1. (a) Takɩm mbʋ Yosɛɛfʋ kataa? (b) Nɛ ɛzɩma ɛlaba?

 YAKƆƆB pɩyalʋ Yosɛɛfʋ kaakatɩ takɩm sɔsɔm nabʋyʋ. Halʋ nɔɔyʋ heyi-i se: «Hɩnɩ mɔn-cɔlɔ.» Halʋ ɛnʋ ɛɛkɛ Yosɛɛfʋ caa Potifaarɩ halʋ. Ɛlɛ, Yosɛɛfʋ kizi se ɛɛlakɩ mbʋ halʋ ɛnʋ ɛpɔzɩ-ɩ se ɛla yɔ. Sɔnɔ, nɔɔyʋ pɩzɩɣ nɛ ɛpɔzɩ ɛ-tɩ se: «Ɛzɩ ɛbɛ yɔɔ Yosɛɛfʋ kaɖɩnɩ takɩm mbʋ?» Potifaarɩ taawɛɛ ɖɩɣa. Pɩtasɩ lɛ, Yosɛɛfʋ kaakɛ yom ɖɩɣa ŋga ka-taa; nɛ ye ekizaa se ɛɛlakɩ mbʋ halʋ ɛnʋ ɛpɔzʋʋ-ɩ se ɛla yɔ, pɩtʋʋ fɛyɩ se ɛlɛ pɩzɩɣ eyele nɛ wezuu caɣʋ wɛɛ-ɩ kaɖɛ siŋŋ. Ɛlɛ, paa halʋ ɛnʋ eewobi pɩ-yɔɔ nɛ ɛcɛyɩɣ Yosɛɛfʋ yɔ, ɛlɛ wobi pɩ-yɔɔ nɛ ekizi se ɛɛlakɩ mbʋ ɛpɔzʋʋ-ɩ yɔ. Ɛbɛ yɔɔ? Yosɛɛfʋ yɔɔdaa se: «Malakɩ ɛzɩma nɛ mala kɩdɛkɛdɩm sɔsɔm mbʋ yɔ nɛ manɖʋ Ɛsɔ ɖɩwɩzɩyɛ?»—Kiɖe 39:7-12.

2. Ɛzɩma Yosɛɛfʋ laba nɛ ɛtɩlɩ se acɛyɛ labʋ kɛ kɩdɛkɛdɩm Ɛsɔ ɛsɩndaa?

² Ɛzɩma Yosɛɛfʋ laba nɛ ɛtɩlɩ se acɛyɛ labʋ kɛ «kɩdɛkɛdɩm sɔsɔm» ɛ-Ɛsɔ ɛsɩndaa? Moyizi paɣtʋ taa paɣtʋ ndʋ tɩtɔŋ se «taala acɛyɛ» yɔ, pataatɩɩmatɩ-tʋ; pɩlabɩ pɩnzɩ mɩnɩŋ naalɛ pʋwayɩ pʋcɔ nɛ pama-tʋ. (Ejl. 20:14) Paa mbʋ yɔ, Yosɛɛfʋ kaasɩm Yehowa camɩyɛ, pʋyɔɔ ɛpɩzaa nɛ ɛtɩlɩ lɩmaɣza wena Yehowa wɛnɩ kʋzʋʋ kɩdɛkɛdʋʋ wezuu caɣʋ yɔɔ yɔ. Kɩɖaŋ nɩɩyɩ yɔ: Pɩtʋʋ fɛyɩ se Yosɛɛfʋ kaasɩma se Yehowa ɖʋwa se abalʋ kʋɖʋm nɛ halʋ kʋɖʋm ɩɖɔkɩnɩ nesi. Nɛ pɩtʋʋ fɛyɩ se ɛɛnɩ ɛzɩma Yehowa kandɩyɩ e-neze Saara yɔɔ tam nabʋlɛ alɩwaatʋ ndʋ pañɩnaɣ se pakpa-ɩ nɛ ɖoŋ nɛ pasʋnɩ-ɩ yɔ pɩ-tɔm. Yehowa labɩ mbʋ se pɩsa nɛ Saara wɛɛ siɣsiɣ ɛ-walʋ ɛsɩndaa. Mbʋ ɖɔɖɔ Ɛsɔ labɩ nabʋyʋ nɛ ɛkandɩyɩ Izaakɩ halʋ Rebeka yɔɔ. (Kiɖe 2:24; 12:14-20; 20:2-7; 26:6-11) Yosɛɛfʋ maɣzɩ tɔm ndʋ tɩ-yɔɔ lɛ, ɛpɩzaa nɛ ɛtɩlɩ mbʋ pɩtʋʋzɩ Ɛsɔ ɛsɩndaa nɛ mbʋ pɩtɩtʋʋzɩ yɔ. Yosɛɛfʋ kaasɔɔlɩ ɛ-Ɛsɔ Yehowa, pʋyɔɔ ɛɛsɔɔlɩ ɖɔɖɔ Ɛsɔ paɣtʋ nɛ ɛ-paɣtʋ kila siɣsiɣ ñɩna; nɛ ɛɛtɛm ɛ-taa se ɛlakɩ mbʋ Yehowa sɔɔlaa yɔ.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

