Apostoloowaa Tʋma Labʋ 8:1-40
8 Sɔɔlɩ ɛlɛ yɔ, pɩɩkɛdɩnɩ-ɩ se pakʋ Etiyɛɛnɩ.+
Kɩyakʋ ŋgʋ ki-wiye, nazɩm sɔsɔm nabʋyʋ lɩɩ ɛgbɛyɛ nɖɩ ɖɩwɛ Yeruzalɛm yɔ ɖɩ-yɔɔ; pa-tɩŋa pamɩzɩ ɖama Yuudee nɛ Samaarii ageeta kpeekpe taa nɛ pɩkazɩ apostoloowaa ɖeke.+
2 Ɛlɛ ɛyaa mba pañaŋaɣ Ɛsɔ yɔ, pakpaɣ Etiyɛɛnɩ nɛ powoni-i nɛ pepi; nɛ pewii-i pɩŋŋ.
3 Ɛlɛ Sɔɔlɩ paɣzɩ ɛgbɛyɛ wɩlʋʋ ñaŋ. Ewokaɣ kpaɣ ɖɩɣa nɛ ŋwolo ɖɩɣa, nɛ ɛhɔŋ abalaa nɛ halaa nɛ ɛlɩɣna nɛ ɛɖʋʋ-wɛ salaka.+
4 Ɛlɛ mba paamɩzɩ ɖama yɔ, pɔcɔʋ ɛjaɖɛ taa nɛ posusuu Ɛsɔ tɔm kɩbandʋ.+
5 Nɛ Filiipu tii Samaarii tɛtʋ* taa+ nɛ ɛpaɣzɩ-wɛ susuu Krɩstʋ yɔɔ tɔm.
6 Alɩwaatʋ ndʋ ɛyaa samasɩ welisaɣni Filiipu nɛ sɩcɔŋnɩ maamaaci lakasɩ* nzɩ ɛlakaɣ yɔ lɛ, sɩ-tɩŋa sikeŋni tɔm ndʋ ɛyɔɔdaɣ yɔ camɩyɛ.
7 Mbʋ pʋyɔɔ yɔ ɛyaa sakɩyɛ kaawɛnɩ azuluma feziŋ, nɛ ɩlɛ makaɣ kubusi ɖoŋ nɛ ɩlɩɣ.+ Pɩtasɩ lɛ, ɛyaa sakɩyɛ mba paakɛ kaakalasɩ nɛ taɖɩyɛ tɩnaa yɔ, pɔ-yɔɔ cɛkaɣ.
8 Piyeba nɛ taa leleŋ sɔsɔŋ wɛɛ tɛtʋ ndʋ tɩ-taa.
9 Abalʋ nɔɔyʋ kaawɛ tɛtʋ taa, payaɣ-ɩ se Siimɔɔ, ɖooo lɛ ɛlakaɣ maajiki lakasɩ nɛ pɩɖɩɣzɩɣ Samaarii mba, nɛ ɛtɔŋ se ɛkɛ sɔsɔ nɔɔyʋ.
10 Pa-tɩŋa payɩ, kpaɣnɩ cikpelu nɛ piwolo sɔsɔ, pekeŋaɣni-i camɩyɛ nɛ pɔtɔŋ se: «Abalʋ ɛnɛ, ɛkɛ Ɛsɔ Ðoŋ, weyi payaɣ se Sɔsɔŋ yɔ.»
11 Nɛ pekeŋaɣni-i camɩyɛ, mbʋ pʋyɔɔ yɔ ɛɛtɩŋnɩ ɛ-maajiki lakasɩ yɔɔ alɩwaatʋ sakɩyɛ nɛ eyele nɛ pɩɖɩɣzɩɣ-wɛ.
12 Ɛlɛ Filiipu susi tɔm kɩbandʋ Ɛsɔ Kewiyaɣ yɔɔ+ nɛ Yesu Krɩstʋ hɩɖɛ yɔɔ lɛ, abalaa nɛ halaa tisi, nɛ pamɩyɩsɩ-wɛ lɩm.+
13 Siimɔɔ maɣmaɣ ɖɔɖɔ tisi, nɛ pamɩyɩsɩ-ɩ lɩm nɛ pɩtɛ lɛ, ɛñɔɔnɩ Filiipu;+ nɛ ɛnaɣaɣ yʋsasɩ nɛ maamaaci lakasɩ sɔsɔsɩ nzɩ Filiipu lakaɣ yɔ lɛ, pɩɖɩɣzɩɣ-ɩ siŋŋ.
