Ebree mba 11:1-40
11 Tisuu kɛnɩ mbʋ ɛyʋ taɣ liu nɛ ndɛŋgbɛzaɣ fɛyɩ pɩ-yɔɔ yɔ pɩ-ɖaŋʋʋ kpam,+ ɛyʋ wɩlʋʋ kaɣlaa se mbʋ paanaɣ-pʋ yɔ pɩwɛ keekee yɔ.*
2 Mbʋ pʋyɔɔ yɔ tisuu mbʋ, pɩ-yɔɔ pɩtɩŋnaa nɛ Ɛsɔ lɩzɩ ɖooo lɔndaa mba* aseɣɖe se pɔ-tɔm kɛdɩnɩ-ɩ.
3 Tisuu yɔɔ ɖiɖiɣziɣna se Ɛsɔ tɩŋnɩ ɛ-tɔm yɔɔ nɛ ɛsɩɩ mbʋ payɩ pɩwɛɛ yɔ* pi-lona taa tete; nɛ mbʋ panaɣ yɔ, pɩlɩnɩ wondu ndʋ paanaɣ-tʋ yɔ tɩ-taa.
4 Tisuu yɔɔ Aabɛɛlɩ la Ɛsɔ kɩlaʋ ŋgʋ kɩmʋ ñɩm nɛ pɩkpaɖɩ Kayɩnɩ ñɩŋgʋ yɔ,+ nɛ tisuu mbʋ pɩ-yɔɔ lɛ, palɩzɩ-ɩ aseɣɖe se ɛɛwɛ siɣsiɣ; mbʋ pʋyɔɔ yɔ ɛ-kʋjɔŋ kaakɛdɩnɩ Ɛsɔ,*+ nɛ paa ɛsɩba yɔ, eɖiɣni tɩŋnʋʋ e-tisuu yɔɔ nɛ ɛyɔɔdʋʋ.+
5 Tisuu yɔɔ pɛkɛzɩ Enɔɔkɩ+ lone se ɛtaana sɩm, nɛ nɔɔyʋ taapɩzɩɣ se ɛna-ɩ ɖoli, mbʋ pʋyɔɔ yɔ Ɛsɔ kɛzɩ-ɩ lone;+ mbʋ pʋyɔɔ yɔ pʋcɔ nɛ pɛkɛzɩ-ɩ lone lɛ, palɩzɩ-ɩ aseɣɖe se ɛ-tɔm kaakɛdɩnɩ Ɛsɔ siŋŋ.
6 Pɩtasɩ lɛ, ɛyʋ ɛfɛyɩnɩ tisuu kɔyɔ, ɛ-tɔm ɛɛpɩzɩɣ nɛ pɩkɛdɩnɩ Ɛsɔ, mbʋ pʋyɔɔ yɔ weyi ɛñɔtʋʋnɩ Ɛsɔ yɔ, pɩwɛɛ se etisi se ɛwɛɛ, nɛ ɛhɛyɩɣ mba pañɩnɩɣ-ɩ siŋŋ yɔ.+
7 Tisuu yɔɔ Ɛsɔ tɛm paɣʋ Noowa+ wondu ndʋ pataatɩɩnatɩ-tʋ yɔ tɩ-yɔɔ lɛ,+ Noowa wɩlɩ se eseɣ Ɛsɔ sɔɔndʋ nɛ ɛsaɣ aɖakaɣ+ se pɩya ɛ-ɖɩɣa taa mba ñʋʋ; nɛ tisuu mbʋ pɩ-yɔɔ lɛ, ɛkʋ ɛjaɖɛ tɔm,+ nɛ ɛpɩsɩ weyi ehikiɣ siɣsiɣ wɛtʋ ndʋ tɩlɩɣnɩ tisuu taa yɔ.