 ³ Ŋsɔɔlɩ siɣsiɣ wɛtʋ na? Pɩtʋʋ fɛyɩ se ŋsɔɔlɩ-tʋ. Ɛlɛ, ɖa-tɩŋa ɖɩtɩtalɩ pilim, nɛ ye ɖɩtɩkpa ɖa-tɩ yɔ, lɩmaɣza wena ɛjaɖɛ wɛnɩ siɣsiɣ wɛtʋ yɔɔ yɔ, apɩzɩɣ nɛ awɛɛnɩ ɖoŋ ɖɔ-yɔɔ kɛlɛʋ yem. (Iza. 5:20; Roma 12:2) Pʋyɔɔ lɛ, ɖɩkaɣ naʋ mbʋ siɣsiɣ wɛtʋ kɛnaa yɔ, nɛ ɖɩkaɣ naʋ ɖɔɖɔ wazasɩ nzɩ ɖihikiɣ ye ɖɩsɔɔlɩ siɣsiɣ wɛtʋ yɔ. Pʋwayɩ lɛ, ɖɩkaɣ naʋ nɩŋgbanzɩ naadozo nzɩ ɖɩpɩzɩɣ ɖɩkpɛzɩ nɛ pɩsɩnɩ-ɖʋ nɛ ɖɩsɔɔlɩ Yehowa paɣtʋ nɛ ɛ-paɣtʋ kila nɛ pɩkɩlɩ yɔ.

4. Lɩmaɣza wena ɛyaa sakɩyɛ wɛnɩ siɣsiɣ wɛtʋ yɔɔ nɛ atɩtʋʋzɩ?

⁴ Ɛyaa nabɛyɛ maɣzɩɣ se pɛwɛ siɣsiɣ paa pakpazɩɣ pa-tɩ, pɔhɔŋnɩ ɛyaa lalaa tɔm yaa pamaɣzɩɣ se palakɩ camɩyɛ nɛ pɩkpaɖɩɣ ɛyaa lalaa yɔ. Ɛlɛ, wɛtʋ ndʋ payɩ Ɛsɔ tɩsɔɔlɩ-tʋ. Alɩwaatʋ ndʋ Yesu kaawɛ tɛtʋ yɔɔ yɔ, ɛkʋ ɛ-alɩwaatʋ taa Ɛsɔ sɛtʋ ñʋndɩnaa tɔm siŋŋ mbʋ pʋyɔɔ yɔ, paba ɖʋwaɣ paɣtʋ pɩlɩɩnɩ mbʋ pa-maɣmaɣ pamaɣzaɣ se pɩwɛ siɣsiɣ yɔ pɩ-yɔɔ. (Ekl. 7:16; Luka 16:15) Ɛyʋ weyi ɛlakɩ mbʋ Yehowa yɔɔdʋʋ se pɩtʋʋzaa yɔ, ɛɛmaɣzɩɣ kpa se ɛlakɩ camɩyɛ nɛ pɩkpaɖɩ ɛyaa lalaa.

5. Bibl taa lɛ, siɣsiɣ wɛtʋ tɔbʋʋ lɛ suwe? Ha kɩɖaŋ nɩɩyɩ.

⁵ Siɣsiɣ wɛtʋ kɛ wɛtʋ kɩbandʋ. Tobi lɛ, siɣsiɣ wɛtʋ tɔbʋʋ lɛ se ɛyʋ ɛla mbʋ pɩtʋʋzɩ Yehowa Ɛsɔ ɛsɩndaa yɔ. Bibl taa lɛ, tɔm pee wena pɛɖɛzaa se «siɣsiɣ wɛtʋ» yɔ, a-tɔbʋʋ lɛ se ɛyʋ ɛcaɣ wezuu nɛ pɩla nɔɔ kʋɖʋmaɣ nɛ paɣtʋ nɛ paɣtʋ kila wena akpaɖaa yɔ, pʋ-tɔbʋʋ lɛ se Yehowa paɣtʋ nɛ ɛ-paɣtʋ kila. Kɩɖaʋ nakʋyʋ yɔ: Yehowa ɖʋ paɣtʋ tadɩyɛ laɖaa se pɩpɔzʋʋ se palabɩnɩ tʋmɩyɛ ‘yuŋ kɩmaɣzʋʋ ŋgʋ kɩwɛ toovenim yɔ.’ (Wp. 25:15; nwt) Ebree tɔm piye nɖɩ pɛɖɛzaa se «toovenim» yɔ, papɩzɩɣ nɛ pɛɖɛzɩ-ɖɩ ɖɔɖɔ se «siɣsiɣ.» Ye mbʋ, Krɩstʋ tʋ weyi ɛsɔɔlaa se ɛwɛɛ siɣsiɣ Ɛsɔ ɛsɩndaa yɔ, pɩpɔzʋʋ se ɛyɔɔdʋʋ toovenim ɛ-tadɩyɛ labʋ taa hɔɔlɩŋ tɩŋa taa. Ɛyʋ weyi ɛsɔɔlɩ labʋ mbʋ pɩwɛ siɣsiɣ yɔ, alɩwaatʋ ndʋ ɛnaɣ se pɛwɛɛ nɛ pomuluu ɛyʋ nɔɔyʋ yɔ, pɩɩkɛdɩɣnɩ-ɩ. Nɛ ɛyʋ weyi ɛwɛ siɣsiɣ toovenim taa yɔ, pɩsa nɛ ‘ɛ-tɔm kɛdɩnɩ [Yehowa] pɩtɩŋa pɩ-taa’ lɛ, ɛtazɩɣ se ɛna se lɩmaɣza wena ɛkpakɩɣ yɔ, suwe Yehowa maɣzɩɣ pɩlɩɩnɩ a-yɔɔ.—Kol. 1:10.

