1. (a) Ɛbɛ yɔɔ papɩzɩɣ nɛ patasɩ-ɖʋ lɔŋ? (b) Nɛ ɛbɛ yɔɔ pɩpɔzʋʋ ɖa-tɩŋa payɩ lɔŋ tasʋʋ?

 NABƲYƲ taa, pɩpɔzʋʋ ɖa-tɩŋa payɩ lɔŋ tasʋʋ. Hɔɔlɩŋ nɩɩyɩ taa lɛ, ɖa-maɣmaɣ ɖɩpɩzɩɣ nɛ ɖɩkpaɣ lɩmaɣzɩyɛ se ɖɩpɔzʋʋ ɛyʋ weyi ɖɩñaŋɩ-ɩ yɔ lɔŋ tasʋʋ. Hɔɔlɩŋ lɛɛŋ taa lɛ, koobu abalɩñɩnʋ weyi ɛmaɣzɩɣ ɖɔ-yɔɔ yɔ, ɛpɩzɩɣ nɛ ɛñɔtɩnɩ-ɖʋ nɛ ɛsɩnɩ-ɖʋ nɛ ɖɩna se ɖɩcaɣ kpɛzʋʋ “nɩŋgbaŋaɣ kɩdɛkɛdaɣ nakɛyɛ,” pʋ-tɔbʋʋ lɛ se ɖɩcaɣ labʋ mbʋ ɖɩkaɣ kpiɖuu pɩ-yɔɔ pʋwayɩ yɔ. (Gal. 6:1) Kɛdɛzaɣ ɖeɖe lɛ, alɩwaatʋ ndʋ ɖɩlakɩ kɩdɛkɛdɩm sɔsɔm nabʋyʋ nɛ pɩtɛ yɔ, nɔɔyʋ pɩzɩɣ nɛ ɛñɔtɩnɩ-ɖʋ nɛ ɛtasɩ-ɖʋ lɔŋ se pɩsa nɛ ɖɩñɔɔzɩ mbʋ ɖɩwɛɛkaa yɔ. Paa pɩtɩɩkɛ ɛbɛ yɔɔ patasɩɣ-ɖʋ lɔŋ yɔ, pɩwɛɛ se ɖitisi nɛ ɖɩmʋ-ɩ. Ye ɖɩlakɩ mbʋ yɔ, pɩwazɩɣ-ɖʋ nɛ pɩpɩzɩɣ nɛ pɩya ɖa-ñʋʋ.—Adu. 6:23.

2. Ɛzɩ Aduwa 12:15 yɔɔdʋʋ yɔ, ɛbɛ yɔɔ pɩpɔzʋʋ se ɖitisi nɛ ɖɩmʋ lɔŋ tasʋʋ?

² Ðɔ-tɔm ñʋʋ mayaɣ seɣtiɣ-ɖʋ se ‘ɖiwelisi lɔŋsɩnɖaa tɔm.’ (Adu. 22:17) Ɛyʋ nɔɔyʋ fɛyɩ se ɛsɩm pɩtɩŋa; paa ɛzɩmtaa lɛ, nɔɔyʋ wɛɛ se ɛsɩm lɔŋ yaa ɛwɛ lɛɣtʋ nɛ pɩkpaɖɩ-ɖʋ. (Kalɩ Aduwa 12:15.) Ye mbʋ, ye ɖiwelisiɣ lɔŋ weyi patasɩɣ-ɖʋ yɔ, pɩwɩlɩɣ se ɖɩwɛnɩ tɩ luzuu. Pɩwɩlɩɣ se ɖɩsɩm ɖɛ-ɛjandʋ nɛ ɖiɖiɣzinaa se pɩpɔzʋʋ se pasɩnɩ-ɖʋ nɛ ɖɩtalɩ ɖa-kaɖʋsɩ. Fezuu kiɖeɖeu sɩnɩ Wiyaʋ Salomɔɔ nɛ ɛma se: “Ðenɖe lɔŋ pasɩyaa kpaɖɩ ɖɔʋ yɔ, peeɖe papɩzɩɣ.”—Adu. 15:22.

