Ejipiti Lɩʋ 34:1-35
34 Nɛ Yehowa heyi Moyizi se: «Saɣ ña-tɩ pɩtaahalanzɩ 2 nɛ sɩwɛɛ ɛzɩ kajalaɣ ñɩnzɩ yɔ,+ nɛ mankaɣ maʋ pɩtaahalanzɩ nzɩ sɩ-yɔɔ tɔm ndʋ tɩɩwɛ kajalaɣ pɩtaahalanzɩ yɔɔ yɔ,+ nzɩ ŋyɔkaa yɔ.+
2 Ñɔɔzɩ ña-tɩ nɛ ŋɖaŋ cee tanaŋ tɛɛ, mbʋ pʋyɔɔ yɔ cee tanaŋ tɛɛ ŋkaɣ kpaʋ Sinayii Pʋʋ yɔɔ nɛ ŋsɩŋ mɛ-ɛsɩndaa pʋʋ ñʋʋ taa peeɖe.+
3 Ɛlɛ nɔɔyʋ ɛtaatɩŋɩ-ŋ nɛ ɛkpa, nɛ pɩfɛyɩ se pana ɛyʋ nɔɔyʋ ɖoli pʋʋ yɔɔ. Halɩ pɩkpɛndɩnɩ heŋ yaa naŋ, pɩtɩpɔzɩ se ɩtɔɔ ñɩtʋ pʋʋ ŋgʋ kɩ-ɛsɩndaa.»+
4 Nɛ Moyizi saɣ pɩtaahalanzɩ 2 ɛzɩ kajalaɣ ñɩnzɩ yɔ nɛ ɛkʋyɩ tanaŋ tɛɛ lɔŋ nɛ ɛkpa Sinayii Pʋʋ yɔɔ, ɛzɩ Yehowa kaapɔzʋʋ-ɩ se ɛla yɔ, nɛ ɛkpaɣ pɩtaahalanzɩ nzɩ sɩ-naalɛ e-nesi taa.
5 Peeɖe Yehowa tibi+ ɛsɔmɩnʋʋ taa nɛ ɛsɩŋ ɛ-cɔlɔ peeɖe nɛ esusuu Yehowa hɩɖɛ.+
6 Yehowa ɖɛɣaɣ ɛ-ɛsɩndaa nɛ esusuu se: «Yehowa, Yehowa, Ɛsɔ weyi ɛnaɣ ɛyaa pʋtɔdɩyɛ+ nɛ ɛnɩɣ ɛyaa wɩzasɩ* yɔ,+ weyi ɛɛkɔʋ pana lɛɛ lɛɛ,+ nɛ weyi ɛ-sɔɔlɩm siɣsiɣ ñɩmbʋ*+ nɛ e-toovenim*+ ɖɔ pɩdɩɩfɛyɩ yɔ,
7 ɛwɩlɩɣ ɛ-sɔɔlɩm siɣsiɣ ñɩmbʋ ɛyaa kudokiŋ,+ ekpeɣu weyi picoɖi-i yɔ, nɛ ekpeɣu ɖɔɖɔ paɣtʋ yɔɔ maʋ nɛ kɩwɛɛkɩm;+ ɛlɛ ɛɛkaɣ yebu weyi ɛmʋnɩ nɩŋgbaŋʋʋ hɔm yɔ ɛ-nɩŋgbaŋʋʋ hɔm kaaʋ,+ nɛ ɛkɔŋnɩ caanaa kɩwɛɛkɩm tɛ nɩŋgbaŋʋʋ hɔm pɩyalaa nɛ sayɩnaa yɔɔ, kpaɖʋʋ 3 ñɩŋgʋ nɛ 4 ñɩŋgʋ yɔɔ.»+
8 Kpaagbaa mbʋ lɛ, Moyizi luŋ tataa nɛ ɛpa ɛ-ɛsa nɛ tɛtʋ.
9 Nɛ ɛyɔɔdɩ se: «Lɛɛlɛɛyɔ, ye mɔn-tɔm ɛkɛdɩnɩ-ŋ yɔ, Oo Yehowa, mentendi-ŋ Yehowa, wɛɛ ɖɛ-hɛkʋ taa nɛ ɖa nɛ ŋ ɖiwolo,+ paa ɖɩkɛ samaɣ ŋga ka-ñʋʋ taa wɛ ɖoŋ* yɔ,+ nɛ ŋkpeɣ-ɖʋ ɖa-kɩdɛkɛdɩm nɛ ɖa-kɩwɛɛkɩm,+ nɛ ŋkpaɣ-ɖʋ ɛzɩ ña-maɣmaɣ ña-pʋyʋ yɔ.»