6. Paɣtʋ nɛ paɣtʋ kila wena Yehowa ɖʋwa pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ yɔ, ɛbɛ yɔɔ ɖɩpɩzɩɣ nɛ ɖɩtaa-yɛ liu? (Izaayii 55:8, 9)

⁶ Bibl yɔɔdʋʋ se Yehowa cɔlɔ siɣsiɣ wɛtʋ lɩnaa. Pʋyɔɔ paya-ɩ se «siɣsiɣ tɔm ɖɩjaɣyɛ.» (Yer. 50:7) Yehowa kɛnɩ Lɩzɩyʋ, pʋyɔɔ lɛ e-ɖeke ɛwɛnɩnɩ waɖɛ se ɛɖʋ paɣtʋ nɛ paɣtʋ kila pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ. Yehowa talɩ pilim; pʋyɔɔ lɛ, lɩmaɣza wena ɛwɛna pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ yɔ, akpaɖɩ ɖa-ñɩna. Ðoŋ ɖoŋ lɛ, ɖɛ-tɛ mantɩtalɩ pilim wɛtʋ nɛ kɩwɛɛkɩm wɛnɩ ɖoŋ ɖa-lɩmaɣza yɔɔ. (Adu. 14:12; kalɩ Izaayii 55:8, 9.) Paa mbʋ yɔ, palɩzɩ-ɖʋ Ɛsɔ lɛzʋʋ nɛ pʋyɔɔ lɛ, ɖɩpɩzɩɣ nɛ ɖɩcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila siɣsiɣ ñɩna. (Kiɖe 1:27) Nɛ mbʋ ɖɩsɔɔlaa se ɖɩla. Ðɩsɔɔlɩ ɖa-Caa, nɛ sɔɔlɩm mbʋ piseɣtiɣ-ɖʋ se ɖɩla ɖo-ɖoŋ ɖeɖe nɛ ɖɩmaɣzɩnɩ-ɩ.—Efɛz. 5:1.

7. Ɛbɛ yɔɔ pɩpɔzʋʋ-ɖʋ paɣtʋ nɛ paɣtʋ kila wena papɩzɩɣ nɛ pataa-yɛ liu yɔ? Ha kɩɖaʋ nakʋyʋ.

⁷ Ye ɖɩcakɩ wezuu nɛ pɩlakɩ nɔɔ kʋɖʋmaɣ nɛ paɣtʋ nɛ paɣtʋ kila wena Yehowa ɖʋwa pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ yɔ, pɩwazɩɣ-ɖʋ. Ŋsɩm mbʋ pʋyɔɔ yɔ? Ye paa kuduyuŋ maʋ ɛgbɛyɛ nɖɩ lɛ, ɖɩɖʋʋ ɖɩ-maɣmaɣ ɖɩ-paɣtʋ pɩlɩɩnɩ wondu ndʋ pamaɣzɩɣna yɔ tɩ-yɔɔ yɔ, maɣzɩ nɛ ŋna mbʋ pɩlɩɣ pɩ-taa yɔ. Mbʋ pɩlɩɣ pɩ-taa yɔ pɩɩwɛɣ camɩyɛ. Nɛ ye fɛɖaa ɩɩɖɔŋ paɣtʋ ndʋ paɖʋwa pɩlɩɩnɩ kʋdɔmɩŋ waʋ yɔɔ yɔ tɩ-yɔɔ ɖeyi ɖeyi yɔ, pɩpɩzɩɣ piyele nɛ kʋdɔndɩnaa nabɛyɛ sɩ. Pɩtʋʋ fɛyɩ se paɣtʋ nɛ paɣtʋ kila wena papɩzɩɣ nɛ pataa-yɛ liu yɔ akandɩyɩɣ ɛyʋ yɔɔ. Mbʋ ɖɔɖɔ paɣtʋ nɛ paɣtʋ kila wena Ɛsɔ  ɖʋwa pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ yɔ, akandɩyɩɣ ɖɔ-yɔɔ.

8. Ɛyaa mba pɔsɔɔlɩ labʋ mbʋ pɩwɛ siɣsiɣ yɔ, wazasɩ nzɩ pakaɣ hiɣu?

⁸ Ɛyaa mba pañakɩ pana nɛ pacakɩ wezuu nɛ pɩlakɩ nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila yɔ, Yehowa wazɩɣ-wɛ. Ɛlabɩ tamaɣ se: «Siɣsiɣ tʋ tɩnɩ tɛtʋ, ɛwɛɣ tɩ-yɔɔ tam.» (Keɣa 36:29) Ŋpɩzɩɣ ŋmaɣzɩ nɛ ŋna ɛzɩma ɛyaa kaɣ wɛʋ nɔɔ kʋɖʋmaɣ, laŋhɛzɩyɛ nɛ taa leleŋ taa alɩwaatʋ ndʋ paa weyi ɛcakɩ wezuu nɛ pɩlakɩ nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila yɔ? Wezuu ŋgʋ Yehowa sɔɔlaa se ŋcaɣ. Pɩtʋʋ fɛyɩ se ɖa-taa paa anɩ wɛnɩ lɩmaɣza kɩbana wena a-yɔɔ pɩwɛɛ se ɛsɔɔlɩ siɣsiɣ wɛtʋ yɔ! Ɛzɩma ɖɩpɩzɩɣ ɖɩla nɛ ɖɩsɔɔlɩ wɛtʋ ndʋ nɛ pɩkɩlɩ? Iyele nɛ ɖɩna nɩŋgbanzɩ naadozo nzɩ ɖɩpɩzɩɣ nɛ ɖɩkpɛzɩ yɔ.

9. Ɛbɛ kaɣ-ɖʋ sɩnʋʋ nɛ ɖɩsɔɔlɩ siɣsiɣ wɛtʋ?

