Ruti 3:1-18
3 Nɛ Ruti waŋ Nawomii heyi-i se: «Mɛn-pɛlɛ, pɩpɔzʋʋ se mañɩnɩ-ŋ ɖɩɣa* nakɛyɛ+ nɛ pɩɖɔmnɩ-ŋ camɩyɛ.
2 Bowaazɩ kɛ ɖɔ-hɔʋ taa tʋ nɔɔyʋ.+ Ña nɛ ɛ-pɛlaa ɩɩlabɩnɩ tʋmɩyɛ. Ɛfalɩɣ orjɩ* ɖanaɣ kanɛ tɔɔnaɣ ɖɩmaɖɛ.
3 Ye mbʋ, sɔ lɩm nɛ ŋtaa sɔzɩŋ num; pʋwayɩ lɛ, ŋsuu wondu kɩbandʋ* nɛ ŋtii tɔɔnaɣ ɖɩmaɖɛ. Taayele nɛ abalʋ ɛnʋ ɛna-ŋ pʋcɔ nɛ ɛtɛ tɔɔʋ nɛ ɛñɔɔ.
4 Alɩwaatʋ ndʋ ɛhɩnɩɣ yɔ, cɔnɩ ɖenɖe ɛhɩnaa yɔ nɛ ŋwolo ŋkuli ɛ-naataŋ yɔɔ nɛ ŋhɩnɩ. Ɛkaɣ-ŋ heyuu mbʋ pɩwɛɛ se ŋla yɔ.»
5 Ðɩnɛ ɛlɛ Ruti cosi se: «Mbʋ payɩ ŋtɔm se mala yɔ, mankaɣ-pʋ labʋ.»
6 Nɛ Ruti tii tɔɔnaɣ ɖɩmaɖɛ nɛ ɛla mbʋ payɩ ɛ-waŋ heyi-i se ɛla yɔ.
7 Alɩwaatʋ ndʋ tɩ-taa lɛ, Bowaazɩ tɔkaɣ nɛ ɛñɔʋ nɛ ɛnɩɣ leleŋ. Pʋwayɩ lɛ ewolo nɛ ɛhɩnɩ tɔɔnaɣ pee huuye cɔlɔ. Pʋwayɩ lɛ Ruti kɔɔ ɖaaa nɛ ekuli Bowaazɩ naataŋ yɔɔ nɛ ɛhɩnɩ.
8 Ðoo hɛkʋ taa lɛ, abalʋ paɣzɩ seluu, nɛ ɛkʋsɩ ɛ-tɩ nɛ ɛna halʋ nɔɔyʋ hɩnɩ ɛ-naataŋ tɛɛ.
9 Abalʋ pɔzɩ-ɩ se: «Ña yɔ anɩ?» Halʋ cosi se: «Ma yɔ Ruti, ña-lɩmɖʋyʋ. Posi ño-toko ña-lɩmɖʋyʋ yɔɔ, mbʋ pʋyɔɔ yɔ ŋkɛ mba papɩzɩɣ nɛ paɖaɣnɩ-ɖʋ yabʋ yɔ pa-taa nɔɔyʋ.»+
10 Peeɖe Bowaazɩ yɔɔdaa se: «Mɛn-pɛlɛ, Yehowa ɛwazɩ-ŋ. Ŋwɩlɩ ñɔ-sɔɔlɩm siɣsiɣ ñɩmbʋ lɛɛlɛɛyɔ nɛ pɩkɩlɩ kajalaɣ ɖeɖe,+ mbʋ pʋyɔɔ yɔ ŋtɩtɩŋ evebiya, paa pɛkɛ kʋñɔndɩnaa yaa ñɩm tɩnaa yɔ.
11 Nɛ lɛɛlɛɛyɔ, mɛn-pɛlɛ, sɔɔndʋ ɛtaakpa-ŋ. Mankaɣ-ŋ labʋ mbʋ payɩ ŋpɔzaa yɔ,+ mbʋ pʋyɔɔ yɔ tɛtʋ taa ɛyaa tɩŋa* nawa se ŋkɛ halʋ kɩbanʋ siŋŋ.
