1. Ye pɔtɔm se ɛyʋ nɔɔyʋ kpiɖi ɛ-kɩwɛɛkɩm yɔɔ yɔ, pʋ-tɔbʋʋ lɛ suwe?

 ALƖWAATƲ ndʋ ɖɩlakɩ kɩwɛɛkɩm nabʋyʋ yɔ, pɩcɛyaa se ɖikpiɖi pɩ-yɔɔ. Bibl taa lɛ, ye pɔtɔm se ɛyʋ nɔɔyʋ kpiɖi ɛ-kɩwɛɛkɩm yɔɔ yɔ pɩwɩlɩɣ se ɛlɛɣzɩ ɛ-lɩmaɣza lakasɩ nasɩyɩ yɔɔ, eyele lakasɩ nzɩ labʋ nɛ ɛtɛ ɛ-taa se ɛɛtasɩɣ-sɩ labʋ.—Kalɩ Tɔm pee sɔsɔna tɔbʋʋ lɩzʋʋ, «Kɩwɛɛkɩm yɔɔ kpiɖuu.»

2. Ɛbɛ yɔɔ pɩcɛyaa se ɖa-tɩŋa ɖɩtɩlɩ kɩwɛɛkɩm yɔɔ kpiɖuu yɔɔ tɔm? (Nehemiya 8:​9-11)

² Pɩpɔzʋʋ se ɛyaa tɩŋa ɩtɩlɩ kɩwɛɛkɩm yɔɔ kpiɖuu yɔɔ tɔm. Ɛbɛ yɔɔ? Mbʋ pʋyɔɔ yɔ ɖa-tɩŋa ɖɩlakɩ kɩwɛɛkɩm paa evemiye nɖɩ. Ðɩkɛ Aɖam nɛ Ɛva pa-lʋlʋʋ taa mba nɛ pʋyɔɔ lɛ pɛɖɛzɩ ɖa-tɩŋa kɩwɛɛkɩm nɛ sɩm. (Roma 3:23; 5:12) Pɩtɩkazɩ ɖa-taa nɔɔyʋ. Halɩ ɛyaa mba paawɛnɩ tisuu sɔsɔm yɔ, pɩtaawɛɛ-wɛ kɛlɛʋ se palʋbɩnɩ kɩwɛɛkɩm. Pa-taa nɔɔyʋ lɛ apostoloo Pɔɔlɩ. (Roma 7:​21-24) Ɛzɩ pɩwɩlɩɣ se pɩwɛɛ se ɖɩcaɣ pʋtɔdɩyɛ alɩwaatʋ kpeekpe mbʋ pʋyɔɔ yɔ ɖɩlakɩ kɩwɛɛkɩm na? Aayɩ, Yehowa kɛ pʋtɔdɩyɛ nayʋ nɛ ɛsɔɔlaa se ɖɩwɛɛ taa leleŋ taa. Iyele nɛ ɖɩna Yuuda ñɩma mba paacaɣ wezuu Nehemiya alɩwaatʋ taa yɔ pa-kɩɖaʋ. (Kalɩ Nehemiya 8:​9-11.) Yehowa taasɔɔlɩ se pɛwɛɛ laŋwɛɛkɩyɛ taa kɩwɛɛkɩm mbʋ palaba nɛ pɩɖɛɛ yɔ pɩ-yɔɔ, ɛlɛ ɛɛsɔɔlaa se pɛsɛɛ-ɩ nɛ taa leleŋ. Yehowa nawa se ye ɖikpiɖi ɖa-kɩwɛɛkɩm yɔɔ yɔ, piyeki nɛ ɖihiɣ taa leleŋ. Pʋyɔɔ lɛ, eyeba se ɖɩtɩlɩ tɔm ndʋ. Ye ɖikpiɖi ɖa-kɩwɛɛkɩm yɔɔ yɔ, ɖa-taa pɩzɩɣ nɛ pɩtɛ se ɖa-Caa pʋtɔdɩyɛ nayʋ kaɣ kpaɣʋ nɛ ekpeɣ-ɖʋ.

