Ejipiti Lɩʋ 36:1-38
36 «Bezaalɛɛlɩ nɛ Oholiyaabɩ pakaɣnɩ labʋ tʋmɩyɛ nɖɩ, pa nɛ abalaa mba payɩ pɛwɛ niye yɔ,* mba Yehowa ha-wɛ lɔŋsɩnɖɛ nɛ tɔm taa nɩʋ lɛɣtʋ se patɩlɩ ɛzɩma pala tʋmɩyɛ kiɖeɖeye ɖeyi ɖeyi ɛzɩ Yehowa pɔzʋʋ yɔ.»+
2 Nɛ Moyizi yaa Bezaalɛɛlɩ nɛ Oholiyaabɩ nɛ abalaa mba payɩ pɛwɛ niye nɛ Yehowa ɖʋ pa-laŋa taa lɔŋsɩnɖɛ yɔ,+ mba payɩ pa-laŋa seɣtaɣ-wɛ se paha pa-tɩ nɛ pala tʋmɩyɛ yɔ.+
3 Nɛ pamʋ Moyizi cɔlɔ haɖɛ+ nɖɩ payɩ Izrayɛɛlɩ mba kɔnaa se palabɩnɩ tʋmɩyɛ kiɖeɖeye yɔ. Ɛlɛ, Izrayɛɛlɩ mba wɛɛ nɛ pɔkɔŋnɩ-ɩ sɔɔlɩm faaa haɖɛ, paa tanaŋ ŋgʋ.
4 Pʋwayɩ papaɣzɩ tʋmɩyɛ kiɖeɖeye labʋ lɛ, tʋmlaɖaa mba payɩ pɛwɛ niye yɔ pɛwɛɛ nɛ pɔkɔŋ kʋɖʋm kʋɖʋm,
5 nɛ pɛwɛɛ peheyiɣ Moyizi se: «Samaɣ wɛɛ nɛ kɔkɔŋnɩ mbʋ yɔ, pɩɖɔwa nɛ pɩcɛzɩ mbʋ pɩpɔzaa se pakpaɣ nɛ palabɩnɩ tʋmɩyɛ nɖɩ Yehowa pɔzaa se pala yɔ.»
6 Peeɖe Moyizi pɔzaa se posusi ɖigbeɣliye* kpeekpe taa se: «Abalaa nɛ halaa, ɩtaatasɩ kɔnʋʋ wondu natʋyʋ se ɩhaɣ haɖɛ kiɖeɖeye.» Nɛ mbʋ pɩlaba nɛ pekizini samaɣ se kataatasɩ wondu natʋyʋ kɔnʋʋ.
7 Wondu ndʋ, tɩɩɖɔwa se pakpaɣ nɛ palabɩnɩ tʋmɩyɛ nɖɩ pɩɩwɛɛ se pala yɔ ɖɩ-tɩŋa, nɛ halɩ tɩɩɖɔwa nɛ pɩcɛzɩ mbʋ pɩpɔzʋʋ yɔ.
8 Nɛ tʋmlaɖaa mba payɩ pɛwɛ niye yɔ,+ pala Ɛsɔ sɛtʋ kɩɖanɖʋʋ;+ palabɩ-kʋ nɛ kizinziku pɩsaŋ 10 weyi palabɩnɩ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ; ɛkpaɣ* pɩsatʋ nɛ ɛlɩzɩnɩ kerebimwaa ɩ-yɔɔ.+
9 Paa kizinziku pɩsaʋ ŋgʋ lɛ, kɩ-ɖaɣlɩkɩŋ kaakɛ nuŋgolonzi* 28 nɛ kɩ-walanzɩ ñɛkɛ nuŋgolonzi 4. Kizinziku pɩsaŋ tɩŋa kaawɛ kɩmaŋ.
