1, 2. (a) Ɛbɛ wɩlɩɣ se ɛyaa wɛɛ palʋkɩ siŋŋ se pɛwɛɛ pa-tɩ yɔɔ? (b) Nɛ ɛbɛ lɩ pɩ-taa?

SƆNƆ, ɛyaa yɔɔdʋʋ tɔm sakɩyɛ kɩmaŋ wɛʋ, hɛzʋʋ, nɛ tɩ-yɔɔ wɛʋ pɔ-yɔɔ. Ɛjaɖɛ hɔɔlɩŋ sakɩyɛ taa, ɛyaa lʋkɩ se palɩɩ kañatʋ lakasɩ, tɛ yɔɔ tɛ yɔɔ lakasɩ nɛ kʋñɔndʋtʋ yomiye taa. Lalaa sɔɔlaa se paha-wɛ nʋmɔʋ nɛ pɔyɔɔdɩ pa-lɩmaɣza, palɩzɩ mbʋ pɔsɔɔlɩ labʋ yɔ nɛ peɖiyi pa-tɩ. Paa le, ɛyaa ñɩnɩɣ se pala mbʋ pɔsɔɔlaa yɔ, yaa pacaɣ wezuu ɛzɩ pɔsɔɔlʋʋ yɔ.

² Pɩwɛ ɛyaa kaɖɛ se patɩlɩ nʋmɔŋ weyi ɩ-yɔɔ patɩŋna nɛ patalɩ pa-kaɖʋsɩ nzɩ yɔ. Politiki nʋmɔʋ taa nɛ hɔɔlɩŋ lɛɛŋ taa lɛ, sakɩyɛ tɩŋɩɣnɩ ñʋndɩnaa kaɖɩnʋʋ, nɔɔhɔnɖɛ, puuyaɣ lakasɩ nɛ halɩ you yɔɔ se pɩsa nɛ pɛwɛɛ pa-tɩ yɔɔ. Ɛlɛ papɩzaa nɛ patalɩ pa-kaɖʋwa na? Aayɩ, ɛlɛ ɖoŋ ɖoŋ lɛ, pɩkɔŋnɩ-wɛ kʋñɔmɩŋ sakɩyɛ nɛ nabɛyɛ lesiɣ pe-weziŋ. Wɛtʋ tʋnɛ tɩwɩlɩɣ kpayɩ kpayɩ se tɔm ndʋ fezuu kiɖeɖeu sɩnɩ Salomɔɔ nɛ ɛma se “ɛyʋ ñazɩɣ ɛyʋ nɛ ɛwɩlɩɣ-ɩ kʋñɔŋ” yɔ, tɩkɛ toovenim.​—Ekl. 8:9.

3. Ɛbɛ ɖɩpɩzɩɣ ɖɩla nɛ ɖihiɣ taa leleŋ nɛ koboyaɣ siŋŋ?

³ Yesu tɔmkpɛlɩkɩyʋ Yakubu ñɩɣ niye mbʋ ɛyʋ pɩzɩɣ ɛla nɛ  ehiɣ taa leleŋ nɛ koboyaɣ siŋŋ yɔ pɩ-yɔɔ. Ɛmawa se: “Piyele weyi ɛñɔʋnɩ tɩ-yɔɔ wɛʋ paɣtʋ siŋŋ yɔ nɛ ɛtɩkɛ welisiyu lizɔʋ tʋ yɔ, ɛlɛ ɛñakɩ pana nɛ ɛɖɔŋ tɩ-yɔɔ camɩyɛ yɔ, . . . ehikiɣ koboyaɣ, paɣtʋ yɔɔ ɖɔm yɔɔ.” (Yak. 1:25) Yehowa weyi ɛɖʋ paɣtʋ ndʋ tɩtalɩ pilim yɔ, ɛsɩm mbʋ payɩ pʋpɔzʋʋ ɛyaa nɛ papɩzɩ nɛ pɛwɛɛ taa leleŋ nɛ koboyaɣ taa siŋŋ yɔ. Ɛha kajalaɣ halʋ nɛ abalʋ mbʋ payɩ pʋpɔzʋʋ-wɛ se pɛwɛɛ taa leleŋ taa yɔ halɩ pɩkpɛndɩnɩ tɩ-yɔɔ wɛʋ siŋŋ.