3. Tɔm pɔzʋʋ mbʋ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Iyele nɛ ɖɩkpɛlɩkɩ kɩwɛɛkɩm yɔɔ kpiɖuu tɔm nɛ pɩkpaɖɩ. Tɔm ñʋʋ kʋnɛ kɩ-taa, ɖɩkaɣ tazʋʋ tɔm pɔzʋʋ 3 taa. Tɔm ndʋ  Yehowa kpɛlɩkɩ Izrayɛɛlɩ piya kɩwɛɛkɩm yɔɔ kpiɖuu yɔɔ? Ɛzɩma Yehowa sɩnɩ ɛyaa se pekpiɖi pa-kɩwɛɛkɩm yɔɔ? Tɔm ndʋ Yesu wayɩ tɩŋɩyaa kpɛlɩkɩ kɩwɛɛkɩm yɔɔ kpiɖuu yɔɔ?

TƆM NDƲ YEHOWA KPƐLƖKƖ IZRAYƐƐLƖ MBA KƖWƐƐKƖM YƆƆ KPIÐUU YƆƆ?

4. Tɔm ndʋ Yehowa kpɛlɩkɩ Izrayɛɛlɩ mba kɩwɛɛkɩm yɔɔ kpiɖuu yɔɔ?

⁴ Alɩwaatʋ ndʋ Yehowa cɛlɩ Izrayɛɛlɩ mba ɛ-paɣtʋ yɔ, pɔyɔɔdaa se pakaɣ ɖɔm tɩ-yɔɔ. Yehowa labɩ-wɛ tamaɣ se ye pɔɖɔm paɣtʋ ndʋ tɩ-yɔɔ yɔ ɛkaɣ pɔ-yɔɔ kandɩyʋʋ nɛ ɛwazɩ-wɛ. Ɛyɔɔdɩ paɣtʋ ndʋ tɩ-tɔm se: «Paɣtʋ tʋnɛ, ndʋ manɖʋʋ-ŋ sɔnɔ yɔ, tɩtɩkɩlɩ-ŋ kaɖɛ, nɛ tɩfɛyɩ ɖɔɖɔ ɖooo poliŋ taa.» (Wp. 30:​11, 16) Ɛlɛ ye pamanɩ ɛ-paɣtʋ yɔɔ yaa ye palɩzaa se pɛsɛɣ ɛsɔnaa lalaa yɔ, ɛɛkaɣ tasʋʋ kandɩyʋʋ pɔ-yɔɔ nɛ pakaɣ tɔɔʋ kʋñɔŋ. Ɛlɛ paa pɩlabɩ mbʋ yɔ, Yehowa ɛɛkaɣ-wɛ lɔʋ tam. Papɩzɩɣ nɛ ‘papɩsɩnɩ pɛ-Ɛsɔ Yehowa yɔɔ nɛ pewelisi ɛ-nɔɔ taa tɔm.’ (Wp. 30:​1-3, 17-20) Pʋ-tɔbʋʋ lɛ se papɩzɩɣ nɛ pekpiɖi pa-kɩwɛɛkɩm yɔɔ. Ye palabɩ mbʋ yɔ, Yehowa kaɣ-wɛ ñɔtɩnʋʋ nɛ ɛɖaɣnɩ-wɛ wazʋʋ.

5. Ɛzɩma tɩyɛ Yehowa kaawɩlaa se ɛ-samaɣ tɔm tɩnɩɩ-ɩ? (2 Awiya 17:​13, 14)

⁵ Yehowa samaɣ manɩ ɛ-paɣtʋ yɔɔ tam sakɩyɛ. Pɩtasɩna se pɛsɛ sɩʋ kpelisi lɛ, palabɩ ɖɔɖɔ lakasɩ kɩdɛkɛdɩsɩ lɛɛsɩ sakɩyɛ. Piyeba nɛ pɔtɔɔ kʋñɔŋ. Ɛlɛ Yehowa wobi pɩ-yɔɔ nɛ ɛsɩnɩ ɛ-samaɣ se kaɖaɣnɩ-ɩ paɣzʋʋ sɛʋ. Etiyi nayaa tam sakɩyɛ se peseɣti ɛ-samaɣ nɛ kekpiɖi nɛ kapɩsɩnɩ ɛ-yɔɔ.—Kalɩ 2 Awiya 17:​13, 14.

6. Ɛzɩma tɩyɛ Yehowa tɩŋnɩ ɛ-nayaa yɔɔ nɛ ɛwɩlɩ ɛ-samaɣ se pɩcɛyaa se kekpiɖi ka-kɩwɛɛkɩm yɔɔ? (Cɔnɩ ɖɔɖɔ kɩlɛmʋʋ.)