10 Pʋwayɩ lɛ, ɛkpaɣ kizinziku pɩsaŋ 5 nɛ ɛsɔ ɖama nɔsɩ taa, nɛ ɛkpaɣ kizinziku pɩsaŋ 5 lɛɛŋ nɛ ɛsɔ ɖɔɖɔ ɖama nɔsɩ taa.
11 Pʋwayɩ lɛ, ɛkpaɣ pɩsatʋ ndʋ tɩwɛ pʋlɔɔ yɔ nɛ ɛlabɩnɩ nimee wena pokoti-yɛ ɛzɩ kokoo yɔ kizinziku pɩsaʋ sɔsɔʋ nɔɔ yɔɔ, ɖenɖe kɩ nɛ lɛɛkʋ pakaɣ ɖama katʋʋ yɔ. Ɛla mbʋ ɖɔɖɔ kizinziku pɩsaʋ sɔsɔʋ lɛɛkʋ nɔɔ yɔɔ, ɖenɖe kɩ nɛ lɛɛkʋ pakaɣ ɖama katʋʋ yɔ.
12 Ɛlabɩ nimee 50 wena pokoti-yɛ ɛzɩ kokoo yɔ kizinziku pɩsaʋ kʋɖʋmʋʋ yɔɔ nɛ nimee 50 wena pokoti-yɛ ɛzɩ kokoo yɔ kizinziku pɩsaʋ lɛɛkʋ nɔɔ yɔɔ, ɖenɖe kɩkatɩɣ lɛɛkʋ yɔ, se pɩsa nɛ nimee ana aha ɖama nɛ ɛsa.
13 Kɛdɛzaɣ ɖeɖe lɛ, ɛkpaɣ sika nɛ ɛlabɩnɩ kpasɩ 50 nɛ ɛkpaɣ kpasɩ nzɩ nɛ ɛtamsɩnɩ kizinziku pɩsaŋ, piyele nɛ Ɛsɔ sɛtʋ kɩɖanɖʋʋ pɩsɩ pʋyʋ kʋɖʋm.
14 Nɛ ɛkpaɣ pʋnʋ hʋndʋ nɛ ɛlabɩnɩ pɩsaŋ weyi pohuuzuuni Ɛsɔ sɛtʋ kɩɖanɖʋʋ yɔɔ yɔ. Ɛlabɩ kizinziku pɩsaŋ 11.+
15 Paa kizinziku pɩsaʋ ŋgʋ lɛ, kɩ-ɖaɣlɩkɩŋ kaakɛ nuŋgolonzi 30 nɛ kɩ-walanzɩ ñɛkɛ nuŋgolonzi 4. Kizinziku pɩsaŋ 11 ɛnɩ ɩ-tɩŋa ɩɩwɛ kɩmaŋ.
16 Pʋwayɩ lɛ, ɛkpaɣ kizinziku pɩsaŋ 5 nɛ ɛsɔ ɖama nɔsɩ taa, nɛ ɛkpaɣ kizinziku pɩsaŋ 6 lɛɛŋ nɛ ɛsɔ ɖɔɖɔ ɖama nɔsɩ taa.
17 Pʋbʋ wayɩ lɛ, ɛla nimee 50 wena pokoti-yɛ ɛzɩ kokoo yɔ kizinziku pɩsaʋ sɔsɔʋ hɔɔlʋʋ kʋɖʋmʋʋ yɔɔ, ɖenɖe kɩkatɩɣ lɛɛkʋ yɔ, nɛ ɛla ɖɔɖɔ nimee 50 wena pokoti-yɛ ɛzɩ kokoo yɔ kizinziku pɩsaʋ lɛɛkʋ nɔɔ yɔɔ, ɖenɖe kɩkatɩɣ lɛɛkʋ yɔ.
18 Nɛ ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ kpasɩ 50 se ɛkpaɣ-sɩ nɛ ɛtamsɩnɩ kizinziku pɩsaŋ se pɩpɩsɩ pʋyʋ kʋɖʋm.