4. Ɛzɩma Aɖam nɛ Ɛva paawɛ pa-tɩ yɔɔ? (Cɔnɩ kiɖe tɛɛ kɩlɛmʋʋ.)

⁴ Alɩwaatʋ ndʋ ɖɩɩkalɩɣ Kiɖe Tɛɛ Tɔm takayaɣ kajalaɣ ñʋʋ nɛ naalɛ ñɩŋgʋ yɔ, ɖɩnaɣ se tɩ-yɔɔ wɛʋ mbʋ ɛyaa ñɩnɩɣ sɔnɔ paanaɣ yɔ, Aɖam nɛ Ɛva paawɛnɩ-pʋ: Pataatɛɖɩɣ pʋyʋ, sɔɔndʋ taakpaɣ-wɛ nɛ nabʋyʋ nɛ nɔɔyʋ taalakɩ-wɛ kañatʋ. Pataanɩɣzɩɣ tɔɔnaɣ yaa tʋmɩyɛ nɖɩ pala yɔ ɖɩ-yɔɔ, pataahɩnɩɣ kʋdɔŋ nɛ pataanɩɣzɩɣ sɩm yɔɔ ɖɔɖɔ. (Kiɖe 1:27-29; 2:8, 9, 15) Ɛlɛ pɩwɩlɩɣ se Aɖam nɛ Ɛva paawɛ pa-tɩ yɔɔ hɔɔlɩŋ tɩŋa taa? Iyele nɛ ɖɩyɔɔdɩ pɩ-tɔm.

5. Pʋcɔ nɛ ɛyaa wɛɛ pa-tɩ yɔɔ lɛ, ɛbɛ pɩcɛyaa se pala?

⁵ Sɔnɔ ɛyaa sakɩyɛ maɣzɩɣ se pʋcɔ nɛ pɛwɛɛ pa-tɩ yɔɔ siŋŋ lɛ, pɩwɛɛ se pala mbʋ mbʋ pɔsɔɔlaa yɔ, ɛlɛ paamaɣzɩɣ mbʋ pɩkaɣ pɩ-taa lɩʋ yɔ pɩ-yɔɔ. Takayaɣ nakɛyɛ (The World Book Encyclopedia) lɩzɩ pɩ-taa se tɩ-yɔɔ wɛʋ kɛ “ɖoŋ weyi ɛyʋ wɛna se ɛsɛtɩ ɛ-tɩ tɔm nɛ ɛñɔɔnɩ-tʋ kpam yɔ.” Nɛ katasɩ yɔɔdʋʋ se: “Sakɩyɛ maɣzɩɣ se ye ajɛɛ ɩɖʋʋ paɣtʋ ndʋ tɩtʋʋzaa, tɩ-tɔm cɛyɩ nɛ tɩmʋna yɔ, ɛyaa pɩzɩɣ nɛ pɛwɛɛ pa-tɩ yɔɔ.” Tɔm tʋnɛ tɩwɩlɩɣ se pʋcɔ nɛ ɛjaɖɛ naɖɩyɛ taa ɛyaa wɛɛ pa-tɩ yɔɔ lɛ, pʋpɔzʋʋ se paɖʋ paɣtʋ natʋyʋ. Ye mbʋ tɔm pɔzʋʋ lɛ se amʋnaa se ɛɖʋ paɣtʋ ndʋ tɩtʋʋzaa, tɩ-tɔm cɛyɩ nɛ tɩmʋna yɔ?

6. (a) Ɛbɛ yɔɔ ɖɩpɩzɩɣ ɖɩyɔɔdɩ se Yehowa ɖeke wɛnɩ ɛ-tɩ yɔɔ kiya? (b) Tɩ-yɔɔ wɛʋ mbʋ ɛyaa wɛna? Nɛ ɛbɛ yɔɔ?