10 Nɛ ecosi-i se: «Na, manɖʋʋ ɛgbɛyɛ naɖɩyɛ: Mankaɣ labʋ piti lakasɩ nzɩ patɩlabɩtɩ-sɩ wiɖiyi tɛtʋ kpeekpe yɔɔ yaa ajɛɛ kpeekpe taa yɔ ña-samaɣ kpeekpe ɛsɩndaa,+ nɛ ɛyaa samasɩ kpeekpe nzɩ sɩ-hɛkʋ taa ɩwɛɛ yɔ sɩkaɣ naʋ Yehowa tʋma, mbʋ pʋyɔɔ yɔ lakasɩ nzɩ sɩwɛ piti yɔ, nzɩ mankaɣ labʋ mɩ-hɛkʋ taa.+
11 «Ɩɖɔkɩ paɣtʋ ndʋ manɖʋʋ-mɩ sɔnɔ yɔ kpam.+ Ɩna, menɖiɣni ɖɔɔnʋʋ mɩ-ɛsɩndaa Amoori mba, Kanaŋ mba, Hɛɛtɩ mba, Perizi mba, Hivi mba nɛ Yebuusi mba.+
12 Ɩkpa mɩ-tɩ nɛ ɩtaaɖʋ ɛgbɛyɛ naɖɩyɛ nɛ ajɛɛ wena a-taa iɖiɣni wobu yɔ a-taa ñɩma,+ pɩtɩkɛ mbʋ yɔ pɩpɩzɩɣ nɛ pɩkɛ kpaca mɩ-hɛkʋ taa.+
13 Ɛlɛ pɩwɛɛ se ituzi pa-altaarunaa nɛ ɩpɛɖɩ, pɩwɛɛ se ɩyɔkɩ pe-tilima kiɖeɖena, nɛ ɩsɛtɩ pe-sizikasɩ kiɖeɖesi* nɛ ɩpɛɖɩ.+
14 Pɩtɩpɔzɩ se ŋluŋ ɛsɔ lɛlʋ nɔɔyʋ tɛɛ,+ mbʋ pʋyɔɔ yɔ pasɩm Yehowa se ɛkɛ* weyi ɛñɩnɩɣ se pɔñɔɔnɩ e-ɖeke koŋ yɔ. Ɛɛɛ, ɛkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ* yɔ.+
15 Kpa ña-tɩ nɛ ŋtaaɖʋ ɛgbɛyɛ nɛ ɛjaɖɛ nɖɩ ɖɩ-taa mba, mbʋ pʋyɔɔ yɔ alɩwaatʋ ndʋ pa nɛ pɛ-ɛsɔnaa palakɩ hayitu nɛ palaɣ pɛ-ɛsɔnaa kɩlaŋ yɔ,+ nɔɔyʋ kaɣ-ŋ yaʋ nɛ ŋkaɣ tɔɔʋ mbʋ ɛlawa yɔ.+
16 Nɛ pɩtʋʋ fɛyɩ se ŋkaɣ kpaɣʋ pɛ-pɛlaa taa nabɛyɛ nɛ ŋcɛlɩ ña-pɩyalaa,+ nɛ pɛ-pɛlaa kaɣ hayitu labʋ nɛ pɛ-ɛsɔnaa nɛ peyele nɛ mɩ-pɩyalaa la hayitu nɛ pɛ-ɛsɔnaa.+
17 «Pɩtɩpɔzɩ se ŋyolisi ñɩɣtʋ nɛ ŋlabɩnɩ ɛsɔnaa.+
18 «Pɩwɛɛ se ŋtɔɔ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ.+ Ŋkaɣ tɔɔʋ kpɔnɔ ŋgʋ kɩ-taa patɩɖʋ lɔlɔm yɔ, ɛzɩ manɖʋʋ-ŋ paɣtʋ yɔ; la mbʋ kɩyakɩŋ 7 alɩwaatʋ ndʋ paɖʋwa yɔ tɩ-yɔɔ Abiib* fenaɣ+ taa, mbʋ pʋyɔɔ yɔ Abiib fenaɣ taa ŋlɩ Ejipiti.
