Bibl yɔɔdʋʋ kpayɩ kpayɩ se Yehowa pɩzɩɣ nɛ ɛyɔɔdɩ mbʋ pɩkaɣ labʋ cee wayɩ yɔ pɩ-tɔm. (Iza. 45:21) Ɛlɛ kiiheyiɣ-ɖʋ ɛzɩma ɛlakɩ mbʋ yɔ yaa alɩwaatʋ ndʋ ɛlakɩ mbʋ yɔ nɛ halɩ tɔm ndʋ ɛsɔɔlaa se ɛtɩlɩ yɔ tɩ-tɔm tete. Pʋyɔɔ lɛ, ɖɩɩsɩŋ tɔm tɩŋa ɖoŋ weyi Yehowa wɛna se ɛtɩlɩ mbʋ pɩkaɣ labʋ cee wayɩ yɔ ɩ-yɔɔ. Ɛlɛ iyele nɛ ɖɩtazɩ tɔm ndʋ ɖɩsɩma yɔ tɩ-taa natʋyʋ taa.

Yehowa pɩzɩɣ nɛ ɛtɩlɩ mbʋ payɩ ɛsɔɔlaa se ɛtɩlɩ yɔ, ɛlɛ nabʋyʋ taa ɛɖʋʋ ɛ-tɩ kamasɩ. Ɛ-lɔŋsɩnɖɛ fɛyɩ kamaɣ, pʋyɔɔ lɛ ɛpɩzɩɣ nɛ ɛyɔɔdɩ mbʋ pɩkaɣ labʋ cee wayɩ yɔ ye ɛsɔɔlaa se ɛlakɩ mbʋ yɔ. (Roma 11:33) Pɩfɛyɩ-ɩ kaɖɛ se ɛɖɔkɩ ɛ-tɩ, pʋyɔɔ lɛ ɛpɩzɩɣ ɖɔɖɔ nɛ ɛlɩzɩ se ɛɛtɩlɩɣ mbʋ pɩkaɣ labʋ yɔ.—Kpaɣ-tʋ nɛ ŋmaɣzɩnɩ Izaayii 42:14.

Yehowa yeki se ɛ-sɔɔlɩm ɛla. Ɛzɩma tɔm ndʋ titukuuni ɖoŋ weyi ɛwɛna se ɛyɔɔdɩ mbʋ pɩkaɣ labʋ cee wayɩ yɔ? Izaayii 46:10 yɔɔdʋʋ se: «Ðooo kiɖe tɛɛ mɔyɔɔdʋʋ mbʋ pɩkaɣ labʋ yɔ pɩ-tɔm, nɛ ɖooo lɔndaa mɔyɔɔdʋʋ mbʋ pɩtɩlabɩta yɔ pɩ-tɔm. Mɔyɔɔdʋʋ se: “Lɩmaɣzɩyɛ nɖɩ mankpaɣaa yɔ ɖɩkaɣ labʋ, nɛ mankaɣ labʋ mbʋ payɩ pɩkɛdɩnɩ-m yɔ.”»

Ye mbʋ, Yehowa pɩzɩɣ nɛ ɛyɔɔdɩ mbʋ pɩkaɣ labʋ cee wayɩ yɔ, mbʋ pʋyɔɔ yɔ ɛwɛnɩ ɖoŋ se eyele nɛ mbʋ ɛsɔɔlaa yɔ pɩla. Yehowa eekpedesiɣ se ɛna mbʋ pɩkaɣ labʋ cee wayɩ yɔ nɛ pɩwɛɛ ɛzɩ mbʋ pɩkaɣ labʋ cee wayɩ yɔ pɩtɛm labʋ nɛ ɛɖaɣnɩɣ-pʋ cɔnʋʋ kɩcɔnʋʋ yɔ. Ɛlɛ Yehowa pɩzɩɣ nɛ ɛlɩzɩ se eyeki nɛ nabʋyʋ la alɩwaatʋ natʋyʋ yɔɔ ɖeyi ɖeyi, nɛ alɩwaatʋ ndʋ tɩtalɩɣ lɛ, eyele nɛ pɩla.—Ejl. 9:​5, 6; Mat. 24:36; Tʋma 17:31.

Pʋyɔɔ lɛ, Bibl labɩnɩ tʋmɩyɛ tɔm pee ɛzɩ «mɔñɔɔzɩ-tʋ,» «malabɩ-tʋ» nɛ «kaɖʋwa» se kɩyɔɔdɩ mbʋ Yehowa lakɩ pɩlɩɩnɩ mbʋ pɩkaɣ labʋ cee wayɩ yɔ pɩ-taa nabʋyʋ tɔm. (2 Awi. 19:25; pɩ-tɛɛ tɔm; Iza. 46:11) Kiɖe tɛɛ tɔm piye nɖɩ pɛɖɛzɩnɩ tɔm pee ana yɔ, ɖɩlabɩ nɔɔ kʋɖʋmaɣ nɛ tɔm piye naɖɩyɛ nɛ ɖɩ-tɔbʋʋ lɛ se «cʋʋ mayʋ.» (Yer. 18:4) Ɛzɩ cʋʋ mayʋ weyi ɛwɛ niye yɔ ɛkpakɩɣ cʋʋ nɛ ɛlakɩnɩ ñanaɣ kɩbaŋa nakɛyɛ yɔ, mbʋ ɖɔɖɔ Yehowa pɩzɩɣ nɛ ɛtɩŋnɩ nʋmɔŋ ndɩ ndɩ yɔɔ nɛ eyele nɛ ɛ-sɔɔlɩm la.—Efɛz. 1:11.