⁶ Tɔm kɩcɛyɩtʋ ndʋ pɩwɛɛ se ɖɩtɩlɩ tɩ-yɔɔ wɛʋ yɔɔ yɔ, ndʋ lɛ se Yehowa ɖeke wɛnɩnɩ tɩ-yɔɔ wɛʋ kiya mbʋ pɩfɛyɩnɩ kamaɣ yɔ. Ɛbɛ yɔɔ? Mbʋ pʋyɔɔ yɔ ɛnʋ kɛnɩ wondu kpeekpe lɩzɩyʋ nɛ kedeŋa kpeekpe yɔɔ Ðoŋ Tɩŋa Tʋ. (1 Tim. 1:17; Natʋ 4:11) Maɣzɩ tɔm pee kɩbana wena wiyaʋ Daviid labɩnɩ tʋmɩyɛ alɩwaatʋ ndʋ ɛkɛdaɣ lone sɔsɔɖɛ nɖɩ ɖɩ-taa Yehowa wɛɛ yɔ, a-yɔɔ nɛ ŋna. (Kalɩ 3 Awiya 29:11, 12.) Toovenim taa lɛ, wondu kɩlɩzɩtʋ ndʋ tɩwɛ ɛsɔdaa nɛ tataa yɔ, ti-kpeekpe tɩwɛ tɩ-tɩ yɔɔ, ɛlɛ pɩtɩkɛ hɔɔlɩŋ tɩŋa taa. Pɩwɛɛ se ɖɩtɩlɩ se Yehowa wɛnɩnɩ ɖoŋ se ɛɖʋ paɣtʋ ndʋ tɩtʋʋzaa, tɩ-tɔm cɛyɩ nɛ tɩmʋna yɔ. Paɣtʋ ndʋ ɖeyi ɖeyi Yehowa ɖʋwa alɩwaatʋ ndʋ ɛcalɩ ɛyʋ lɩzʋʋ yɔ.

7. Mbʋ ɖɩlakɩ nɛ ɖihikiɣ taa leleŋ yɔ, pɩ-taa nabʋyʋ lɛ mbʋ?

⁷ Paa Aɖam nɛ Ɛva paawɛ pa-tɩ yɔɔ hɔɔlɩŋ ndɩ ndɩ taa yɔ, pa-tɩ yɔɔ wɛʋ kaawɛnɩ kamaɣ. Pɩsa nɛ pɛwɛɛ wezuu lɛ, pɩɩwɛɛ se pefezi, pɔtɔɔ tɔɔnaɣ nɛ poɖoo. Ɛzɩ pɩ-labʋ yeba nɛ pɩwɛɛ-wɛ ɛzɩ pɛfɛyɩ pa-tɩ yɔɔ yɔ? Aayɩ, mbʋ pʋyɔɔ yɔ Yehowa nawa se alɩwaatʋ ndʋ palakɩ mbʋ yɔ, pehikiɣ taa leleŋ nɛ pɛɛyɛ. (Keɣa 103:14, 15; Ekl. 3:12, 13) Anɩ pɩɩkɛdɩɣna se efezi helim kɩbam, ɛtɔɔ tɔɔnaɣ ŋga ɛsɔɔlaa yɔ yaa ɛhɩnɩ nɛ ɛhɛzɩ ɖoo taa? Ða-taa lakɩ leleŋ alɩwaatʋ ndʋ ɖɩlakɩ mbʋ yɔ nɛ pɩtɩkɛnɩ-ɖʋ sʋʋtʋ. Pɩtʋʋ fɛyɩ se mbʋ ɖɔɖɔ pɩlakaɣ Aɖam nɛ Ɛva.

8. (a) Paɣtʋ ndʋ Ɛsɔ ɖʋ Aɖam nɛ Ɛva? (b) Nɛ kaɖʋwa ŋga yɔɔ ɛɖʋ-wɛ paɣtʋ ndʋ?

 ⁸ Yehowa ɖʋ paɣtʋ Aɖam nɛ Ɛva se palʋlɩ nɛ posu tɛtʋ yɔɔ nɛ pɔcɔnɩ tɩ-yɔɔ camɩyɛ. (Kiɖe 1:28) Paɣtʋ tʋnɛ tɩ-yɔɔ lɛ, ɖɩpɩzɩɣ nɛ ɖɩyɔɔdɩ se Ɛsɔ tʋʋ waɖɛ nɖɩ ɛɛha-wɛ yɔ ɖɩ-yɔɔ yaa we? Aayɩ. Ɛsɔ ɖʋ paɣtʋ tʋnɛ se pɩha waɖɛ ɛyaa nɛ paɖʋ nesi tamaɣ ŋga ɛɛlaba yɔ. Ŋga lɛ se ɛyaa mba patalɩ pilim yɔ, posu ɛjaɖɛ kpeekpe yɔɔ nɛ tɛtʋ kpeekpe pɩsɩ paradisuu nɛ pacaɣ tɩ-yɔɔ tam. (Iza. 45:18) Sɔnɔ, ye nabɛyɛ ɩlɩzaa se pacakɩ ɛɖandʋ yaa pɔɖɔkʋʋ nesi ɛlɛ paalʋlʋʋ piya yɔ, pɩtɩwɩlɩ se pɛwɛɛ nɛ pakaɖɩɣnɩ Ɛsɔ tamaɣ. Toovenim lɛ, ɛyaa sakɩyɛ ɖɔkʋʋ nesi nɛ palʋlʋʋ piya paa pakatɩɣ kala naayɛ yɔ. (1 Kɔr. 7:36-38) Ɛbɛ yɔɔ? Mbʋ pʋyɔɔ yɔ, ɖoŋ ɖoŋ lɛ, pɩ-labʋ kɔŋnɩ-wɛ taa leleŋ nɛ pɛɛyɛ. (Keɣa 126:3) Aɖam nɛ Ɛva papɩzaɣ se pehiɣ taa leleŋ nɛ koboyaɣ pɔ-hɔʋ taa tam.

