1. Ɛbɛ pɩpɔzaɣ se ɛyʋ ɛla pʋcɔ nɛ ɛyɔɔdɩnɩ Pɛrɩsɩ wiyaʋ?

MAƔZƖ se pɩlakɩ pɩnzɩ 2500 yɔ, ŋwɛ Pɛrɩsɩ. Ŋsɔɔlaa se ŋheyi tɛtʋ taa wiyaʋ tɔm natʋyʋ; nɛ pʋyɔɔ lɛ, ŋɖɔ nʋmɔʋ nɛ ŋwolo Suuzaŋ, tɛtʋ ndʋ tɩ-taa wiyaʋ wɛɛ yɔ. Ɛlɛ pʋcɔ nɛ ŋpɩzɩ nɛ ŋyɔɔdɩnɩ wiyaʋ lɛ, pɩwɛɛ se ɛha-ŋ nʋmɔʋ. Ye ɛtɩha-ŋ nʋmɔʋ, ɛlɛ ŋñaɣ pana se ŋyɔɔdɩnɩ-ɩ yɔ, papɩzɩɣ nɛ pakʋ-ŋ!—Ɛstɛɛrɩ 4:11.

2. Ɛzɩma Yehowa sɔɔlaa se pɩlabɩ-ɖʋ alɩwaatʋ ndʋ ɖɩyɔɔdʋʋnɩ-ɩ yɔ?

² Ða-taa wɛ leleŋ siŋŋ se Yehowa fɛyɩ ɛzɩ Pɛrɩsɩ wiyaʋ ɛnʋ yɔ! Yehowa kɩlɩ paa tɛtʋ yɔɔ wiyaʋ weyi, ɛlɛ ɖɩpɩzɩɣ nɛ ɖɩyɔɔdɩnɩ-ɩ paa alɩwaatʋ ndʋ. Ɛsɔɔlaa se sɔɔndʋ ɛtaakpa-ɖʋ se ɖɩyɔɔdɩnɩ-ɩ. Kɩɖaʋ nakʋyʋ yɔ, paa Yehowa kaawɛnɩ hɩla kɩsɛsɛna sɔsɔna ɛzɩ, Lɩzɩyʋ Sɔsɔ, Ðoŋ Tɩŋa Tʋ nɛ Kɩbaɣlʋ Kɩlɩm yɔ, ɛsɔɔlaa se ɖɩyɔɔdʋʋnɩ-ɩ lɛ, ɖɩlabɩnɩ tʋmɩyɛ tɔm piye “Caa,” tɔm piye nɖɩ ɖɩwɩlɩɣ se ɖɩsɔɔlɩ-ɩ. (Mat. 6:9) Pɩlakɩ-ɖʋ leleŋ se Yehowa sɔɔlaa se ɖɩñɔtɩnɩ-ɩ kpam!

3. (a) Ɛbɛ yɔɔ ɖɩpɩzɩɣ nɛ ɖɩyaa Yehowa se “Caa”? (b) Nɛ tɔm ñʋʋ kʋnɛ, ɛbɛ tɔm kɩkaɣ yɔɔdʋʋ?