⁹ Nɩŋgbaŋaɣ 1: Sɔɔlɩ weyi ɛɖʋ paɣtʋ nɛ paɣtʋ kila ana yɔ. Pɩsa nɛ ɖɩsɔɔlɩ siɣsiɣ wɛtʋ lɛ, pɩpɔzʋʋ se ɖɩñaɣ pana nɛ ɖɩsɔɔlɩ Yehowa nɛ pɩkɩlɩ. Ɛnʋ ɖʋnɩ paɣtʋ nɛ paɣtʋ kila pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ. Ðɩwɛɣ nɛ ɖɩsɔɔlʋʋ Yehowa nɛ pɩkɩlɩɣ lɛ, ɖɩkaɣ sɔɔlʋʋ nɛ pɩkɩlɩ se ɖɩcaɣ wezuu nɛ pɩla nɔɔ kʋɖʋmaɣ nɛ ɛ-paɣtʋ nɛ ɛ-paɣtʋ kila siɣsiɣ ñɩna. Kɩɖaʋ nakʋyʋ yɔ: Ye Aɖam nɛ Ɛva paasɔɔlɩ Yehowa yɔ, wiɖiyi pataamaanɩ ɛ-paɣtʋ yɔɔ kpa.—Kiɖe 3:1-6, 16-19.

10. Ɛbɛ Abraham laba nɛ pɩsɩnɩ-ɩ nɛ ɛnɩɩ ndʋ Yehowa maɣzɩɣ yɔ tɩ-taa camɩyɛ nɛ pɩkɩlɩ?

¹⁰ Pɩtʋʋ fɛyɩ se ɖɩtɩsɔɔlɩ se ɖɩla kɩwɛɛkɩm mbʋ Aɖam nɛ Ɛva paalaba yɔ. Ye ɖiwobi pɩ-yɔɔ nɛ ɖɩkpɛlɩkɩɣ Yehowa yɔɔ tɔm, ɖɩsɔɔlʋʋ ɛ-wɛtʋ kɩbandʋ ndɩ ndɩ nɛ ɖɩñakɩ pana se ɖɩtɩlɩ ndʋ ɛmaɣzɩɣ yɔ, ɖɩpɩzɩɣ nɛ ɖɩfɛɛ kaɖɛ nɖɩ. Ye ɖɩlakɩ mbʋ yɔ, ɖɩkaɣ sɔɔlʋʋ Yehowa nɛ pɩkɩlɩ. Maɣzɩ Abraham yɔɔ nɛ ŋna. Toovenim taa lɛ, ɛɛsɔɔlɩ Yehowa. Halɩ alɩwaatʋ ndʋ pɩɩwɛ Abraham kaɖɛ se ɛnɩɩ mbʋ pʋyɔɔ Yehowa kpaɣ lɩmaɣza naayɛ yɔ pɩ-taa yɔ, ɛtɩkaɖɩnɩ-ɩ. Ɛlɛ ɛñaɣ pana se ɛtɩlɩ Yehowa camɩyɛ nɛ pɩkɩlɩ. Kɩɖaʋ nakʋyʋ yɔ: Alɩwaatʋ ndʋ Abraham nɩwa se Yehowa kpaɣ lɩmaɣzɩyɛ se ɛɖɩzɩɣ Sodom nɛ Gomɔɔrɩ yɔ, kajalaɣ taa lɛ, sɔɔndʋ kpa-ɩ se «tɛtʋ kpeekpe Tɔm Hʋyʋ» ɛtaakɔɔ nɛ ɛɖɩzɩ ɛyaa kɩdɛkɛdaa nɛ ɛkpɛndɩnɩ ɛyaa mba pɛwɛ siɣsiɣ yɔ. Abraham ɛsɩndaa lɛ, pɩɩwɛɣ ɖeu se pɩla mbʋ, pʋyɔɔ eluzi ɛ-tɩ nɛ ɛpɔzɩ Yehowa tɔm ndɩ ndɩ. Yehowa ɖʋ suuɖu nɛ ecosi ɛ-tɔm pɔzʋʋ yɔɔ. Pɩtɛmnaa se Abraham kɔm nɛ eɖiɣzina se Yehowa sɩm mbʋ pɩwɛ paa ɛyʋ weyi lɛ ɛ-laŋɩyɛ taa yɔ nɛ alɩwaatʋ ndʋ ɛhɔŋ ɛyaa kɩdɛkɛdaa nɩŋgbaŋʋʋ yɔ, ɛɛkpɛndɩɣnɩ mba patɩla nabʋyʋ yɔ.—Kiɖe 18:20-32.

11. Ɛzɩma Abraham wɩlaa se ɛɛsɔɔlɩ Yehowa nɛ ɛtaɣaɣ-ɩ liu?