⁶ Yehowa tɩŋaɣnɩ ɛ-nayaa yɔɔ ɖoŋ ɖoŋ nɛ ɛpakɩ ɛ-samaɣ nɛ ɛñɔɔzʋʋ-kɛ. Ɛsɔ tɩŋnɩ Yereemii yɔɔ nɛ eheyi ɛ-samaɣ se: «Pɩsɩ, Oo kaañamtʋ tʋ Izrayɛɛlɩ . . . Maakaɣ tisuu mɛ-ɛsa nɛ mɔncɔnɩ-mɩ nɛ pana, mbʋ pʋyɔɔ yɔ mɛwɛ siɣsiɣ, maakaɣ wɛʋ pana taa tam . . . Ɛlɛ pɩwɛɛ se ŋɖiɣzina se ŋwɛɛkaa,  mbʋ pʋyɔɔ yɔ ŋkaɖɩnɩ ñɛ-Ɛsɔ Yehowa.» (Yer. 3:​12, 13) Yehowa heyi Yowɛɛlɩ se eheyi ɛ-samaɣ se: «Ɩpɩsɩ mɔn-cɔlɔ nɛ mɩ-laŋɩyɛ pilim.» (Yow. 2:​12, 13) Ɛtɩŋnɩ Izaayii yɔɔ nɛ ɛyɔɔdɩ se: «Ɩwɛɛ kele kele; ɩlɩzɩ mɩ-lakasɩ kɩdɛkɛdɩsɩ mɛ-ɛsɩndaa; iyele labʋ mbʋ pɩfɛyɩ ɖeu yɔ.» (Iza. 1:​16-19) Pɩtasɩ lɛ, Yehowa tɩŋnɩ Ezekɩyɛɛlɩ yɔɔ nɛ ɛpɔzɩ tɔm tʋnɛ: «Ɛzɩ man-taa lakɩ leleŋ nɛ kañatʋ tʋ sɩm na? Ɛzɩ pɩɩkɛdɩɣnɩ-m nɛ pɩkɩlɩ se eyele ɛ-nʋmɔʋ nɛ ɛwɛɛ wezuu na? . . . Nɔɔyʋ sɩm ɛɛkɛdɩɣnɩ-m. Pʋyɔɔ lɛ, ɩpɩsɩ ɩkɔɔ nɛ ɩwɛɛ wezuu.» (Ezek. 18:​23, 32) Yehowa taa lakɩ leleŋ siŋŋ alɩwaatʋ ndʋ ɛyaa kpiɖiɣ pa-kɩwɛɛkɩm yɔɔ yɔ, mbʋ pʋyɔɔ yɔ ɛsɔɔlaa se pacaɣ wezuu tam. Ye mbʋ, Yehowa ɛɛcakɩ yem nɛ ɛɖaŋ se kɩwɛɛkɩm laɖʋ ɛlɛɣzɩ pʋcɔ nɛ ɛsɩnɩ-ɩ. Iyele nɛ ɖɩna kɩɖaŋ lɛɛŋ.