³ Pɩmʋnaa se ɖɩyaa Yehowa se “Caa” mbʋ pʋyɔɔ yɔ, ɛnʋ kɛnɩ ɖe-wezuu Hiɖe. (Keɣa 35:10) Ɛkɛ ɖa-Caa nɛ pʋyɔɔ lɛ, pɩkɛnɩ-ɖʋ kɩjɛyʋʋ se ɖɩñamɩ-ɩ. Ye ɖɩlakɩ mbʋ ɛpɔzʋʋ-ɖʋ yɔ, ɖɩkaɣ hiɣu wazasɩ nzɩ sɩ-wayɩ fɛyɩ yɔ. (Ebr. 12:9) Wazasɩ nzɩ sɩ-taa nakɛyɛ lɛ tamtam wezuu, paa pɩtɩɩkɛ ɛsɔdaa yaa tɛtʋ yɔɔ yɔ. Pɩtasɩ lɛ, ɖihikiɣ wazasɩ sɔnɔ sɔnɔ ɖɔɖɔ. Tɔm ñʋʋ kʋnɛ, kɩkaɣ yɔɔdʋʋ mbʋ pɩwɩlɩɣ se Yehowa kɛ ɖa-Caa kʋsɔɔlʋ lɛɛlɛɛyɔ, nɛ mbʋ pʋyɔɔ ɖa-taa pɩzɩɣ nɛ pɩtɛ se ɛɛkaɣ-ɖʋ siɣye haʋ kpa nɛ ɛsɩndaa yɔ pɩ-tɔm. Ɛlɛ kajalaɣ lɛ, iyele nɛ ɖɩna mbʋ pʋyɔɔ ɖa-taa pɩzɩɣ nɛ pɩtɛ se ɖa-Caa weyi ɛwɛ ɛsɔdaa yɔ, ɛsɔɔlɩ-ɖʋ siŋŋ nɛ ɛcɔŋnɩ ɖɔ-yɔɔ yɔ.

4. Ɛbɛ yɔɔ pɩwɛ nabɛyɛ kaɖɛ se pakpaɣ Yehowa ɛzɩ pa-Caa yɔ?

⁴ Pɩwɛ-ŋ kaɖɛ se ŋmaɣzɩ se Ɛsɔ kɛ ña-Caa? Pɩpɩzɩɣ nɛ pɩla nabɛyɛ ɛzɩ patɩlɩɩ pʋyʋ, ye pakpaɣ-wɛ nɛ pamaɣzɩnɩ Yehowa yɔ. Papɩtɩɣ se Ɛsɔ Ðoŋ Tɩŋa Tʋ cɔŋnɩ pa-taa paa weyi lɛ ɛ-yɔɔ. Ɛlɛ ɖa-Caa kʋsɔɔlʋ tɩsɔɔlɩ se pɩlabɩ-ɖʋ mbʋ. Ɛha-ɖʋ wezuu nɛ ɛsɔɔlaa se taabalɩyɛ ɛwɛɛ ɖa nɛ ɩ ɖɛ-hɛkʋ taa. Apostoloo Pɔɔlɩ yɔɔdɩ toovenim tɔm ndʋ nɛ pɩtɛ lɛ, ɛlɩzɩ mba pewelisaɣni-i Atɛɛnɩ yɔ pɩ-taa se Yehowa ‘tiposini ɖa-taa nɔɔyʋ.’ (Tʋma 17:24-29) Ɛsɔ sɔɔlaa se ɖa-taa paa anɩ ɛñɔtɩnɩ-ɩ faaa ɛzɩ pɩɣa nakɛyɛ ñɔtʋʋnɩ lʋlɩyʋ sɔɔlɩm tʋ weyi ɛcɔŋnɩ kɔ-yɔɔ yɔ.

5. Ɛbɛ Krɩstʋ tʋ halɩñɩnʋ nɔɔyʋ kɩɖaʋ pɩzɩɣ nɛ kɩkpɛlɩkɩ-ɖʋ?

⁵ Pɩpɩzɩɣ nɛ pɩwɛɛ lalaa kaɖɛ se pakpaɣ Yehowa ɛzɩ pa-Caa yɔ mbʋ pʋyɔɔ yɔ, pa-maɣmaɣ pa-caanaa tɩwɩlɩ-wɛ sɔɔlɩm nɛ patɩhɛndɩnɩ-wɛ sakɩyɛ, yaa patɩla mbʋ paa ññɩɩ. Yʋsɩ tɔm ndʋ Krɩstʋ tʋ halɩñɩnʋ nɔɔyʋ yɔɔdaa yɔ. Ɛyɔɔdaa se: “Man-caa kaasɔɔlɩ-m tʋʋ. Alɩwaatʋ ndʋ mancalɩ paɣzʋʋ Bibl kpɛlɩkʋʋ yɔ, pɩɩwɛ-m kaɖɛ se mamaɣzɩ se mɔñɔtɩnɩ Caja weyi ɛwɛ ɛsɔdaa yɔ. Ɛlɛ mɔnkɔm nɛ mantɩlɩ Yehowa nɛ pɩtɛ lɛ, ma-lɩmaɣza tɩŋa lɛɣzɩ.” Ña ɖɔɖɔ mbʋ pɩlakɩ-ŋ? Ye mbʋ yɔ, pitaatibi-ŋ yɔɔɔ. Alɩwaatʋ wɛɣ nɛ tɩɖɛɣ lɛ, ña ɖɔɖɔ ŋkaɣ ɖiɣzinuu se Yehowa kɛ Caja kɩbanʋ siŋŋ.