¹¹ Kɛdaɣ ŋga Abraham nɛ Yehowa palaba pɩlɩɩnɩ Sodom nɛ Gomɔɔrɩ pɔ-yɔɔ yɔ, kotukuni Abraham laŋɩyɛ siŋŋ. Pɩtʋʋ fɛyɩ se piiyeba nɛ ɛsɔɔlɩ ɛ-Caa nɛ ɛñaŋɩ-ɩ nɛ pɩkɩlɩ ɖooo lɛ. Pɩnzɩ sakɩyɛ wayɩ, Abraham katɩ wɛtʋ natʋyʋ nɛ tɩtakɩ ɛzɩma ɛtaɣaɣ Yehowa liu yɔ siŋŋ. Yehowa pɔzɩ-ɩ se ɛkpaɣ ɛ-pɩyalʋ kʋsɔɔlʋ Izaakɩ nɛ ɛlaa-ɩ kɩlaʋ. Ɛlɛ, alɩwaatʋ ndʋ tɩ-taa lɛ, Abraham kaasɩm ɛ-Ɛsɔ camɩyɛ nɛ pɩkɩlɩ, pʋyɔɔ lɛ ɛtɩpɔzɩ-ɩ tɔm natʋyʋ. Abraham ñɔɔzɩ ɛ-tɩ kpaagbaa se ɛla mbʋ Yehowa pɔzɩ-ɩ se ɛla yɔ. Paa mbʋ yɔ, maɣzɩ nɛ ŋna ɛzɩma ɛnɩɣaɣ siziŋ alɩwaatʋ ndʋ ɛɛwɛɛ nɛ ɛñɔɔzʋʋ ɛ-tɩ se ɛla tʋmɩyɛ nɖɩ yɔ. Pɩtʋʋ fɛyɩ se Abraham kpaɣ alɩwaatʋ nɛ ɛmaɣzɩ tɔm ndʋ ɛɛkpɛlɩkɩ Yehowa yɔɔ yɔ tɩ-yɔɔ siŋŋ. Ɛɛnawa se Yehowa ɛɛkaɣ labʋ mbʋ pɩfɛyɩ siɣsiɣ yɔ yaa mbʋ pɩwɩlɩɣ se ɛfɛyɩnɩ sɔɔlɩm yɔ kpa. Ɛzɩ apostoloo Pɔɔlɩ yɔɔdʋʋ yɔ, Abraham maɣzaa se Yehowa wɛnɩ ɖoŋ se efezi ɛ-pɩyalʋ kʋsɔɔlʋ. (Ebr. 11:17-19) Toovenim taa lɛ, Yehowa kaalabɩ tamaɣ se Izaakɩ kaɣ kɛʋ ɛjaɖɛ naɖɩyɛ  caa, nɛ pɩtalʋʋnɩ alɩwaatʋ ndʋ yɔ, Izaakɩ taawɛɛnɩ pɩɣa nakɛyɛ. Abraham kaasɔɔlɩ ɛ-Caa Yehowa, pʋyɔɔ ɛtaɣaɣ-ɩ liu se ɛkaɣ labʋ mbʋ pɩwɛ siɣsiɣ yɔ. Paa pɩɩwɛ Abraham kaɖɛ yɔ, e-tisuu seɣti-i nɛ ɛña.—Kiɖe 22:1-12.

12. Ɛzɩma ɖɩpɩzɩɣ nɛ ɖɩmaɣzɩnɩ Abraham? (Keɣa 72:28)

¹² Ɛzɩma ɖɩpɩzɩɣ nɛ ɖɩmaɣzɩnɩ Abraham? Pɩpɔzʋʋ se ɖiwolo pɩ-yɔɔ nɛ ɖɩkpɛlɩkɩɣ Yehowa yɔɔ tɔm ɛzɩ Abraham kaalabʋ yɔ. Ye ɖɩlakɩ mbʋ yɔ, ɖɩkaɣ-ɩ ñɔtɩnʋʋ nɛ pɩkɩlɩ nɛ ɖɩkaɣ-ɩ sɔɔlʋʋ ɖɔɖɔ nɛ pɩkɩlɩ. (Kalɩ Keɣa 72:28.) Ðɩkaɣ falɩsʋʋ ɖɛ-ɛhʋyɛ se pɩsa nɛ Yehowa lɩmaɣza wɛɛnɩ ɖoŋ ɖɩ-yɔɔ. (Ebr. 5:14) Piyeki nɛ alɩwaatʋ ndʋ nɔɔyʋ ñakɩ pana se ɛtakɩ-ɖʋ nɛ ɖɩla mbʋ pɩfɛyɩ ɖeu yɔ, ɖɩkaɣ kizuu. Ðɩkaɣ paɖʋʋ mbʋ payɩ pɩpɩzɩɣ nɛ pɩkɔnɩ ɖa-Caa wɩzasɩ nɛ pɩpɩzɩɣ nɛ pɩcamɩ ɖa nɛ ɩ ɖa-taabalɩyɛ yɔ. Ɛlɛ, ɛbɛ ɖɔɖɔ ɖɩpɩzɩɣ nɛ ɖɩtasɩ labʋ nɛ ɖɩwɩlɩ se ɖɩsɔɔlɩ siɣsiɣ wɛtʋ?

13. Ɛzɩma ɖɩpɩzɩɣ nɛ ɖɩñɩnɩ siɣsiɣ wɛtʋ? (Aduwa 15:9)

¹³ Nɩŋgbaŋaɣ 2: Ñaɣ pana nɛ paa evemiye nɖɩ lɛ, ŋsɔɔlɩ siɣsiɣ wɛtʋ nɛ pɩkɩlɩ. Ye ɖɩsɔɔlaa se ɖo-tomnaɣ ɛkpa ɖoŋ camɩyɛ yɔ, pɩpɔzʋʋ se ɖɩñaɣ pana siŋŋ nɛ ɖɩlakɩ hola aleɣya paa evemiye nɖɩ. Mbʋ ɖɔɖɔ pɩpɔzʋʋ se ɖɩñaɣ pana siŋŋ nɛ ɖɩsɔɔlɩ mbʋ Yehowa yɔɔdʋʋ se pɩwɛ siɣsiɣ yɔ nɛ pɩkɩlɩ. Ðɩpɩzɩɣ nɛ ɖɩlakɩ mbʋ paa evemiye nɖɩ nɛ pɩtɩkɩlɩ kaɖɛ. Yehowa nɩɣ ɖɔ-tɔm taa, nɛ ɛɛpɔzʋʋ-ɖʋ kpa se ɖɩla mbʋ pɩcɛzɩ ɖo-ɖoŋ kamaɣ yɔ. (Keɣa 102:14) Eheyiɣ-ɖʋ se ɛnʋ sɔɔlɩ «weyi ɛtɩŋɩɣ siɣsiɣ lakasɩ nʋmɔʋ yɔ.» (Kalɩ Aduwa 15:9.) Ye ɖɩñɩnɩɣ se ɖɩtalɩ kaɖʋwa nakɛyɛ Yehowa sɛtʋ taa yɔ, ɖiwoki pɩ-yɔɔ nɛ ɖɩñakɩ pana siŋŋ se ɖɩtalɩ-kɛ. Mbʋ ɖɔɖɔ pɩwɛɛ, ye ɖɩñɩnɩɣ siɣsiɣ wɛtʋ yɔ. Nɛ Yehowa kaɣ-ɖʋ sɩnʋʋ nɛ suuɖu se ɖɩɖɛɛnɩ ɛsɩndaa; alɩwaatʋ kaaɖɛɣ lɛ, ɛkaɣ-ɖʋ sɩnʋʋ pazɩ pazɩ se ɖɩla camɩyɛ nɛ pɩkɩlɩ.—Keɣa 83:6, 8.