3. Nʋmɔŋ weyi yɔɔ pɩpɩzɩɣ pɩtɩŋna nɛ ɖɩmʋ lɔŋ tasʋʋ?

³ Ðɩpɩzɩɣ nɛ ɖɩmʋ lɔŋ tasʋʋ mbʋ pɩtɩlɩɩnɩ ɛyʋ nɔɔyʋ cɔlɔ kpayɩ yɔ yaa mbʋ pɩlɩnɩ ɛyʋ nɔɔyʋ cɔlɔ kpayɩ yɔ. Ye pɔtɔm se lɔŋ tasʋʋ nabʋyʋ tɩlɩɩnɩ ɛyʋ nɔɔyʋ cɔlɔ kpayɩ yɔ, pʋ-tɔbʋʋ lɛ suwe? Ðɩpɩzɩɣ nɛ ɖɩkalɩ tɔm natʋyʋ Bibl taa yaa ɖɛ-ɛgbɛyɛ takayaɣ nakɛyɛ taa nɛ tiyele nɛ ɖɩmaɣzɩ wezuu ŋgʋ ɖɩwɛɛ nɛ ɖɩcakɩ yɔ kɩ-yɔɔ nɛ piseɣti-ɖʋ nɛ ɖɩñɔɔzɩ ɖe-wezuu caɣʋ. (Ebr. 4:12) Mbʋ ɖɩyaɣ se lɔŋ tasʋʋ mbʋ pɩtɩlɩɩnɩ ɛyʋ nɔɔyʋ cɔlɔ kpayɩ yɔ. Ye pɔtɔm se lɔŋ tasʋʋ nabʋyʋ lɩnɩ ɛyʋ nɔɔyʋ cɔlɔ kpayɩ yɔ, pʋ-tɔbʋʋ lɛ suwe? Ɛgbɛyɛ taa ɛzʋtʋyʋ nɔɔyʋ yaa koobu abalɩñɩnʋ nɔɔyʋ, weyi ɛpɩ fezuu taa yɔ ɛpɩzɩɣ  nɛ eheyi-ɖʋ se pɩpɔzʋʋ se ɖɩla lɛɣzɩtʋ hɔɔlʋʋ nakʋyʋ taa. Ðɩpɩzɩɣ nɛ ɖɩyaa lɔŋ tasʋʋ mbʋ se lɔŋ tasʋʋ mbʋ pɩlɩnɩ ɛyʋ nɔɔyʋ cɔlɔ kpayɩ yɔ. Ye ɛyʋ nɔɔyʋ ɛsɔɔlɩ-ɖʋ siŋŋ nɛ ɛtɩŋnɩ Bibl yɔɔ nɛ ɛtasɩ-ɖʋ lɔŋ yɔ, pɩpɔzʋʋ se ɖɩwɩlɩ se ɖɩwɛnɩ ɛsɩmɩyɛ nɛ ɖiwelisi tɔm ndʋ ɛyɔɔdʋʋ yɔ nɛ ɖɩkpaɣ ɛ-lɔŋ tasʋʋ nɛ ɖɩlabɩnɩ tʋmɩyɛ.

4. Ɛzɩ Eklesɩyastɩ 7:9 yɔɔdʋʋ yɔ, alɩwaatʋ ndʋ ɛyʋ nɔɔyʋ tasɩɣ-ɖʋ lɔŋ yɔ, wɛtʋ ndʋ pɩtɩpɔzɩ se ɖɩwɛɛna?

⁴ Toovenim taa lɛ, pɩpɩzɩɣ nɛ pɩwɛɛ-ɖʋ kaɖɛ siŋŋ se ɖitisi nɛ ɖɩmʋ lɔŋ tasʋʋ mbʋ pɩlɩnɩ ɛyʋ nɔɔyʋ cɔlɔ kpayɩ yɔ. Halɩ ɖɩpɩzɩɣ nɛ ɖɩkɔ pana. Ɛbɛ yɔɔ? Paa ɖitisiɣ faaa se ɖɩtɩtalɩ pilim yɔ, alɩwaatʋ ndʋ ɛyʋ nɔɔyʋ heyiɣ-ɖʋ se pɩpɔzʋʋ se ɖɩlɛɣzɩ ɖɛ-ɛjandʋ natʋyʋ yɔ, pɩpɩzɩɣ nɛ pɩwɛɛ-ɖʋ kaɖɛ se ɖitisi nɛ ɖɩmʋ ɛ-lɔŋ tasʋʋ. (Kalɩ Eklesɩyastɩ 7:9.) Ðɩpɩzɩɣ nɛ ɖɩñɩnɩ kawanaɣ nakɛyɛ se ɖɩlʋ ɖa-tɩ yɔɔ. Ðɩpɩzɩɣ nɛ ɖɩpɩtɩ mbʋ piseɣti ɛyʋ ɛnʋ nɛ ɛtasɩ-ɖʋ lɔŋ yɔ pɩ-yɔɔ; yaa ɛzɩma ɛkpaɣnaa nɛ ɛtasɩ-ɖʋ lɔŋ yɔ, pɩpɩzɩɣ nɛ pɩcɛyɩ-ɖʋ. Halɩ ɖɩpɩzɩɣ nɛ ɖɩka ɖa-lɩmaɣza weyi ɛtasɩ-ɖʋ lɔŋ yɔ ɛ-ɛjandʋ natʋyʋ yɔɔ nɛ ɖɩyɔɔdɩ se: ‘Ɛnʋ anɩ nɛ ɛtasɩɣ-m lɔŋ? Ɛnʋ ɖɔɖɔ ɛwɛnɩ ɛjandʋ!’ Nɛ ye lɔŋ weyi ɛyʋ ɛnʋ ɛtasɩ-ɖʋ yɔ ɛtɩkɛdɩnɩ-ɖʋ yɔ, pɩtɩla ɖiitisiɣ se ɖɩmʋ-ɩ, yaa pɩtɩla ɖɩpɔzʋʋ ɛyʋ lɛlʋ se ɛtasɩ-ɖʋ lɔŋ mbʋ pʋyɔɔ yɔ, ɖɩtaɣ liu se ɛlɛ kaɣ-ɖʋ heyuu tɔm ndʋ ɖɩsɔɔlaa se ɖɩnɩɩ yɔ.

5. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁵ Tɔm ñʋʋ kʋnɛ kɩ-taa, ɖɩkaɣ tazʋʋ Bibl taa ɛyaa mba paakizi mʋʋ lɔŋ tasʋʋ nɛ mba paatisaa nɛ pamʋ lɔŋ tasʋʋ yɔ pa-kɩɖaŋ taa. Ðɩkaɣ naʋ ɖɔɖɔ mbʋ pɩkaɣ-ɖʋ sɩnʋʋ nɛ ɖitisi nɛ ɖɩmʋ lɔŋ tasʋʋ nɛ ɖiyele nɛ pɩwazɩ-ɖʋ yɔ.

6. Patasɩ Wiyaʋ Robowam lɔŋ nɛ ɛla ɛzɩma yɔ, lɔŋ weyi pɩkpɛlɩkɩɣ-ɖʋ?

⁶ Iyele nɛ ɖɩna Robowam kɩɖaʋ. Alɩwaatʋ ndʋ ɛpɩsɩ Izrayɛɛlɩ wiyaʋ yɔ, ɛ-samaɣ kɔm ɛ-cɔlɔ se kɔpɔzɩ-ɩ nabʋyʋ. Kɔpɔzɩ-ɩ se ɛpasɩ sʋʋtʋ ndʋ ɛ-caa Salomɔɔ kaasʋʋ-kɛ yɔ tɩ-yɔɔ. Pɩlabɩ ɖeu se Robowam pɔzɩ Izrayɛɛlɩ taa ɛyaa mba pasʋtʋyaa yɔ lɔŋ tasʋʋ se ɛna se suwe pɩwɛɛ se ecosi samaɣ. Ɛzʋtʋyaa mba, patasɩ wiyaʋ lɔŋ se ye ɛlabɩ mbʋ samaɣ pɔzʋʋ-ɩ yɔ, kakaɣ-ɩ ɖʋʋ nesi paa ɛzɩmtaa. (1 Aw. 12:3-7) Pɩwɛ ɛzɩ Robowam taa taala leleŋ nɛ lɔŋ weyi ɛzʋtʋyaa tasɩ-ɩ yɔ, pʋyɔɔ ewoba nɛ ɛpɔzɩ ɛ-ɖaɣʋnaa lɔŋ tasʋʋ. Pɩtʋʋ fɛyɩ se ɛ-ɖaɣʋnaa mba paawɛnɩ ɛzɩ pɩnzɩ 40 mbʋ yɔ. Ye mbʋ, paawɛnɩ wezuu caɣʋ taa lɛɣtʋ pazɩ. (4 Aw. 12:13) Ɛlɛ alɩwaatʋ ndʋ tɩ-taa lɛ, patasɩ Robowam lɔŋ kɩdɛkɛdɩŋ. Patasɩ-ɩ lɔŋ se ɛsɔzɩ samaɣ sʋʋtʋ. (1 Aw. 12:8-11) Alɩwaatʋ ndʋ patasɩ Robowam lɔŋ ɛnɩ ɩ-naalɛ yɔ, ɛpɩzaɣ se ɛtɩmnɩ Yehowa nɛ ɛpɔzɩ-ɩ nɛ ɛna se lɔŋ tasʋʋ mbʋ pɩwɛɛ se ɛlabɩnɩ tʋmɩyɛ. Ɛlɛ, ɛlɩzaa se ɛlakɩnɩ tʋmɩyɛ lɔŋ tasʋʋ mbʋ pɩkɛdɩnɩ-ɩ yɔ nɛ ewelisini evebiya. Mbʋ pɩlɩ pɩ-taa yɔ, pɩkɔnɩ kaɖɛ Robowam nɛ Izrayɛɛlɩ samaɣ. Ðɔ-hɔɔlʋʋ taa lɛ, lɔŋ weyi patasɩɣ-ɖʋ yɔ, pɩtɩla pɩtɩkɛ paa ɛzɩmtaa pɩkɛɣnɩ tɔm ndʋ ɖɩsɔɔlaa se ɖɩnɩɩ yɔ. Paa mbʋ yɔ, ye pɩlɩnɩ Ɛsɔtɔm taa yɔ, pɩwɛɛ se ɖitisi nɛ ɖɩmʋ-ɩ.