7. Lɔŋ weyi Yehowa tɩŋnɩ nayʋ Ozee nɛ ɛ-halʋ pa-kɩɖaʋ yɔɔ nɛ ɛkpɛlɩkɩ ɛ-samaɣ?

⁷ Yehowa labɩnɩ tʋmɩyɛ nayʋ Ozee nɛ ɛ-halʋ Gomɛɛrɩ pa-kɩɖaʋ nɛ ɛkpɛlɩkɩnɩ ɛ-samaɣ lɔŋ. Gomɛɛrɩ labɩ acɛyɛ nɛ pɩtɛ lɛ, ɛkʋyɩ Ozee yɔɔ nɛ ɛ nɛ abalaa lalaa pacakɩ kʋzʋʋ kɩdɛkɛdʋʋ wezuu. Ɛ-tɔm kaatɛma? Yehowa naɣ laŋa taa, pʋyɔɔ eheyi Ozee se: «Tasɩ wobu nɛ ŋsɔɔlɩ halʋ weyi abalʋ lɛlʋ sɔɔlɩ-ɩ yɔ, halʋ weyi eɖiɣni labʋ acɛyɛ yɔ, ɛzɩ Yehowa sɔɔlʋʋ Izrayɛɛlɩ samaɣ yɔ, ŋgʋ kaka ñapɩsɩnɩ ɛsɔnaa lalaa yɔɔ.» (Ozee 3:1; Adu. 16:2) Tɔzɩ se Ozee halʋ kaawɛ kɩwɛɛkɩm sɔsɔm labʋ yɔɔ. Paa mbʋ yɔ Yehowa heyi Ozee se ɛkpaɣ nɛ ekpeɣ ɛ-halʋ nɛ ɛpɩsɩnɩ-ɩ. a Mbʋ ɖɔɖɔ, Izrayɛɛlɩ ñɩma mba powobi pɩ-yɔɔ nɛ palakɩ kɩwɛɛkɩm yɔ pɔ-tɔm tɩnɩɩ Yehowa. Paa paawobi pɩ-yɔɔ nɛ palakɩ kɩwɛɛkɩm sɔsɔm yɔ, Yehowa tiyele-wɛ sɔɔlʋʋ. Etiyi nayaa tam sakɩyɛ se pasɩnɩ-wɛ nɛ pekpiɖi pa-kɩwɛɛkɩm yɔɔ nɛ pɛlɛɣzɩ pe-wezuu caɣʋ. Ɛzɩ kɩɖaʋ kʋnɛ kɩwɩlɩɣ se Yehowa weyi ɛkɛ «ɛyaa laŋa taa tazɩyʋ» yɔ, ɛkaɣ ñaɣʋ pana nɛ ɛsɩnɩ ɛyʋ weyi ɛwɛ kɩwɛɛkɩm sɔsɔm labʋ yɔɔ yɔ nɛ ekpiɖi ɛ-kɩwɛɛkɩm yɔɔ? (Adu. 17:3) Iyele nɛ ɖɩtazɩ tɔm ndʋ tɩ-taa nɛ pɩkɩlɩ.

ƐZƖMA YEHOWA SƖƔNƖ KƖWƐƐKƖM LAÐAA SE PEKPIÐI PA-KƖWƐƐKƖM YƆƆ?

8. Ɛbɛ Yehowa laba se pɩsa nɛ ɛsɩnɩ Kayɩnɩ nɛ ekpiɖi ɛ-kɩwɛɛkɩm yɔɔ? (Kiɖe Tɛɛ Tɔm 4:​3-7) (Cɔnɩ ɖɔɖɔ kɩlɛmʋʋ.)

⁸ Kayɩnɩ kaakɛ Aɖam nɛ Ɛva pa-kajalaɣ pɩɣa. Ɛ-lʋlɩyaa ɖɛzɩ-ɩ mantɩtalɩ pilim wɛtʋ. Pɩtasɩ lɛ, Bibl yɔɔdɩ ɛ-tɔm se: «Ɛ-maɣmaɣ ɛ-lakasɩ kaakɛ kɩdɛkɛdɩsɩ.» (1 Yoh. 3:12) Pʋtɔma pʋyɔɔ alɩwaatʋ ndʋ Kayɩnɩ la Yehowa kɩlaʋ yɔ, «[ɛ] nɛ ɛ-kɩlaʋ pɔ-tɔm tɩkɛdɩnɩ» Yehowa. Mbʋ ɛzɩ Kayɩnɩ kaalɛɣzɩ ɛ-lakasɩ lɛ, ‘ɛkɔ pana siŋŋ nɛ ɛñɩŋ ɛ-ɛsɩndaa.’ Ɛbɛ Yehowa labɩ pʋwayɩ? Ɛyɔɔdɩnɩ Kayɩnɩ. (Kalɩ Kiɖe Tɛɛ Tɔm 4:​3-7.) Tɔzɩ se Yehowa yɔɔdɩnɩ Kayɩnɩ nɛ nɔɔ kɩbaŋa se ɛcɔlɩ ɛ-lɩmaɣza nɛ eheyi-i se ye ɛlabɩ mbʋ pɩwɛ ɖeu yɔ ɛwazɩɣ-ɩ. Yehowa paɣ-ɩ ɖɔɖɔ se ye ɛtɩkpa ɛ-tɩ yɔ, ɛ-pana ana apɩzɩɣ atuyi-i nɛ ɛla kɩwɛɛkɩm. Pɩlabɩ pʋtɔdɩyɛ se Kayɩnɩ tiwelisini Yehowa. Etiyele se Yehowa ɛsɩnɩ-ɩ nɛ ekpiɖi ɛ-kɩwɛɛkɩm yɔɔ. Toovenim se Kayɩnɩ tiwelisini Yehowa, ɛlɛ ɛzɩ piyeba nɛ Yehowa ɖʋ ɛ-taa se ɛɛtasɩɣ sɩnʋʋ kɩwɛɛkɩm laɖaa lalaa nɛ pekpiɖi pa-kɩwɛɛkɩm yɔɔ? Aayɩ.