6. Ɛzɩ Maatiyee 11:27 yɔɔdʋʋ yɔ, nʋmɔŋ weyi ɩ-yɔɔ Yehowa tɩŋnaa nɛ ɛsɩnɩ-ɖʋ se ɖɩkpaɣ-ɩ ɛzɩ ɖa-Caa kʋsɔɔlʋ yɔ, ɩ-taa lɛɛkʋ lɛ ŋgʋ?

⁶ Nʋmɔŋ weyi ɩ-yɔɔ Yehowa tɩŋnaa nɛ ɛsɩnɩ-ɖʋ se ɖɩkpaɣ-ɩ ɛzɩ ɖa-Caa kʋsɔɔlʋ yɔ, ɩ-taa lɛɛkʋ lɛ se eyeba nɛ pama tɔm ndʋ Yesu yɔɔdaa yɔ nɛ mbʋ ɛlaba yɔ Bibl taa. (Kalɩ Maatiyee 11:27.) Yesu maɣzɩnɩ ɛ-Caa wɛtʋ ɖeyi ɖeyi; pʋyɔɔ lɛ, ɛpɩzaɣ se ɛyɔɔdɩ se: “Weyi ɛna-m yɔ, ɛna ɖɔɖɔ Caa.” (Yoh. 14:9) Ðoŋ ɖoŋ lɛ, Yesu yɔɔdaɣ Yehowa tɔm se ɛwɛ ɛzɩ Caja yɔ. Alɩwaatʋ ndʋ Yesu yɔɔdaɣ Yehowa tɔm yɔ, ɛlabɩnɩ tɔm piye “Caa” tʋmɩyɛ tam ɛzɩ 165 mbʋ yɔ, Evaŋgilimwaa ɖeke taa. Ɛbɛ yɔɔ Yesu yɔɔdɩ Yehowa tɔm tam sakɩyɛ se ɛwɛ ɛzɩ Caja yɔ? Lɩmaɣzɩyɛ naɖɩyɛ lɛ se ɛlabɩ mbʋ se pɩsa nɛ ɛyaa taa tɛ se Yehowa kɛ Caja sɔɔlɩm tʋ.—Yoh. 17:25, 26.

7. Mbʋ Yehowa labɩ ɛ-Pɩyalʋ yɔ, ɛbɛ pɩkpɛlɩkɩɣ-ɖʋ?

⁷ Iyele nɛ ɖɩyɔɔdɩ mbʋ Yehowa labɩ ɛ-Pɩyalʋ Yesu yɔ pɩ-tɔm, nɛ ɖɩna se ɛbɛ pɩkpɛlɩkɩɣ-ɖʋ. Yehowa welisaɣ Yesu adɩma paa ɛzɩmtaa. Pɩtasɩna se ewelisaɣ Yesu adɩma lɛ, ecosaɣ a-yɔɔ ɖɔɖɔ. (Yoh. 11:41, 42) Paa kaɖɛ nɖɩ Yesu kaakataa yɔ, paa ɛzɩmtaa lɛ eɖiɣzinaa se ɛ-Caa sɔɔlɩ-ɩ nɛ ɛɖʋʋ-ɩ nesi.—Luka 22:42, 43.