Yehowa ñaŋ tɩ-yɔɔ wɛʋ lɩzʋʋ waɖɛ nɖɩ ɛha ɛyaa yɔ. Ɛtɩma mbʋ pɩkaɣ labʋ paa ɛyʋ weyi lɛ e-wezuu caɣʋ taa yɔ nɛ ɛsɩɩ. Ɛɛlakɩ ɖɔɖɔ se laŋa kɩbana tɩnaa ɩla mbʋ piyeki nɛ paɖɩzɩ-wɛ yɔ. Ɛhaɣ ɛyaa tɩŋa waɖɛ se palɩzɩ mbʋ pɔsɔɔlaa se palakɩ yɔ nɛ eseɣtiɣ-wɛ se pala mbʋ pɩwɛ ɖeu yɔ.

Iyele nɛ ɖɩna kɩɖaŋ 2. Kajalaɣ kɩɖaʋ tukuuni Niniivi mba. Yehowa kaayɔɔdaa se pakaɣ yɔkʋʋ Niniivi tɛtʋ tɩ-kañatʋ lakasɩ yɔɔ. Ɛlɛ alɩwaatʋ ndʋ Niniivi mba kpiɖi pa-lakasɩ yɔɔ yɔ, «lɩmaɣza wena [Yehowa kaakpaɣaa] se ɛkɔŋnɩ pɔ-yɔɔ asɛyʋʋ yɔ ɛlɛɣzɩ-yɛ, nɛ ɛtɩtasɩ-kʋ kɔnʋʋ.» (Yon. 3:​1-10) Yehowa lɛɣzɩ ɛ-lɩmaɣza tɔm ndʋ ɛɛyɔɔdaa yɔ tɩ-yɔɔ, mbʋ pʋyɔɔ yɔ Niniivi mba labɩnɩ tʋmɩyɛ tɩ-yɔɔ wɛʋ lɩzʋʋ waɖɛ nɖɩ paawɛna yɔ nɛ palɩzɩ se pɛlɛɣzɩɣ pa-lakasɩ alɩwaatʋ ndʋ panɩ tɔm ndʋ Yehowa tiyaa se peheyi-wɛ yɔ.

Kɩɖaʋ naalɛ ñɩŋgʋ tukuuni natʋ tɔm ndʋ tɩyɔɔdʋʋ you laɖʋ Siiruusi tɔm yɔ. Natʋ ndʋ, tɩtɔŋ se ɛkaɣ lɩzʋʋ Yuuda mba yomiye taa nɛ ɛha nɔɔ se paɖaɣnɩ maʋ Yehowa templo. (Iza. 44:26–45:4) Pɛrɩsɩ wiyaʋ Siiruusi yeba nɛ natʋ tɔm ndʋ tɩla. (Ɛsd. 1:​1-4) Ɛlɛ, Siiruusi taasɛɣ Ɛsɔ toovenim tʋ. Yehowa tɩŋnɩ Siiruusi yɔɔ nɛ eyele nɛ natʋ tɔm ndʋ tɩla, ɛlɛ ɛtɩñɩɣ Siiruusi yɔɔ se ɛsɛɛ-ɩ.—Adu. 21:1.

Lɩmaɣza wena ɖɩnawa yɔ, a-yɔɔ Yehowa maɣzɩɣ alɩwaatʋ ndʋ ɛyɔɔdʋʋ mbʋ pɩkaɣ labʋ cee wayɩ yɔ pɩ-tɔm yɔ. Ɛlɛ toovenim taa lɛ, pɩtɩkɛ a-ɖeke a-yɔɔ ɛmaɣzɩɣ. Ɛyʋ nɔɔyʋ ɛɛpɩzɩɣ nɛ ɛnɩɩ ndʋ payɩ Yehowa maɣzɩɣ nɛ mbʋ payɩ ɛlakɩ yɔ pɩ-taa kiya. (Iza. 55:​8, 9) Ɛlɛ ndʋ ɖɩsɩm Yehowa yɔɔ yɔ, tɩkpazɩɣ ɖe-tisuu ɖoŋ se paa ɛzɩmtaa lɛ ɛlakɩ mbʋ pɩtʋʋzaa yɔ, pɩkpɛndɩnɩ alɩwaatʋ ndʋ ɛyɔɔdʋʋ mbʋ pɩkaɣ labʋ cee wayɩ yɔ pɩ-tɔm yɔ.