Ezekɩyɛɛlɩ 25:1-17
25 Yehowa tɔm tasɩ-m talʋʋ se:
2 «Ɛyʋ pɩyalʋ, kɛzɩ ñɛ-ɛsa nɛ Amooni mba yɔɔ+ nɛ ŋyɔɔdɩ mbʋ pɩkaɣ-wɛ talʋʋ yɔ pɩ-natʋ tɔm.+
3 Pɩwɛɛ se ŋheyi Amooni mba se: “Iwelisi tɔm ndʋ Kɩbaɣlʋ Kɩlɩm Yehowa yɔɔdʋʋ yɔ. Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩyɔɔdɩnɩ tɛtɛ pɛŋɩyɛ se “Ahaaŋ!” alɩwaatʋ ndʋ pepisi mon-kooka kiɖeɖeɣa yɔ, nɛ alɩwaatʋ ndʋ Izrayɛɛlɩ ɛjaɖɛ pɩsɩ njɛyɛ yɔ nɛ alɩwaatʋ ndʋ pɛɖɛnɩ Yuuda ɖɩɣa yomiye taa yɔ,
4 pʋyɔɔ lɛ manɖʋzʋʋ-mɩ Wɩsɩ Ðɩlɩyɛ taa ñɩma nesi tɛɛ nɛ ɩpɩsɩ pa-pʋyʋ. Pakaɣ siɣu lona wena a-taa pacakɩ yɔ* mɩ-tɛ nɛ pesiɣ pe-kizinzikiŋ mɩ-hɛkʋ taa. Pakaɣ tɔɔʋ mɩ-tɩŋ pee nɛ pakaɣ ñɔʋ mɩ-naalɩm.
5 Mankaɣ labʋ nɛ Raba+ pɩsɩ aɖaaɖaanaa ñɩtʋ ɖɩdɔɔyɛ, nɛ mala nɛ Amooni mba ɛjaɖɛ pɩsɩ lone nɖɩ ɖɩ-taa kpɩna hɛzɩɣ yɔ; nɛ toovenim taa lɛ ɩkaɣ tɩlʋʋ se ma lɛ Yehowa.’”»
6 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ɩkpalɩ mi-nesi taa+ nɛ ɩma mɩ-nɩŋgbanzɩ nɛ tɛtʋ nɛ ɩmɛyɩnɩ* tɛtɛ pɛŋɩyɛ sɔsɔɖɛ+ Izrayɛɛlɩ ɛjaɖɛ yɔɔ,
7 pʋyɔɔ lɛ, mankaɣ sezuu me-nesi mɩ-yɔɔ nɛ manɖʋzɩ-mɩ ajɛɛ nesi tɛɛ nɛ ɩpɩsɩ mbʋ palazɩɣ yɔ. Mankaɣ-mɩ lɩzʋʋ samasɩ taa nɛ manɖɩzɩ-mɩ ajɛɛ taa.+ Mankaɣ-mɩ ɖɩzʋʋ, nɛ toovenim taa lɛ ɩkaɣ tɩlʋʋ se ma lɛ Yehowa.”
8 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mowaabʋ+ nɛ Seyiri+ pɔyɔɔdaa se: ‘Ɩna! Yuuda ɖɩɣa wɛ ɛzɩ ajɛɛ lɛɛna tɩŋa yɔ;’
9 pʋyɔɔ lɛ, monkuluu Mowaabʋ hɔɔlʋʋ* nakʋyʋ yɔɔ nɛ meyele, hɔɔlʋʋ ŋgʋ kɩwɛnɩ kɩ-kamaɣ yɔɔ tɛtʋ yɔɔ kiŋ yɔ, kɩ-ɛjaɖɛ keɖeɣa,* Bɛtɩ-Yesimotɩ, Baalɩ-Meyɔɔnɩ nɛ piwolo pɩtalɩ Kiriyatayim.+
10 Mankaɣ kpaɣʋ kɩ nɛ Amooni mba nɛ mɛncɛlɩ Wɩsɩ Ðɩlɩyɛ taa mba+ nɛ papɩsɩ pa-pʋyʋ, nɛ paakaɣ tasʋʋ tɔzʋʋ Amooni mba yɔɔ ajɛɛ taa.+
11 Nɛ mankaɣ hʋʋ tɔm Mowaabʋ taa,+ nɛ toovenim taa lɛ pakaɣ tɩlʋʋ se ma lɛ Yehowa.”
12 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Edom kpa Yuuda ɖɩɣa kɩmɩyɛ nɛ kɩɖɔɔ wɛɛ siŋŋ mbʋ pʋyɔɔ yɔ kɩkpa-wɛ kɩmɩyɛ;+
13 pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ ɖɔɖɔ sezuu me-nesi Edom yɔɔ nɛ manɖɩzɩ kɩ-taa ɛyaa nɛ kpɩna, nɛ mankaɣ labʋ nɛ kɩpɩsɩ njɛyɛ.+ Pakaɣ-wɛ kʋʋ nɛ laɣɖɛ kpaɣnɩ Temaanɩ nɛ piwolo Dedaanɩ.+
14 “Mankaɣ tɩŋnʋʋ man-samaɣ Izrayɛɛlɩ nesi yɔɔ nɛ mankpa kɩmɩyɛ Edom.+ Kakaɣ kɔnʋʋ man-pana nɛ mɔ-hɔpɩsɩyɛ Edom yɔɔ, nɛ Edom mba tɩlɩ mbʋ man-kɩmɩyɛ kpaʋ kɛnaa yɔ,”+ Kɩbaɣlʋ Kɩlɩm Yehowa yɔɔdʋʋna.’”
15 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Paɖɩyɛ kaahɛzaɣ yɔɔ lɛ, Filistii mba ɖʋ lɩmaɣza kɩdɛkɛda pa-ñʋŋ taa nɛ pañɩnɩ se pakpa kɩmɩyɛ nɛ paɖɩzɩ.+
16 Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩna! Menseziɣ me-nesi Filistii mba yɔɔ,+ mankaɣ ɖɩzʋʋ Kereti mba+ nɛ mankaɣ ɖɩzʋʋ ɖɔɖɔ teŋgu nɔɔ ñɩma mba pɩkazaa yɔ.+
17 Mankaɣ hɔm pa-nɩŋgbaŋʋʋ nɛ pana sɔsɔna nɛ mankpanɩ-wɛ kɩmɩyɛ sɔsɔɖɛ, nɛ toovenim taa lɛ pakaɣ tɩlʋʋ se ma lɛ Yehowa, alɩwaatʋ ndʋ mankpaɣ-wɛ kɩmɩyɛ yɔ.’”»
Pɩ-tɛɛ tɔm
^ Yaa «lona wena pɔcɔzɩ-yɛ kolonzi yɔ.»
^ Yaa «mɩ-kalɩzasɩ mɛyɩnɩ.»
^ Yaa «ajana wondu.»
^ Yaa «kajalaŋa.»