7. Lɔŋ weyi Wiyaʋ Uziya kɩɖaʋ kpɛlɩkɩɣ-ɖʋ?

⁷ Wiyaʋ Uziya taamʋ lɔŋ tasʋʋ. Ɛsʋ Yehowa tɛ templo taa lone nɖɩ ɖɩ-taa paha cɔjɔnaa ɖeke waɖɛ se pasʋʋ yɔ ɖɩ-taa, nɛ ɛñɩnaɣ se ɛsɔ tɩlaaɖɩ miŋ. Peeɖe Yehowa tɛ cɔjɔnaa heyi-i se: “Pɩtɩkɛ ña-tʋmɩyɛ lɛ, Uziya, se ŋfɛtɩ [Yehowa] sɔzɩŋ pɛɛ ñɔsɩ, ɛlɛ cɔjɔnaa.” Ɛzɩma Uziya laba? Ye eeluzi ɛ-tɩ nɛ ɛmʋ lɔŋ weyi patasɩ-ɩ yɔ nɛ ɛlɩɩ templo taa kpaagbaa yɔ, pɩtɩla Yehowa kaakpeɣ-i. Ɛlɛ, “Uziya kɔ pana.” Ɛbɛ yɔɔ ɛtɩmʋ lɔŋ weyi patasɩ-ɩ yɔ? Pɩtʋʋ fɛyɩ se ɛmaɣzaɣ se ɛkɛ wiyaʋ nɛ pʋyɔɔ lɛ, ɛwɛnɩ waɖɛ se ɛla mbʋ ɛsɔɔlaa yɔ. Ɛlɛ pɩtɩkɛ mbʋ Yehowa ñamaɣzaɣ. Uziya labɩ mbʋ ɛtaawɛɛnɩ waɖɛ se ɛla yɔ lɛ, mbʋ pɩlɩ  pɩ-taa yɔ mbʋ lɛ se canatʋ kʋdɔŋ kpa-ɩ nɛ ɛpɩsɩ “canaɣ pɩkɔɔ pɩtalɩ ɛ-sɩm kɩyakʋ wiye.” (4 Aw. 26:16-21) Uziya kɩɖaʋ kpɛlɩkɩɣ-ɖʋ se paa anɩ ɖɩtɩɩkɛnaa yɔ, ye ɖikizi mʋʋ Bibl taa lɔŋ tasʋʋ yɔ, ɖɔ-tɔm ɛtaasɩɣ kɛdɩnʋʋ Yehowa.

8. Alɩwaatʋ ndʋ patasɩ Yɔɔb lɔŋ yɔ, ɛzɩma ɛlaba?

⁸ Ɛzɩ ɖɩnaʋ nɛ pɩɖɛɛ yɔ, Bibl yɔɔdʋʋ ɛyaa mba pekizaa se paamʋʋ lɔŋ tasʋʋ yɔ pɔ-tɔm, nɛ pa-kɩɖaŋ pakɩ-ɖʋ. Ɛlɛ kɩyɔɔdʋʋ ɖɔɖɔ ɛyaa mba petisaa nɛ pamʋ lɔŋ tasʋʋ nɛ pɩwazɩ-wɛ yɔ pɔ-tɔm. Iyele nɛ ɖɩna Yɔɔb kɩɖaʋ. Paa ɛɛñaŋaɣ Ɛsɔ nɛ ɛñɩnɩɣ se ɛ-tɔm ɛkɛdɩnɩ-ɩ yɔ, ɛtaatalɩ pilim. Alɩwaatʋ ndʋ ɛɛwɛ nɩɣzɛ taa siŋŋ yɔ, ɛyɔɔdɩ tɔm natʋyʋ nɛ tɩtɩtʋʋzɩ. Mbʋ pɩlɩ pɩ-taa yɔ lɛ se Eliihu nɛ Yehowa patasɩ-ɩ lɔŋ kpayɩ. Ɛzɩma Yɔɔb laba? Eluzi ɛ-tɩ nɛ ɛmʋ lɔŋ tasʋʋ mbʋ. Ɛyɔɔdaa se: “Mɔyɔɔdɩ kɩɩsɩŋɩyʋ yɔɔdaɣ . . . Mankalɩɣ man-tɩ ma-maɣmaɣ, mahɩnɩ puuyuu taa nɛ tɔlɩma taa.” Yehowa wazɩ Yɔɔb mbʋ pʋyɔɔ yɔ, ɛlɛ luzi ɛ-tɩ.—Yɔɔb 42:3-6, 12-17.