9. Ɛbɛ yɔɔ ɖɩɩpɩzɩɣ nɛ ɖɩyɔɔdɩ se paɣtʋ ndʋ Ɛsɔ ɖʋ Kiɖe Tɛɛ Tɔm 2:17 taa yɔ, tɩtɩtʋʋzɩ, tɩ-tɔm tɩtɩcɛyɩ yaa tɩtɩmʋna?

⁹ Yehowa ɖaɣnɩ ɖʋʋ paɣtʋ lɛɛtʋ Aɖam nɛ Ɛva, nɛ eheyi-wɛ ɖɔɖɔ mbʋ paɣtʋ ndʋ tɩ-yɔɔ maʋ pɩzɩɣ nɛ pɩkɔnɩ-wɛ yɔ. Ɛyɔɔdaa se: “Taatɔɔ kɩbandʋ nɛ kɩdɛkɛdɩm pa-sɩmtʋ tɩʋ piye, mbʋ pʋyɔɔ yɔ kɩyakʋ ŋgʋ ŋtɔkɩ yɔ, ŋkaɣ sɩbʋ siŋŋ.” (Kiɖe 2:17) Ðɩpɩzɩɣ ɖɩtɔ se paɣtʋ tʋnɛ tɩtɩtʋʋzɩ, tɩ-tɔm tɩcɛyɩ yaa tɩtɩmʋna yaa we? Paɣtʋ ndʋ, tɩwɩlɩɣ se Ɛsɔ mʋ tɩ-yɔɔ wɛʋ waɖɛ nɖɩ Aɖam nɛ Ɛva paawɛna yɔ? Toovenim taa lɛ pɩtɩkɛ mbʋ. Bibl taa tazɩyaa sakɩyɛ yɔɔdaa se pɩɩmʋnaa se Ɛsɔ ɛɖʋ paɣtʋ ndʋ. Pa-taa nɔɔyʋ yɔɔdaa se: “Paɣtʋ ndʋ Ɛsɔ ɖʋ [Kiɖe 2:16, 17] taa yɔ, tɩwɩlɩɣ se Ɛsɔ ɖeke sɩmnɩ mbʋ pɩwazɩɣ ɛyaa . . . nɛ mbʋ pɩɩwazɩɣ-wɛ . . . yɔ. Pʋcɔ nɛ ‘piɖeni’ ɛyaa lɛ, pʋpɔzʋʋ se pataa Ɛsɔ liu nɛ pañamɩ-ɩ. Ye patɩña Ɛsɔ yɔ, eyeki-wɛ nɛ pa-maɣmaɣ palɩzɩ mbʋ pɩwɛ ɖeu . . . nɛ mbʋ pɩfɛyɩ ɖeu yɔ.” Ɛlɛ tʋmɩyɛ ɖɩnɛ, ɛyaa ɩɩpɩzɩɣ palabɩ-ɖɩ pa-maɣmaɣ nɛ piɖeni-wɛ.

10. Ɛbɛ yɔɔ pɩwɛɛ se ɖɩtɩlɩ se tɩ-yɔɔ wɛʋ lɩzʋʋ waɖɛ wɛ ndɩ nɛ kɩbam nɛ kɩdɛkɛdɩm tɩlʋʋ waɖɛ?