19 «Abalɩbiya kajalaɣ ñɩnzɩ nzɩ payɩ palʋlʋʋ yɔ* matɩnɩ-sɩ,+ pɩkpɛndɩnɩ ña-kpɩna kpeekpe, paa pɩtɩɩkɛ nɔ abalɩñɩnʋ kajalaɣ ñɩnʋ yaa heu abalɩñɩnʋ kajalaɣ ñɩnʋ yɔ.+
20 Pɩwɛɛ se ŋkpaɣ heu nɛ ŋlɛɣzɩnɩ kpaŋaɣ kajalaɣ pɩɣa lone taa. Ɛlɛ ye ŋŋlɛɣzɩɣ ko-lone taa yɔ, pʋbʋ lɛ, pɩwɛɛ se ŋyɔkɩ ke-nimaɣ. Pɩwɛɛ se paa ña-pɩyalaa taa kajalaɣ abalɩbɩɣa ŋga lɛ ŋhɛyɩ kɔ-yɔɔ.+ Nɔɔyʋ ɛtaakɔɔ mɛ-ɛsɩndaa nesi kpɛɖɛ.
21 «Kɩyakɩŋ 6 pɩwɛɛ se ŋla tʋmɩyɛ, ɛlɛ kɩyakʋ 7 ñɩŋgʋ wiye lɛ, pɩwɛɛ se ŋhɛzɩ.*+ Halɩ haɖaʋ alɩwaatʋ taa nɛ kʋmtʋ alɩwaatʋ taa, pɩwɛɛ se ŋhɛzɩ.
22 «Nɛ ŋkaɣ kpaɣʋ blee pee kajalaɣ ñɩna wena apɩwa nɛ ŋkʋm-yɛ yɔ nɛ ŋtɔɔnɩ ña-Kpɩtaŋ Kazandʋ, nɛ Kʋmtʋ Kazandʋ, nɛ Tɔɔnaɣ Kpeɣluu Kazandʋ,* pɩnaɣ sɩŋɩɣ lɛ.+
23 «Tam nabudozo pɩnaɣ taa lɛ, pɩwɛɛ se ña-abalaa kpeekpe iwolo Kɩbaɣlʋ toovenim tʋ Yehowa, Izrayɛɛlɩ tɛ Ɛsɔ ɛsɩndaa.+
24 Mbʋ pʋyɔɔ yɔ mankaɣ ɖɔɔnʋʋ ajɛɛ ñɛ-ɛsɩndaa,+ nɛ mankaɣ walɩsʋʋ ñɛ-tɛtʋ, nɛ nɔɔyʋ liu ɛɛkaɣ wɛʋ ñɛ-ɛjaɖɛ alɩwaatʋ ndʋ ŋkpaɣ se ŋna Yehowa ñɛ-Ɛsɔ ɛsɩndaa tam nabudozo pɩnaɣ taa yɔ.
25 «Pɩtɩpɔzɩ se ŋkpaɣ man-kɩlaʋ calɩm nɛ ŋkpɛndɩnɩ mbʋ pɩ-taa paɖʋ lɔlɔm yɔ nɛ ŋlaa.+ Nɛ kɩlaʋ ŋgʋ palaɣ Paska kazandʋ wiye yɔ, pɩtɩpɔzɩ se pasɩɩ-kʋ ɖoo tɩŋa nɛ pɩkɔɔ nɛ pɩñandɩ.+
26 «Kajalaɣ pee wena ñɛ-tɛtʋ lʋlʋʋ yɔ, pɩwɛɛ se ŋkɔnɩ a-taa wena akpaɖɩ ɖeu yɔ ñɛ-Ɛsɔ Yehowa ɖɩɣa taa.+
«Pɩfɛyɩ se ŋtɩzɩ mbeɣa ko-ɖoo hɩlɩm taa.»+
27 Yehowa wolo pɩ-yɔɔ nɛ eheyi Moyizi se: «Pɩwɛɛ se ŋma tɔm ndʋ,+ mbʋ pʋyɔɔ yɔ tɔm ndʋ tɩ-yɔɔ mantɩŋɩɣna se manɖʋ ɛgbɛyɛ ma nɛ ŋ nɛ Izrayɛɛlɩ ɖɛ-hɛkʋ taa.»+
28 Nɛ ɛcaɣ Yehowa cɔlɔ peeɖe kɩyakɩŋ 40 nɛ ɖoo 40. Ɛtɩtɔɔ tɔɔnaɣ nɛ ɛtɩñɔɔ lɩm.+ Nɛ ɛma* pɩtaahalanzɩ yɔɔ ɛgbɛyɛ nɖɩ ɖɩ-tɔm, Paɣtʋ Hiu.*+
29 Nɛ Moyizi kʋyɩnɩ Sinayii Pʋʋ yɔɔ nɛ etii, nɛ Aseɣɖe Lɩzʋʋ pɩtaahalanzɩ 2 wɛ e-nesi taa.+ Alɩwaatʋ ndʋ Moyizi lɩnɩ pʋʋ taa nɛ etii yɔ, etiɖiɣzina se ɛ-ɛsɩndaa tɔnʋʋ kaawɛɛ nɛ kɩñɩlɩsɩɣ mbʋ pʋyɔɔ yɔ ɛ nɛ Ɛsɔ paayɔɔdaa.