9. Alɩwaatʋ ndʋ patasɩ Moyizi lɔŋ yɔ, ɛzɩma ɛlaba, nɛ ɛbɛ yɔɔ ɛkɛnɩ-ɖʋ kɩɖaʋ kɩbaŋʋ?

⁹ Moyizi labɩ kɩwɛɛkɩm sɔsɔm nabʋyʋ nɛ pɩtɛ lɛ, etisi faaa nɛ pɔhɔ ɛ-nɩŋgbaŋʋʋ, nɛ ɛkɛnɩ-ɖʋ kɩɖaʋ kɩbaŋʋ. Alɩwaatʋ natʋyʋ ɛkɔ pana nɛ ɛtɩɖʋ Yehowa hɩɖɛ. Pʋyɔɔ lɛ, Moyizi lesi waɖɛ nɖɩ ɛɛwɛna se ɛsʋʋ Lidaʋ Tɛtʋ taa yɔ. (Kɩg. 20:1-13) Alɩwaatʋ ndʋ Moyizi heyi Yehowa se ɛɖaɣnɩ cɔnʋʋ lɩmaɣzɩyɛ nɖɩ ɛkpaɣaa yɔ ɖi-ɖeɖe yɔ, ɛlɛ heyi-i se: “Taatasɩ-m tɔm ndʋ heyuu.” (Wp. 3:23-27) Moyizi tɩkɔ pana. Ɛlɛ, etisi lɩmaɣzɩyɛ nɖɩ Yehowa kpaɣaa yɔ ɖɩ-yɔɔ, nɛ Yehowa wobi pɩ-yɔɔ nɛ ɛtɩŋnɩ ɛ-yɔɔ nɛ eɖiyi Izrayɛɛlɩ piya. (Wp. 4:1) Moyizi nɛ Yɔɔb petisaa nɛ pamʋ lɔŋ tasʋʋ, nɛ pɛkɛnɩ kɩɖaŋ kɩbaŋ weyi pɩwɛɛ se ɖɩmaɣzɩna yɔ. Yɔɔb tisaa nɛ ɛñɔɔzɩ ɛ-lɩmaɣza; ɛtɩñɩnɩ kawanaɣ nakɛyɛ. Moyizi lesi waɖɛ nɖɩ ɖɩmʋ ñɩm ɛ-ɛsɩndaa yɔ nɛ pɩtɛ lɛ, ewobi pɩ-yɔɔ nɛ ɛɖɔkɩ e-siɣsiɣ wɛtʋ nɛ ɛwɩlɩ se etisaa nɛ ɛmʋ Yehowa lɔŋ tasʋʋ.

10. (a) Aduwa 4:10-13 wɩlɩɣ se ye ɖitisiɣ nɛ ɖɩmʋʋ lɔŋ tasʋʋ yɔ, ɛzɩma pɩwazɩɣ-ɖʋ? (b) Patasɩ ɛyaa nabɛyɛ lɔŋ lɛ, wɛtʋ kɩbandʋ ndʋ palɩzaa nɛ pawɩlɩ?

¹⁰ Ye ɖɩmaɣzɩnɩ ɛyaa siɣsiɣ tɩnaa ɛzɩ Yɔɔb nɛ Moyizi yɔ pa-kɩɖaŋ yɔ, pɩwazɩɣ-ɖʋ. (Kalɩ Aduwa 4:10-13.) Mbʋ ɖeyi ɖeyi ɖo-koobiya sakɩyɛ laba. Payaɣ koobu abalɩñɩnʋ nɔɔyʋ se Emmanuel nɛ ɛwɛ Kɔŋgoo ɛjaɖɛ taa. Na tɔm ndʋ ɛyɔɔdaa pɩlɩɩnɩ lɔŋ weyi paatasɩ-ɩ yɔ ɩ-yɔɔ yɔ. Ɛtɔm se: “Mɛ-ɛgbɛyɛ taa koobiya abalɩñɩma mba papɩ fezuu taa yɔ pɔkɔm nɛ peɖiɣzina se mancaɣ wɛɛkʋʋ ma nɛ Yehowa ɖa-taabalɩyɛ, nɛ pañaɣ pana se pasɩnɩ-m. Mɔnɖɔm pɔ-lɔŋ tasʋʋ yɔɔ, nɛ pɩsɩnɩ-m nɛ mɛnfɛɛ kala sakɩyɛ.” * Payaɣ nʋmɔʋ lɩzɩyʋ nɔɔyʋ se Megan; ɛwɛ Kanadaa ɛjaɖɛ taa. Ɛyɔɔdaa pɩlɩɩnɩ lɔŋ tasʋʋ yɔɔ se: “Pɩtɩkɛ paa ɛzɩmtaa manɩɣaɣ tɔm ndʋ maasɔɔlaa se manɩɩ yɔ, ɛlɛ tɔm ndʋ pɩɩcɛyaa se manɩɩ.” Payaɣ Krowaasii ɛjaɖɛ taa koobu abalɩñɩnʋ nɔɔyʋ se Marko; ɛyɔɔdaa se: “Melesi waɖɛ naɖɩyɛ, ɛlɛ mamaɣzɩɣ alɩwaatʋ ndʋ tɩɖɛwa yɔ tɩ-yɔɔ lɛ, menɖiɣziɣnaa se lɔŋ weyi paatasɩ-m yɔ ɛsɩnɩ-m nɛ manɖaɣnɩ kpaʋ ɖoŋ fezuu taa.”