9. Ɛzɩma Yehowa sɩnɩ Daviid nɛ ekpiɖi ɛ-kɩwɛɛkɩm yɔɔ?

⁹ Yehowa kaasɔɔlɩ Wiyaʋ Daviid siŋŋ. Halɩ ɛya-ɩ se «ɛyʋ weyi ɛ-tɔm kɛdɩnɩ-m yɔ.» (Tʋma 13:22) Ɛlɛ Daviid kɔm nɛ ɛla kɩwɛɛkɩm sɔsɔm, pɩ-taa nabʋyʋ lɛ se ɛlabɩ acɛyɛ  nɛ ɛtɛ ɛkʋ ɛyʋ. Moyizi Paɣtʋ taa lɛ, Daviid mʋnɩ sɩm. (Lev. 20:10; Kɩg. 35:31) Paa mbʋ yɔ, Yehowa kaasɔɔlaa se ɛsɩnɩ Daviid nɛ ekpiɖi ɛ-kɩwɛɛkɩm yɔɔ. b Paa Daviid etaakpiɖiti ɛ-kɩwɛɛkɩm yɔɔ yɔ, Yehowa tiyi nayʋ Naataanɩ ɛ-cɔlɔ. Naataanɩ tɩŋnɩ kɩɖaʋ nakʋyʋ yɔɔ se pɩsa nɛ etukuni Daviid laŋɩyɛ. Piitukuni Daviid siŋŋ nɛ ekpiɖi ɛ-kɩwɛɛkɩm yɔɔ. (2 Sam. 12:​1-14) Ɛma keɣa nakɛyɛ nɛ kawɩlɩɣ ɛzɩma ekpiɖi mbʋ ɛlaba yɔ pɩ-yɔɔ siŋŋ yɔ. (Keɣ. 51, kajalaɣ tɔm) Keɣa ŋga, kɛhɛzɩ ɛyaa mba palabɩ kɩwɛɛkɩm yɔ pa-taa sakɩyɛ laŋa nɛ keseɣti-wɛ nɛ pekpiɖi pa-kɩwɛɛkɩm yɔɔ. Ða-taa wɛ leleŋ siŋŋ se Yehowa sɔɔlɩ Daviid nɛ ɛsɩnɩ-ɩ nɛ ekpiɖi ɛ-kɩwɛɛkɩm yɔɔ.

10. Ŋmaɣzɩɣ ɛzɩma Yehowa ɖʋʋ suuɖu nɛ kɩwɛɛkɩm laɖaa nɛ ekpeɣu-wɛ pa-kɩwɛɛkɩm yɔ pɩ-yɔɔ lɛ, ɛzɩma pɩlakɩ-ŋ?

¹⁰ Yehowa paɖɩɣ paa kɩwɛɛkɩm mbʋ. (Keɣ. 5:​4, 5) Paa mbʋ yɔ, ɛnawa se ɖa-tɩŋa ɖɩkɛ kɩwɛɛkɩm laɖaa, nɛ sɔɔlɩm mbʋ ɛsɔɔlɩnɩ-ɖʋ yɔ piseɣtiɣ-i se ɛsɩnɩ-ɖʋ nɛ ɖɩlʋbɩnɩ kɩwɛɛkɩm. Paa ɛzɩmtaa lɛ, ɛñɩnɩɣ se ɛsɩnɩ kɩwɛɛkɩm laɖaa halɩ pɩkpɛndɩnɩ mba palakɩ kɩwɛɛkɩm sɔsɔm kpem yɔ se pekpiɖi pa-kɩwɛɛkɩm yɔɔ nɛ pɔñɔtɩnɩ-ɩ. Pɩhɛzɩɣ ɖa-laŋɩyɛ siŋŋ se ɖɩtɩlɩ tɔm ndʋ. Ye ɖɩmaɣzɩɣ ɛzɩma Yehowa ɖʋʋ suuɖu nɛ kɩwɛɛkɩm laɖaa nɛ ekpeɣu-wɛ pa-kɩwɛɛkɩm yɔ pɩ-yɔɔ yɔ, piseɣtiɣ-ɖʋ se ɖɩtɛ ɖa-taa se ɖɩɖɔkʋʋ ɖe-siɣsiɣ wɛtʋ ɛ-ɛsɩndaa nɛ ɖikpiɖi lɛɛ lɛɛ alɩwaatʋ ndʋ ɖɩlakɩ kɩwɛɛkɩm nabʋyʋ yɔ. Lɛɛlɛɛyɔ lɛ, iyele nɛ ɖɩna tɔm ndʋ Yesu wɩlɩ ɛ-wayɩ tɩŋɩyaa kɩwɛɛkɩm yɔɔ kpiɖuu yɔɔ yɔ.