8 Tisuu yɔɔ alɩwaatʋ ndʋ paya Abraham+ yɔ, ɛñama nɛ ɛlɩɩ nɛ ewolo lone nɖɩ ɛkaɣ-ɖɩ mʋʋ se ɖɩpɩsɩ ɛ-ñɩm yɔ ɖɩ-taa; ɛlɩwa, paa ɛtaatɩlɩ ɖenɖe eɖiɣni wobu yɔ.+
9 Tisuu yɔɔ ɛcaɣ lidaʋ tɛtʋ taa ɛgɔndʋ ɛzɩ ɛgɔndʋ tɛtʋ taa yɔ,+ ɛsʋwaɣ kizinzikiŋ tɛɛ+ ɛ nɛ Izaakɩ nɛ Yakɔɔb, mba ɛ nɛ wɛ paka lidaʋ tɔm kʋɖʋmtʋ ndʋ yɔ.+
10 Mbʋ pʋyɔɔ yɔ, ɛɖaŋaɣ tɛtʋ ndʋ tɩwɛnɩ tigila siŋŋ yɔ, ndʋ Ɛsɔ kɛ tɩ-lɩzɩyʋ nɛ tɩ-mayʋ yɔ.+
11 Tisuu yɔɔ ɖɔɖɔ paa Saara ɛɛɖɛ piya lʋlʋʋ yɔɔ yɔ,+ paha-ɩ ɖoŋ se ɛhaɣ hoɣa nɛ ɛlʋlɩ pɩɣa,* mbʋ pʋyɔɔ yɔ ɛɛkpaɣ Weyi ɛlabɩ-ɩ tamaɣ ŋga yɔ se ɛwɛ siɣsiɣ.*
12 Mbʋ yebina nɛ abalʋ kʋɖʋm weyi pɩɩwɛ ɛzɩ ɛsɩba yɔ,+ ɛlʋlɩ piya+ nɛ sɩɖɔɔ ɛzɩ ɛsɔdaa tɩɩnzɩ yɔ, nɛ sɩfɛyɩ kalʋʋ ɛzɩ teŋgu nɔɔ kañɩŋa yɔ.+
13 Tisuu taa ɛyaa mba pa-tɩŋa pasɩba, paa tamasɩ nzɩ sɩtɩla nɛ pana yɔ;+ ɛlɛ pana-sɩ poliŋ taa+ nɛ palabɩ-sɩ talɩ ɖeu nɛ pɔyɔɔdɩ kaɣlaa se pɛkɛ agɔma nɛ mba pɛwɛ ɛjaɖɛ taa alɩwaatʋ pazɩ yɔ.
14 Mbʋ pʋyɔɔ yɔ mba pɔyɔɔdʋʋ mbʋ yɔ, pawɩlɩɣ kaɣlaa se peɖiɣni ñɩnʋʋ lone nɖɩ ɖɩkɛ pa-ñɩnɖɛ yɔ siŋŋ.
15 Paa mbʋ yɔ, ye paawɛɛ nɛ pɔtɔzʋʋ lone nɖɩ ɖɩ-taa palɩnaa yɔ ɖɩ-yɔɔ yɔ,+ paahiɣ waɖɛ nɛ papɩsɩ.
16 Ɛlɛ lɛɛlɛɛyɔ lɛ, pe-liu wɛɛ se pehiɣ lone nɖɩ ɖɩkɩlɩ ɖeu yɔ, pʋ-tɔbʋʋ se nɖɩ ɖɩkɛ ɛsɔdaa pʋyʋ yɔ. Pʋyɔɔ lɛ, pɔ-tɔm ɛɛlakɩ Ɛsɔ fɛyɛ, se payaa-ɩ se pɛ-Ɛsɔ,+ mbʋ pʋyɔɔ yɔ ɛñɔɔzɩ-wɛ tɛtʋ natʋyʋ.+
17 Tisuu yɔɔ alɩwaatʋ ndʋ pɩtakɩ Abraham yɔ,+ pɩɩwɛ ɛzɩ ɛla Izaakɩ yɔ—ɛyʋ weyi palabɩ-ɩ tamasɩ nɛ ɛ-taa la leleŋ yɔ, ɛñɩnaɣ se ɛlaa ɛ-pɩyalʋ ɛgbamɩyɛ+—
18 ŋgʋ paaheyi-i se: «Mba pakaɣ-wɛ yaʋ se ña-lʋlʋʋ taa mba* yɔ, Izaakɩ taa pakaɣ lɩnʋʋ.»+
19 Ɛlɛ ɛɛmaɣzaa se Ɛsɔ pɩzɩɣ nɛ efezi ɛ-pɩyalʋ nɛ sɩɖaa taa, nɛ ɛmʋ-ɩ nɛ sɩɖaa taa nɛ pɩkɛnɩ kɩɖaʋ.+