19 Ɛkpaɣ ɛyaŋ tɔna wena pata-yɛ tɔlɩm kɩsɛɛmɩm cɩɩɩ yɔ nɛ ɛlabɩnɩ kizinziku yɔɔ kuhuuzuu nɛ ɛkpaɣ ɖɔɖɔ kpɩnɛ nɖɩ payaɣ se fɔɔkɩ yɔ ɖɩ-tɔnɛ nɛ ɛlabɩnɩ kuhuuzuu se patɩnɩ pɩ-yɔɔ.+
20 Pʋwayɩ lɛ, ɛkpaɣ akasɩya ɖaŋ+ nɛ ɛlabɩnɩ Ɛsɔ sɛtʋ kɩɖanɖʋʋ tɛ kpoŋgbolonaa* mba pasɩŋ yiɣ yiɣ yɔ.+
21 Paa kpoŋgbolo* ŋgʋ lɛ, kɩ-kʋkʋyɩŋ kɛ nuŋgolonzi 10 nɛ kɩ-walanzɩ kɛ nuŋgoloŋa kʋɖʋmaɣ nɛ hɔɔlʋʋ.
22 Paa kpoŋgbolo ŋgʋ lɛ, kɩwɛnɩ nɩŋgbanzɩ* 2 nzɩ sɩwɛ ɖama yɔɔ yɔ. Mbʋ ɛlabɩ Ɛsɔ sɛtʋ kɩɖanɖʋʋ tɛ kpoŋgbolonaa tɩŋa.
23 Ɛlabɩ kpoŋgbolonaa Ɛsɔ sɛtʋ kɩɖanɖʋʋ hadɛ kiŋ hɔɔlʋʋ yɔɔ, pɛkpɛndɩ kpoŋgbolonaa 20, paha ɛsa nɛ hadɛ kiŋ.
24 Pʋwayɩ lɛ, ɛkpaɣ liidiye ñɩɣtʋ nɛ ɛlabɩnɩ ɖɩdɩnɩyɛ lona 40, wena a-taa pakaɣ tɩnʋʋ kpoŋgbolonaa 20 waa mba yɔ: ɖɩdɩnɩyɛ lona 2 kpoŋgbolo kʋɖʋmʋʋ tɛɛ se kɩ-nɩŋgbanzɩ 2 nzɩ sɩsʋʋ pɩ-taa, nɛ ɖɩdɩnɩyɛ lona 2 paa kpoŋgbolo ŋgʋ kɩtɩŋɩɣ pʋwayɩ yɔ kɩ-tɛɛ se kɩ-nɩŋgbanzɩ 2 ɩsʋʋ pɩ-taa.+
25 Ɛsɔ sɛtʋ kɩɖanɖʋʋ hɔɔlʋʋ lɛɛkʋ yɔɔ, hayo kiŋ hɔɔlʋʋ yɔɔ lɛ, ɛlabɩ kpoŋgbolonaa 20
26 nɛ pa-ɖɩdɩnɩyɛ lona 40 wena palabɩnɩ liidiye ñɩɣtʋ yɔ: ɖɩdɩnɩyɛ lona 2 kpoŋgbolo kʋɖʋmʋʋ tɛɛ, nɛ ɖɩdɩnɩyɛ lona 2 paa kpoŋgbolo lɛɛkʋ ŋgʋ lɛ kɩ-tɛɛ.
27 Ɛsɔ sɛtʋ kɩɖanɖʋʋ wayɩ hɔɔlʋʋ, wɩsɩ ɖɩɖʋyɛ hɔɔlʋʋ taa lɛ, ɛlabɩ kpoŋgbolonaa 6.+
28 Ɛlabɩ kpoŋgbolonaa 2 nɛ pɛkɛ Ɛsɔ sɛtʋ kɩɖanɖʋʋ kɔna taa tilima, wayɩ kɔnanaa 2 mba pa-taa.
29 Tilima ana pakpɩtɩ-yɛ 2 kpaɣnɩ pɩ-tɛɛ nɛ pɩkpa hayo, piwolo pɩsɩɩnɩ kajalaɣ kokooye. Mbʋ ɛlabɩ kɔna taa tilima ana a-naalɛ.
30 Nɛ pɩɩkpɛndɩ kpoŋgbolonaa 8 nɛ pa-ɖɩdɩnɩyɛ lona 16 wena palabɩnɩ liidiye ñɩɣtʋ yɔ: ɖɩdɩnɩyɛ lona 2 paa kpoŋgbolo ŋgʋ lɛ kɩ-tɛɛ.