¹⁰ Sɔnɔ ɛyaa sakɩyɛ kalɩɣ paɣtʋ ndʋ Yehowa ɖʋ Aɖam yɔ lɛ, papɩzɩɣ nɛ pɔyɔɔdɩ se tɩwɩlɩɣ se Aɖam tɩtasɩ wɛʋ ɛ-tɩ yɔɔ se ɛpɩzɩ nɛ ɛla mbʋ ɛ-maɣmaɣ ɛsɔɔlaa yɔ. Pɔ-tɔm ndʋ tɩwɩlɩɣ se paasɩŋ tʋkaɣ ŋga kɛwɛ tɩ-yɔɔ wɛʋ lɩzʋʋ waɖɛ nɛ kɩbam nɛ kɩdɛkɛdɩm tɩlʋʋ waɖɛ pɛ-hɛkʋ taa yɔ. Aɖam nɛ Ɛva paawɛnɩ waɖɛ se palɩzɩ se pañaŋ Ɛsɔ yaa paañaŋɩ-ɩ. Ɛlɛ Yehowa ɖeke kaawɛnɩnɩ waɖɛ se eheyi-wɛ mbʋ pɩwɛ ɖeu nɛ mbʋ pɩfɛyɩ ɖeu yɔ, nɛ mbʋ kaasɩŋnɩ “kɩbam nɛ kɩdɛkɛdɩm sɩmtʋ tɩʋ” ŋgʋ kɩɩwɛ Edɛɛnɩ kaɖaɣ taa yɔ. (Kiɖe 2:9) Pɩkɛ toovenim se lɩmaɣza wena ɖɩkpakɩɣ yɔ, nabʋyʋ taa ɖɩɩsɩŋ mbʋ pɩpɩzɩɣ pɩlɩɩ pɩ-taa yɔ nɛ ɖɩɩpɩzɩɣ ɖɔɖɔ nɛ ɖɩyɔɔdɩ se paa ɛzɩmtaa lɛ, lɩmaɣza wena ɖɩkpakɩɣ yɔ akaɣ-ɖʋ ɖenuu. Pʋyɔɔ ɖoŋ ɖoŋ lɛ, ɖɩnaɣ ɛyaa kpakɩɣ lɩmaɣza wena pamaɣzɩɣ se awɛ ɖeu yɔ, ɛlɛ pʋwayɩ lɛ pɩkɔŋnɩ-wɛ kʋñɔmɩŋ yaa asɛyɩŋ. (Adu. 14:12) Ɛyʋ wɛ ɛjandʋ hɔɔlɩŋ sakɩyɛ taa, pʋyɔɔ pɩwɛ mbʋ. Pɩtɩŋnɩ paɣtʋ ndʋ Yehowa ɖʋwa yɔ tɩ-yɔɔ lɛ, ɛkpɛlɩkɩ Aɖam nɛ Ɛva ɛzɩma papɩzɩɣ nɛ pɛwɛɛ pa-tɩ yɔɔ siŋŋ yɔ. Ɛzɩma tɩyɛ? Nɛ ɛzɩma Aɖam nɛ Ɛva palaba?

11, 12. Ɛbɛ yɔɔ lɩmaɣza wena Aɖam nɛ Ɛva pakpaɣaa yɔ akɔnɩ-wɛ asɛyʋʋ? Ha kɩɖaʋ nakʋyʋ.

¹¹ Ɛzɩ ɖɩnaʋ yɔ, Aɖam nɛ Ɛva palɩzaa se paañaŋ Ɛsɔ. Sataŋ cɛtɩ Ɛva nɛ eheyi-i se “mɩ-ɛsa kuluu nɛ ɩwɛɛ ɛzɩ [Ɛsɔ] yɔ, mba pasɩm kɩbam nɛ kɩdɛkɛdɩm yɔ.” nɛ ɛlɛ tisi pɩ-yɔɔ (Kiɖe 3:5) Mbʋ Aɖam nɛ Ɛva palaba yɔ, piyeba nɛ pɛwɛɛ pa-tɩ yɔɔ  nɛ pɩkpaɖɩ yaa we? Pɩlabɩ pʋtɔdɩyɛ se pɩtɩla mbʋ. Pɩtɩla ɛzɩ Sataŋ kaaheyuu-wɛ yɔ. Pitileɖi lɛ, peɖiɣzinaa se ɛzɩma pamanɩ Ɛsɔ paɣtʋ yɔɔ nɛ pala pa-maɣmaɣ pɔ-sɔɔlɩm yɔ, pɩkɔnɩ-wɛ asɛyʋʋ. (Kiɖe 3:16-19) Ɛbɛ yɔɔ? Mbʋ pʋyɔɔ yɔ, Yehowa tɩha ɛyaa waɖɛ se pa-maɣmaɣ patɩlɩ mbʋ pɩkɛ kɩbam nɛ kɩdɛkɛdɩm yɔ.​—Kalɩ Aduwa 20:24; Yereemii 10:23.