8. Ɛzɩma tɩyɛ Yehowa cɔnɩ Yesu kɩcɛyɩm ɖeɖe?

⁸ Yesu ɖiɣzinaa se ɛ-Caa kɛnɩ e-wezuu Hiɖe nɛ kɩ-Ðɔkɩyʋ, alɩwaatʋ ndʋ ɛyɔɔdaa se: ‘Mɛwɛ wezuu Caa yɔɔ yɔ.’ (Yoh. 6:57) Yesu ta ɛ-Caa liu nɛ ɛ-laŋɩyɛ pilim, nɛ Yehowa cɔnɩ e-tomnaɣ yɔɔ kɩcɛyɩm ɖeɖe. Kɔzɩ kɔzɩ lɛ, Yehowa cɔnɩ Yesu fezuu taa kɩcɛyɩm ɖeɖe.—Mat. 4:4.

9. Ɛzɩma Yehowa wɩlaa se ɛkɛ Caja weyi ɛsɔɔlɩ Yesu siŋŋ yɔ?

⁹ Yehowa kɛ Caja kʋsɔɔlʋ nɛ pʋyɔɔ lɛ, eyeba nɛ Yesu ɖiɣzina se ɛwɛɛ nɛ ɛɖʋʋ-ɩ nesi. (Mat. 26:53; Yoh. 8:16) Paa Yehowa ɛtɩkandɩyɩ Yesu yɔɔ se kala ɛtaatalɩ-ɩ yɔ, ɛsɩnɩ-ɩ nɛ ɛɖɔkɩ ɛ-tɩ a-taa. Yesu taa kaatɛma se paa kaɖɛ nɖɩ ɛpɩzaɣ se ɛkatɩ yɔ, ɖɩkaɣ sɩʋ tɩnaɣ. (Ebr. 12:2) Yehowa wɩlaa se ɛsɔɔlɩ Yesu. Ewelisaɣni Yesu, ɛcɔŋnɩ ɛ-kɩcɛyɩm ɖeɖe, ɛfalɩsɩɣ-ɩ nɛ ɛɖʋʋ-ɩ nesi. (Yoh. 5:20;  8:28) Lɛɛlɛɛyɔ, iyele nɛ ɖɩna ɛzɩma ɖa-Caa weyi ɛwɛ ɛsɔdaa yɔ, ɛcɔŋnɩ ɖɔ-yɔɔ mbʋ ɖɔɖɔ yɔ.

10. Ɛzɩ Keɣa 65:19, 20 yɔɔdʋʋ yɔ, ɛzɩma Yehowa wɩlɩɣ se ɛsɔɔlɩ-ɖʋ?

¹⁰ Yehowa welisiɣ ɖa-adɩma. (Kalɩ Keɣa 65:19, 20.) Ɛtɩsɔɔlɩ se ɖa-adɩma ɩwɛɛnɩ kamaɣ, ɛlɛ eseɣtiɣ-ɖʋ se ɖɩtɩmɩɣnɩ-ɩ ɖoŋ ɖoŋ. (1 Tes. 5:17) Paa le ɖɩtɩɩwɛɛ yɔ, ɖɩpɩzɩɣ nɛ ɖɩñɔtɩnɩ ɖɛ-Ɛsɔ nɛ ñamtʋ paa alɩwaatʋ ndʋ. Pɩtɩkɩlɩ-ɩ ɖɔkɩnʋʋ kpa se etaawelisini-ɖʋ, ɛlɛ ewelisiɣ ɖa-adɩma paa ɛzɩmtaa. Alɩwaatʋ ndʋ ɖɩnaɣ se Yehowa welisiɣ ɖa-adɩma yɔ, ɖɩsɔɔlʋʋ-ɩ nɛ pɩkpaɖɩ. Keɣa maɖʋ yɔɔdaa se: “[Yehowa] mʋ ma-adɩma, mɔnsɔɔlɩ-ɩ pɩŋŋ.”—Keɣa 114:1.

