Yozuwee 23:1-16
23 Yehowa lɩzɩ Izrayɛɛlɩ ki-koyindinaa mba pɔcɔ-kʋ nɛ pata yɔ pe-nesi tɛɛ nɛ ɛha-kʋ hɛzɩyɛ nɛ pɩla kɩyakɩŋ sakɩyɛ,+ alɩwaatʋ ndʋ Yozuwee kaakpadɩyaa nɛ ɛ-pɩnzɩ ɖɔɔ yɔ lɛ,+
2 Yozuwee yaa Izrayɛɛlɩ kpeekpe,+ Izrayɛɛlɩ taa ɛzʋtʋyaa, ñʋndɩnaa, tɔm hʋyaa nɛ kaɖɩsɩ+ nɛ eheyi-wɛ se: «Mankpadɩyaa pɩdɩɩfɛyɩ.
3 Nɛ mɩ-maɣmaɣ ɩna mbʋ payɩ mɩ-Ɛsɔ Yehowa labɩ ajɛɛ anɛ mɩ-yɔɔ yɔ, mbʋ pʋyɔɔ yɔ mɩ-Ɛsɔ Yehowa kaakɛnɩ weyi ɛlabɩ you mi-lone taa yɔ.+
4 Ɩna, mɔntɔ piye+ nɛ mantayɩnɩ-mɩ* ajɛɛ wena akazaa yɔ a-tɛtʋ nɛ tɩpɩsɩ mi-cejewe ñɩm,+ nɛ mbʋ ɖɔɖɔ mantayɩ-mɩ ajɛɛ wena manɖɩzaa yɔ+ a-tɛtʋ, kpaɣnɩ Yɔɔrdaŋ nɛ piwolo Teŋgu Sɔsɔʋ,* wɩsɩ ɖɩɖʋyɛ taa.
5 Nɛ mɩ-Ɛsɔ Yehowa kɛnɩ weyi etuzaɣ-wɛ mɩ-ɛsɩndaa yɔ,+ ɛnʋ ɖɔɔnɩnɩ-wɛ mɩ-yɔɔ, nɛ ɩmʋ pɛ-ɛjaɖɛ, ɛzɩ mɩ-Ɛsɔ Yehowa kaalabʋ-mɩ tamaɣ yɔ.+
6 «Lɛɛlɛɛyɔ, pɩwɛɛ se ɩwɛɛ abalɩtʋ kpem nɛ ɩɖɔkɩ ndʋ payɩ pama Moyizi Paɣtʋ takayaɣ taa yɔ nɛ ɩɖɔ tɩ-yɔɔ,+ itaayele-tʋ nɛ ɩkɛɛnɩ nɩwaŋ yɔɔ yaa nɩmɩyɛ yɔɔ,+
7 nɛ itaasidi mɩ-tɩ ajɛɛ wena akazɩ mɩ-hɛkʋ taa yɔ a-taa kaaʋ.+ Halɩ pɩtɩha nʋmɔʋ se ɩyaa pɛ-ɛsɔnaa hɩla maɣmaɣ+ yaa iɖuuni-wɛ, nɛ pɩtɩha nʋmɔʋ ɖɔɖɔ se ɩsɛɛ-wɛ yaa iluŋ pɛ-tɛɛ kaaʋ.+
8 Ɛlɛ pɩwɛɛ se ɩñɔɔnɩ mɩ-Ɛsɔ Yehowa,+ ɛzɩ ɩtɛm labʋ nɛ pɩkɔɔ pɩtalɩ sɔnɔ yɔ.
