-camɩyɛ lakasɩ kɛɣ camɩyɛ lakasɩ siŋŋ, nzɩ sɩlɩnɩ ɖa-laŋɩyɛ taa nɛ sɩkɛdɩɣnɩ Ɛsɔ yɔ.

Pɩpɩzɩɣ nɛ pɩwɛɛ-ɖʋ kɛlɛʋ se ɖɩla camɩyɛ lakasɩ mba palabɩ-ɖʋ camɩyɛ lakasɩ yɔ yaa mba ɖɩsɩm-wɛ yɔ. (2 Sam. 2:6) Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ, ɩ-taa nakʋyʋ lɛ se ɖɩwɩlɩ-wɛ ɖɛ-ɛsɩmɩyɛ. (Kol. 3:15) Ɛlɛ ye pɩlakɩ-ɖʋ ɛzɩ nɔɔyʋ tɩmʋna se ɖɩlabɩ-ɩ camɩyɛ lakasɩ yɔ, ɛbɛ ɖɩpɩzɩɣ nɛ ɖɩla?

Iyele nɛ ɖɩmaɣzɩ tɔm tʋnɛ tɩ-yɔɔ. Yehowa labɩ-ɖʋ lootiye, nɛ ɛha-ɖʋ kɩɖaʋ ŋgʋ kɩkpaɖaa yɔ hɔɔlʋʋ ŋgʋ kɩ-taa. Nɛ ɛ-Tɔm kpɛlɩkɩɣ-ɖʋ lɔŋ kɩbaŋ nɩɩyɩ pɩlɩɩnɩ ɛzɩma ɖɩwɛɛnɩ wɛtʋ kɩbandʋ ndʋ yɔ pɩ-yɔɔ. Palabɩnɩ tʋmɩyɛ tɔm piye “lootiye” tam sakɩyɛ Krɩstʋ Mba Grɛɛkɩ Masɩ taa. Ɛzɩma Ɛsɔ lakɩ-ɖʋ camɩyɛ lakasɩ?

Maɣzɩ pɩ-yɔɔ nɛ ŋna! Yehowa lakɩ camɩyɛ lakasɩ ɛyaa kpeekpe nɛ ɛhaɣ-wɛ mbʋ pɩpɔzʋʋ-wɛ se pɛwɛɛ wezuu yɔ. (Mat. 5:45) Toovenim taa lɛ, halɩ pʋcɔ nɛ ɖɩtɩlɩɣ Yehowa lɛ, ɛlakaɣ-ɖʋ camɩyɛ lakasɩ. (Efɛz. 2:4, 5, 8) Kɩɖaʋ nakʋyʋ yɔ. Ɛcɛlɩ ɛ-Pɩyalʋ weyi ɛkɩlɩ sɔɔlʋʋ yɔ, ɛ-Pɩyalʋ ɛgbamɩyɛ, ɛyaa kpeekpe yɔɔ. Apostoloo Pɔɔlɩ mawa se Yehowa hɛyɩ kɩhɛyʋʋ pʋ-ñʋʋ taa kɩlaʋ “pɩtɩŋnɩ e-lootiye sɔsɔɖɛ yɔɔ.” (Efɛz. 1:7) Pɩtasɩ lɛ, paa ɖɩlabɩ kɩwɛɛkɩm nɛ ɖɩɖʋ Yehowa ɖɩwɩzɩyɛ yɔ, ewoki pɩ-yɔɔ nɛ eɖiyiɣ-ɖʋ nɛ ɛwɩlɩɣ-ɖʋ tɔm. Ɛ-lɔŋ tasʋʋ nɛ ɛ-tɔm pee wɛ “ɛzɩ tɛʋ ŋgʋ kɩnɩɣ ñɩtʋ yɔɔ hɛɛɛ yɔ.” (Wp. 32:2; nwt) Pɩtʋʋ fɛyɩ se camɩyɛ lakasɩ nzɩ ɛwɛɛ nɛ ɛlakɩ-ɖʋ yɔ, ɖɩɩpɩzɩɣ nɛ ɖɩhɛyɩ-ɩ sɩ-yɔɔ. Nɛ ɖɩnawa se ye Yehowa ɛtaalabɩ-ɖʋ lootiye yɔ, ɖɩtaawɛnɩ cee wayɩ lidaʋ nakʋyʋ.—Kpaɣ-tʋ nɛ ŋmaɣzɩnɩ 1 Pɩyɛɛrɩ 1:13.

Pɩtʋʋ fɛyɩ se Yehowa camɩyɛ lakasɩ kɛdɩɣnɩ-ɖʋ siŋŋ nɛ siseɣtiɣ-ɖʋ. Nɛ pɩwɛɛ se ɖɩñaɣ pana nɛ ɖɩmaɣzɩɣnɩ Yehowa nɛ ɖɩlakɩ ɛyaa lalaa camɩyɛ lakasɩ paa evemiye nɖɩ. Ðɩtaalɩzɩɣ ɛyaa nabɛyɛ ɖeke na nɛ ɖɩlakɩ-wɛ camɩyɛ lakasɩ. (1 Tes. 5:15) Ye ɖɩlakɩ lalaa camɩyɛ lakasɩ tam yɔ, ɖɩwɛɣ ɛzɩ miŋ weyi esoŋuu ɛyʋ nikaɣ alɩwaatʋ taa yɔ. Ðɩkɛɣ mba pɛhɛzɩɣ ɖɔ-hɔʋ taa mba, ɖo-koobiya Krɩstʋ mba, ɖa-tʋmɩyɛ taa taabalaa, ɖo-sukuli taa taabalaa, nɛ ɖɔ-cɔlɔ mba laŋa yɔ.

Maɣzɩ ñɔ-hɔʋ taa mba yaa ñɛ-ɛgbɛyɛ taa ñɩma mba ñɔ-tɔm pee kɩbana nɛ ña-camɩyɛ lakasɩ kaɣ wazʋʋ yɔ pɔ-yɔɔ nɛ ŋna. Pɩtɩla yɔ, nɔɔyʋ wɛ ñɛ-ɛgbɛyɛ taa nɛ pɩpɔzʋʋ se pasɩnɩ-ɩ nɛ ɛcɔnɩ ɛ-ɖɩɣa nɛ ɛ-kaɖaɣ yɔɔ, yaa se pasɩnɩ-ɩ tʋmɩyɛ naɖɩyɛ labʋ ɖoŋ ɖoŋ ɛzɩ wondu yabʋ mbʋ yɔ. Pɩtasɩ lɛ, ye ŋkatɩ nɔɔyʋ tɔm susuu taa nɛ pɩpɔzʋʋ se pasɩnɩ-ɩ yɔ, ŋpɩzɩɣ nɛ ŋla nabʋyʋ ɖeyi ɖeyi nɛ ŋsɩnɩ-ɩ?

Tɛtɛ nɛ ɖɩmaɣzɩnɩ Yehowa nɛ ɖiyele nɛ “camɩyɛ lakasɩ paɣtʋ” ɖiyiɣ ɖɔ-yɔɔdaɣ nɛ ɖa-lakasɩ paa ɛzɩmtaa.