¹² Iyele nɛ ɖɩkpaɣ ɛsɔdaa lɔɔɖɩyɛ sayʋ kɩɖaʋ. Pɩsa nɛ ɛtalɩ ɖenɖe ewoki yɔ nɛ kɛgbɛdɩsaɣ nakɛyɛ ɛtaatalɩ-ɩ lɛ, pɩwɛɛ se ɛtɩŋ ɛsɔdaa nʋmɔʋ ŋgʋ paɖʋwa yɔ kɩ-taa. Paa ɛsɔdaa lɔɔɖa ɖɩzɩŋɩyɛ nɖɩ ɖɩ-taa lɛ, wondu natʋyʋ wɛɛ nɛ tɩsɩɣnɩ ɛsɔdaa lɔɔɖɩyɛ sayʋ se ɛlabɩnɩ tʋmɩyɛ wondu ndʋ tʋtʋ ñɛwɛ ɛ-cɔlɔ yɔ nɛ pɩsa nɛ ɛyɔɔdʋʋnɩ mba pɔcɔŋnɩ ɛ-nʋmɔʋ ɖɔm yɔɔ yɔ paa ɛzɩmtaa camɩyɛ. Ɛlɛ ye ɛsɔdaa lɔɔɖɩyɛ sayʋ ɛtɩlabɩnɩ tʋmɩyɛ wondu ndʋ, nɛ ye ɛlɩzaa se ɛtɩŋɩɣ nʋmɔʋ ŋgʋ ɛ-maɣmaɣ ɛsɔɔlaa yɔ, pɩkɔŋnɩ kaɖɛ. Ɛzɩ ɛsɔdaa lɔɔɖɩyɛ sayʋ ɛnʋ yɔ, Aɖam nɛ Ɛva palɩzaa se palakɩ pa-maɣmaɣ pɔ-sɔɔlɩm. Pekizi nʋmɔʋ ŋgʋ Ɛsɔ wɩlɩ-wɛ yɔ. Ɛbɛ lɩ pɩ-taa? Ɛzɩ ɖɩnaʋ yɔ, pɩkɔnɩ kɛgbɛdɩsaɣ sɔsɔɔ pɩ-tɔbʋʋ se pɩkɔnɩ pa-maɣmaɣ nɛ pa-sayɩnaa kɩwɛɛkɩm nɛ sɩm. (Roma 5:12) Ɛzɩma pañaɣ pana se peɖiyi pa-tɩ yɔ, piyeba nɛ pelesi tɩ-yɔɔ wɛʋ siŋŋ mbʋ Ɛsɔ ha-wɛ yɔ.

13, 14. Ɛzɩma ɖɩpɩzɩɣ ɖɩla nɛ ɖɩwɛɛ ɖa-tɩ yɔɔ siŋŋ?

¹³ Ɛyaa pɩzɩɣ pamaɣzɩ se ye pɛwɛ pa-tɩ yɔɔ hɔɔlɩŋ tɩŋa taa yɔ, piɖeɣni-wɛ nɛ pɩkpaɖɩ. Ɛlɛ toovenim taa lɛ, ye tɩ-yɔɔ wɛʋ ɛfɛyɩnɩ kamaɣ yɔ, pɩkɔŋnɩ kala sakɩyɛ. Pɩkɛ toovenim se tɩ-yɔɔ wɛʋ kɔŋnɩ wazasɩ sakɩyɛ, ɛlɛ ye paɣtʋ natʋyʋ ɛfɛyɩ nɛ tɩɖʋʋ kamaɣ ɖa-tɩ yɔɔ wɛʋ mbʋ yɔ, ɛzɩma pɩkaɣ wɛʋ ɛjaɖɛ yɔɔ? Pʋyɔɔ takayaɣ sɔsɔɔ ŋga ɖɩɩtɛm yɔɔdʋʋ yɔ, pama ka-taa se: “Paa samaɣ ŋga ka-taa lɛ, pañakɩ pana se paɖʋ paɣtʋ nɛ tihuuzi ka-taa ɛyaa yɔɔ, paɖʋʋ-tʋ ɖɔɖɔ se tɩsɩnɩ paa weyi nɛ ɛtɩlɩ se ɛ-tɩ yɔɔ wɛʋ wɛnɩ tɩnaɣ. Pɩ-labʋ fɛyɩ kɛlɛʋ.” Toovenim pɩ-labʋ fɛyɩ kɛlɛʋ. Pʋyɔɔ palɩzɩ paɣtʋ sakɩyɛ sakɩyɛ, lɔyaawaa nɛ tɔm hʋyaa sakɩyɛ sakɩyɛ se paba ɩpɩzɩ  nɛ palɩzɩ paɣtʋ ndʋ tɩ-taa; nɛ peyele ɖɔɖɔ nɛ ɛyaa ɖɔ paɣtʋ ndʋ tɩ-yɔɔ.

