Ejipiti Lɩʋ 7:1-25
7 Nɛ Yehowa heyi Moyizi se: «Na, malaba nɛ ŋwɛɛ ɛzɩ Ɛsɔ yɔ* Farawɔɔ cɔlɔ, nɛ ña-maɣmaɣ ña-ɖalʋ Aarɔɔnɩ kaɣ kɛʋ ña-nayʋ.+
2 Pɩwɛɛ se ŋɖaɣnɩ yɔɔdʋʋ tɔm ndʋ payɩ mankaɣ-ŋ heyuu yɔ, nɛ ña-ɖalʋ Aarɔɔnɩ kaɣ yɔɔdɩnʋʋ Farawɔɔ, nɛ ɛlɛ kaɣ yebu Izrayɛɛlɩ mba nɛ palɩɩ ɛ-ɛjaɖɛ taa nɛ pɛɖɛɛ.
3 Ma lɛ, mankaɣ yebu nɛ Farawɔɔ laŋɩyɛ sʋʋ kpɩzɩŋ,+ nɛ mankaɣ labʋ yʋsasɩ nɛ maamaaci lakasɩ sakɩyɛ Ejipiti ɛjaɖɛ taa.+
4 Ɛlɛ Farawɔɔ ɛɛkaɣ-mɩ welisinuu, nɛ mankaɣ me-nesi kpazʋʋ Ejipiti ɛjaɖɛ yɔɔ nɛ mahʋʋ tɔm siŋŋ nɛ malɩzɩ mɛ-ɛyaa sakɩyɛ,* man-samaɣ Izrayɛɛlɩ ñɩma, Ejipiti ɛjaɖɛ taa.+
5 Nɛ pɩtʋʋ fɛyɩ se Ejipiti mba kaɣ tɩlʋʋ se ma lɛ Yehowa+ alɩwaatʋ ndʋ monposuu me-nesi Ejipiti yɔɔ nɛ malɩzɩ Izrayɛɛlɩ mba pɛ-hɛkʋ taa yɔ.»
6 Moyizi nɛ Aarɔɔnɩ palabɩ mbʋ Yehowa kaapɔzɩ-wɛ yɔ; mbʋ ɖeyi ɖeyi palaba.
7 Moyizi kaawɛnɩ pɩnzɩ 80 nɛ Aarɔɔnɩ ñɛwɛɛnɩ pɩnzɩ 83 alɩwaatʋ ndʋ pɔyɔɔdɩnɩ Farawɔɔ yɔ.+
8 Nɛ Yehowa heyi Moyizi nɛ Aarɔɔnɩ se:
9 «Ye Farawɔɔ eheyi-mɩ se: “Ɩla maamaaci nakʋyʋ” lɛ, heyi Aarɔɔnɩ se: “Kpaɣ ña-ɖaʋ nɛ ŋpɛɖɩ-kʋ Farawɔɔ ɛsɩndaa.” Kɩkaɣ pɩsʋʋ ɖʋm sɔsɔ.»+
10 Nɛ Moyizi nɛ Aarɔɔnɩ powolo Farawɔɔ cɔlɔ nɛ pala mbʋ ɖeyi ɖeyi Yehowa heyi-wɛ yɔ. Aarɔɔnɩ pɛɖɩ ɛ-ɖaʋ Farawɔɔ nɛ ɛ-lɩmɖʋyaa pɛ-ɛsɩndaa, nɛ kɩpɩsɩ ɖʋm sɔsɔ.
11 Ɛlɛ Farawɔɔ yaa lɔŋsɩnɖaa nɛ tɩyaa; nɛ Ejipiti cɔjɔnaa mba pɛkɛ maajiki laɖaa yɔ+ patɩŋnɩ maajiki* yɔɔ nɛ pala ɖɔɖɔ mbʋ.+
12 Paa weyi ɛpɛɖɩ ɛ-ɖaʋ, nɛ ɖaŋ ɛnɩ ɩpɩsɩ ɖʋmaa sɔsaa; ɛlɛ Aarɔɔnɩ ɖaʋ li pa-ɖaŋ.
13 Paa mbʋ yɔ, Farawɔɔ laŋɩyɛ sʋ kpɩzɩŋ+ nɛ etiwelisini-wɛ, ɛzɩ Yehowa kaayɔɔdʋʋ yɔ.
14 Peeɖe Yehowa heyi Moyizi se: «Farawɔɔ laŋɩyɛ sʋ kpɩzɩŋ.+ Ekizaa se eeyeki samaɣ nɛ kɛɖɛɛ.
15 Wolo Farawɔɔ cɔlɔ tanaŋ tɛɛ. Na! Eɖiɣni wobu lɩm cɔlɔ! Pɩwɛɛ se ŋsɩŋ Niili Pɔɔ nɔɔ nɛ ŋkatɩ-ɩ; ɖɔkɩ ɖaʋ ŋgʋ kɩɩpɩsɩ ɖʋm yɔ ñe-nesi taa.+
16 Nɛ pɩwɛɛ se ŋheyi-i se: “Ebree mba tɛ Ɛsɔ Yehowa tiyi-m ñɔ-cɔlɔ,+ nɛ ɛyɔɔdʋʋ se: ‘Yele man-samaɣ nɛ kɛɖɛɛ nɛ pɩsa nɛ kɛsɛ-m kañɩmbusuu taa,’ ɛlɛ ŋtɩña ɛ-nɔɔ taa tɔm halɩ nɛ sɔnɔ.