11. Tɔm ndʋ Koobu Karl Klein yɔɔdaa pɩlɩɩnɩ lɔŋ tasʋʋ mʋʋ yɔɔ?

¹¹ Koobu Karl Klein kaakɛ Nɔɔɖɛyaa Ɛgbɛyɛ taa tʋ, ɛnʋ ɖɔɖɔ eetisaa nɛ ɛmʋ lɔŋ tasʋʋ nɛ pɩwazɩ-ɩ. Koobu Klein kɛdɩ e-wezuu caɣʋ tɔm taa se alɩwaatʋ natʋyʋ koobu Joseph Rutherford tasɩ-ɩ lɔŋ nɩɩyɩ kpayɩ. Ɛ nɛ ɩ paakɛ taabalaa kɩbama. Koobu Klein yɔɔdaa se kiɖe tɛɛ lɛ, ɛnʋ taamʋ lɔŋ tasʋʋ mbʋ camɩyɛ. Ɛtɔm se: “Pʋwayɩ [Koobu Rutherford] na-m lɛ, ɛsɛ-m nɛ taa leleŋ se: ‘Pɩcaɣ ɛzɩma Karl!’ Ɛlɛ man-taa kaawɛnɩ-ɩ mbʋ, pʋyɔɔ moncosi-i  nɛ mɔ-mɔɔŋ tɛɛ. Peeɖe eheyi-m se: ‘Karl, kpa ña-tɩ! Eleeu wɛɛ nɛ ɛcɔŋʋʋ-ŋ!’ Fɛyɛ kaakpa-m nɛ moncosi-i se: ‘Aayɩ, man-taa tɩwɩɩnɩ-ŋ Koobu Rutherford.’ Ɛlɛ ɛɛnawa se man-taa wɩnɩ-ɩ, pʋyɔɔ lɛ ɛɖaɣnɩ-m paɣʋ se: ‘Manɩ pɩ-taa. Ɛlɛ, kpa ña-tɩ! Eleeu wɛɛ nɛ ɛcɔŋʋʋ-ŋ!’ Ɛɛwɛnɩ toovenim! Alɩwaatʋ ndʋ ɖɩcakɩnɩ koobu nɔɔyʋ, kɔzɩ kɔzɩ ye eheyi-ɖʋ tɔm ndʋ ɛwɛnɩ waɖɛ se eheyi-ɖʋ yɔ . . ., pʋbʋ lɛ, ɖɩha Sataŋ nʋmɔʋ se ɛkpa-ɖʋ ɛ-kpaca taa.” * (Efɛz. 4:25-27) Koobu Klein tisaa nɛ ɛmʋ Koobu Rutherford lɔŋ tasʋʋ, nɛ powobi pɩ-yɔɔ nɛ pɛkɛ taabalaa kɩbama.

12. Ɛzɩma tɩ luzuu pɩzɩɣ pɩsɩnɩ-ɖʋ nɛ ɖitisi nɛ ɖɩmʋ lɔŋ tasʋʋ? (Keɣa 140:5)

¹² Ɛbɛ pɩzɩɣ pɩsɩnɩ-ɖʋ nɛ ɖitisi nɛ ɖɩmʋ lɔŋ tasʋʋ? Pɩpɔzʋʋ se ɖiluzi ɖa-tɩ nɛ ɖɩtɔzɩ se ɖɩtɩtalɩ pilim nɛ nabʋyʋ taa ɖɩpɩzɩɣ nɛ ɖɩla kɩmɛlɛndʋ siŋŋ. Ɛzɩ ɖɩnaʋ nɛ pɩɖɛɛ yɔ, nabʋyʋ taa Yɔɔb kaawɛnɩ lɩmaɣza wena atɩtʋʋzɩ yɔ. Ɛlɛ pʋwayɩ ɛñɔɔzɩ ɛ-lɩmaɣza, nɛ Yehowa wazɩ-ɩ pʋyɔɔ. Ɛbɛ yɔɔ? Mbʋ pʋyɔɔ yɔ, Yɔɔb luzi ɛ-tɩ. Etisaa nɛ ɛmʋ lɔŋ weyi Eliihu tasɩ-ɩ yɔ paa ɛɛkɩlɩ ɛlɛ nɛ pɩnzɩ sakɩyɛ yɔ, nɛ pɩ-yɔɔ ɛtɩŋnaa nɛ ɛwɩlɩ se ɛwɛnɩ tɩ luzuu. (Yɔɔb 32:6, 7) Mbʋ ɖɔɖɔ tɩ luzuu kaɣ-ɖʋ sɩnʋʋ nɛ ɖɩɖɔ lɔŋ weyi patasɩɣ-ɖʋ yɔ ɩ-yɔɔ, halɩ paa pɩlakɩ-ɖʋ ɛzɩ pɩtɩmʋna se patasɩ-ɖʋ lɔŋ ɛnɩ yaa paa ɖɩkɩlɩ weyi ɛtasɩɣ-ɖʋ lɔŋ yɔ. Kanadaa ɛjaɖɛ taa ɛgbɛyɛ taa ɛzʋtʋyʋ nɔɔyʋ yɔɔdaa se: “Ɛzɩma ɖɩnaɣ ɖa-tɩ yɔ, pɩtɩkɛ mbʋ ɛyaa lalaa naɣ-ɖʋ. Ye mbʋ, ɛzɩma ɖɩpɩzɩɣ nɛ ɖɩɖɛɛnɩ ɛsɩndaa ye nɔɔyʋ ɛɛtasɩɣ-ɖʋ lɔŋ yɔ?” Pɩwɛɛ se ɖa-tɩŋa payɩ ɖɩñaɣ pana nɛ ɖɩlʋlʋʋ fezuu piye nɛ pɩkɩlɩɣ nɛ ɖɩpɩsɩ tɔm kɩbandʋ susuyaa nɛ tɩ-wɩlɩyaa kɩbama nɛ pɩkɩlɩ.—Kalɩ Keɣa 140:5.