TƆM NDƲ YESU WAYƖ TƖŊƖYAA KPƐLƖKƖ KƖWƐƐKƖM YƆƆ KPIÐUU YƆƆ?

11-12. Tɔm ndʋ Yesu wɩlɩ ɛ-tɔm welisiyaa pɩlɩɩnɩ ɛ-Caa kpaɣʋ nɛ kpeɣu yɔɔ? (Cɔnɩ kɩlɛmʋʋ.)

¹¹ Kajalaɣ pɩnzɩ mɩnʋʋ taa pɩɩwɛɛ se Mesiya ɛkɔɔ. Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, Yehowa tɩŋnɩ Yohanɛɛsɩ Lɩm Mɩyɩsɩyʋ nɛ Yesu Krɩstʋ pɔ-yɔɔ nɛ ɛwɩlɩ ɛyaa se pɩcɛyɩ siŋŋ se pekpiɖi pa-kɩwɛɛkɩm yɔɔ.—Mat. 3:​1, 2; 4:17.

¹² Alɩwaatʋ ndʋ Yesu kaawɛ tɛtʋ yɔɔ yɔ, ɛwɩlɩ ɛyaa se ɛ-Caa sɔɔlɩ faaa se ekpeɣ-ɖʋ alɩwaatʋ ndʋ ɖɩlakɩ kɩwɛɛkɩm yɔ. Yesu  labɩ mbʋ alɩwaatʋ ndʋ ɛyɔɔdɩ evebu nɔɔyʋ tɔm pɩɣa kilebaɣ eduuye taa yɔ. Evebu ɛnʋ ɛlɩzaa se ɛlɩɣ ɖɩɣa nɛ ɛlabɩ lakasɩ kɩdɛkɛdɩsɩ ndɩ ndɩ. Ɛlɛ pɩlabɩ alɩwaatʋ natʋyʋ pʋwayɩ lɛ, «ɛ-lɩmaɣza pɩsɩ a-ɖeɖe» nɛ ɛpɩsɩ ɖɩɣa. Ɛzɩma ɛ-caa laba? Yesu yɔɔdaa se evebu ɛnʋ «ɛwɛ poliŋ taa lɛ, ɛ-caa losi-i nɛ pɩlabɩ-ɩ pʋtɔdɩyɛ, nɛ ese nɛ ewolo ekpibi-i nɛ ɛkpɛlɩ ɛ-yɔɔ nɛ sɔɔlɩm.» Evebu ɛnʋ ɛtaamaɣzɩ se ɛ-caa pɩzɩɣ nɛ ekpeɣ-i ɛ-kɩwɛɛkɩm, pʋyɔɔ eheyi-i se ɛpɩzɩɣ nɛ ɛkɛ ɛ-lɩmɖʋyaa taa nɔɔyʋ. Ɛlɛ ɛ-caa kaasɔɔlaa se ekpeɣ-i, pʋyɔɔ ɛya-ɩ se «man-pɩyalʋ» nɛ ɛɖaɣnɩ-ɩ mʋʋ ɛ-hɔʋ taa. Ɛ-caa yɔɔdaa se: «Eeleba nɛ pana-ɩ.» (Luka 15:​11-32) Alɩwaatʋ ndʋ Yesu kaawɛ ɛsɔdaa yɔ, pɩtʋʋ fɛyɩ se ɛɛna tam sakɩyɛ ɛzɩma ɛ-Caa naɣ kɩwɛɛkɩm laɖaa mba pekpiɖiɣ pa-kɩwɛɛkɩm yɔɔ yɔ pa-pʋtɔdɩyɛ yɔ nɛ ekpeɣu-wɛ faaa yɔ. Yesu kɛdaɣ kanɛ, kɛhɛzɩɣ ɖa-laŋa siŋŋ; nɛ kawɩlɩɣ-ɖʋ se ɖa-Caa Yehowa kɛ pʋtɔdɩyɛ nayʋ siŋŋ.