11. Ɛzɩma Yehowa cosuu ɖa-adɩma yɔɔ?

¹¹ Pɩtasɩna se ɖa-Caa welisiɣ ɖa-adɩma lɛ, ecosuu a-yɔɔ ɖɔɖɔ. Apostoloo Yohanɛɛsɩ heyiɣ-ɖʋ lidaʋ tɔm tʋnɛ: “Paa ɛbɛ ɖɩpɔzʋʋ nɛ pɩlakɩ nɔɔ kʋɖʋmaɣ nɛ [Ɛsɔ] sɔɔlɩm yɔ, ewelisiɣni-ɖʋ.” (1 Yoh. 5:14, 15) Pɩkɛ toovenim se pɩtɩla Yehowa eecosuu ɖa-adɩma yɔɔ ɛzɩ ɖɩɩɖaŋʋʋ yɔ. Ɛsɩm mbʋ pɩwazɩɣ-ɖʋ nɛ pɩkɩlɩ yɔ; pʋyɔɔ lɛ, nabʋyʋ taa ecosuu se aayɩ yaa ɛñɩnɩɣ se ɖɩɖaŋ.—2 Kɔr. 12:7-9.

12-13. Ɛzɩma ɖa-Caa weyi ɛwɛ ɛsɔdaa yɔ ɛcɔŋnɩ ɖa-kɩcɛyɩm ɖeɖe?

¹² Yehowa cɔŋnɩ ɖa-kɩcɛyɩm ɖeɖe. Ɛlakɩ mbʋ ɛpɔzʋʋ cajanaa tɩŋa se pala yɔ. (1 Tim. 5:8) Ɛcɔŋnɩ e-piya tomnaɣ yɔɔ kɩcɛyɩm ɖeɖe. Ɛtɩsɔɔlɩ se ɖɩnɩɣzɩ tɔɔnaɣ, wondu kususutu yaa ɖɩzʋyɛ yɔɔ. (Mat. 6:32, 33; 7:11) Ɛzɩ lʋlɩyʋ kʋsɔɔlʋ yɔ, halɩ Yehowa labɩ ɖʋtʋ se ɛcɔŋnɩ ɖa-kɩcɛyɩm tɩŋa ɖeɖe cee wayɩ.

¹³ Kɔzɩ kɔzɩ lɛ, Yehowa cɔŋnɩ ɖe-fezuu taa kɩcɛyɩm ɖeɖe. Ɛtɩŋnɩ ɛ-Tɔm yɔɔ nɛ ɛwɩlɩ-ɖʋ ɛ-yɔɔ toovenim tɔm, ɛ-kaɖʋwa, wezuu kaɖʋwa nɛ mbʋ pɩkaɣ labʋ cee wayɩ yɔ. Ɛwɩlaa se ɛmaɣzɩɣ ɖa-taa paa weyi lɛ ɛ-yɔɔ alɩwaatʋ ndʋ ɖɩcalɩ tɩlʋʋ toovenim yɔ. Ɛtɩŋnɩ ɖa-lʋlɩyaa yaa ɛyaa lalaa yɔɔ nɛ ɛsɩnɩ-ɖʋ nɛ ɖɩtɩlɩ ɛ-yɔɔ tɔm. Nɛ ewobi pɩ-yɔɔ nɛ ɛsɩɣnɩ-ɖʋ se ɖɩkɛ ɛ-taabalaa. Ɛtɩŋɩɣnɩ mbʋ ɛgbɛyɛ taa ɛzʋtʋyaa nɛ koobiya lalaa mba papɩ fezuu taa yɔ palakɩ nɛ pasɩɣnɩ-ɖʋ nɛ sɔɔlɩm yɔ pɩ-yɔɔ. Pɩtasɩ lɛ, Yehowa tɩŋɩɣnɩ ɛgbɛyɛ taa kediɣzisi yɔɔ nɛ ɛwɩlɩɣ-ɖʋ tɔm. Kediɣzisi taa ɖa nɛ ɖo-koobiya ɖɩkpɛndɩɣ nɛ ɖɩkpɛlɩkɩɣ Ɛ-tɔm. Pɩtɩŋnɩ nʋmɔŋ ɛnɩ nɛ lɛɛŋ yɔɔ lɛ, Yehowa wɩlɩɣ se ɛkɛ Caja weyi ɛmaɣzɩɣ ɖa-tɩŋa ɖɔ-yɔɔ yɔ.—Keɣa 31:8.