13. Lɩmaɣza wena pɩpɔzʋʋ se ɖɩwɛɛnɩ lɔŋ weyi patasɩɣ-ɖʋ yɔ ɩ-yɔɔ?

¹³ Kpaɣ lɔŋ tasʋʋ se pɩkɛnɩ nʋmɔŋ weyi ɩ-yɔɔ Ɛsɔ tɩŋɩɣna nɛ ɛwɩlɩɣ-ŋ sɔɔlɩm yɔ ɩ-taa nakʋyʋ. Yehowa sɔɔlaa se piɖeni-ɖʋ. (Adu. 4:20-22) Alɩwaatʋ ndʋ ɛtɩŋɩɣnɩ ɛ-Tɔm, ɛgbɛyɛ takayaɣ nakɛyɛ, yaa koobu Krɩstʋ tʋ weyi ɛpɩ fezuu taa yɔ ɛ-yɔɔ nɛ ɛtasɩ-ɖʋ lɔŋ yɔ, ɛwɩlɩɣ se ɛsɔɔlɩ-ɖʋ. Ebree mba 12:9, 10 yɔɔdʋʋ se: “Ɛlakɩ mbʋ se pɩwazɩ-ɖʋ.”

14. Alɩwaatʋ ndʋ patasɩɣ-ɖʋ lɔŋ yɔ, ɛbɛ yɔɔ pɩwɛɛ se ɖɩka ɖa-lɩmaɣza?

¹⁴ Ka ña-lɩmaɣza lɔŋ weyi patasɩɣ-ŋ yɔ ɩ-yɔɔ, pɩtaakɛ ɛzɩma pakpaɣnaa nɛ patasɩɣ-ŋ lɔŋ yɔ pɩ-yɔɔ. Nabʋyʋ taa, pɩtɩla pɩlakɩ-ɖʋ ɛzɩ ɛzɩma pakpaɣnaa nɛ patɩsɩ-ɖʋ lɔŋ nɩɩyɩ yɔ, pɩtɩmʋna. Pɩkɛ toovenim se ye nɔɔyʋ ɛñɩnɩɣ se ɛtasɩ ɛyʋ lɛlʋ lɔŋ yɔ, pɩpɔzʋʋ se ɛñaɣ pana nɛ eyele nɛ pɩwɛɛ ɛlɛ kɛlɛʋ se ɛmʋ lɔŋ tasʋʋ mbʋ. * (Gal. 6:1) Ɛlɛ, ye ɖa patasɩɣ lɔŋ yɔ,  pɩwɛɣ ɖeu se ɖɩka ɖa-lɩmaɣza lɔŋ weyi ɩwɛ lɔŋ tasʋʋ mbʋ pɩ-taa yɔ ɩ-yɔɔ, paa ɖɩmaɣzɩɣ se pɩɩwɛɛ se weyi ɛtasɩ-ɖʋ lɔŋ yɔ ɛtɩŋnɩ nʋmɔʋ ŋgʋ kɩkpaɖɩ ɖeu yɔ kɩ-yɔɔ nɛ ɛla mbʋ yɔ. Ðɩpɩzɩɣ nɛ ɖɩpɔzɩ ɖa-tɩ se: ‘Paa ɛzɩma pakpaɣnaa nɛ patasɩ-m lɔŋ yɔ pɩtɩkɛdɩnɩ-m yɔ, ɛzɩ manpɩzɩɣ nɛ mɛnkpɛlɩkɩ lɔŋ nɩɩyɩ lɔŋ tasʋʋ mbʋ pɩ-taa? Ɛzɩ manpɩzɩɣ nɛ mohuuzi mɛ-ɛsa weyi ɛtasɩ-m lɔŋ yɔ ɛ-ɛjandʋ yɔɔ, nɛ lɔŋ tasʋʋ mbʋ pɩwazɩ-m?’ Lɔŋ weyi payɩ patasɩɣ-ɖʋ yɔ, pɩkɛɣnɩ lɔŋsɩnɖɛ se ɖɩtɩŋnɩ nʋmɔʋ nakʋyʋ yɔɔ nɛ ɖiyele nɛ ɩwazɩ-ɖʋ.—Adu. 15:31.

15. Ɛbɛ yɔɔ pɩwɛɛ se ɖɩpɔzʋʋ lɔŋ tasʋʋ?

¹⁵ Bibl seɣtiɣ-ɖʋ se ɖɩpɔzɩ lɔŋ tasʋʋ. Aduwa 13:10 yɔɔdʋʋ se: “Lɔŋ wɛ ɛyaa hɛɛɛ tɩnaa [yaa mba pɔpɔzʋʋ lɔŋ tasʋʋ yɔ pɔ-cɔlɔ.]” Tɔm ndʋ tɩkɛ toovenim siŋŋ! Ɛyaa mba paaɖaŋɩɣ se nɔɔyʋ ɛñɔtɩnɩ-wɛ nɛ ɛtasɩ-wɛ lɔŋ, ɛlɛ pa-maɣmaɣ pɔpɔzʋʋ lɔŋ tasʋʋ yɔ, ɖoŋ ɖoŋ lɛ, pɛɖɛɣnɩ ɛsɩndaa fezuu taa siŋŋ nɛ pɩkɩlɩ mba paapɔzʋʋ lɔŋ tasʋʋ yɔ. Pʋyɔɔ lɛ, pɔzʋʋ lɔŋ tasʋʋ ña-maɣmaɣ.