14. (a) Ɛbɛ «siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ» kɩsɩŋnaa? (b) Nɛ ɛbɛ yɔɔ pɩpɔzʋʋ-ɖʋ kʋ?

¹⁴ Yehowa tɔzʋʋ-ɖʋ nɛ sɔɔlɩm se pɩtɩkɛ sʋʋtʋ pɩkɛnaa se ɖɩla mbʋ ɛyɔɔdʋʋ se pɩwɛ siɣsiɣ yɔ. (1 Yoh. 5:3) Ɛlɛ pɩkandɩyɩɣ ɖɔ-yɔɔ, nɛ pɩpɔzʋʋ se pakandɩyɩ ɖɔ-yɔɔ paa evemiye nɖɩ. Maɣzɩ fezuu taa you wondu ndʋ tɩ-tɔm apostoloo Pɔɔlɩ yɔɔdaa yɔ tɩ-yɔɔ nɛ ŋna. (Efɛz. 6:14-18) You wondu ndʋ tɩ-taa ŋgʋ kandɩyɩɣ  Krɩstʋ tʋ laŋɩyɛ yɔɔ? Ŋgʋ lɛ «siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ,» nɛ kɩsɩŋnɩ Yehowa paɣtʋ nɛ ɛ-paɣtʋ kila siɣsiɣ ñɩna. Ñɩɣyʋʋ toko kandɩyɩɣ ɛyʋ laŋɩyɛ maɣmaɣ yɔɔ, mbʋ ɖɔɖɔ Yehowa paɣtʋ nɛ ɛ-paɣtʋ kila siɣsiɣ ñɩna pɩzɩɣ nɛ akandɩyɩ ña-laŋɩyɛ yɔɔ, pʋ-tɔbʋʋ se ɛyʋ weyi ŋkɛnɩ ɖooo ña-taa yɔ. Pʋyɔɔ pɩcɛyaa se siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ kɩwɛɛ fezuu taa you wondu ndʋ ŋsuu yɔ tɩ-taa!—Adu. 4:23.

15. Ɛzɩma ŋpɩzɩɣ nɛ ŋsuu siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ?

¹⁵ Ɛzɩma ŋpɩzɩɣ nɛ ŋsuu siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ? Ŋpɩzɩɣ nɛ ŋla mbʋ, ye ŋlakɩnɩ tʋmɩyɛ Ɛsɔ paɣtʋ nɛ ɛ-paɣtʋ kila lɩmaɣza wena ŋkpakɩɣ paa evemiye nɖɩ yɔ a-taa yɔ. Alɩwaatʋ ndʋ ŋmaɣzɩɣ se ŋna mbʋ pɩ-tɔm pɩwɛɛ se ŋyɔɔdɩ, minziiki ŋgʋ pɩwɛɛ se ŋwelisi, aleɣya wena pɩwɛɛ se ŋcɔna yaa takayɩsɩ nzɩ pɩwɛɛ se ŋkalɩ yɔ, kajalaɣ taa lɛ pɔzɩ ña-tɩ se: «Ɛbɛ mankaɣ sʋzʋʋ ma-laŋɩyɛ taa? Mbʋ malɩzɩɣ se malakɩ yɔ, pɩkaɣ kɛdɩnʋʋ Yehowa? Yaa pɩkaɣ seɣtuu wɛtʋ ndʋ Yehowa yɔɔdʋʋ se tɩfɛyɩ siɣsiɣ yɔ, ɛzɩ kʋzʋʋ kɩdɛkɛdʋʋ wezuu caɣʋ, puuyaɣ lakasɩ, ɛsa naɣ naɣ nɛ piɖeni men-ɖeke wɛtʋ mbʋ yɔ?» (Fil. 4:8) Lɩmaɣza wena ŋkpakɩɣ yɔ, ye alakɩ nɔɔ kʋɖʋmaɣ nɛ Yehowa sɔɔlɩm yɔ, ŋkaɣ haʋ nʋmɔʋ se ɛ-paɣtʋ nɛ ɛ-paɣtʋ kila siɣsiɣ ñɩna ɩkandɩyɩ ña-laŋɩyɛ yɔɔ.

16-17. Tɔm ndʋ tɩwɛ Izaayii 48:18 taa yɔ, ɛzɩma tɩsɩɣnɩ-ɖʋ se ɖa-taa ɛtɛ se ɖɩpɩzɩɣ ɖɩcaɣ wezuu nɛ kɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila tam?