20 Tisuu yɔɔ ɖɔɖɔ Izaakɩ wazɩ Yakɔɔb+ nɛ Ezaawuu,+ wondu ndʋ tɩkaɣ kɔm yɔ tɩ-yɔɔ.
21 Tisuu yɔɔ alɩwaatʋ ndʋ Yakɔɔb wɩzɩ sɩbʋ yɔ,+ ɛwazɩ paa Yosɛɛfʋ pɩyalʋ weyi lɛ,+ nɛ ɛñɩɣ ɛ-ɖaʋ ñʋʋ yɔɔ nɛ ɛsɛɛ Ɛsɔ.+
22 Tisuu yɔɔ Yosɛɛfʋ wɩzɩ sɩbʋ lɛ, ɛyɔɔdɩ se Izrayɛɛlɩ piya kaɣ lɩʋ Ejipiti, nɛ ɛɖʋ-sɩ paɣtʋ ɛ-mɔɔ* yɔɔ.+
23 Tisuu yɔɔ Moyizi lʋlɩyaa mɛsɩ-ɩ fenasɩ 3 ɛ-lʋlʋʋ wayɩ,+ mbʋ pʋyɔɔ yɔ paanawa se pɩɣa cikpelaɣ ŋga kaaɖewa+ nɛ sɔɔndʋ tɩkpa-wɛ nɛ wiyaʋ paɣtʋ.+
24 Tisuu yɔɔ Moyizi kɔm nɛ ɛpaɣlɩ lɛ,+ ekizaa se pataayaa-ɩ se Farawɔɔ pɛlɛ pɩyalʋ;+
25 ɛlɩzaa se pawɩlɩ ɛ nɛ Ɛsɔ samaɣ ñaŋ, mbʋ ɛzɩ ɛɛnɩ kɩwɛɛkɩm leleŋ weyi eeleɖiɣ yɔ;
26 mbʋ pʋyɔɔ yɔ ɛkpaɣ Krɩstʋ fɛyɛ se pɩkɛ ñɩm mbʋ pɩkpaɖɩ Ejipiti ñɩm yɔ, mbʋ pʋyɔɔ yɔ ɛ-ɛsɩyɛ kaawɛ kɩhɛyʋʋ yɔɔ.
27 Tisuu yɔɔ ɛkʋyɩ Ejipiti,+ ɛlɛ sɔɔndʋ tɩkpa-ɩ nɛ wiyaʋ pana,+ mbʋ pʋyɔɔ yɔ ɛɛɖɔkɩ kpam ɛzɩ ɛnaɣaɣ Weyi paanaɣ-ɩ yɔ.+
28 Tisuu yɔɔ ɛtɔɔ Paska nɛ ɛɖɔ calɩm mɩzʋʋ paɣtʋ yɔɔ, se pɩsa nɛ ɖɩzɩyʋ ɛtaakɔnɩ kaɖɛ* pa-kajalaɣ piya.+
29 Tisuu yɔɔ pɛtɛzɩ Teŋgu Kɩsɛɛmʋʋ ɛzɩ tɛtʋ ndʋ tɩwɩlɩ waɣwaɣ yɔ tɩ-yɔɔ yɔ,+ ɛlɛ Ejipiti mba ñɩnaɣ se pala mbʋ lɛ, teŋgu libi-wɛ.+
30 Tisuu yɔɔ Yeriikoo kolonzi tɔlaa, samaɣ ɖɔma nɛ kɔcɔɔ-sɩ kɩyakɩŋ 7 nɛ pɩtɛ lɛ.+
31 Tisuu yɔɔ hayitu laɖʋ Rahaabɩ hiɣ ñʋʋ yabʋ alɩwaatʋ ndʋ paɖɩzaɣ kaañamtʋ tɩnaa yɔ, mbʋ pʋyɔɔ yɔ ɛɛmʋ cɔŋɩyaa laŋhɛzɩyɛ taa.+
32 Nɛ suwe mantasɩɣ yɔɔdʋʋ? Mbʋ pʋyɔɔ yɔ ye mɔntɔm se mɔyɔɔdʋʋ Gideyɔɔ,+ Baaraakɩ,+ Samsɔɔ,+ Yɛftee,+ Daviid,+ Samɩyɛɛlɩ+ nɛ nayaa lalaa pɔ-tɔm kɔyɔ alɩwaatʋ ɛɛkaɣ-m talʋʋ.