¹⁴ Tɔm ndʋ Yesu yɔɔdaa pɩlɩɩnɩ ɛzɩma ɛyʋ pɩzɩɣ nɛ ɛwɛɛ ɛ-tɩ yɔɔ siŋŋ yɔ, tɩwɛ ndɩ nɛ ndʋ ɛyaa maɣzɩɣ yɔ. Ɛyɔɔdaa se: “Ye ɩɖɔkɩ mɔn-tɔm kɔyɔ, ɩkaɣ kɛʋ mɔn-tɔm mʋyaa tɩtɩm taa. Ɩkaɣ tɩlʋʋ tʋtʋyɛ tɔm nɛ tʋtʋyɛ tɔm kaɣ-mɩ holuu nɛ ɩwɛɛ mɩ-tɩ yɔɔ.” (Yoh. 8:31, 32) Tɔm ndʋ Yesu yɔɔdaa yɔ, tɩwɩlɩɣ se pʋcɔ nɛ ɛyʋ wɛɛ ɛ-tɩ yɔɔ siŋŋ lɛ, pʋpɔzʋʋ se ɛkpɛzɩ nɩŋgbanzɩ naalɛ: Kajalaɣ lɛ, pɩwɛɛ se ɛkpɛlɩkɩ toovenim tɔm ndʋ Yesu wɩlaa yɔ nɛ etisi tɩ-yɔɔ. Nɛ nabʋlɛ lɛ, ɛpɩsɩ ɛ-tɔm mʋyʋ. Ye ɖɩlabɩ mbʋ yɔ, ɖɩwɛɣ ɖa-tɩ yɔɔ siŋŋ. Ɛlɛ ɛzɩma tɩyɛ ɖɩwɛɣ ɖa-tɩ yɔɔ? Yesu wobi pɩ-yɔɔ nɛ ɛlɩzɩ pɩ-taa se: “Ɛyʋ weyi ɛlakɩ kɩwɛɛkɩm yɔ, ɛkɛ yom. Ye Pɩyalʋ eholi-mɩ yɔ, ɩkaɣ wɛʋ mɩ-tɩ yɔɔ siŋŋ.”​—Yoh. 8:34, 36.

15. Ɛbɛ yɔɔ tɩ-yɔɔ wɛʋ mbʋ pɩ-tɔm Yesu yɔɔdaa yɔ, piyeki se ‘ɖɩwɛɛ ɖa-tɩ yɔɔ siŋŋ’?