¹⁶ Wiɖiyi ŋtɛm nɩɣzʋʋ se ɛzɩ ŋkaɣ pɩzʋʋ nɛ ŋwolo pɩ-yɔɔ nɛ ŋcakɩ wezuu ŋgʋ kɩlakɩ nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila paa evemiye nɖɩ, nɛ halɩ pɩnzɩ nɛ pɩnzɩ na? Iyele nɛ ɖɩna kɩɖaʋ ŋgʋ Yehowa labɩnɩ tʋmɩyɛ Izaayii 48:18 taa yɔ. (Kalɩ Izaayii 48:18.) Yehowa labɩ-ɖʋ tamaɣ se ɖe-siɣsiɣ wɛtʋ pɩzɩɣ nɛ tɩwɛɛ ɛzɩ «lɩm sɔsɔm hola» yɔ. Kpaɣ se ŋsɩŋ teŋgu sɔsɔʋ nakʋyʋ kidiiliŋ yɔɔ nɛ ŋcɔŋnɩ lɩm hola awɛɛ nɛ afalɩɣ nɛ atɩŋɩɣ ɖama wayɩ. Ŋwɛɣ lone kɩbanɖɛ nɖɩ ɖɩ-taa lɛ, ŋkaɣ nɩɣzʋʋ se evemiye naɖɩyɛ lɩm hola ana apɩzɩɣ nɛ ayele falʋʋ na? Aayɩ! Ŋnawa se lɩm hola ana, awɛʋ nɛ afalɩɣ yɔ, pɩlakɩ pɩnzɩ kudokiŋ sakɩyɛ yɔ; nɛ pɩtʋʋ fɛyɩ se akaɣ wobu pɩ-yɔɔ nɛ afalɩɣ mbʋ.

¹⁷ Ñe-siɣsiɣ wɛtʋ pɩzɩɣ nɛ tɩwɛɛ ɛzɩ teŋgu yɔɔ lɩm hola ana yɔ! Ɛzɩma tɩyɛ? Alɩwaatʋ ndʋ pɩpɔzʋʋ se ŋkpaɣ lɩmaɣzɩyɛ naɖɩyɛ yɔ, kajalaɣ taa lɛ, maɣzɩ nɛ ŋna se ɛbɛ Yehowa sɔɔlaa se ŋla. Pʋwayɩ lɛ, ŋlabɩ-pʋ. Pɩtɩla pɩwɛɣ-ŋ kaɖɛ siŋŋ se ŋlakɩ mbʋ. Ɛlɛ paa ɛzɩmtaa lɛ, ña-Caa kʋsɔɔlʋ kaɣ-ŋ haʋ ɖoŋ nɛ ɛkaɣ-ŋ sɩnʋʋ nɛ ŋwolo pɩ-yɔɔ nɛ ŋlakɩ mbʋ pɩwɛ siɣsiɣ yɔ paa evemiye nɖɩ.—Iza. 40:29-31.

18. Ɛbɛ yɔɔ pɩpɔzʋʋ se ɖɩkpa ɖa-tɩ nɛ ɖɩtaalakɩnɩ tʋmɩyɛ mbʋ ɖa-maɣmaɣ ɖɩmaɣzɩɣ se pɩwɛ siɣsiɣ yɔ nɛ ɖɩhʋʋnɩ ɛyaa lalaa tɔm?

¹⁸ Nɩŋgbaŋaɣ 3: Ðʋzɩ tɔm hʋʋ Yehowa nesi tɛɛ. Alɩwaatʋ ndʋ ɖɩñakɩ pana siŋŋ se ɖɩcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila siɣsiɣ ñɩna yɔ, pɩpɔzʋʋ se ɖɩkpa ɖa-tɩ nɛ ɖɩtaahʋʋnɩ ɛyaa lalaa tɔm nɛ ɖɩtaamaɣzɩɣ se ɖɩwɛ siɣsiɣ nɛ pɩkpaɖɩ lalaa. Ðɩfɛyɩnɩ waɖɛ se ɖɩhʋʋnɩ ɛyaa lalaa tɔm nɛ ɖɩna se pɛwɛɛ nɛ palakɩ mbʋ Yehowa sɔɔlaa se pala yɔ yaa paalakɩ. Pɩwɛɛ se ɖɩtɔzɩ se Yehowa kɛnɩ «tɛtʋ kpeekpe tɔm hʋyʋ.» (Kiɖe 18:25) Yehowa tɩɖʋzɩ tɔm hʋʋ mbʋ ɖe-nesi tɛɛ. Toovenim taa lɛ, Yesu ɖʋ-ɖʋ paɣtʋ se: «Iyele lalaa tɔm hʋnʋʋ nɛ pataahʋʋnɩ-mɩ.»—Mat. 7:1. *

19. Ɛzɩma Yosɛɛfʋ wɩlaa se ɛtaɣ liu Yehowa tɔm hʋʋ?

¹⁹ Iyele nɛ ɖɩtasɩ naʋ abalʋ siɣsiɣ tʋ Yosɛɛfʋ kɩɖaʋ. Ɛtaahʋʋnɩ ɛyaa lalaa tɔm, halɩ pɩkpɛndɩnɩ  mba palabɩ-ɩ kañatʋ siŋŋ yɔ. Yosɛɛfʋ ɖalaa maɣmaɣ labɩ-ɩ puuyaɣ lakasɩ, pɛpɛdɩ-ɩ se ɛpɩsɩ yom nɛ pɛcɛtɩ pa-caa se ɛsɩba. Pɩnzɩ sakɩyɛ wayɩ lɛ, Yosɛɛfʋ nɛ ɛ-hɔʋ pɔkɔm nɛ pakatɩ ɖama. Alɩwaatʋ ndʋ tɩ-taa lɛ, Yosɛɛfʋ kaapɩsɩ ñʋʋdʋ sɔsɔ nɔɔyʋ; pʋyɔɔ lɛ ɛpɩzaɣ se ɛhʋʋnɩ ɛ-ɖalaa tɔm nɛ kañatʋ nɛ ɛkpa-wɛ kɩmɩyɛ. Paa Yosɛɛfʋ ɖalaa kaakpiɖi mbʋ paalaba nɛ pɩɖɛɛ yɔ pɩ-yɔɔ siŋŋ yɔ, sɔɔndʋ kpaɣaɣ-wɛ se pɩtɩla Yosɛɛfʋ kaɣ-wɛ kpaʋ kɩmɩyɛ. Ɛlɛ Yosɛɛfʋ hɛzɩ pa-laŋa nɛ ɛtɔ se: «Sɔɔndʋ ɛtaakpa-mɩ kaaʋ! Mɔnkɔŋ mansɩɩ man-tɩ Ɛsɔ ɖeɖe yaa we?» (Kiɖe 37:18-20, 27, 28, 31-35; 50:15-21) Yosɛɛfʋ luzi ɛ-tɩ nɛ ɛɖʋzɩ tɔm hʋʋ Yehowa nesi tɛɛ.