14 Apostoloowaa kaawɛ Yeruzalɛm, nɛ panɩwa se Samaarii mba mʋ Ɛsɔ tɔm lɛ,+ petiyi Pɩyɛɛrɩ nɛ Yohanɛɛsɩ pɔ-cɔlɔ;
15 nɛ paba tii nɛ patɩmɩ pɔ-yɔɔ se pamʋ fezuu kiɖeɖeu.+
16 Mbʋ pʋyɔɔ yɔ kitaatibiti pa-taa nɔɔyʋ yɔɔ, ɛlɛ paamɩyɩsɩ-wɛ lɩm Kɩbaɣlʋ Yesu hɩɖɛ taa ɖeke na.+
17 Ðɩnɛ ɛlɛ patɩnɩ pe-nesi pɔ-yɔɔ,+ nɛ papaɣzɩ mʋʋ fezuu kiɖeɖeu.
18 Nɛ Siimɔɔ nawa se apostoloowaa tɩnɩɣ pe-nesi ɛyaa yɔɔ nɛ paba mʋʋ fezuu kiɖeɖeu lɛ, ɛlɩzɩ liidiye se ɛhaɣ-wɛ,
19 nɛ ɛyɔɔdɩ se: «Ɩha-m ɖoŋ ɛnɩ ɖɔɖɔ, nɛ pɩsa nɛ weyi ɛ-yɔɔ mantɩnɩɣ me-nesi yɔ, ɛpɩzɩ nɛ ɛmʋ fezuu kiɖeɖeu.»
20 Ɛlɛ Pɩyɛɛrɩ heyi-i se: «Ña nɛ ñe-liidiye ile, mbʋ pʋyɔɔ yɔ ŋmaɣzɩɣ se ŋpɩzɩɣ nɛ ŋya kʋjɔʋ* ŋgʋ Ɛsɔ lakɩ yɔ nɛ liidiye.+
21 Ŋfɛyɩnɩ waɖɛ naɖɩyɛ tɔm tʋnɛ tɩ-taa, mbʋ pʋyɔɔ yɔ ña-laŋɩyɛ tɩtʋʋzɩ Ɛsɔ ɛsɩndaa.
22 Pʋyɔɔ lɛ, kpiɖi ña-lakasɩ kɩdɛkɛdɩsɩ nzɩ sɩ-yɔɔ, nɛ ŋtendi Yehowa* se, ye pɩsaŋ yɔ, ekpeɣ-ŋ ña-laŋɩyɛ taa maɣzɩm kɩdɛkɛdɩm mbʋ;
23 mbʋ pʋyɔɔ yɔ manaɣ se ŋkɛ sɔtʋ ñaŋ ñɩndʋ* nɛ mbʋ pɩfɛyɩ siɣsiɣ yɔ pi-yom.»
24 Siimɔɔ cosi nɛ eheyi-wɛ se: «Itendi Yehowa* mɔ-yɔɔ nɛ tɔm ndʋ ɩyɔɔdaa yɔ, tɩ-taa natʋyʋ ɛtaatalɩ-m.»
25 Mbʋ yebina nɛ pɛtɛm aseɣɖe lɩzʋʋ kpayɩ kpayɩ nɛ pɔyɔɔdɩ Yehowa* tɔm lɛ, papaɣzɩ pɩsʋʋ nɛ Yeruzalɛm kiŋ, nɛ posusuu tɔm kɩbandʋ Samaarii mba tɛtʋ cikpetu sakɩyɛ taa.+
26 Ɛlɛ Yehowa* tiyiyu+ yɔɔdɩnɩ Filiipu nɛ ɛtɔ se: «Kʋyɩ nɛ ŋwolo habɩyɛ nɖɩ ɖɩlɩnɩ Yeruzalɛm nɛ ɖitiki Gaazaa yɔ ɖɩ-hadɛ kiŋ.» (Pɩkɛ kañɩmbusuu taa habɩyɛ.)
27 Peeɖe ɛkʋyaa nɛ ewolo nɛ ɛna Etiyoopii abalʋ nɔɔyʋ, ɛɛkɛ eliŋgiye* nɛ ɛɛwɛnɩ ɖoŋ sɔsɔŋ, ɛɖʋwaɣ lɩm Etiyoopii abiɖe Kandaasɩ, nɛ ɛcɔŋnɩ ɛ-ñɩm kpeekpe yɔɔ. Eewobi Yeruzalɛm se ɛsɛɛ Ɛsɔ,+
28 nɛ ɛwɛɛ nɛ ɛpɩsɩɣ, ɛɛcaɣ ɛ-kɛɛkɛɛ taa nɛ ɛkalɩɣ nayʋ Izaayii takayaɣ nɛ nɔɔ kɩkʋyaɣ.