¹⁵ Ðɩnɩɣ pɩ-taa kpayɩ kpayɩ se tɩ-yɔɔ wɛʋ mbʋ Yesu heyi ɛ-tɔm mʋyaa se pakaɣ hiɣu yɔ, pɩkpaɖɩ ɖeu tɩ-yɔɔ wɛʋ mbʋ sakɩyɛ ñakɩ pana sɔnɔ se pɛwɛɛnɩ politiki nʋmɔʋ taa yaa hɔɔlɩŋ lɛɛŋ taa yɔ. Yesu yɔɔdʋʋ se: “Ye Pɩyalʋ eholi-mɩ yɔ, ɩkaɣ wɛʋ mɩ-tɩ yɔɔ siŋŋ” yɔ, ɛyɔɔdaɣ ɛzɩma ɛkaɣ-wɛ holuu kaɖɛ sɔsɔɖɛ nɖɩ ɖɩkpaɖɩ kala kpeekpe yɔ ɖɩ-taa yɔ, pɩ-tɔbʋʋ se ‘kɩwɛɛkɩm yomiye’ taa. Pɩtasɩna se kɩwɛɛkɩm tuzuu-ɖʋ nɛ ɖɩlakɩ mbʋ pɩfɛyɩ ɖeu yɔ lɛ, piyeki ɖɔɖɔ nɛ ɖɩɩpɩzɩɣ ɖɩlakɩ mbʋ ɖiɖiɣzina se pɩwɛ ɖeu yɔ, yaa ɖɩcaɣ wezuu ŋgʋ ɖa-mamaɣ ɖɩnawa se kɩkɛ kɩbaŋʋ yɔ. Ye mbʋ ɖɩnɩɣ pɩ-taa se ɖɩkɛ kɩwɛɛkɩm yomaa nɛ yomiye nɖɩ ɖɩkɔŋnɩ-ɖʋ ɛsɩñɩŋɩyɛ, wɩzasɩ, kʋñɔŋ nɛ sɩm. (Roma 6:23) Apostoloo Pɔɔlɩ maɣmaɣ kaanɩ wɩzasɩ nzɩ pɩdɩɩfɛyɩ. (Kalɩ Roma 7:21-25.) Alɩwaatʋ ndʋ paɖɩzɩɣ mbʋ payɩ kɩwɛɛkɩm kɔnaa yɔ lɛ, ɖɩtaɣ liu se ɖɩkaɣ wɛnʋʋ tɩ-yɔɔ wɛʋ siŋŋ mbʋ Aɖam nɛ Ɛva paawɛna yɔ.

16. Ɛzɩma ɖɩpɩzɩɣ nɛ ‘ɖɩwɛɛ ɖa-tɩ yɔɔ siŋŋ’?

¹⁶ Tɔm ndʋ Yesu yɔɔdaa se “ye ɩɖɔkɩ mɔn-tɔm kɔyɔ,” tɩwɩlɩɣ se pɩwɛɛ se ɖɩɖɔ paɣtʋ natʋyʋ yɔɔ pʋcɔ nɛ eholi-ɖʋ nɛ ɖɩwɛɛ ɖa-tɩ yɔɔ. Ðɩkɛ Krɩstʋ ñɩma mba paha pa-tɩ Ɛsɔ nɛ pamɩyɩsɩ-wɛ lɩm yɔ, ye mbʋ pɩwɩlɩɣ se ɖikizi ɖa-tɩ nɛ ɖɩlɩzɩ se ɖɩɖɔŋ Krɩstʋ wɩlɩtʋ yɔɔ ɛzɩ ɛ-tɔm mʋyaa yɔ. (Mat. 16:24) Ɛzɩ Yesu yɔɔdʋʋ yɔ, ɖɩkaɣ wɛʋ ɖa-tɩ yɔɔ siŋŋ alɩwaatʋ ndʋ ɖɩkaɣ wɛnʋʋ ɛ-kɩlaʋ wazasɩ kpeekpe yɔ.

17. (a) Ɛbɛ yeki nɛ ɖɩnɩɩ leleŋ siŋŋ ɖe-wezuu caɣʋ taa? (b) Tɔm ndʋ taa ɖɩkaɣ tazʋʋ ñʋʋ ŋgʋ kɩkɔŋ yɔ kɩ-taa?

¹⁷ Ye ɖiluzuu ɖa-tɩ Yesu wɩlɩtʋ tɛɛ ɛzɩ ɛ-tɔm mʋyaa yɔ, pʋbʋ lɛ ɖe-wezuu caɣʋ wɛɣnɩ tɔbʋʋ nɩʋ siŋŋ nɛ pɩha-ɖʋ koboyaɣ. Mbʋ yekina nɛ ɖɩkɔɔ ɖɩlɩɩ kɩwɛɛkɩm nɛ sɩm po-yomiye taa. (Kalɩ Roma 8:1, 2, 20, 21.) Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma ɖɩpɩzɩɣ nɛ ɖɩlabɩnɩ tɩ-yɔɔ wɛʋ waɖɛ tʋmɩyɛ sɔnɔ nɛ lɛɣtʋ nɛ ɖɩɖʋnɩ hɩɖɛ Yehowa tam yɔ; Yehowa kɛnɩ tɩ-yɔɔ wɛʋ siŋŋ tɛ Ɛsɔ yɔ.