17 Tɔm tʋnɛ Yehowa yɔɔdʋʋ: ‘Pʋnɛ ŋkaɣ tɩlɩnʋʋ se ma lɛ Yehowa.+ Na, mankpakɩɣ ɖaʋ ŋgʋ kɩwɛ me-nesi taa yɔ nɛ mamabɩnɩ lɩm mbʋ pɩwɛ Niili Pɔɔ taa yɔ, nɛ pɩkaɣ pɩsʋʋ calɩm.
18 Nɛ kpakpasɩ nzɩ sɩwɛ Niili taa yɔ sɩkaɣ sɩbʋ, nɛ Niili kaɣ lɩʋ sɔŋ siŋŋ, nɛ pɩɩkaɣ sam se Ejipiti mba ɩñɔɔ Niili taa lɩm.’”»
19 Pʋwayɩ lɛ, Yehowa heyi Moyizi se: «Heyi Aarɔɔnɩ se: “Kpaɣ ña-ɖaʋ nɛ ŋposi ñe-nesi Ejipiti lɩm yɔɔ,+ kɩ-pɔsɩ yɔɔ, kɩ-lɔɔŋ* yɔɔ, kɩ-fɛɛŋ yɔɔ+ nɛ kɩ-lɩm lona kpeekpe yɔɔ nɛ pɩpɩsɩ calɩm.” Calɩm kaɣ wɛʋ Ejipiti ɛjaɖɛ kpeekpe taa, halɩ pɩkpɛndɩnɩ ɖasɩ ñanzɩ nɛ pɛɛ ñanzɩ taa.»
20 Kpaagbaa mbʋ lɛ, Moyizi nɛ Aarɔɔnɩ pala ɖeyi ɖeyi ɛzɩ Yehowa kaaheyuu-wɛ yɔ. Aarɔɔnɩ kʋsɩ ɖaʋ nɛ ɛma lɩm mbʋ pɩɩwɛ Niili Pɔɔ taa yɔ, Farawɔɔ nɛ ɛ-lɩmɖʋyaa pɛ-ɛsɩndaa, nɛ lɩm mbʋ pɩɩwɛ pɔɔ taa yɔ pɩtɩŋa pɩpɩsɩ calɩm.+
21 Nɛ kpakpasɩ nzɩ sɩɩwɛ pɔɔ taa yɔ sɩsɩ,+ nɛ pɔɔ paɣzɩ lɩʋ sɔŋ siŋŋ nɛ Ejipiti ñɩma taapɩzɩɣ se pɔñɔɔ Niili taa lɩm,+ nɛ calɩm kaawɛ Ejipiti ɛjaɖɛ kpeekpe taa.
22 Paa mbʋ yɔ, Ejipiti cɔjɔnaa mba pɛkɛ maajiki laɖaa yɔ patɩŋnɩ pɛ-mɛsaɣ tɛɛ ɖoŋ yɔɔ nɛ pala mbʋ ɖɔɖɔ;+ piyeba nɛ Farawɔɔ laŋɩyɛ wɛɛ nɛ ɖɩtɛzɩɣ sʋʋ kpɩzɩŋ nɛ etiwelisini-wɛ, ɛzɩ Yehowa kaayɔɔdʋʋ yɔ.+
23 Nɛ Farawɔɔ pɩsɩ ɛ-tɛ, nɛ ɛtɩkpaɣ mbʋ pɩlaba yɔ nɛ ɛlabɩnɩ tʋmɩyɛ.
24 Pʋyɔɔ lɛ, Ejipiti mba tɩŋa huyaɣ pɔŋ Niili cɔlɔ kpɛɛɛ se pehiɣ lɩm nɛ pɔñɔɔ, mbʋ pʋyɔɔ yɔ pataapɩzɩɣ se pɔñɔɔ Niili taa lɩm.
25 Nɛ kɩyakɩŋ 7 ɖɛɛ, kpaɣnɩ alɩwaatʋ ndʋ Yehowa mabɩ Niili yɔ.
Pɩ-tɛɛ tɔm
^ Piye piye, «Na, manpɩsɩ-ŋ Ɛsɔ.»
^ Piye piye, «mɔn-sɔɔjanaa.»
^ Yaa «maajiki ɖoŋ.»
^ Pʋ-tɔbʋʋ se lɔɔŋ weyi ɩlɩnɩ Niili taa yɔ.