14. (a) Ɛbɛ yɔɔ Yehowa falɩsɩɣ-ɖʋ? (b) Nɛ ɛzɩma ɛfalɩsɩɣ-ɖʋ?

¹⁴ Yehowa falɩsɩɣ-ɖʋ. Yesu talɩ pilim, ɛlɛ ɖa lɛ ɖɩtɩtalɩ pilim. Pʋyɔɔ lɛ, pɩsa nɛ ɖa-Caa kʋsɔɔlʋ falɩsɩ-ɖʋ lɛ, ɛsɩɣzɩɣ-ɖʋ lɔŋ alɩwaatʋ ndʋ pɩpɔzʋʋ yɔ. Ɛ-Tɔm tɔzʋʋ-ɖʋ se: “Mba Yehowa sɔɔlɩ-wɛ yɔ, ɛsɩɣzɩɣ-wɛ lɔŋ.” (Ebr. 12:6, 7) Yehowa tɩŋɩɣnɩ nʋmɔŋ sakɩyɛ yɔɔ nɛ ɛsɩɣzɩɣ-ɖʋ lɔŋ. Kɩɖaʋ nakʋyʋ yɔ. Ðɩpɩzɩɣ nɛ ɖɩkalɩ tɔm natʋyʋ Bibl taa, yaa ɖiwelisi tɔm natʋyʋ kediɣzaɣ taa nɛ ɖiɖiɣzina se pɩcɛyaa se ɖɩlɛɣzɩ ɖa-maɣzɩm yaa ɖa-lakasɩ. Yaa pɩtɩla, sɩnʋʋ mbʋ pɩpɔzʋʋ-ɖʋ yɔ, pɩlɩɣnɩ ɛzʋtʋyaa cɔlɔ. Paa ɛzɩma Yehowa ɛsɩɣzɩɣ-ɖʋ lɔŋ yɔ, ɛlakɩ mbʋ paa ɛzɩmtaa mbʋ pʋyɔɔ yɔ ɛsɔɔlɩ-ɖʋ.—Yer. 30:11.

15. Ɛzɩma Yehowa kandɩyɩɣ ɖɔ-yɔɔ?

¹⁵ Yehowa ɖʋʋ-ɖʋ nesi kala taa. Ɛzɩ caja nɔɔyʋ ɖʋʋ e-piya nesi kaɖɛ alɩwaatʋ taa yɔ, mbʋ ɖɔɖɔ ɖa-Caa weyi ɛwɛ ɛsɔdaa yɔ ɛɖʋʋ-ɖʋ nesi kala taa. Ɛtɩŋɩɣnɩ e-fezuu kiɖeɖeu yɔɔ nɛ ɛkandɩyɩɣ ɖɔ-yɔɔ se kaɖɛ naɖɩyɛ ɛtaatalɩ-ɖʋ fezuu taa. (Luka  11:13) Yehowa sɩɣnɩ-ɖʋ ɖɔɖɔ alɩwaatʋ ndʋ pitiki-ɖʋ yɔɔɔ yɔ. Kɩɖaʋ nakʋyʋ yɔ: Ɛhaɣ-ɖʋ lidaʋ kɩbaŋʋ. Cee wayɩ lidaʋ ŋgʋ, kɩsɩɣnɩ-ɖʋ se ɖɩɖɔkɩ ɖa-tɩ kala taa. Maɣzɩ tɔm tʋnɛ tɩ-yɔɔ nɛ ŋna: Paa kaɖɛ wɛtʋ ndʋ ɛtalɩ-ɖʋ yɔ, ɖa-Caa kʋsɔɔlʋ kaɣ yebu nɛ kʋñɔmɩŋ weyi payɩ ɖɩtɔkɩ yɔ ɩsɩɩ tɩnaɣ. Kala wena payɩ ɖɩwɛɛ nɛ ɖɩkatɩɣ yɔ, akaɣ sɩʋ tɩnaɣ, ɛlɛ wazasɩ nzɩ Yehowa haɣ-ɖʋ yɔ sɩwɛɣ tam.—2 Kɔr. 4:16-18.