13-14. (a) Lɔŋ weyi apostoloo Pɩyɛɛrɩ kpɛlɩkɩ kɩwɛɛkɩm yɔɔ kpiɖuu yɔɔ? (b) Nɛ tɔm ndʋ ɛwɩlɩ ɛyaa lalaa pɩ-yɔɔ? (Cɔnɩ ɖɔɖɔ kɩlɛmʋʋ.)

¹³ Apostoloo Pɩyɛɛrɩ kpɛlɩkɩ lɔŋ kɩbaŋ Yesu cɔlɔ pɩlɩɩnɩ kɩwɛɛkɩm yɔɔ kpiɖuu nɛ kpaɣʋ nɛ kpeɣu yɔɔ. Piyiɣdaɣ Pɩyɛɛrɩ ɖoŋ ɖoŋ nɛ pɩpɔzaɣ se pekpeɣ-i, nɛ Yesu kaakpeɣ-i faaa. Pɩyɛɛrɩ kpɛzɩ tam nabudozo se ɛɛsɩŋ ɛ-Kɩbaɣlʋ lɛ, pitibi-i yɔɔɔ kpem. (Mat. 26:​34, 35, 69-75) Ɛlɛ Yesu fema lɛ, ɛlɩzɩ ɛ-tɩ nɛ ɛwɩlɩ Pɩyɛɛrɩ; pɩtɩla ɛlabɩ mbʋ alɩwaatʋ ndʋ Pɩyɛɛrɩ kaawɛ e-ɖeke yɔ. (Luka 24:​33, 34; 1 Kɔr. 15:​3-5) Pɩtʋʋ fɛyɩ se alɩwaatʋ ndʋ tɩ-taa, Yesu kpaɣaa nɛ ekpeɣ Pɩyɛɛrɩ faaa nɛ ɛhɛzɩ ɛ-laŋɩyɛ.—Mark. 16:7.

¹⁴ Pɩyɛɛrɩ na ɛzɩma pɩlakɩ ɛyʋ alɩwaatʋ ndʋ ekpiɖiɣ ɛ-kɩwɛɛkɩm yɔɔ nɛ alɩwaatʋ ndʋ pekpeɣu-i ɛ-kɩwɛɛkɩm yɔ. Pʋyɔɔ ɛpɩzaa nɛ ɛwɩlɩ ɛyaa lalaa tɔm ndʋ. Pɔtɔɔ Pantekooti kazandʋ nɛ pɩla alɩwaatʋ natʋyʋ lɛ, Pɩyɛɛrɩ yɔɔdɩ tɔm Yuuda mba samaɣ nakɛyɛ ɛsɩndaa  nɛ ɛlɩzɩ-kɛ pɩ-taa se ŋga kʋnɩ Mesiya. Ɛlɛ eseɣti-kɛ nɛ sɔɔlɩm se: «Pʋyɔɔ lɛ ikpiɖi mɩ-kɩwɛɛkɩm yɔɔ, nɛ ɩpɩsɩ nɛ pɩsa nɛ pahɩzɩ mɩ-kɩwɛɛkɩm, nɛ Yehowa maɣmaɣ kɔnɩ-mɩ laŋɩyɛ hɛzʋʋ alɩwaatʋ.» (Tʋma 3:​14, 15, 17, 19) Pɩyɛɛrɩ tɩŋnɩ nʋmɔʋ ŋgʋ kɩ-yɔɔ nɛ ɛwɩlɩ se ye kɩwɛɛkɩm laɖʋ ekpiɖi ɛ-kɩwɛɛkɩm yɔɔ yɔ, piseɣtiɣ-i nɛ ɛpɩsɩ, pʋ-tɔbʋʋ se piseɣtiɣ-i nɛ ɛlɛɣzɩ ɛ-lɩmaɣza kɩdɛkɛda nɛ ɛ-lakasɩ kɩdɛkɛdɩsɩ nɛ ɛpaɣzɩ labʋ mbʋ pɩkɛdɩɣnɩ Ɛsɔ yɔ. Apostoloo Pɩyɛɛrɩ wɩlaa ɖɔɖɔ se Yehowa hɩzɩɣ pa-kɩwɛɛkɩm caɣ caɣ yaa ɛlakɩ nɛ pɩɩtasɩɣ wɛʋ. Nɛ pɩnzɩ sakɩyɛ wayɩ, Pɩyɛɛrɩ hɛzɩ Krɩstʋ mba laŋa nɛ ɛyɔɔdɩ se: «Yehowa . . . wɛ suuɖu mɩ-yɔɔ, mbʋ pʋyɔɔ yɔ ɛtɩsɔɔlɩ se paɖɩzɩ nɔɔyʋ; ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.» (2 Pɩy. 3:9) Alɩwaatʋ ndʋ ɖɩlakɩ kɩwɛɛkɩm yɔ, ye ɖɩnawa se Yehowa kpeɣu-ɖʋ caɣ caɣ yɔ, pɩhɛzɩɣ ɖa-laŋɩyɛ siŋŋ; paa pɩkɛ kɩwɛɛkɩm sɔsɔm yɔ.