33 Tisuu yɔɔ lɛ, pawabɩ kewiyisi,+ peyeba nɛ siɣsiɣ wɛtʋ la, palabɩ-wɛ tamasɩ,+ paɖɩɣ mʋʋzɩŋ* nɔsɩ,+
34 paɖɩzɩ miŋ ɖoŋ,+ palɩɩ laɣɖɛ nesi tɛɛ,+ pakpazɩ-wɛ ɖoŋ pɛ-ɛjandʋ taa,+ papɩsɩ ɖoŋ tɩnaa you taa,+ pawa sɔɔjanaa mba pɔkɔm wadʋʋ tɛtʋ yɔɔ yɔ.+
35 Halaa mba pɛ-ɛyaa kaasɩba yɔ pefezi pa-sɩɖaa nɛ pɛcɛlɩ-wɛ,+ ɛlɛ pawɩlɩ lalaa kʋñɔŋ mbʋ pʋyɔɔ yɔ, pataatisi se pɛhɛyɩ kɩhɛyʋʋ nakʋyʋ nɛ poholi-wɛ, se pɩsa nɛ pehiɣ femtu ndʋ tɩkɩlɩ ɖeu yɔ.
36 Ɛɛɛ, lalaa takɩm kaakɛnɩ woŋa nɛ mabʋtʋ; toovenim taa lɛ, palabɩ-wɛ nɛ pɩcɛzɩ mbʋ, pɔhɔkɩ-wɛ kpasɩ+ nɛ paɖʋ-wɛ salaka.+
37 Payaɣ-wɛ pɛɛ,+ patakɩ-wɛ, pafaɣ-wɛ nabʋlɛ, pakʋ-wɛ nɛ laɣɖɛ,+ posuu heŋ tɔna nɛ pʋŋ tɔna nɛ poyotuu,+ alɩwaatʋ ndʋ paawɛ kɩcɛyɩm taa, kʋñɔŋ taa,+ nɛ alɩwaatʋ ndʋ pawɩlaɣ-wɛ ñaŋ yɔ;+
38 nɛ ɛjaɖɛ taamʋnɩ-wɛ. Poyoti kañɩmbusuu taa nɛ pʋŋ taa nɛ ɛwasɩ pɔŋ taa+ nɛ tɛtʋ pɛŋla taa.
39 Nɛ pa-tɩŋa payɩ mbʋ yɔ, paa paalɩzɩ-wɛ aseɣɖe kɩbanɖɛ pe-tisuu yɔɔ yɔ, tamaɣ ŋga katɩla nɛ pana;
40 mbʋ pʋyɔɔ yɔ Ɛsɔ kaaɖʋwa se ɛhaɣ-ɖʋ pʋyʋ nɔɔyʋ, weyi ɛkɩlɩ ɖeu yɔ,+ se pɩtaala nɛ palabɩ-wɛ nɛ patalɩ pilim nɛ ɖɩfɛyɩ pɩ-taa.
Pɩ-tɛɛ tɔm
^ Yaa «ɛyʋ taa tɛŋʋʋnɩ mbʋ pɩwɛɛ keekee ɛlɛ paanaɣ-pʋ yɔ.»
^ Yaa «lɩzɩ ɖɔ-cɔzɔnaa.»
^ Yaa «ɛsɩɩ ɛjaɖɛ yɔɔ ɖʋtʋ; ɛsɩɩ pɩnzɩ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Yaa «mbʋ pʋyɔɔ yɔ Ɛsɔ mʋ ɛ-kʋjɔŋ nɛ ɛlɩzɩnɩ-ɩ aseɣɖe.»
^ Piye piye, «ɖomaɣ.»
^ Yaa «se ɛmʋnaa se pataa-ɩ liu.»
^ Piye piye, «ño-ɖomaɣ.»
^ Yaa «e-pimtu.»
^ Piye piye, «ɖɩzɩyʋ etaatukuni.»
^ Yaa «tɔɔyɩŋ.»