16. Alɩwaatʋ ndʋ Aɖam tɩña ɛ-Caa kʋsɔɔlʋ yɔ, ɛbɛ laba?

¹⁶ Ye ɖɩmaɣzɩɣ mbʋ ɛlaba alɩwaatʋ ndʋ Aɖam tɩñamɩ-ɩ yɔ pɩ-yɔɔ yɔ, ɖɩnaɣ kpayɩ kpayɩ se Yehowa sɔɔlɩ-ɖʋ. Alɩwaatʋ ndʋ Aɖam tɩña ɛ-Caa weyi ɛwɛ ɛsɔdaa yɔ, ɛ nɛ e-liɖe taa ñɩma patɩtasɩ wɛnʋʋ lone Yehowa hɔʋ taa. (Roma 5:12; 7:14) Ɛlɛ Yehowa labɩ nabʋyʋ se ɛsɩnɩ Aɖam liɖe taa ñɩma.

17. Aɖam kaañamtʋ wayɩ lɛ, ɛbɛ Yehowa laba kpaagbaa?

¹⁷ Yehowa hɔm Aɖam nɩŋgbaaŋ, ɛlɛ ɛlabɩ tamaɣ se ɛsɩɣnɩ Aɖam liɖe taa ñɩma. Ɛlabɩ tamaɣ kpaagbaa se ɛyaa mba pañaŋɩ-ɩ yɔ, ɛkaɣ-wɛ pɩsɩnʋʋ ɛ-hɔʋ taa. (Kiɖe 3:15; Roma 8:20, 21) Yehowa tɩŋnɩ ɛ-Pɩyalʋ kʋsɔɔlʋ Yesu kɩhɛyʋʋ pʋ-ñʋʋ taa kɩlaʋ yɔɔ na nɛ ɛla ɖʋtʋ ndʋ. Ɛzɩma Yehowa cɛlɩ ɛ-Pɩyalʋ ɖɔ-yɔɔ yɔ, pɩwɩlɩɣ se ɛsɔɔlɩ-ɖʋ siŋŋ.—Yoh. 3:16.

18. Ɛbɛ yɔɔ ɖa-taa pɩzɩɣ nɛ pɩtɛ se Yehowa sɔɔlaa se ɖɩkɛ e-piya, paa ɖiiposini-i yɔ?

¹⁸ Paa ɖɩtɩtalɩ pilim yɔ, Yehowa sɔɔlaa se ɖɩwɛɛ ɛ-hɔʋ taa, nɛ ɛɛmaɣzɩɣ kpa se ɖɩkɛnɩ-ɩ sʋʋtʋ natʋyʋ. Ðɩpɩzɩɣ nɛ ɖɩɖʋ Yehowa ɖɩwɩzɩyɛ yaa ɖiposini-i nabʋyʋ taa, ɛlɛ paa ɛzɩmtaa lɛ, ɛwɛnɩ lidaʋ se ɖɩkaɣ pɩsʋʋ ɛ-cɔlɔ. Yesu tɩŋnɩ pɩɣa ŋga keleba yɔ kɛ-kɛdaɣ yɔɔ nɛ ɛwɩlɩ ɛzɩma Yehowa sɔɔlɩ e-piya siŋŋ yɔ. (Luka 15:11-32) Caja weyi  ɛ-tɔm pɔyɔɔdɩ kɛdaɣ ŋga ka-taa yɔ, ɛtɩlɔ lidaʋ kpa se ɛ-pɩyalʋ ɛɛkaɣ pɩsʋʋ. Alɩwaatʋ ndʋ pɩyalʋ pɩsɩ ɖɩɣa yɔ, caja mʋ-ɩ nɛ taa leleŋ sɔsɔŋ. Ye ɖiiposini Yehowa ɛlɛ ɖikpiɖi yɔ, ɖa-taa pɩzɩɣ nɛ pɩtɛ se ɖa-Caa kʋsɔɔlʋ sɔɔlɩ faaa se ɛmʋ-ɖʋ.

