Keɣa 26:1-12
Daviid hendu.
26 Oo Yehowa, hʋʋ mɔn-tɔm, mbʋ pʋyɔɔ yɔ mɔnɖɔm man-cɩŋgɩlɩm wɛtʋ taa;+Manta Yehowa liu, nɛ mantiyebi-i liu taʋ kaaʋ.+
2 Oo Yehowa, wili-m nɛ ŋtakɩ-m;La nɛ ma-lɩmaɣza cukaŋ ñɩna* nɛ ma-laŋɩyɛ wɛɛ kele kele.*+
3 Mbʋ pʋyɔɔ yɔ ñɔ-sɔɔlɩm siɣsiɣ ñɩmbʋ wɛ mɛ-ɛsɩndaa paa ɛzɩmtaa,Nɛ mɔnɖɔŋ ño-toovenim taa.+
4 Maaɖʋʋ taabalɩyɛ nɛ cɛtɩyaa,*+Nɛ menseɣ mba pɛmɛsɩɣ mbʋ pɛkɛnaa yɔ.*
5 Manpaɖɩɣ ɛyaa kɩdɛkɛdaa ɛgbaɣdɩyɛ,+Nɛ menkizaa se maaɖʋʋ taabalɩyɛ nɛ kañatʋ tɩnaa.*+
6 Mankaɣ saŋʋʋ me-nesi nɛ pɩwɩlɩ se mantɩɖɔɔ wɛɛ,Oo Yehowa, mankaɣ ɖɔm nɛ mɔncɔɔ ña-altaaru,
7 Se meyele nɛ panɩɩ mɛ-ɛsɩmɩyɛ wɩlʋʋ taŋ+Nɛ monsusi ñe-piti tʋma tɩŋa tɔm.
8 Yehowa, mɔnsɔɔlɩ ɖɩɣa ŋga ka-taa ŋwɛɛ yɔ,+Lone nɖɩ ɖɩ-taa ña-samtʋ wɛɛ yɔ.+
9 Taahazɩ kɩwɛɛkɩm laɖaa nɛ ŋkpɛndɩnɩ-m*+Nɛ taalɩzɩ puuyaɣ tɩnaa* wezuu nɛ ŋkpɛndɩnɩ ma-ñɩŋgʋ,
10 Mba pe-nesi lakɩ fɛyɛ lakasɩ yɔ,Nɛ mba pe-nesi kɩbanzɩ sɔɔlɩ mʋʋ kʋjɔŋ se pomuli lalaa yɔ.*
11 Ɛlɛ ma lɛ, mankaɣ ɖɔm man-cɩŋgɩlɩm wɛtʋ taa.
Holi-m* nɛ ŋna man-pʋtɔdɩyɛ.
12 Ma-nɩŋgbaŋaɣ sɩŋ lone landamm ñɩnɖɛ taa;+Mankaɣ sam Yehowa samaɣ sɔsɔɔ taa.*+
Pɩ-tɛɛ tɔm
^ Piye piye, «man-kataŋgayɩsɩ.»
^ Yaa «Kelesi ma-lɩmaɣza cukaŋ ñɩna nɛ ma-laŋɩyɛ.»
^ Piye piye, «Ma nɛ cɛtɩyaa ɖɩɩcakɩ.»
^ Yaa «maasʋzʋʋ man-tɩ pɩ-tɛɛ nɛ pɩ-yɔɔ tɩnaa taa.»
^ Piye piye, «se ma nɛ kañatʋ tɩnaa ɖɩɩcakɩ.»
^ Yaa «ŋkpɛndɩnɩ man-kalɩzaɣ.»
^ Yaa «calɩm kpɛdɩyaa.»
^ Yaa «sɔɔlɩ haʋ kʋjɔŋ se pomuli lalaa yɔ.»
^ Piye piye, «Ya ma-ñʋʋ.»
^ Piye piye, «kigbeɣliŋ taa.»