20-21. Ɛbɛ pɩzɩɣ pɩsɩnɩ-ɖʋ nɛ ɖɩtaakpakɩɣ ɖa-tɩ se ɖɩwɛ siɣsiɣ nɛ pɩkpaɖɩ ɛyaa lalaa?

²⁰ Ða ɖɔɖɔ ɖɩɖʋzʋʋ tɔm hʋʋ Yehowa nesi tɛɛ ɛzɩ Yosɛɛfʋ kaalabʋ yɔ. Ðɩɩmaɣzɩɣ se mbʋ ɖo-koobiya lakɩ yɔ, ɖɩsɩm mbʋ piseɣtiɣ-wɛ nɛ palakɩ-pʋ yɔ. Ðɩɩpɩzɩɣ nɛ ɖɩtɩlɩ mbʋ pɩwɛ ɛyaa laŋa taa yɔ; Yehowa ɖeke «teɣdiɣni feziŋ» [yaa tazɩɣnɩ mbʋ piseɣtiɣ ɛyʋ yɔ pɩ-taa]. (Adu. 16:2) Ɛsɔɔlɩ ɛyaa tɩŋa, paa wezuu ŋgʋ pacaɣaa nɛ pɩɖɛɛ yɔ kɩwɛ ndɩ ndɩ yaa paa palɩnɩ sɔnzɩ ndɩ ndɩ taa yɔ. Nɛ Yehowa seɣtiɣ-ɖʋ se ‘ɖikuli ɖa-laŋa wamm.’ (2 Kɔr. 6:13) Ðɩɩhʋʋnɩ ɖo-koobiya tɔm, ɛlɛ ɖɩñɩnɩɣ se ɖɩsɔɔlɩ pa-tɩŋa.

²¹ Pɩwɩlɩɣ ɖɔɖɔ se pɩtɩpɔzɩ se ɖɩhʋʋnɩ tɔm mba pɛfɛyɩ ɛgbɛyɛ taa yɔ. (1 Tim. 2:3, 4) Ye ñɔ-hɔʋ taa tʋ nɔɔyʋ eetisiɣ mbʋ pʋyɔɔ ŋtisiɣ yɔ pɩ-yɔɔ yɔ, ɛzɩ pɩwɛɛ se ŋhʋʋnɩ-ɩ tɔm nɛ ŋyɔɔdɩ se: «Ɛyʋ ɛnɛ ɛɛkaɣ kɔm toovenim taa kpa»? Aayɩ, ye ŋlabɩ mbʋ yɔ pɩwɩlɩɣ se ŋkpazɩɣ ña-tɩ nɛ ŋmaɣzɩɣ se ŋwɛ siɣsiɣ nɛ pɩkpaɖɩ lalaa. Yehowa wɛɛ nɛ ɛhaɣ waɖɛ «ɛyaa tɩŋa paa le» se pekpiɖi pa-kɩwɛɛkɩm yɔɔ. (Tʋma 17:30) Paa ɛzɩmtaa lɛ, tɔzɩ se mba pamaɣzɩɣ se pɛwɛ siɣsiɣ nɛ pɩkpaɖɩ ɛyaa lalaa yɔ, Yehowa kpakɩɣ-wɛ se pɛfɛyɩ siɣsiɣ.

22. Ɛbɛ yɔɔ ŋtɛm ña-taa se ŋsɔɔlʋʋ siɣsiɣ wɛtʋ?

²² Ye ɖɩsɔɔlɩ mbʋ Yehowa yɔɔdʋʋ se pɩwɛ siɣsiɣ yɔ, pɩkaɣ yebu nɛ ɖihiɣ taa leleŋ nɛ pɩkaɣ-ɖʋ sɩnʋʋ nɛ ɖɩkɛ kɩɖaʋ kɩbaŋʋ ɛyaa lalaa, nɛ pɩkaɣ yebu ɖɔɖɔ nɛ pɔsɔɔlɩ ɖa nɛ Ɛsɔ nɛ pɩkɩlɩ. Tɛtɛ nɛ ɖiwolo pɩ-yɔɔ nɛ ɖiyele nɛ ‘siɣsiɣ wɛtʋ ñɔɔsɩ nɛ lɔkɔtʋ kʋʋ-ɖʋ.’ (Mat. 5:6) Ña-taa ɛtɛ se Yehowa naɣ pana wena ŋwɛɛ nɛ ŋñakɩ yɔ, nɛ paa ɛzɩmtaa lɛ ɛ-taa lakɩ leleŋ nɛ ɛzɩma ŋɖɛɣnɩ ɛsɩndaa yɔ. Ɛjaɖɛ ɖɩnɛ ɖɩ-taa, ɛyaa wɛɛ nɛ papɩsɩɣ mba pɛfɛyɩ siɣsiɣ yɔ nɛ pɩkɩlɩɣ, ɛlɛ ña-laŋɩyɛ ɛhɛɛ! Paa ɛzɩmtaa lɛ, tɔzʋʋ se «[Yehowa] sɔɔlɩ mba pɛwɛ siɣsiɣ yɔ.»—Keɣa 145:8.