19. Ɛzɩma Yehowa kaɣ ñɔɔzʋʋ mbʋ Aɖam wɛɛkaa yɔ?

¹⁹ Ða-Caa kaɣ ñɔɔzʋʋ mbʋ payɩ Aɖam wɛɛkaa yɔ. Aɖam kaañamtʋ wayɩ lɛ, Yehowa labɩ tamaɣ se ɛlɩzɩɣ ɛyaa 144000 tɛtʋ yɔɔ, mba pa nɛ ɛ-Pɩyalʋ pakaɣ kɛʋ awiya nɛ cɔjɔnaa ɛsɔdaa yɔ. Yesu nɛ mba ɛ nɛ wɛ pɔtɔkɩ kewiyitu yɔ, pakaɣ sɩnʋʋ ɛyaa mba pañaŋ yɔ se patalɩ pilim ɛjaɖɛ kɩfaɖɛ taa. Pɔɖɔkʋʋ pa-tɩ kɛdɛzaɣ takɩm taa nɛ pɩtɛ lɛ, Ɛsɔ kaɣ-wɛ haʋ tamtam wezuu. Pʋbʋ taa lɛ, ɖa-Caa taa kaɣ labʋ leleŋ, alɩwaatʋ ndʋ ɛnaɣ tɛtʋ suni ɛ-pɩyalaa nɛ ɛ-pɛlaa mba patalɩ pilim yɔ. Pɩkaɣ kɛʋ alɩwaatʋ kɩbandʋ siŋŋ!

20. (a) Nʋmɔŋ weyi yɔɔ Yehowa tɩŋnaa nɛ ɛwɩlɩ se ɛsɔɔlɩ-ɖʋ siŋŋ? (b) Nɛ ɛbɛ taa tɔm ñʋʋ ŋgʋ kɩkɔŋ yɔ kɩkaɣ tazʋʋ?

²⁰ Yehowa wɩlaa se ɛsɔɔlɩ-ɖʋ siŋŋ. Ɛkɛ Caja weyi ɛ-wayɩ fɛyɩ yɔ. Ewelisiɣ ɖa-adɩma nɛ ɛcɔŋnɩ ɖo-tomnaɣ yɔɔ nɛ ɖe-fezuu taa kɩcɛyɩm ɖeɖe. Ɛfalɩsɩɣ-ɖʋ nɛ ɛɖʋʋ-ɖʋ nesi. Pɩtasɩ lɛ, ɛñɔɔzɩ wazasɩ kɩbanzɩ nɛ ɛsɩɩ-ɖʋ cee wayɩ. Pɩkɛnɩ-ɖʋ taa leleŋ se ɖɩtɩlɩ se ɖa-Caa sɔɔlɩ-ɖʋ nɛ ɛcɔŋnɩ ɖɔ-yɔɔ! Tɔm ñʋʋ ŋgʋ kɩkɔŋ yɔ, kɩkaɣ tazʋʋ nʋmɔŋ weyi ɩ-yɔɔ ɖa mba ɖɩkɛ e-piya yɔ, ɖɩpɩzɩɣ ɖɩtɩŋna nɛ ɖɩwɩlɩ se ɖɩwɛnɩ ɛsɩmɩyɛ ɛ-sɔɔlɩm yɔɔ yɔ ɩ-taa.