29 Ðɩnɛ ɛlɛ fezuu heyi Filiipu se: «Wolo nɛ ŋñɔtɩnɩ kɛɛkɛɛ ŋgʋ yɔ.»
30 Filiipu se nɛ ewolo kɩ-cɔlɔ nɛ ɛnɩɩ ɛwɛɛ nɛ ɛkalɩɣ nayʋ Izaayii takayaɣ nɛ nɔɔ kɩkʋyaɣ, nɛ ɛpɔzɩ-ɩ se: «Toovenim taa lɛ, ŋnɩɣ tɔm ndʋ ŋwɛɛ nɛ ŋkalɩɣ yɔ tɩ-tɔbʋʋ na?»
31 Ecosi-i se: «Toovenim taa lɛ, ye nɔɔyʋ ɛtɩwɩlɩ-m yɔ, ɛzɩma manpɩzɩɣ nɛ manɩɩ tɩ-tɔbʋʋ?» Peeɖe etendi Filiipu se ɛkpa nɛ ɛcaɣ ɛ-cɔlɔ.
32 Nɛ Masɩ hɔɔlʋʋ ŋgʋ ɛwɛɛ nɛ ɛkalɩɣ yɔ, ŋgʋ yɔ: «Pɛɖɛnɩ-ɩ ɛzɩ heu yɔ se pakʋ-ɩ, nɛ ɛzɩ heɣa ŋga kosum ɖiɣ ɖiɣ weyi ɛkɔʋ ka-hʋndʋ yɔ ɛ-ɛsɩndaa yɔ, mbʋ ɖɔɖɔ etikuli ɛ-nɔɔ.+
33 Paɖʋwaɣ-ɩ fɛyɛ lɛ, patɩhʋʋ ɛ-tɔm siɣsiɣ.+ Akaɣ kɛdʋʋ ɛ-kpaɖʋʋ tɔm tete? Mbʋ pʋyɔɔ yɔ palɩzɩ e-wezuu tɛtʋ yɔɔ.»+
34 Nɛ eliŋgiye pɔzɩ Filiipu se: «Mentendi-ŋ, a-tɔm nayʋ yɔɔdʋʋ? Ɛ-maɣmaɣ ɛ-tɔm yaa ɛyʋ nɔɔyʋ tɔm?»
35 Filiipu paɣzɩ yɔɔdʋʋ, nɛ ɛpaɣzɩnɩ mayaɣ ŋga lɛ, esusi-i Yesu yɔɔ tɔm kɩbandʋ.
36 Nɛ paawɛɛ nɛ pɔɖɔŋ habɩyɛ yɔɔ lɛ, patalɩ lɩm nabʋyʋ cɔlɔ, nɛ eliŋgiye yɔɔdɩ se: «Na! Lɩm yɔ cɩnɛ; ɛbɛ ɖaŋɩɣ-m se pataamɩyɩsɩ-m lɩm?»
37 *——
38 Peeɖe ɛha nɔɔ se kɛɛkɛɛ ɛsɩŋ, nɛ Filiipu nɛ eliŋgiye pa-naalɛ petii lɩm taa, nɛ Filiipu mɩyɩsɩ-ɩ lɩm.
39 Palɩnɩ lɩm taa lɛ, Yehowa* fezuu kpaɣ Filiipu lɛɛ lɛɛ nɛ kɩɖɛna, nɛ eliŋgiye tɩtasɩ-ɩ naʋ, ɛlɛ ewolo ɛ-nʋmɔʋ yɔɔ nɛ taa leleŋ.
40 Ɛlɛ Filiipu na ɛ-tɩ Asɩdoodi, nɛ ɛcɔʋ egeetiye nɖɩ ɖɩ-taa nɛ esusuu tɔm kɩbandʋ tɛtʋ tɩŋa taa nɛ pɩkɔɔ pɩtalɩ alɩwaatʋ ndʋ ɛtalɩ Sezaaree yɔ.+
Pɩ-tɛɛ tɔm
^ Pɩpɩzɩɣ pɩkɛ, «tɛtʋ natʋyʋ.»
^ Piye piye, «sɩcɔŋnɩ yʋsasɩ.»
^ Yaa «falaa kʋjɔʋ.»
^ Cɔnɩ Tɔm kɩsɔzɩtʋ A5.
^ Piye piye, «ŋwɛ ñaŋ ɛzɩ hoyosaɣ yɔ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «kaɖɩka.»
^ Cɔnɩ Tɔm kɩsɔzɩtʋ A3.
^ Cɔnɩ Tɔm kɩsɔzɩtʋ A5.