12 Ɛlɛ, paa pɩkɛ toovenim se mɛnkɛ mba papɩzɩɣ nɛ paɖaɣnɩ-mɩ yabʋ yɔ pa-taa nɔɔyʋ yɔ,+ lɛlʋ wɛɛ nɛ ɛñɔtɩnɩ-mɩ nɛ pɩkɩlɩ-m.+
13 Caɣ cɩnɛ ɖoo anɛ, nɛ ye tɛʋ efema nɛ ɛsɔɔlɩ se ɛɖaɣnɩ-ŋ yabʋ yɔ pɩwɛ ɖeu, ɛɖaɣnɩ-ŋ yabʋ.+ Ɛlɛ ye ɛtɩsɔɔlɩ se ɛɖaɣnɩ-ŋ yabʋ yɔ, ɖɩnɛ ɛlɛ, Yehowa ñɩtʋʋ nɛ ɛwɛɛ wezuu yɔ, ma-maɣmaɣ makaɣnɩ-ŋ ɖaɣnʋʋ yabʋ. Hɩnɩ cɩnɛ nɛ tɛʋ kɔɔ nɛ kife.»
14 Ðɩnɛ ɛlɛ Ruti hɩnɩ ɛ-naataŋ tɛɛ nɛ tɛʋ kɔɔ nɛ kife, nɛ ɛkʋyɩ lɔŋ tanaŋ tɛɛ alɩwaatʋ ndʋ pɩtɩñandɩtɩ camɩyɛ se papɩzɩ nɛ patɩlɩ ɛyʋ yɔ. Nɛ Bowaazɩ heyi-i se: «Taayele nɛ nɔɔyʋ na se halʋ nɔɔyʋ kɔm tɔɔnaɣ ɖɩmaɖɛ.»
15 Nɛ ɛtasɩ yɔɔdʋʋ se: «Kɔnɩ pɩsaʋ ŋgʋ ŋhuwa yɔ nɛ ŋposi-kʋ.» Ðɩnɛ ɛlɛ eposi-kʋ, nɛ Bowaazɩ ɖʋ kɩ-taa orjɩ kɩmaɣzɩŋ 6* nɛ ɛsʋʋ-ɩ, pʋwayɩ lɛ Bowaazɩ pɩsɩ tɛtʋ taa.
16 Ruti pɩsɩ ɛ-waŋ cɔlɔ nɛ ɛlɛ pɔzɩ-ɩ se: «Mɛn-pɛlɛ, ɛzɩma pɩɖɔmnɩ-ŋ?»* Nɛ Ruti heyi-i mbʋ payɩ abalʋ ɛnʋ ɛlabɩ-ɩ yɔ.
17 Nɛ ɛsɔzɩ se: «Ɛha-m orjɩ kɩmaɣzɩŋ 6 ɛnɛ nɛ eheyi-m se: “Taawolo ña-waŋ cɔlɔ nesi kpɛɖɛ.”»
18 Peeɖe ɛ-waŋ yɔɔdaa se: «Mɛn-pɛlɛ, caɣ cɩnɛ, nɛ pɩkɔɔ nɛ pɩsɩɩnɩ alɩwaatʋ ndʋ ŋnaɣ mbʋ pɩtɛŋna yɔ, mbʋ pʋyɔɔ yɔ ye abalʋ ɛnʋ ɛtɩcɔnɩ tɔm ndʋ ti-ɖeɖe sɔnɔ yɔ ɛɛhɛzɩɣ.»
Pɩ-tɛɛ tɔm
^ Piye piye, «ɖɩhɛzɩyɛ.»
^ Orjɩ kɛ tɔɔnaɣ pee naayɛ.
^ Yaa «ŋsuu ño-tokonaa kɩtɩnaa.»
^ Piye piye, «mbʋ pʋyɔɔ yɔ man-samaɣ nɔnɔɔ tɩŋa.»
^ Pɩkɛɣnɩ Seeya kɩmaɣzɩŋ 6, yaa litrinaa 44 mbʋ yɔ. Cɔnɩ Tɔm kɩsɔzɩtʋ B14.
^ Piye piye, «ña yɔ anɩ?»