9 Yehowa kaɣ ɖɔɔnʋʋ ajɛɛ sɔsɔna nɛ ajɛɛ ɖoŋ ñɩna mɩ-ɛsɩndaa,+ mbʋ pʋyɔɔ yɔ halɩ nɛ sɔnɔ, nɔɔyʋ tɩpɩzɩ nɛ ɛsɩŋ mɩ-ɛsɩndaa.+
10 Mɩ-taa kʋɖʋm ɖeke kaɣ ɖɔɔnʋʋ ɛyaa kudoku,+ mbʋ pʋyɔɔ yɔ mɩ-Ɛsɔ Yehowa lakɩnɩ you mi-lone taa,+ ɛzɩ ɛɛlabʋ-mɩ tamaɣ yɔ.+
11 Pʋyɔɔ lɛ, ɩcaɣnɩ mɩ-ɛsa paa ɛzɩmtaa*+ nɛ ɩsɔɔlɩ mɩ-Ɛsɔ Yehowa.+
12 «Ɛlɛ ye ɩpɩsaa nɛ ɩñɔɔnɩ ajɛɛ anɛ a-taa ñɩma mba pakazaa+ nɛ pɛwɛɛ mɩ-hɛkʋ taa yɔ, nɛ mɩ nɛ wɛ ɩkpakɩɣ ɖama pɛlaa,* nɛ ɩɖʋnɩ-wɛ taabalɩyɛ nɛ paba ɖɔɖɔ paɖʋnɩ-mɩ taabalɩyɛ yɔ,+
13 pɩwɛɛ se ɩtɩlɩ se paa pɩɩlabɩ ɛzɩma yɔ, mɩ-Ɛsɔ Yehowa ɛɛkaɣ-mɩ tasʋʋ ɖɔɔnʋʋ ajɛɛ ana.+ Akaɣ-mɩ pɩsʋʋ kpaca nɛ kaamʋʋ nɛ ɛgbazɩyɛ mɩ-hʋyɩŋ tɛɛ+ nɛ sɔɔ mɩ-ɛsa taa, nɛ pɩkɔɔ nɛ pɩsɩɩnɩ alɩwaatʋ ndʋ ɩtɛŋɩlɩ ɛjaɖɛ kɩbanɖɛ ɖɩnɛ ɖɩ-taa yɔ, ɛjaɖɛ nɖɩ mɩ-Ɛsɔ Yehowa cɛlɩ-mɩ yɔ.
14 «Lɛɛlɛɛyɔ, ɩna! Mawɩzɩ sɩbʋ,* nɛ ɩsɩm camɩyɛ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe se tamasɩ kɩbanzɩ nzɩ payɩ mɩ-Ɛsɔ Yehowa heyi-mɩ sɩ-tɔm yɔ, sɩ-taa tɔm piye naɖɩyɛ tɩɖɛɛ yem nɛ ɖɩtɩla. Sɩ-tɩŋa payɩ sɩlaba nɛ pɩwazɩ-mɩ. Sɩ-taa tɔm piye naɖɩyɛ tɩɖɛɛ yem se ɖɩtɩla.+
15 Ɛlɛ ɛzɩ tamasɩ kɩbanzɩ nzɩ payɩ mɩ-Ɛsɔ Yehowa heyi-mɩ sɩ-tɔm yɔ sɩlabʋ mɩ-hɔɔlʋʋ taa yɔ,+ mbʋ ɖɔɖɔ Yehowa kaɣ kɔnʋʋ asɛyʋʋ ŋgʋ ɛyɔɔdɩ kɩ-tɔm yɔ kɩ-tɩŋa* mɩ-yɔɔ nɛ ɛkaɣ-mɩ ɖɩzʋʋ ɛjaɖɛ kɩbanɖɛ ɖɩnɛ ɖɩ-taa, nɖɩ mɩ-Ɛsɔ Yehowa cɛlɩ-mɩ yɔ.+
16 Ye ɩcɛbɩ mɩ-Ɛsɔ Yehowa ɛgbɛyɛ nɖɩ ɛɖʋ-mɩ paɣtʋ se ɩɖɔkɩ yɔ, nɛ ye ɩɖɛwa nɛ ɩsɛɛ ɛsɔnaa lalaa nɛ iluŋ pɛ-tɛɛ yɔ, Yehowa pana kaɣ mɩ-yɔɔ kpaʋ+ nɛ ɩkaɣ tɛŋɩlʋʋ lɛɛ lɛɛ ɛjaɖɛ kɩbanɖɛ nɖɩ ɛcɛlɩ-mɩ yɔ ɖɩ-taa.»+
Pɩ-tɛɛ tɔm
^ Yaa «Ɩna, maha-mɩ.»
^ Pʋ-tɔbʋʋ se Mediiteraanee.
^ Yaa «Pʋyɔɔ lɛ, ifeŋiɣ mɩ-kalɩzasɩ yɔɔ camɩyɛ.»
^ Piye piye, «nɛ mɩ nɛ wɛ ɩɖʋ nesi ɖɔkʋʋ agbaa.»
^ Piye piye, «Manɖʋʋ tɛtʋ kpeekpe nʋmɔʋ taa sɔnɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «kaɣ kɔnʋʋ tɔm kɩdɛkɛdɩtʋ ndʋ tɩ-tɩŋa.»