15-16. (a) Lɔŋ weyi apostoloo Pɔɔlɩ kpɛlɩkɩ kpaɣʋ nɛ kpeɣu yɔɔ? (1 Timootee 1:​12-15) (b) Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

¹⁵ Taarɩsɩ tʋ Sɔɔlɩ kaalabɩ kɩwɛɛkɩm sɔsɔm sakɩyɛ. Ɛɛnazɩ Krɩstʋ wayɩ tɩŋɩyaa siŋŋ. Pʋtɔma, Krɩstʋ mba hɔɔlʋʋ sɔsɔʋ maɣzaɣ se ɛɛpɩzɩɣ nɛ ɛlɛɣzɩ kpa. Ɛlɛ Yesu kaanawa se Sɔɔlɩ pɩzɩɣ nɛ ɛlɛɣzɩ nɛ ekpiɖi ɛ-kɩwɛɛkɩm yɔɔ. Ɛ nɛ ɛ-Caa pana wɛtʋ kɩbandʋ Sɔɔlɩ yɔɔ. Yesu yɔɔdaa se: «Abalʋ ɛnʋ ɛkɛ ñanaɣ ŋga malɩzaa yɔ.» (Tʋma 9:15) Halɩ Yesu tɩŋnɩ maamaaci lakasɩ nasɩyɩ yɔɔ nɛ ɛsɩnɩ Sɔɔlɩ nɛ ekpiɖi ɛ-kɩwɛɛkɩm yɔɔ. (Tʋma 7:58–8:3; 9:​1-9, 17-20) Sɔɔlɩ, weyi pɔkɔm nɛ payaa pʋwayɩ se apostoloo Pɔɔlɩ yɔ, ɛpɩsɩ Krɩstʋ tʋ nɛ pɩtɛ lɛ, ɛyɔɔdaɣ ɖoŋ ɖoŋ ɛzɩma ɛ-taa labɩ leleŋ se Yehowa nɛ Yesu pana ɛ-pʋtɔdɩyɛ nɛ palabɩ-ɩ camɩyɛ lakasɩ yɔ pɩ-tɔm. (Kalɩ 1 Timootee 1:​12-15.) Pɔɔlɩ heyi e-koobiya se: «Ɛsɔ caɣ se ɛtɩŋnɩ ɛ-camɩyɛ lakasɩ yɔɔ nɛ ɛsɩnɩ-ŋ nɛ ŋkpiɖi ña-kɩwɛɛkɩm yɔɔ.»—Roma 2:4.

¹⁶ Alɩwaatʋ ndʋ Pɔɔlɩ nɩwa se Kɔrɛntɩ ɛgbɛyɛ taa mba ha nʋmɔʋ abalʋ weyi ɛcakaɣ kʋzʋʋ kɩdɛkɛdʋʋ wezuu yɔ se ɛwɛɛ ɛgbɛyɛ taa yɔ, ɛzɩma ɛcɔnɩ tɔm ndʋ ti-ɖeɖe? Tɔm ndʋ ɛyɔɔdaa yɔ, tɩkpɛlɩkɩɣ-ɖʋ ɛzɩma Yehowa lɩzɩɣ sɔɔlɩm nɛ ɛwɩlɩɣ ɛ-sɛyaa alɩwaatʋ ndʋ ɛsɩɣzɩɣ-wɛ lɔŋ yɔ nɛ ɛzɩma ɛnaɣ pa-pʋtɔdɩyɛ alɩwaatʋ ndʋ pekpiɖiɣ yɔ. Nɛ ɖɩkaɣ kpɛlɩkʋʋ ɛzɩma ɖɩpɩzɩɣ nɛ ɖɩmaɣzɩnɩ ɛ-pʋtɔdɩyɛ naʋ yɔ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ mbʋ pɩlabɩ Kɔrɛntɩ ɛgbɛyɛ taa yɔ.