30 Alɩwaatʋ ndʋ Aarɔɔnɩ nɛ Izrayɛɛlɩ mba tɩŋa na Moyizi yɔ, peɖiɣzinaa se ɛ-ɛsɩndaa tɔnʋʋ wɛɛ nɛ kɩñɩlɩsɩɣ, nɛ sɔɔndʋ kpaɣaɣ-wɛ se pɔñɔtɩnɩ-ɩ.+
31 Ɛlɛ Moyizi yaa-wɛ. Peeɖe Aarɔɔnɩ nɛ samaɣ ñʋndɩnaa tɩŋa pɔkɔm ɛ-cɔlɔ, nɛ Moyizi yɔɔdɩnɩ-wɛ.
32 Pʋwayɩ lɛ, Izrayɛɛlɩ mba kpeekpe kɔɔ ɛ-cɔlɔ, nɛ eheyi-wɛ paɣtʋ ndʋ payɩ Yehowa kaacɛlɩ-ɩ Sinayii Pʋʋ taa yɔ.+
33 Moyizi tɛŋ-wɛ yɔɔdɩnʋʋ lɛ, ehuuzi kɛdɛɛka ɛ-ɛsɩndaa.+
34 Ɛlɛ Moyizi kaawoki Yehowa ɛsɩndaa se ɛyɔɔdɩnɩ-ɩ lɛ, ekuluu kɛdɛɛka nɛ pɩkɔɔ nɛ pɩsɩɩnɩ alɩwaatʋ ndʋ ɛlɩwa yɔ.+ Pʋwayɩ lɛ ɛlɩɩ nɛ eheyi Izrayɛɛlɩ mba paɣtʋ ndʋ ɛmʋwa yɔ.+
35 Nɛ Izrayɛɛlɩ mba naɣaɣ se Moyizi ɛsɩndaa tɔnʋʋ ñɩlɩsaɣ; nɛ Moyizi ɖaɣnaɣ huuzuu kɛdɛɛka ɛ-ɛsɩndaa nɛ pɩkɔɔ nɛ pɩsɩɩnɩ alɩwaatʋ ndʋ ɛtasɩɣ sʋʋ se ɛyɔɔdɩnɩ Ɛsɔ* yɔ.+
Pɩ-tɛɛ tɔm
^ Yaa «e-siɣsiɣ wɛtʋ.»
^ Yaa «ɛ-kɩbandʋ labʋ sɔɔlɩm.»
^ Yaa «nɛ ɛmaɣzɩɣ ɛyaa yɔɔ.»
^ Piye piye, «ke-liu wɛ canjanaa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «Yehowa, ɛ-hɩɖɛ kɛ.»
^ Yaa «weyi ɛtɩsɔɔlɩ se ɛwɛɛnɩ paɖanaa.»
^ Cɔnɩ Tɔm kɩsɔzɩtʋ B15.
^ Piye piye, «nzɩ payɩ sɩtʋlʋʋ halɩtʋ nɔɔ yɔ.»
^ Yaa «pɩwɛɛ se ŋɖɔ sabaatɩ paɣtʋ yɔɔ.»
^ Payaɣ-tʋ ɖɔɖɔ se Coka (Kizinzikiŋ) Kazandʋ.
^ Piye piye, «Tɔm Pee Hiu.»
^ Pɩtʋʋ fɛyɩ se Yehowa mana. Cɔnɩ kalɩtʋ 1.
^ Piye piye, «ɛyɔɔdɩnɩ-ɩ.»