31 Pʋwayɩ lɛ, ɛkpaɣ akasɩya tɩʋ nɛ ɛlabɩnɩ ɖaŋ sɔsɔŋ. Ɛsɔ sɛtʋ kɩɖanɖʋʋ hɔɔlʋʋ kʋɖʋmʋʋ yɔɔ lɛ, ɛɖʋ ɖaŋ sɔsɔŋ 5 se ɩɖɔkɩ kpoŋgbolonaa+
32 nɛ ɛɖʋ ɖaŋ sɔsɔŋ 5 Ɛsɔ sɛtʋ kɩɖanɖʋʋ hɔɔlʋʋ lɛɛkʋ yɔɔ se ɩɖɔkɩ kpoŋgbolonaa mba pɛwɛ peeɖe yɔ, nɛ ɛɖʋ ɖaŋ sɔsɔŋ 5 kpoŋgbolonaa mba pɛwɛ Ɛsɔ sɛtʋ kɩɖanɖʋʋ wɩsɩ ɖɩɖʋyɛ hɔɔlʋʋ taa yɔ, hɔɔlʋʋ ŋgʋ kɩwɛnɩ wayɩ yɔ.
33 Ɛlabɩ hɛkʋ taa ɖaʋ sɔsɔʋ ŋgʋ kɩtɩŋɩɣnɩ kpoŋgbolonaa hɛkʋ taa yɔ, kpaɣnɩ tɩnaɣ yɔɔ nɛ piwolo tɩnaɣ lɛɛka yɔɔ.
34 Ɛkpaɣ sika nɛ ɛtaa kpoŋgbolonaa yɔɔ, nɛ ɛkpaɣ sika nɛ ɛlabɩnɩ po-kokoo wena aɖɔkʋʋ ɖaŋ sɔsɔŋ yɔ, nɛ ɛkpaɣ sika nɛ ɛtaa ɖaŋ sɔsɔŋ ɛnɩ ɩ-yɔɔ.+
35 Pʋwayɩ lɛ, ɛkpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ nɛ pɩsaŋ weyi ɩwɛ fɛlɛ fɛlɛ yɔ nɛ ɛlabɩnɩ pɩsaʋ kikenduu.+ Ɛkpaɣ pɩsatʋ nɛ ɛlɩzɩnɩ+ kerebimwaa+ kɩ-yɔɔ.
36 Pʋwayɩ lɛ, ɛla akasɩya tɩʋ tilima naanza nɛ ɛtaa a-yɔɔ sika, pɩkpɛndɩnɩ sika kokoo wena a-nɔsɩ howa yɔ, nɛ ɛkpaɣ liidiye ñɩɣtʋ nɛ ɛla a-ɖɩdɩnɩyɛ lona naanza.
37 Pʋbʋ wayɩ lɛ, ɛkpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ nɛ pɩsaŋ weyi ɩwɛ fɛlɛ fɛlɛ, weyi pɛkpɛndaa nɛ palʋʋ yɔ nɛ ɛlabɩnɩ pɩsaʋ kikenduu nakʋyʋ kizinziku ɖɩzʋyɛ nɔnɔɔ yɔɔ,+
38 ɛla ɖɔɖɔ ki-tilima 5 nɛ a-kokoo wena a-nɔsɩ howa yɔ. Ɛtaa sika a-ñʋʋ yɔɔ nɛ mbʋ pataŋnɩ-yɛ yɔ* pɩ-yɔɔ, ɛlɛ ɛlabɩ a-ɖɩdɩnɩyɛ lona 5 nɛ ñɩɣyʋʋ kɩsɛɛmʋʋ.
Pɩ-tɛɛ tɔm
^ Piye piye, «abalaa mba pɛwɛnɩ laŋɩyɛ nɖɩ ɖɩwɛ lɔŋ yɔ.»
^ Yaa «maalika.»
^ Pɩtʋʋ fɛyɩ se pɩkɛ Bɛtɩsaalɛɛlɩ.
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
^ Yaa «ɖasɩ nzɩ sɩtʋʋzaa yɔ.»
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