16. Wɛtʋ ndʋ taa ɖɩpɩzɩɣ nɛ ɖɩpɔzɩ lɔŋ tasʋʋ?

¹⁶ Ɛzɩmtaa ɖɩpɩzɩɣ nɛ ɖɩpɔzɩ ɖo-koobiya Krɩstʋ ñɩma lɔŋ tasʋʋ? Iyele nɛ ɖɩmaɣzɩ wɛtʋ natʋyʋ yɔɔ. (1) Koobu halɩñɩnʋ nɔɔyʋ pɔzɩ tɔm susuyu weyi ɛwɛ niye yɔ se ɛsɩɩ-ɩ nɛ pɛkpɛlɩkɩnɩ nɔɔyʋ Bibl nɛ pʋwayɩ lɛ, ɛpɔzɩ ɛlɛ lɔŋ tasʋʋ se ɛna ɛzɩma ɛpɩzɩɣ ɛla nɛ ɛwɛɛ niye tɔm wɩlʋʋ taa nɛ pɩkpaɖɩ yɔ. (2) Koobu halɩñɩnʋ nɔɔyʋ kɛ ɛɖanɛ nɛ ɛsɔɔlaa se ɛya wondu kususutu natʋyʋ; pʋyɔɔ lɛ, ɛpɔzɩ koobu halɩñɩnʋ lɛlʋ weyi ɛpɩ fezuu taa yɔ se ɛlɛ eheyi-i ndʋ ɛmaɣzɩɣ pɩlɩɩnɩ wondu ndʋ ɛlɩzaa yɔ tɩ-yɔɔ yɔ. (3) Paha koobu abalɩñɩnʋ nɔɔyʋ waɖɛ se ɛyɔɔdɩ samaɣ taa tɔm kajalaɣ ɖeɖe. Peeɖe ɛpɔzɩ koobu lɛlʋ weyi ɛwɛ niye tɔm yɔɔdʋʋ taa yɔ se ɛlɛ ewelisini-i camɩyɛ nɛ pʋwayɩ lɛ, ɛtasɩ-ɩ lɔŋ kɩbaŋ nɩɩyɩ nɛ pɩsɩnɩ-ɩ nɛ ɛwɛɛ niye nɛ pɩkpaɖɩ. Paa koobu abalɩñɩnʋ nɔɔyʋ paɣzʋʋ samaɣ taa tɔm yɔɔdʋʋ yɔ, pɩlabɩ pɩnzɩ sakɩyɛ yɔ, pɩwɛɣ ɖeu se ɛpɔzɩ tɔm yɔɔdɩyaa mba pɛwɛ niye yɔ lɔŋ tasʋʋ nɛ pʋwayɩ lɛ, ɛɖɔ lɔŋ weyi patasɩɣ-ɩ yɔ ɩ-yɔɔ.

17. Ɛzɩma ɖɩpɩzɩɣ ɖiyele nɛ lɔŋ weyi patasɩɣ-ɖʋ yɔ ɩwazɩ-ɖʋ?

¹⁷ Kpɩtaŋ weyi ɩkɔŋ yɔ yaa fenasɩ nzɩ sɩkɔŋ yɔ sɩ-taa, pɩkaɣ pɔzʋʋ se patasɩ lɔŋ ɖa-tɩŋa; pɩpɩzɩɣ nɛ pɩkɛ lɔŋ tasʋʋ mbʋ pɩlɩnɩ ɛyʋ nɔɔyʋ cɔlɔ kpayɩ yɔ yaa lɔŋ tasʋʋ mbʋ pɩtɩlɩɩnɩ ɛyʋ nɔɔyʋ cɔlɔ kpayɩ yɔ. Alɩwaatʋ ndʋ patasɩɣ-ŋ lɔŋ yɔ, tɔzɩ lɔŋ weyi ɩ-taa ɖɩtazɩ lɛɛlɛɛyɔ yɔ ɩ-yɔɔ. Wolo pɩ-yɔɔ nɛ ŋluzuu ña-tɩ. Ka ña-lɩmaɣza lɔŋ weyi patasɩɣ-ŋ yɔ ɩ-yɔɔ, taaka ña-lɩmaɣza ɛzɩma pakpaɣnaa nɛ patasɩɣ-ŋ lɔŋ yɔ pɩ-yɔɔ. Nɛ ɖɔŋ lɔŋ weyi patasɩɣ-ŋ yɔ ɩ-yɔɔ. Paalʋlʋʋ ɖa-taa nɔɔyʋ nɛ lɔŋsɩnɖɛ. Ɛlɛ Ɛsɔtɔm haɣ-ɖʋ lidaʋ se ye ‘ɖiwelisi lɔŋ weyi papasɩɣ-ɖʋ yɔ nɛ ɖɩmʋ lɔŋ sɩɣzʋʋ yɔ, ɖɩkaɣ kɛʋ lɔŋsɩnɖaa.’—Adu. 19:20.